Abbaa fi haati Waaqayyoon sodaatan ijoolleen isaanii tajaajiltoota Yihowaa amanamoo taʼanii arguu barbaadu. Warri, ijoolleen isaanii akkana akka godhan gargaaruu kan dandaʼan, xinnummaa isaaniitii jalqabanii barumsa Kitaaba Qulqulluu isaan barsiisuudhaani. (Kes 6:7; Fak 22:6) Kana gochuun fedhii ofii aarsaa gochuu gaafataa? Eeyyee ni gaafata! Haa taʼu malee, buʼaan argattan carraaqqii gootan irra baayʼee kan caalu dha.—3Yoh 4.

Warri, Yoseefii fi Maariyaam irraa wanta baayʼee barachuu dandaʼu. Dadhabbii kan qabuu fi baasii kan isaan gaafatu taʼus, “waggaa waggaadhaan Ayyaana Faasikaa kabajuuf gara Yerusaalem deemuu amaleeffatanii turan.” (Luq 2:41) Wantoota hafuuraa maatii isaaniitiif barbaachisaniif dursa kennaa akka turan haala isaa irraa hubachuu ni dandeenya. Haaluma wal fakkaatuun yeroo harʼaattis, warri dubbii fi gocha isaaniitiin fakkeenya taʼuudhaan, akkasumas carraa argatan hundatti ijoollee isaanii barsiisuudhaan daandii isa sirrii irra akka deeman isaan gargaaruu dandaʼu.—Far 127:3-5.

VIIDIYOO CARRAA ARGATAN HUNDATTI FAYYADAMANIIRU JEDHAMU ERGA ILAALTANII BOODA GAAFFIIWWAN KANAA GADII DEEBISUUF YAALAA:

• Joonii fi Shaaran Shiilar ijoollee guddisaa, dhimmoota Mootummichaatiif dursa kan kennan akkamitti?

• Warri, ijoollee isaanii karaa garaa garaatiin barsiisuu, qajeelchuu fi sirreessuu kan qaban maaliifi?

• Ijoolleen qorumsa amantii isaan irra gaʼu mooʼuu akka dandaʼan warri isaanii isaan leenjisuu kan dandaʼan akkamitti?

• Ijoolleen keessan karaa hafuuraa guddina akka godhan isaan gargaaruuf, meeshaalee jaarmiyaan Yihowaa qopheesse kamfaatti fayyadamtaniittu?