Hojii Ergamootaa 3:1-26
3 Gaaf tokko Pheexirosii fi Yohaannis saʼaatii kadhannaatti, jechuunis saʼaatii sagalitti gara mana qulqullummaatti ol baʼaa turan;
2 namoonnis nama erga dhalatee jalqabee naafa ture tokko, namoota gara mana qulqullummaatti seenan akka kadhatuuf guyyuma guyyaadhaan baatanii fidanii balbala mana qulqullummaa isa Miidhagaa jedhamu dura kaaʼu turan.
3 Inni Pheexirosii fi Yohaannis gara mana qulqullummaatti yommuu seenuuf jedhan argee isaan kadhachuu jalqabe.
4 Pheexirosii fi Yohaannis garuu hubatanii isa ilaalan; achiis Pheexiros, “Nu ilaali” isaan jedhe.
5 Kanaafuu, inni waan isaan irraa argadha jedhee yaadee ija keessa isaan ilaale.
6 Pheexiros garuu, “Ani meetii fi warqii hin qabu; wantan qabu garuu siifan kenna. Maqaa Yesuus Kiristoos nama Naazireetiin kaʼiitii deemi!”+ jedhe.
7 Achiis harka isaa mirgaa qabee ol isa kaase.+ Yeruma sanas miilli isaa fi gulubiin* isaa ni jabaate;+
8 utaalee kaʼees miila isaatiin dhaabbate;+ achiis adeemaa, utaalaa fi Waaqayyoon galateeffachaa isaanii wajjin gara mana qulqullummaa seene.
9 Namoonni hundis yommuu inni deemuu fi Waaqayyoon galateeffatu argan.
10 Namni kun namicha karra mana qulqullummaa isa Karra Miidhagaa jedhamu dura taaʼee kadhachaa ture sana taʼuu isaa ni beekan;+ wanta isa irratti raawwatamettis baayʼee ajaaʼibsiifatan; amanuus hin dandeenye.
11 Namichi Pheexirosii fi Yohaannisiin qabatee utuu jiruu, namoonni hundi baayʼee waan dinqisiifataniif daandii Solomoon isa baaxii qabutti fiiganii gara isaanii dhufan.+
12 Pheexiros yommuu kana argu, namoota sanaan akkana jedhe: “Yaa namoota Israaʼel, maaliif akkanatti dinqisiifattu? Akka waan nuti humna keenyaan yookiin namoota Waaqayyoof bulle taʼuu keenyaan namichi kun akka adeemu goonetti maaliif fajajjanii nu ilaaltu?
13 Waaqni abbootii keenyaa, inni Waaqa Abrahaam, Waaqa Yisihaaqii fi Waaqa Yaaqoob taʼe,+ Tajaajilaan isaa Yesuus+ inni Philaaxos gadhiisuuf murteessee utuu jiruu, isin immoo dabarsitanii kennitanii+ fi Philaaxos duratti gantan sun ulfina akka argatu godhe.+
14 Isin nama qulqulluu fi qajeelaa sana gantanii, namichi inni nama ajjeese sun akka isiniif gadhiifamu gaafattan;+
15 Bakka Buʼaa jireenyaa Isa Guddaa garuu ni ajjeestan.+ Haa taʼu malee Waaqayyo duʼaa isa kaase; nutis kanaaf ragoota dha.+
16 Maqaan isaa fi amantiin nuti maqaa isaa irratti qabnu, namichi isin argitanii fi beektan kun jabaa akka taʼu godheera. Amantiin karaa isaa arganne, namichi kun hunda keessan duratti guutummaatti fayyaa akka taʼu godheera.
17 Yaa obbolootaa, isinis akkuma bulchitoonni keessan godhan+ utuu hin beekin kana akka gootan ani beeka.+
18 Waaqayyo garuu Kiristoos kun akka dhiphatu wantoota afaan raajota isaa hundumaatiin dursee beeksise karaa kanaan raawwateera.+
19 “Kanaafuu, cubbuun keessan akka isinii haqamuuf+ yaada geddaradhaa,+ deebiʼaas;+ Yihowaa biraa* yeroon haareffamuu isiniif ni dhufa;
20 inni, Kiristoos isa isiniif muudame, jechuunis Yesuusiin isiniif erga.
21 Innis hanga yeroon wanti hundi akka haareffamu Waaqayyo karaa afaan raajota isaa qulqulluu warra durii dubbate sun gaʼutti samii keessa turuu qaba.
22 Museen iyyuu akkana jedheera: ‘Waaqni keessan Yihowaan* obboloota keessan gidduudhaa raajii akka kootii isiniif ni kaasa.+ Wanta inni isinitti himu kam iyyuu dhagaʼuu qabdu.+
23 Namni* Raajii sana hin dhageenye kam iyyuu sabicha gidduudhaa ni balleeffama.’+
24 Raajonni Saamuʼelii jalqabee turanii fi warri isa booda kaʼan hundi waaʼee guyyoota kanaa ifatti labsaniiru.+
25 Isin ilmaan raajotaa fi ilmaan kakuu Waaqayyo abbootii keessanii wajjin gale sanaa ti;+ Waaqayyo Abrahaamiin, ‘Maatiiwwan lafa irraa hundi sanyii keetiin ni eebbifamu’ jedheera.+
26 Waaqayyo Tajaajilaa isaa erga kaasee booda, tokkoon tokkoon keessan hojii keessan isa hamaa irraa isin deebisee isin eebbisuuf jalqaba gara keessanitti isa ergeera.”+
Miiljaleewwan
^ Ykn., “koronyoo.”
^ Kal., “fuula Yihowaa duraa.” Kutaa Dabalataa A5 ilaali.
^ Kutaa Dabalataa A5 ilaali.
^ Ykn., “Lubbuun.”
