Iyyoob 22:1-30
22 Eliifaaz+ Temaanichi akkana jedhee deebise:
2 “Namni Waaqa fayyaduu dandaʼaa?
Namni hubannaa qabu isaaf buʼaa buusuu dandaʼaa?+
3 Inni Hundumaa Danda’u ati qajeelaa taʼuun kee isa yaaddessaa?*
Yookiin daandii amanamummaa hordofuu keetiin wanta argatu qabaa?+
4 Isa kabajuu keetiin kan kaʼe si adabaa?
Mana murtiitti hoo si dhiheessaa?
5 Kun kan taʼe hamminni kee baayʼee guddaa,Balleessaan kees dhuma kan hin qabne waan taʼeef mitii?+
6 Ati sababii malee obboloota kee irraa qabsiisa fudhatta,Namoota irraas uffata isaanii baastee qullaatti isaan hambista.*+
7 Isa dadhabeef bishaan dhugu hin kennitu,Isa beelaʼes nyaata dhowwatta.+
8 Biyyattiin kan nama humna qabeessa taʼee ti,+Inni ulfina qabeessa taʼes ishii keessa jiraata.
9 Ati garuu dubartoota abbaan manaa irraa duʼe harka duwwaa ariite,Irree ijoollee abbaa hin qabnees* ni caccabsite.
10 Kiyyoowwan* kan sitti marsan,+Naasuun tasaas kan si sodaachisu kanaafi;
11 Arguu akka hin dandeenyeef dukkana guddaa kan sitti taʼe,Lolaan bishaanii kan si uwwises kanaafi.
12 Waaqayyo ol gubbaa samii irra jira mitii?
Urjiileen hundi hammam ol fagaatanii akka jiranis ilaali.
13 Ati garuu akkana jette: ‘Waaqayyo dhugumaan maal beeka?
Duumessa gurraacha keessaan murtii kennuu ni dandaʼaa?
14 Yommuu inni geengoo samii irra deemu,Akka inni hin argineef duumessi isa golga.’
15 Daandii bara durii,Isa namoonni hamoon irra deeman ni hordoftaa?
16 Isaan umuriin isaanii utuu hin gaʼin butamanii fudhatamaniiru,*Hundeen isaaniis lolaadhaan* haxaaʼamee fudhatameera.+
17 Isaan Waaqa dhugaatiin, ‘Nu dhiisi!
Inni Hundumaa Dandaʼu maal nu gochuu dandaʼa?’ jedhu turan.
18 Haa taʼu malee, manneen isaanii wantoota gaggaariidhaan kan guute isa dha.
(Yaanni hamaan akkanaa ana irraa fagoo dha.)
19 Qajeelonni kana arganii gammadu,Warri qulqulluunis akkana jedhanii isaanitti qoosu:
20 ‘Warri nuun morkatan balleeffamaniiru,Ibiddis wanta isaan irraa hafe ni nyaata.’
21 Isa beeki, nagaa ni qabaatta;Achiis wantoota gaggaarii ni argatta.
22 Seera afaan isaa keessaa dhufu fudhadhu,Dubbii isaas garaa keetti qabadhu.+
23 Gara Isa Hundumaa Dandaʼuutti yoo deebite ni haaromta;+Dunkaana kee keessaa jalʼina yoo balleessite,
24 Warqii kee* biyyoo keessatti,Warqii Ofiiris+ sululawwan dhiphoo* qarsaa qaban keessatti yoo gatte,
25 Inni Hundumaa Dandaʼu warqii kee,*Meetii kee isa hundumaa caalaa filatamaas ni taʼa.
26 Yeroo sanatti Isa Hundumaa Dandaʼutti ni gammadda,Sodaa malees gara Waaqayyoo ni ilaalta.*
27 Isa ni kadhatta, innis si dhagaʼa;Atis wareega kee ni raawwatta.
28 Wanti gochuuf murteessite kam iyyuu ni milkaaʼa,Iftis daandii kee irratti ni ifa.
29 Sababiin isaas, ati of tuulummaadhaan yeroo dubbattu ni salphifamta,Garuu inni isa gad of qabu* ni oolcha.
30 Inni warra qulqulluu taʼan ni oolcha;Kanaafuu, harki kee qulqulluu yoo taʼe, dhugumaan ni oolfamta.”
Miiljaleewwan
^ Ykn., “isa ni gammachiisaa?”
^ Kal., “uffata nama qullaa taʼee irraa baasta.”
^ Ykn., “warri jalaa duʼaniis.”
^ Kal., “Kiyyoowwan simbiraa.”
^ Ykn., “umuriin isaanii gabaabbateera.”
^ Kal., “lagaan.”
^ Ykn., “Warqii kee isa hin qulqulleeffamne.”
^ Ykn., “lageen gogaa.”
^ Ykn., “warqii kee isa hin qulqulleeffamne.”
^ Kal., “Fuula kees gara Waaqayyootti ol ni kaasta.”
^ Ykn., “isa ijji isaa gad ilaalu.”
