Iyyoob 31:1-40
31 “Ani ija koo wajjin kakuu galeera.+
Akkamittan durbaaf xiyyeeffannaa sirrii hin taane kenna ree?+
2 Gubbaa Waaqayyo biraa qooda maaliin qaba?
Isa Hundumaa Danda’uu fi ol gubbaa jiru irraa dhaala akkamiin argadha?
3 Isa balleessaa hojjetu badiisa,Warra wanta nama miidhu hojjetanis balaatu eeggata mitii ree?+
4 Inni daandiiwwan koo hin arguu?+
Tarkaanfii koo hundumaas hin lakkaaʼuu?
5 Ani karaa sobaa irra* deemee,Miilli koos gowwoomsuudhaaf ariifatee beekaa?+
6 Waaqayyo madaallii sirrii taʼeen na haa madaalu;+Sana booda amanamummaa koo ni hubata.+
7 Tarkaanfiin koo daandii irraa jalʼateera yoo taʼe,+Yookiin garaan koo ija koo duukaa buʼeera yoo taʼe,+Yookiin harki koo xuraaʼeera yoo taʼe,
8 Sanyii ani facaase namni kan biraan haa nyaatu,+Wanti ani dhaabes haa buqqifamu.*
9 Garaan koo dubartiidhaan gowwoomfameera yoo taʼe,+Anis balbala ollaa koo irratti riphee eeggadheera yoon taʼe,+
10 Haati manaa too nama kan biraadhaaf midhaan haa daaktu,Namoonni kaanis ishii wajjin haa ciisan.*+
11 Sababiin isaas, kun gocha qaanessaa,Balleessaa abbootii murtiitiin nama adabsiisu dha.+
12 Gochi kun akka ibidda nyaatee balleessuu,+Hiddawwan oomisha koo hundumaas nyaatee fixuu ti.*
13 Yeroo isaan na irratti komii* dhiheessanitti,Tajaajiltoota koo warra dhiiraa yookiin warra durbaa haqa dhowwadheera yoon taʼe,
14 Yeroon Waaqayyo duratti dhihaadhutti* maal gochuun dandaʼa?
Yeroo inni na gaafatutti maalan isaaf deebisa?+
15 Isa gadameessa keessatti na tolchetu isaaniinis tolche mitii?+
Dhalachuu keenya dura* kan nu tolche isuma mitii?+
16 Hiyyeessota wanta isaan fedhan dhowwadheera yoon taʼe+Yookiin ijji dubartii abbaan manaa irraa duʼee akka gaddu* godheera yoon taʼe,+
17 Ijoollee warri jalaa duʼaniif utuu hin hirinNyaata gaʼee koo taʼe kophaa koo nyaadheera yoon taʼe,+
18 (Sababiin isaas, dargaggummaa kootii jalqabee akka abbaa taʼee daaʼima warri jalaa duʼan* guddiseera,Ijoollummaa kootii* jalqabee dubartii abbaan manaa irraa duʼe* gargaaraan ture.)
19 Ani nama uffata dhabee rakkachaa jiruYookiin hiyyeessa wanta of irra buufatu dhabe argee,+
20 Inni rifeensa hoolaa kootiin of hoʼiseeNa hin eebbisne yoo taʼe,*+
21 Yeroo inni karra magaalaa+ irratti gargaarsa koo barbaadetti*Harka koo daaʼima warri jalaa duʼan irratti aboottadheera yoon taʼe,+
22 Harki* koo gateettii koo irraa haa buqqaʼu,Ciqilee koo irrattis* haa cabu.
23 Sababiin isaas, ani balaa Waaqayyo biraa dhufu sodaadheera,Ulfina isaa duras dhaabbachuu hin dandeenye.
24 Ani amanannaa koo warqii irra kaaʼadheera yoon taʼeYookiin warqii baʼeessa taʼeen, ‘Ati wabii koo ti!’ jedheera yoon taʼe,+
25 Qabeenya hedduu qabaachuu kootiin kan kaʼe+Badhaadhina koo isa guddaatti gammadeera yoon taʼe,+
26 Aduun yeroo iftu*Yookiin addeessi simboo ishii irratti yeroo sochootu argee,+
27 Garaan koo dhoksaatti gowwoomfamee,Isaan waaqeffachuufis afaan koo harka koo dhungateera yoo taʼe,+
28 Ani Waaqa dhugaa isa ol gubbaa jiru waanan ganeef,Kun balleessaa abbootii murtiitiin nama adabsiisu taʼa ture.
29 Ani badiisa diina kootti gammadee+Yookiin wanti hamaan isa irra gaʼuu isaatti burraaqee beekaa?
30 Inni akka duʼu kakaadhaan gaafachuudhaanMatumaa afaan koo cubbuu akka hojjetu godhee hin beeku.+
31 Namoonni dunkaana koo keessa jiran,‘Nama nyaata* isaatiin hin quufne eenyutu argee beeka?’ hin jennee?+
32 Keessummaan* ala bulee hin beeku;+Ani balbaloota koo imaltuudhaaf baneera.
33 Balleessaa koo kiisii koo keessa dhoksuudhaan,Akkuma namoota kaanii yakka koo dhoksuuf yaalii godhee beekaa?+
34 Gocha namoota hedduu sodaadhee,Yookiin tuffii maatiiwwan kaaniitiin rifadheeCallisee, gad baʼuus sodaadhee beekaa?
35 Maal taʼa namni tokko utuu na dhagaʼee!+
Dhugaa dubbachuu koo argisiisuuf maqaa koo nan mallatteessan ture.*
Inni Hundumaa Dandaʼu deebii naaf haa kennu!+
Maal taʼa inni na himatu himata isaa galmee irratti utuu barreessee!
36 Silaa himata sana gateettii kootti nan baadha,Akkuma gonfoottis mataa koo irratti nan maradhan ture.
37 Tarkaanfii koo hundumaatiif ragaa isaaf nan dhiheessa,Akkuma bulchaa tokkoottis ija jabinaan gara isaatti nan dhihaadhan ture.
38 Lafti koo illee ana irratti yoo iyye,Boʼoowwan isaaniis waliin yoo booʼan,
39 Kaffaltii malee firii isaa nyaadheera yoon taʼe,+Yookiin abbootiin lafa sanaa akka gaddan* godheera yoon taʼe,+
40 Bakka qamadii qoreen,Bakka garbuus aramaan ajaaʼu naaf haa biqilu.”
Dubbiin Iyyoob kana irratti xumurama.
Miiljaleewwan
^ Ykn tarii, “namoota sobanii wajjin.”
^ Ykn., “sanyiiwwan koo haa buqqifaman.”
^ Kal., “Namoonni kaan ishii irratti haa jilbeenfatan.”
^ Ykn., “Oomisha koo hundumaa illee buqqisuu ti.”
^ Ykn., “himata.”
^ Kal., “Yeroo Waaqayyo kaʼutti.”
^ Kal., “Gadameessa keessatti.”
^ Kal., “akka dadhabu.”
^ Kal., “isa.”
^ Kal., “ishii.”
^ Kal., “Gadameessa haadha kootii.”
^ Kal., “Mudhiin isaa na hin eebbisne yoo taʼe.”
^ Ykn tarii, “Karra magaalaa irratti kan na gargaaru akkan qabu argee.”
^ Ykn., “Ceekuun.”
^ Ykn., “Buusaa isaa irraa; Lafee isaa isa olii irraa.”
^ Kal., “Ifni yeroo ifu.”
^ Kal., “foon.”
^ Ykn., “Namni biyya ormaa.”
^ Ykn., “Mallattoon koo kunoo ti.”
^ Ykn., “lubbuun abbootii lafa sanaa akka gaddu.”
