Iyyoob 42:1-17
42 Achiis Iyyoob akkana jedhee Yihowaadhaaf deebii kenne:
2 “Ati wanta hundumaa gochuu akka dandeessu,Wanti gochuuf yaadde kam iyyuu siif rakkisaa akka hin taane ani amma beekeera.+
3 Ati, ‘Inni beekumsa malee gorsa koo dukkaneessu kun eenyu?’ jetteetta.+
Dhuguma iyyuu, waaʼee wantoota baayʼee na dinqisiisanii fi ani hin beekneeHubannaa malee dubbadheera.+
4 Ati, ‘Maaloo na dhaggeeffadhu, anis nan dubbadha.
Ani sin gaafadha, atis naaf deebista’ jetteetta.+
5 Gurri koo waaʼee kee dhagaʼee ture,Amma garuu ijuma kootiin si argeera.
6 Kanaafuu, wantan dubbadhetti nan gaabba,+Biyyoo fi daaraa irra taaʼees yaada nan geddaradha.”+
7 Yihowaan wantoota kana Iyyoobitti erga dubbatee booda, Yihowaan Eliifaaz Temaanichaan akkana jedhe:
“Akka tajaajilaa koo Iyyoobitti waaʼee koo dhugaa waan hin dubbanneef,+ dheekkamsi koo sii fi michoota kee lamaan+ irratti ni bobaʼa.
8 Amma qotiyyoo torbaa fi korbeeyyii hoolaa torba fudhadhaa gara tajaajilaa koo Iyyoob dhaqaatii ofii keessaniif aarsaa gubamu dhiheessaa. Tajaajilaan koo Iyyoobis isiniif ni kadhata.+ Isin akka tajaajilaa koo Iyyoob waaʼee koo dhugaa waan hin dubbanneef, ani akka gowwummaa keessaniitti akkan isin hin adabneef dhugumaan kadhannaa isaa nan dhagaʼa.”*
9 Kanaafuu, Eliifaaz Temaanichi, Bildaad Shuʼaatichii fi Zofaar Naʼaamaatichi deemanii wanta Yihowaan isaaniin jedhe ni godhan. Yihowaanis kadhannaa Iyyoob ni dhagaʼe.
10 Iyyoob michoota isaatiif erga kadhatee+ booda, Yihowaan rakkina Iyyoob ni balleesse,+ badhaadhina isaas isaaf ni deebise.* Yihowaan wanta inni kanaan dura qabu dachaa godhee isaaf ni kenne.+
11 Obboloonni isaa, obboleettonni isaa fi michoonni isaa duraanii hundi+ gara isaa dhufanii mana isaa keessatti isaa wajjin nyaata nyaatan. Isaanis rakkina Yihowaan akka irra gaʼu heyyame hundumaatiif isaaf ni gaddan, isas ni jajjabeessan. Tokkoon tokkoon isaaniis maallaqaa fi qubeellaa warqii isaaf ni kennan.
12 Akka kanaan Yihowaan jireenya Iyyoob isa duraa caalaa jireenya isaa isa boodaa ni eebbise;+ Iyyoob hoolota 14,000, gaalota 6,000, horii cimdii 1,000 fi harroota dhaltuu 1,000 ni horate.+
13 Kana malees, inni ijoollee dhiiraa dabalataa torbaa fi ijoollee durbaa dabalataa sadii ni argate.+
14 Maqaa intala isaa ishii jalqabaa Yemiimaa, ishii lammaffaa Qeeziyaa, ishii sadaffaa immoo Qeren Haphuuk jedhee moggaase.
15 Guutummaa biyyattii keessatti dubartiin akka ijoollee durbaa Iyyoob bareedduu taate tokko illee hin turre; abbaan isaaniis obboloota isaanii wajjin isaaniif dhaala ni kenne.
16 Kana booda Iyyoob waggaa 140 ni jiraate; ijoollee isaa, akkasumas ijoollee ijoollee isaa hamma dhaloota afuuriitti ni arge.
17 Dhuma irrattis Iyyoob bara dheeraa fi jireenya gammachuu qabu jiraatee duʼe.
