Iyyoob 5:1-27
5 “Mee waammadhu! Deebii kan siif kennu jiraa?
Qulqulloota keessaa gara isa kamiitti garagalta?
2 Aariin nama gowwaa taʼe ni ajjeesa,Hinaaffaanis nama hubannaa hin qabne ni ajjeesa.
3 Namni gowwaan hidda godhatee nan arge,Garuu iddoon jireenyaa isaa akkuma tasaa ni abaarame.
4 Ilmaan isaa nageenya hin qaban,Isaan karra magaalaa irratti caccabaniiru,+ kan isaan oolchus hin jiru.
5 Namni beelaʼe wanta inni sassaabe ni nyaata,Isa qoree gidduutti argamu illee ni fudhata,Qabeenyi isaaniis kiyyoodhaan qabameera.
6 Sababiin isaas, wantoonni miidhaa geessisan biyyoo keessaa hin margan,Rakkinnis lafa keessaa hin burqu.
7 Akkuma qaanqeen ol xaaxaʼu,Namnis rakkinaaf dhalata.
8 Ani garuu utuun si taʼee Waaqayyotti nan iyyadha,Dhimma koos Waaqayyo duratti nan dhiheeffadhan ture;
9 Inni wanta guddaa fi qoramuu hin dandeenye,Wantoota dinqisiisoo lakkaaʼamuu hin dandeenye ni raawwata.
10 Inni lafaaf bokkaa ni roobsa,Dirreewwan irrattis bishaan ni erga.
11 Isa rakkataa ol ni kaasa,Isa gaddus gara fayyinaatti ol ni kaasa.
12 Hojiin harka isaanii akka hin milkoofneef,Karoora warra haxxee taʼanii ni gufachiisa.
13 Karoorri warra abshaala taʼanii akka fashalaaʼuuf,Inni warra ogeeyyii taʼan haxxummaa isaaniitiin isaan qabata.+
14 Guyyaan isaanitti ni dukkanaaʼa,Guyyaa saafaattis akkuma waan halkan keessa jiraniitti qaqqabatu.
15 Inni goraadee afaan isaanii keessaa baʼu irraa namoota ni oolcha,Isa hiyyeessa harka isa jabaa jalaa ni oolcha;
16 Kanaan kan kaʼes, rakkataan abdii ni qabaata,Afaan jalʼootaa garuu ni cufama.
17 Kunoo, namni Waaqni adabu gammadaa dha;Kanaafuu, adaba Isa Hundumaa Dandaʼu sanaa hin tuffatin!
18 Inni dhukkubbii ni fida, garuu immoo madaa ni hidha;Inni ni cabsa, garuu immoo harkuma isaatiin ni fayyisa.
19 Inni dhaʼichawwan jaʼa irraa si oolcha,Dhaʼichi torbaffaanis si hin miidhu.
20 Inni yeroo beelaatti duʼa irraa,Yeroo waraanaattis humna goraadee jalaa si fura.
21 Alangaa arrabaa irraa eegumsa ni argatta,+Yommuu badiisni dhufus hin sodaattu.
22 Badiisaa fi beelatti ni kolfita,Bineensota bosonaas hin sodaattu.
23 Dhagoonni maasii keessaa si hin miidhan,*Bineensonni bosonaas sii wajjin nagaa ni qabaatu.
24 Dunkaanni kee amansiisaa* akka taʼu ni beekta,Yommuu kaloo kee qorattus homtuu hin hirʼatu.
25 Ijoollee baayʼee ni qabaatta,Sanyiin kees akkuma biqiltuu lafa irraa hedduu ni taʼa.
26 Akkuma bissiiwwan* midhaanii waqtii isaaniitti walitti qabamanitti,Atis akkuma jabaa taatetti gara awwaalaatti ni adeemta.
27 Kunoo, nuti kana qoranneerra, dhugaan isaas kana dha.
Kana dhagaʼi, fudhadhus.”
Miiljaleewwan
^ Ykn., “sii wajjin kakuu (walii galtee) ni qabaatu.”
^ Kal., “nagaa.”
^ Jechuunis, nadoowwan ykn ladoowwan.
