Lallaba 5:1-20
5 Yommuu gara mana Waaqa dhugaa dhaqxu hundumaatti tarkaanfii kee eeggadhu;+ akkuma gowwoonni godhan aarsaa dhiheessuu mannaa dhagaʼuuf+ dhihaachuu wayya;+ isaan wanti gochaa jiran gaarii akka hin taane hin hubatan.
2 Afaan keetiin dubbachuuf hin ariifatin; garaan kees ariifatee Waaqa dhugaa duratti akka dubbatu hin godhin;+ sababiin isaas, Waaqni dhugaan samii irra jira, ati garuu lafa irra jirta. Wanti dubbattu muraasa+ taʼuu kan qabu kanaafi.
3 Abjuun yaaddoo baayʼisuu irraa dhufa,+ oduun nama gowwaas dubbii baayʼisuu irraa dhufa.+
4 Inni gowwootatti waan hin gammanneef,+ yeroo Waaqayyoof wareega wareegdu hundumaatti wareega kee utuu hin turin raawwadhu.+ Wanta wareegde raawwadhu.+
5 Wareega wareegdee utuu hin raawwatin hafuu mannaa, utuu wareega wareeguu baattee siif wayya.+
6 Afaan kee akka cubbuu si* hojjechiisu hin godhin;+ maleekaa* durattis wareegni kee dogoggora akka ture hin dubbatin.+ Wanta dubbatteen kan kaʼe Waaqni dhugaan sitti dheekkamee hojii harka keetii+ akka balleessu maaliif goota?
7 Akkuma yaaddoo baayʼisuun abjuutti nama geessu,+ dubbii baayʼisuunis gara wanta gatii hin qabneetti nama geessa. Ati garuu Waaqa dhugaa sodaadhu.+
8 Bulchiinsa keessa jiraattu keessatti hacuuccaa hiyyeessa irra gaʼu akkamii iyyuu, akkasumas haqnii fi qajeelummaan jalʼachuu isaa yoo argite waaʼeen kanaa si hin dinqisiisin.+ Sababiin isaas, kan isa irra caalu abbaa taayitaa ol aanaa sana ni ilaala; warri isaan irra caalan kan biroonis jiru.
9 Kana malees, buʼaan biyyattii irraa argamu hunda isaaniitiif ni hirama; mootichi illee wanta maasii irraa argamutti fayyadama.+
10 Namni meetii jaallatu matumaa meetii hin quufu, namni qabeenya jaallatus galii argatu hin quufu.+ Kunis wanta gatii hin qabne dha.+
11 Wanti gaariin yommuu baayʼatu, warri isa nyaatanis ni baayʼatu.+ Abbaan qabeenyaa garuu ijuma isaatiin ilaaluu malee faayidaa maalii irraa argata?+
12 Namni tajaajilaa taʼe wanti nyaatu xinnoos taʼe hedduu hirribni isaa miʼaawaa dha; sooressi garuu qabeenyi hedduun inni qabu hirriba isa dhowwa.
13 Ani aduu jalatti wanta baayʼee nama gaddisiisu* nan arge: kunis qabeenya hedduu abbaan qabeenyaa of miidhuuf kuufate dha.
14 Qabeenyi kun wanti hamaan waan irra gaʼeef ni bade; namichi yommuu ilma dhalchus wanta isa dhaalchisu tokko illee hin qabu ture.+
15 Namni tokko akkuma gadameessa haadha isaa keessaa qullaa isaa baʼetti, qullaa isaa deebiʼee deema.+ Hojii jabaatee hojjete hundumaa irraa wanta fudhatee deemuu dandaʼu tokko illee hin qabu.+
16 Kunis wanta baayʼee nama gaddisiisu* dha: Inni akkuma dhufetti deebiʼee deema; namni bubbeedhaaf jabaatee hojjetu buʼaa maalii argata ree?+
17 Kana malees inni abdii kutannaa, dhukkubaa fi aarii guddaadhaan+ guyyaa guyyaatti dukkana keessa taaʼee nyaata.
18 Wanti ani gaarii fi sirrii akka taʼe arge kana dha: kun badhaasa* isaa waan taʼeef, namni tokko umurii gabaabaa Waaqni dhugaan isaaf kennetti nyaachuu fi dhuguu, akkasumas hojii jabaatee hojjechuudhaan aduu jalatti itti dadhabe hundumaa irraa gammachuu argachuu qaba.+
19 Kana malees, Waaqni dhugaan nama tokkoof badhaadhinaa fi qabeenya,+ akka isaanitti gammaduufis dandeettii yommuu kennu, namni sun badhaasa* isaa fudhachuu fi hojii isaa isa jabaatee hojjetetti gammaduu qaba. Kun kennaa Waaqayyoo ti.+
20 Waaqni dhugaan namni kun gammachuu garaa isaatiin akka qabamu waan godhuuf, inni umurii isaa isa darbaa jiru matumaa hin hubatu.*+
Miiljaleewwan
^ Kal., “foon kee.”
^ Ykn., “ergamaa.”
^ Ykn., “balaa guddaa.”
^ Ykn., “balaa guddaa.”
^ Ykn., “gaʼee.”
^ Ykn., “gaʼee.”
^ Ykn., “hin yaadatu.”
