Miikiyaas 1:1-16
1 Bara mootota Yihudaa+ Yootaam,+ Akaazii+ fi Hisqiyaasitti+ dubbiin Yihowaa gara Miikiyaas*+ isa nama Moresheet dhufee fi inni waaʼee Samaariyaa fi Yerusaalem mulʼataan arge isa kana:
2 “Yaa namoota nana, dhagaʼaa!
Laftii fi ishii keessa kan guuttanis xiyyeeffannaadhaan dhaggeeffadhaa,Yihowaan Gooftaa Ol Aanaan,Eeyyee, Yihowaan mana qulqullummaa isaa keessaa isin irratti ragaa haa baʼu.+
3 Sababiin isaas, kunoo, Yihowaan iddoo isaatii gad ni baʼa;Inni gad buʼee iddoowwan ol kaʼoo lafaa irra ni ejjeta.
4 Akkuma gagaan ibidda duratti taʼu,Akkuma bishaan irraan gadee irra gad dhangalaʼutti,Gaaronni isa jalatti ni baqu,+Sululawwanis* ni baqaqu.
5 Kun hundi kan taʼu fincila Yaaqoobiin,Cubbuu mana Israaʼeliin kan kaʼe dha.+
Fincilli Yaaqoob maali dha?
Samaariyaa mitii?+
Iddoowwan ol kaʼoon Yihudaa hoo maal faʼi?+
Yerusaalem mitii?
6 Ani Samaariyaa tuullaa diiggaa dirree keessa jiru,Akkasumas iddoo muka wayinii dhaaban nan godha;Dhagoota ishii sululatti gad nan darbadha,*Buʼuurawwan ishiis qullaatti nan hambisa.
7 Fakkiiwwan ishii warri bocamanii tolfaman hundi ni caccabsamu,+Kennaawwan ishiin akka gatiitti fudhatte* hundi ibiddaan ni gubamu.+
Waaqolii tolfamoo ishii hundumaa nan balleessa.
Wantoota kana kan walitti qabatte mindaa sagaagalummaa ishiitiin argatteen waan taʼeef,Ammas isaan mindaa sagaagaltuudhaaf kennamu ni taʼu.”
8 Kanaan kan kaʼes ani nan gadooda, nan aadas;+Miila duwwaa fi qullaa koo nan deema.+
Akkuma sardiidaatti nan iyya,Akkuma guchiittis nan gadda.
9 Sababiin isaas, madaan ishii fayyuu hin dandaʼu;+Yihudaa biras gaʼeera.+
Dhaʼichi sun hamma karra saba kootti, hamma Yerusaalemitti babalʼateera.+
10 “Kana Gaat keessatti hin beeksisinaa;Matumaa hin booʼinaa.
Beet* Afraatti biyyoo keessa gangaladhaa.
11 Yaa jiraattota* Shaafiir, qullaa keessan salphinaan ceʼaa.
Jiraattonni* Zaʼaanaan gad hin baane.
Beet Ezeel keessa booʼichi ni jiraata; ishiinis isin gargaaruu ni dhiisti.
12 Jiraattonni* Maarot wanta gaarii eeggatan,Haa taʼu malee, Yihowaa biraa wanti hamaan karra Yerusaalem irratti gad ni buʼe.
13 Yaa jiraattota* Laakiish,+ gaarii keessan fardeenitti hidhaa.
Cubbuun intala Xiyoon isin irraa dhufe,Sababiin isaas, fincilli Israaʼel si keessatti argameera.+
14 Kanaafuu, ati yommuu ishiin si biraa deemtu Moresheet Gaatiif kennaa ni kennita.
Manni Akziib+ mootota Israaʼel gowwoomsee ture.
15 Yaa jiraattota* Maareshaa,+ isa moʼu* sana isin irratti nan fida.+
Ulfinni Israaʼel hamma Adulaamitti+ ni dhufa.
16 Ijoollee kee warra jaallattuuf rifeensa kee muradhu, mataa kees haaddadhu.
Isaan boojuudhaan si jalaa waan fudhatamaniif,+Akkuma risaatti mataa kee moluu godhi.”
Miiljaleewwan
^ Maqaan Mikaaʼel (“Kan Akka Waaqayyoo Eenyu?” jechuu dha) ykn Mikaayaa (“Kan Akka Yihowaa Eenyu?” jechuu dha) jedhu gabaabfamee yommuu barreeffamu.
^ Ykn., “Dirreewwan gad buʼoonis.”
^ Kal., “nan dhangalaasa.”
^ Ykn., “Mindaan sagaagalummaa ishii.”
^ Ykn., “Mana.”
^ Kal., “jiraattuu.”
^ Kal., “Jiraattuun.”
^ Kal., “Jiraattuun.”
^ Kal., “jiraattuu.”
^ Kal., “jiraattuu.”
^ Ykn., “saamu.”
