Zakkaariyaas 2:1-13
2 Anis ol jedhee yommuun ilaalu namicha wadaroo safaraa+ harka isaatti qabate tokko nan arge.
2 Kanaafuu, “Eessa dhaqxa?” jedheen isa gaafadhe.
Innis, “Dalga ishii fi dheerina ishii beekuuf, Yerusaalemiin safaruufan dhaqa”+ jedhee deebise.
3 Kunoo, maleekaan anaa wajjin dubbachaa ture sun gad baʼe; maleekaan kan biraanis isa argachuu dhufe.
4 Achiis akkana isaan jedhe: “Gara achiitti fiigiitii dargaggeessa sanaan akkana jedhi: ‘“Yerusaalem namootaa fi horii ishii keessa jiran hundumaatiin kan kaʼe akkuma gandeen dallaa hin qabneetti kan namni keessa jiraatu ni taati.+
5 Anis dallaa ibiddaa ishiitti marsee jiru ishiidhaaf nan taʼa;+ ulfinni koos ishii gidduu ni jiraata”+ jedha Yihowaan.’”
6 “Kottaa! Kottaa! Biyya kaabaa keessaa baqadhaa”+ jedha Yihowaan.
“Sababiin isaas, ani gara bubbeewwan samii arfaniitti isin bittinneesseen ture”+ jedha Yihowaan.
7 “Yaa Xiyoon ishii intala Baabilonii wajjin jiraattu nana, miliqii kottu.+
8 Sababiin isaas, Yihowaan Gooftaan Raayyaa inni erga ulfina argatee booda* saboota isin saamanii turanitti na erge akkana jedha:+ ‘Kan isin tuqu kam iyyuu qaroo ija kootii tuqa.+
9 Ani harka koo isaan irratti nan raasa, isaanis garbootuma isaaniitiin ni saamamu.’+ Isinis Yihowaan Gooftaan Raayyaa akka na erge dhugumaan ni beektu.
10 “Yaa intala Xiyoon,+ gammachuudhaan ililchi; sababiin isaas, ani nan dhufa,+ si gidduus nan jiraadha”+ jedha Yihowaan.
11 “Guyyaa sanatti saboonni hedduun Yihowaa cinaa ni dhaabbatu,+ isaanis saba koo ni taʼu; ani si gidduu nan jiraadha.” Atis Yihowaan Gooftaan Raayyaa gara keetti akka na erge dhugumaan ni hubatta.
12 Yihowaan lafa qulqulluu irratti Yihudaa gaʼee isaa godhatee akka dhaalaatti ni fudhata; inni ammas Yerusaalemiin ni filata.+
13 Isin foon* hundi, inni iddoo jireenyaa isaa isa qulqulluu irraa tarkaanfii waan fudhatuuf, Yihowaa duratti calluma jedhaa.
