Zakkaariyaas 5:1-11
5 Ammas ol jedhee yommuun ilaalu, maraa kitaabaa balaliʼu tokko nan arge.
2 Innis, “Maaltu sitti mulʼata?” jedhee na gaafate.
Anis, “Maraa kitaabaa balaliʼuu fi dheerinni isaa dhundhuma* 20, dalgi isaa immoo dhundhuma 10 taʼe tokkotu natti mulʼata” jedheen deebise.
3 Achiis akkana naan jedhe: “Kun abaarsa guutummaa lafaa irratti baʼu dha; sababiin isaas, namni hatu kam iyyuu+ akka karaa tokkoon isa irratti barreeffametti hin adabamne; namni kakaa kakatu kam iyyuus+ akka karaa isa kan biraatiin irratti barreeffametti hin adabamne.
4 ‘Ani isa ergeera, innis mana hattuu sanaa fi mana isa maqaa kootiin sobaan kakatu sanaa keessa ni seena; manuma sana keessa turees, manicha, muka isaa fi dhagaa isaa ni nyaata’ jedha Yihowaan Gooftaan Raayyaa.”
5 Achiis maleekaan anaa wajjin dubbachaa ture sun natti dhihaatee, “Maaloo, ol jedhiitii wanta baʼaa jiru ilaali” naan jedhe.
6 Anis, “Maali dha?” jedheen gaafadhe.
Innis, “Kun miʼa eefaa* baʼaa jiru dha” jedhee naaf deebise. Itti fufees, “Guutummaa lafaa irratti bifti isaanii kana dha” naan jedhe.
7 Achiis qadaadni geengoon sibiila irsaasii irraa tolfame tokko yommuu ol kaafamu nan arge; miʼa sana keessas dubartiin takka teessee turte.
8 Innis, “Dubartiin tun hammina bakka buuti” naan jedhe. Achiis inni miʼa safartuu eefaa sana keessatti gad ishii deebisee qadaada sibiila irsaasii irraa tolfame sana afaan isaatti qadaade.
9 Achiis ol jedhee yommuun ilaalu dubartoonni lama gara fuulduraatti yommuu dhufan nan arge; isaan qilleensa keessa barrisaa turan. Isaan qoochoo kan akka allaattii awwaannisaa qabu turan. Achiis miʼicha qilleensa keessatti* ol fuudhan.
10 Anis maleekaa anaa wajjin dubbachaa ture sana, “Miʼa safartuu eefaa sana eessatti geessaa jiru?” jedheen gaafadhe.
11 Innis, “Mana ishiidhaaf ijaaruuf gara biyya Shinaaritti*+ ishii geessu; yommuu manichi qopheeffamus achi, iddoo ishii isa sirrii keessa kaaʼamti” jedhee deebise.
Miiljaleewwan
^ Dhundhumni tokko 44.5 cm dha. Kutaa Dabalataa B14 ilaali.
^ Kal., “Kun eefaa,” as irratti miʼa ykn guuboo eefaa tokko safaruuf oolu argisiisa. Eefaan tokko 22 L dha. Kutaa Dabalataa B14 ilaali.
^ Kal., “lafaa fi samii gidduutti.”
^ Jechuunis, Baabiloniyaa.