NAMICHA bishaan keessa jiru kana ilaali. Rakkina guddaa keessa jira mitii? Qurxummiin sun isa liqimsuuf jedha! Namni kun eenyu akka ta’e beektaa? Yoonaas jedhama. Rakkina guddaa keessa kan gale maaliif akka ta’e mee haa ilaallu.

Yoonaas raajii Yihowaati. Elsaa’i raajichi du’ee baay’ee utuu hin turin, Yihowaan Yoonaasiin: ‘Gara mandara guddittii Nanawwee jedhamtu dhaqi. Hammeenyi namoota achi jiraatanii waan baay’ateef akka isaanitti himtun barbaada’ jedheen.

Yoonaas garuu achi dhaquu hin barbaadne. Kanaafuu, markaba gara biyya Nanawweerraa fagaatu dhaqu tokkoo yaabbate. Yihowaan Yoonaas baqachuusaatti hin gammadne. Kanaafuu bubbee hamaa kaase. Bubbichi hamaa waan ta’eef bishaanichi markaba sana liqimsuuf jedha ture. Namoonni markabicha keessa jiran baay’ee waan sodaataniif akka isaan gargaaran gara waaqoliisaaniitti iyyan.

Dhumarratti, Yoonaas akkas jedhee isaanitti hime: ‘Ani Yihowaa, Waaqa lafaafi samii uumen waaqeffadha. Amma waan Yihowaan na ajaje dhiiseen baqachaa jira.’ Jarri markabicha keessa jiranis: ‘Egaa bubbichi akka nurraa dhaabatu maal si goonuree?’ jedhanii isa gaafatan.

Yoonaasis: ‘Galaanicha keessatti yoo na gattan Galaanichi ni callisa’ jedheen. Jarri markabicha keessa jiran akkas gochuu hin barbaadne. Haata’u malee, bubbichi ittuma caalaa ennaa dhufu Yoonaasiin Galaanatti isa gatan. Yeruma sana bubbichi dhaabatee, Galaanichi callise.

Yoonaas bishaanicha keessa yommuu lixu, qurxummii guddaan tokko isa liqimse. Garuu hin duune. Guyyaa sadiifi halkan sadi garaa qurxummichaa keessa ture. Yoonaas Yihowaadhaaf ajajamee gara Nanawwee deemuu dhiisuusaatti baay’ee gaabbe. Kanaaf maal akka godhe beektaa?

Yoonaas Yihowaan akka isa gargaaru kadhate. Achiis Yihowaan qurxummichi Yoonaasiin lafa gogaarratti akka isa tufu godhe. Sanaan booda Yoonaas gara Nanawwee dhaqe. Waan Yihowaan jedhe hundumaa gochuun baay’ee barbaachisaa ta’uusaa kan nu barsiisu mitii?