APPILII bilchaate tokko mukarraa kutte haa jennu. Zambiilii keessa kaaʼuukee dura yommuu fuunfattu fooliinsaa baayʼee sitti tole. Saʼaatii dheeraadhaaf hojjechaa kan turte taʼus dadhabbiin waan sitti hin dhagaʼamneef hojjechuukee itti fufuu barbaadde. Harmeenkee miseensota maatiikeefi hiriyootakee warra si gargaaruu dhufan kaanii wajjin haasaʼaa mukicharraa firii appilii kutaa jirti. Bifishee ammaa isa yeroo ati ijoollee turtetti qabduu wajjin tokkodha. Haadhakee ishee sirna moofaa keessatti dulloomtee turteefi ijakeetiin argite taʼuushee amanuun sitti ulfaata. Dhibee fayyaatiin kan kaʼe yeroo isheen humna dhabdee turte, yeroo itti isheen duuteefi yeroo itti boossee ishee awwaalte ni yaadatta. Amma garuu isheefi namoonni hedduun duʼaa kaafamanii fayyaa guutuu argachuudhaan jiraachaa jiru!

Guyyaan akkasii akka dhufu hin shakkinu. Abdiiwwan Waaqayyo kenne utuu hin raawwatamin akka hin hafne beekna. Kutaa kana keessatti, abdiiwwan Mootummichaa dhiheenyatti jechuunis hamma waraana Armaagedoonitti raawwiisaanii argatan tokko tokko ilaalla. Abdiiwwan Mootummichaa dinqisiisoo taʼaniifi sana booda raawwatamanis ni ilaalla. Mootummaan Waaqayyoo lafa kana yommuu bulchuufi wanta hunda haaraa yommuu godhu arguun baayʼee kan nama gammachiisudha!