Addunyaa maratti namoonni baayʼeen lolaa cimaadhaan kan kaʼe miidhaan isaanirra gaʼaa jira. Gabaasa armaan gadii ilaali:

•   “Guyyoota muraasa darbanitti magaalaa guddoo Chaayinaatti bokkaa cimaan waggoottan 140man darbanitti roobee hin beekne roobeera. Sanbadduraadhaa hanga Roobiitti bokkaa miilimiitira 744.8 taʼutu roobe.”—AP News, Hagayya 2, 2023.

•   “Kibba Jaappaanitti bokkaa fi bubbee cimaa obomboleettiin Kaanuun jedhamu Kamisa yeroo lammaffaadhaaf fideen yoo xinnaate lubbuun namoota lamaa darbeera. . . . Obomboleettiin naannoo gaarreen giddu gala Taayiwaanitti bokkaa hamma meetira 0.6 taʼu fidu ni uumama jedhamee eegama.”—Deutsche Welle, Hagayya 3, 2023.

•   “Lolaan [Noovaa Iskooshiyaa keessatti] dhuma torbaniitti ga’ee ture kan uumame, naannoo Kaanaadaa qarqara Atilaantikiitti argamu keessatti bokkaa yandoon waggaa 50 keessatti roobee hin beekne waan roobeefi.”—BBC News, Adoolessa 24, 2023.

 Kitaabni Qulqulluun waa’ee taʼeewwan kanaa maal jedha?

 Kitaabni Qulqulluun yeroo “guyyoota dhumaa” jedhamu keessa akka jiraannu dubbata. (2 Ximotewos 3:1) Yesuus bara keessa jiraannu kanatti ‘wantoota nama sodaachisan’ akka arginu raajii dubbateera. (Luqaas 21:11) Jijjiiramni qilleensaa haala qilleensaa sodaachisaa dursanii beekuun hin danda’amne, irra deddeebi’ee mudatuu fi caalaatti cimaa ta’eef sababa ta’eera.

 Kitaabni Qulqulluun wantoonni sodaachisoon yeroo ammaatti addunyaarratti uumamaa jiran abdii akka nuuf kennan dubbata. Maaliif? Yesuus, “Wantoonni kun raawwatamuu isaanii yommuu argitan, Mootummaan Waaqayyoo akka dhihaate beekaa” jedheera.—Luqaas 21:31; Maatewos 24:3.

 Ta’eewwan yeroo ammaatti argaa jirru Mootummaan Waaqayyoo yeroo dhihootti marsaa bishaanii dabalatee humnoota uumamaa guutummaatti akka to’atu nuuf mirkaneessu.—Iyyoob 36:27, 28; Faarfannaa 107:29.

 Mootummaan Waaqayyoo rakkoowwan qilleensa naannoo kan sirreessu akkamitti akka taʼe caalaatti barachuuf mata duree “Lafa Badiisa Irraa Kan Oolchu Eenyu?” jedhu ilaali.