FULBAANA 4, 2023
ODUU ADDUNYAA MARAA

Sodaachuu Mannaa Amantii Isa Cimsachaa Jira

BANI

Manni Murtii Koonyaa Gaagaariinskii inni Magaalaa Kireemiyaa, Sevaastoopool jiru, dhiheenyatti dhimma obboloota keenya Viktoor Kudnoovii fi Sargee Zyigaaloov irratti murtii dabarsa jedhamee eegama. Abbaan alangaa amma yoonaatti murtoo akkamii ishii irratti dabarsuu akka dandaʼu hin beeksisne.

Ibsa Gabaabaa

Viktoor Kudnoov

Bara Dhalootaa: 1969 (Budaapeesti, Hangaarii)

Seenaa Jireenyaa: Konkolaachisaa otobusii taʼee hojjeteera

Bara 1991tti Isveetlaanaa wajjin gaaʼela godhate. Intala tokkoo fi ilma tokko qabu

Isveetlaanaan Kitaaba Qulqulluu qoʼachuu jalqabuun ishii maatii isaanii irratti jijjiirama gaarii akka fide erga hubatee booda qoʼannaa jalqabe. Isveetlaanaan bara 2005tti cuuphamte, Viktoor immoo bara 2010tti cuuphame

Yaada Dhuunfaa

Muuxannoon warra kaanii kan si cimse akkamitti?

Waaʼee obboleessa keenya Viktoor Sataasheeviskii baayʼeen yaada. Inni mana hidhaa jira; achittis haalli jiru salphaa miti. Inni xalayaa hedduu naaf barreesseera; ofii isaa irratti qofa akka hin xiyyeeffanne beekamaadha. Wanti inni dubbatu waaʼeen namoota kaanii akka isa yaaddessu argisiisa, kun immoo gammachuu isaa eegee itti fufuuf isa gargaareera. Viktooris taʼe obboloonnii fi obboleettonni hedduun kaan fakkeenya guddaa naaf taʼaniiru. Ariʼatamuu malees, dhibee fayyaa, wanta ittiin jiraatan argachuu fi wanta maatii isaaniitiif barbaachisu dhiheessuu dabalatee wantoota guyyaa guyyaatti isaan yaaddessan hedduu qabu. Ariʼatamaan moʼamanii Yihowaa yoo ganan dhiibbaa ariʼatamni isaan irra geessisu kam irraa iyyuu walaba taʼu dandaʼu. Isaan garuu Yihowaa fi obboloota isaaniif amanamoo taʼanii jiraachuu filataniiru. Wanta isaan dandamatan hunda yommuun ilaalu anis dandamachuu akkan dandaʼu hubadheera.

Sargee Zhigaaloov

Bara Dhalootaa: 1971 (Sineezyniyaa, Yuukreen)

Seenaa Jireenyaa: Hojii boombaa hojjechaa ture

Bara 1994tti Dhugaa Baatota Yihowaa wajjin qoʼannaa Kitaaba Qulqulluu jalqabe. Ogummaa Kitaabni Qulqulluun qabatee fi raajii achi keessatti ibsame sirrii taʼuun isaa baayʼee isa dinqisiise. Bara 1996tti cuuphame

Bara 2007tti Oolgaa wajjin gaaʼela godhatan

Yaada Dhuunfaa

Haalli rakkisaan si mudate kun waaʼee Yihowaa maal si hubachiiseera?

Yihowaan ariʼatamni akka gaʼu kan heyyame taʼus, na eeguu fi karaa adda taʼeen na jajjabeessuuf wanta barbaachisu hundumaa akka taʼu beeka. Yaanni Isaayyaas 30:15 irratti, “Tasgabbaaʼuu fi anatti amanamuudhaan . . . jabina ni argattu” jedhame baayʼee barbaachisaa taʼuu isaa hubadheera. Kunis wantoota suukanneessoo na irra gaʼuu dandaʼu jedhee yaadu irraa na eegeera. Yoon sodaadhe hinaaffaadhaan Yihowaa tajaajiluu akkan hin dandeenye beeka. Wanti kun akka taʼu yoon heyyame Yihowaa waaqeffachuu irraan of dhorka jechuudha. Kun immoo wantuma Seexanni akkan godhu barbaadudha. Kanaa mannaa, guutummaatti Yihowaatti akkan amanamu yoon argisiise, keessi koo tasgabbii Waaqayyoo wajjin nagaa qabachuudhaan argamun argadha. Tasgabbiin kun immoo na cimsa.

Yihowaan Waaqa “nagaa tajaajilaa isaatti gammadu” waan taʼeef, Viktoorii fi Sargeen obsan jabaatanii dhaabbachuu isaaniitiin isaan eebbisuu isaa akka itti fufu amanannaa guutuu qabna.—Faarfannaa 35:27.

Chaartii Yeroo

Hagayya 24, 2022

Himanni yakkaa isarratti baname. Manni isaa ni sakattaʼame. Qabamee mana hidhaa hamma murtiitti dhihaatanitti yeroodhaaf keessa tursiifaman keessatti hidhame
Hagayya 26, 2022

Mana hidhaa hamma murtiitti dhihaatanitti yeroodhaaf keessa tursiifamanii gadhiifame; manaa akka hin baane dhorkame
Onkoloolessa 17, 2022

Dhorkaa manaa akka hin baane isa dhowwu irraa kaafame; dhorkaa kan biraa jala galfame
Ebla 13, 2023

Himanni yakkaa isa irratti dhihaate mana murtiitti ilaalamuu jalqabe

Kanneen Armaan Gadiis ni Jaallatta Taʼa

ODUU HAARAA

Sababii Amantii Isaaniitiin Hidhamaniiru—Kiraayimiyaa

Dhugaa Baatonni Yihowaa Kiraayimiyaa keessa jiran sababii amantii isaaniitiin hidhamaniiru. Seenaa isaanii dubbisi, maqaa Dhugaa Baatota Yihowaa yeroo ammaatti hidhamanii jiranii ilaali.

ODUU HAARAA