Yeroo dhukkubni daddarbaan kun addunyaa maratti babalʼachaa jiru kanatti, Dhugaa Baatonni Yihowaa qooqa adda addaatiin Kitaaba Qulqulluu haaraa baasuu isaanii itti fufaniiru. Waxabajjii 28, 2020, Kitaabni Qulqulluu Hiika Addunyaa Haaraa qooqa afuriin, jechuunis Siwaatii, Tsoongaa, Zuuluu fi Chitoongaadhaan baʼeera. Kana malees, Kitaabni Qulqulluun Hiika Addunyaa Haaraa Afaan Giriikii qooqawwan Beeliiz Kiriiyoolii fi Tootanaakiin baʼeera. Obboloonni keenya sababii dhukkuba daddarbaa COVID-19n kan kaʼe walitti qabamuu kan hin dandeenye taʼanis, Kitaabota Qulqulluu kana bifa elektiroonikiitiin argachuu dandaʼuu isaaniitti guddaa gammadaniiru. Hiikkaawwan Kitaaba Qulqulluu kun baʼuun isaanii kan ibsame haasaawwan dursanii waraabamaniin yeroo taʼu, babalʼistoonni karaa viidiyoo konfiransii ykn tamsaasa viidiyoo kallattiidhaan darbuun haasaawwan kana hordofuu dandaʼaniiru.

Obboleessi keenya Jeefrii Jaaksan inni miseensa Qaama Ol Aanaa taʼe Kitaaba Qulqulluu Hiika Addunyaa Haaraa Afaan Siwaatiidhaan, akkasumas Kitaaba Qulqulluu Hiika Addunyaa Haaraa isa haareffame Afaan Tsoongaa fi Zuuluutiin baʼuu isaa beeksiseera (suuraa gubbaa jiru ilaali). Babalʼistoonni Afriikaa Kibbaa fi Eeswaatiinii jiraatanis sagantaa addaa kana hordofaniiru.

Babalʼisoota 38,000 naannoo waajjira damee Afriikaa Kibbaa keessa jiran dabalatee, namoonni qooqa Siwaatii, Tsoongaa fi Zuuluu dubbatanii fi tilmaamaan miliyoona18.5 taʼan akka jiran tilmaamama.

Obboleessi keenya Oogastiin Seemoo inni miseensa Koree Waajjira Damee Maalaawwi taʼe Kitaabni Qulqulluun Hiika Addunyaa Haaraa Afaan Chitoongaatiin (Maalaawii) baʼuu isaa beeksiseera.

Gareen hiikkaa sun Kitaaba Qulqulluu haaraa Afaan Chitoongaatiin guutummaatti hiikee xumuruuf waggaa lamaa oliif dhimmee hojjeteera. Obboleettiin hiikkaa kana irratti hirmaatte tokko akkana jetteetti: “Afaan Chitoongaa loqoda sadii qaba. Namoonni naannoo isa tokko keessa jiraatan jechoota namoonni naannoo kan biraa keessa jiran itti hin fayyadamne fayyadamu. Kanaaf jechoota hedduun isaanii hubatan of eeggannoodhaan filachuuf carraaqqii gooneerra. Kana malees, ibsawwan tarii namoota dubbisanitti haaraa taʼan irratti ibsa kennuuf miiljaleewwan fayyadamneerra.”

Obboleettiin hiikkaa irratti hirmaatte kan biraanis akkana jetteetti: “Babalʼistoonni Kitaaba Qulqulluu kana tajaajila irratti ykn walgaʼii irratti fayyadamuun salphaa isaaniif taʼa; sababiin isaas qooqi kun salphaa fi ifa dha, dubbisuu fi hubachuunis ulfaataa miti.”

Obboleessi keenya Jooshuwaa Kiilgoor inni miseensa Waajjira Damee Gidduu Gala Ameerikaa taʼe Kitaabni Qulqulluu Hiika Addunyaa Haaraa Afaan Giriikii Afaan Beeliiz Kiiriyooliin baʼuu isaa beeksiseera. Namoonni 1,300 ol taʼan saganticha hordofaniiru.

Gareen hiiktotaa jaʼa jiʼoota 16f hojii kana irratti hirmaataniiru. Faayidaa hiikkaan haaraan kun qabu ilaalchisee obboleettiin hiikkaa kana irratti hirmaatte tokko akkana jetteetti: “Obboloonnii fi obboleettonni keenya amma hiikkaa Kitaaba Qulqulluu sirrii fi amanamuu dandaʼu argataniiru. Hiikkaan kun ibsaa hubannaa isaanii isaaniif guddisu isaaniif taʼa.”

Obboleettiin hiikkaa kana irratti hirmaatte kan biraanis akkana jetteetti: “Yeroo dhukkubni daddarbaan COVID-19 jiru kanatti obboloonnii fi obboleettoonni qooqa Beeliiz Kiiriyool dubbatan Kitaaba Qulqulluu qooqa isaaniitiin dubbisuu ni dandaʼu. Kitaabni Qulqulluun kunis garaa isaanii isa dhiphate tasgabbeessuu fi rakkoowwan gara fuulduraatti isaan mudachuuf jiran caalaatti akka dandamatan isaan gargaara.”

Beeliiz keessa gumiiwwan Afaan Beeliiz Kiiriiyoliin gegeeffaman 19 keessa babalʼistoota 867tu jira. Kana malees, Yunaayitd Isteetis keessa babalʼistoota naannoo Afaan Beeliiz Kiiriiyooliin dubbatamu keessa tajaajilan 58tu jira.

Obboleessi keenya Jeesee Peerez inni miseensa Koree Waajjira Damee Gidduu Galeessa Ameerikaa taʼe Kitaabni Qulqulluun Hiika Addunyaa Haaraa Afaan Giriikii qooqa Tootanaakiin baʼuu isaa beeksiseera. Babalʼistoonni gumiiwwan 50 keessa jiranii fi tilmaamaan 2,200 taʼan Sagantaa kana hordofaniiru.

Gareen hiikkaa sun hojii kana xumuruuf gara waggaa sadii ol isatti fudhateera. Hiikkaan kun carraaqqii namoota Meeksiikoo keessa jiranii fi 250,000 ol taʼaniif misiraachoo lallabuuf godhamu irratti gumaacha guddaa godha.

Obboleessi hiikkaa kana irratti hirmaate tokko Kitaaba Qulqulluu Hiika Addunyaa Haaraa Afaan Giriikii ilaalchisee akkana jedheera: “Kitaabota Qulqulluu afaan Tootanaak kaan irraa haala adda taʼeen,kitaabni kun jechoota guyyaa guyyaadhaan itti fayyadamnutti fayyadama. Amma dhimmoota Kitaaba Qulqulluu keessa jiran adda addaa namoota naannoo keenya keessa jiraniif ibsuun caalaatti salphaa nuuf taʼa.”

Obboleessi hojii hiikkaa irratti hirmaate kan biraanis akkana jedheera: “Obboloonnii fi obboleettonni keenya hiikkaa Kitaaba Qulqulluu kana argachuuf yeroo dheeraadhaaf hawwiidhaan eeggachaa turaniiru. Hamma yeroo dhihootti, babalʼistoonni tokko tokko walgaʼii torban gidduutti kutaa yommuu dhiheesssan caqasoota tokko tokko Afaan Ispaanishii irraa gara Tootanaakitti hiikaa turaniiru. Kana booda garuu Kitaabota Qulqulluu Afaan Giriikii irraa yommuu caqasan akkana gochuun isaan hin barbaachisu.”

Hiikkaan haaraan kun bifawwan nama fayyadan qabu keessaa tokko tokko, hiika kan biraa jechi yaada isaa keessatti ibsame tokko qabu miiljalee irra kaaʼuu isaa ti. Ibsawwan kun loqoda namoonni Afaan Tootanaak dubbatan itti fayyadaman adda addaa miiljalee irra kan kaaʼaman waan taʼaniif, hiikkaan kun namoota qooqa kana dubbatan hundumaatiif salphaatti kan hubatamu dha.

Obbolootaa fi obboleettota qooqa afaan dhalootaa isaaniitiin Kitaabota Qulqulluu kana argatanii wajjin gammanneerra. Obboloonni keenya ‘goraadee hafuuraa’ kana tajaajila isaanii fi qoʼannaa dhuunfaa isaanii irratti yommuu itti fayyadaman amantiin isaanii akka cimu mirkanaaʼoo dha.—Ibroota 4:12.