Walgaʼii guddaan “Saboota Gammadoo” jedhamuu fi walgaʼii biyyoolessaa Dhugaa Baatota Yihowaa isa jalqabaa taʼe erga godhamee Hagayya 4, 2021, waggaa 75 guuta. Walgaʼiin naannoo Hagayya 4-11, 1946⁠tti ture kun, kan geggeeffame Ohaayoo, Kileevlaandi, Yuunaayitid Isteetis Istaadiyomii Magaalichaa fi Galma Walgaʼii Magaalichaa isatti aanee jirutti ture.

Obboloonni keenya walgaʼii naannoo kana kan qopheessan Waraana Addunyaa Lammaaffaa booda yoo taʼu, walgaʼiin kun walitti buʼiinsa loltootaa guutummaa addunyaa irratti hubaatii guddaa geessise irraa faallaa ture. Walgaʼii guddaa kana irratti obboloonnii fi obboleettoonni addunyaa mara irraa dhufan nagaadhaan walitti qabamaniiru. Yeroo Yunaayitid Isteetis keessatti namoonni gurraachii fi adiin walitti hin makamnetti, namoonni sanyii fi akkaataa guddinaa gara garaa keessaa dhufan hundi gammachuudhaan walitti qabamanii turan.

Walgaʼii naannoo “Saboota Gammadoo” jedhamu kana irratti Dhugaa Baatonni Yihowaa 80,000 taʼan yeroo jalqaatiif bakka tokkotti walitti qabamaniiru. Oboloonnii fi obboleettonni keenya sababii waraanaatiin wal irraa fagaatanii erga turanii booda walitti qabamuun isaanii isaan gammachiisee ture. Bakka buutonni 302 biyyoota 32 irraa dhufan walgaʼii kana irratti argamaniiru. Obboleessi keenya Naataan Noor Dilbata guyyaa xumuraa walgaʼichaa irratti haasaa “Bulchaa Nagaa” jedhu kennee ture.

Walgaʼichi milkaaʼinan kan godhame taʼus, rakkinoonni jiru turan. Guyyaa jalqabaa walgaʼichaatti obboloota walgayicha qindeessanitti baayʼee ulfaatee ture. Namoonni Galma Walgaʼii Magaalichaatti walitti qabaman guutee iddoon taaʼumsaa dhibee ture. Kanaaf obboloonni namni hundi sagantaa galgalaa saʼaatii 1:45⁠tti jalqabuuf bakka taaʼumsaa akka argatuuf istaadiyomii galmichatti aanee jiru fayyadamuuf dirqamaniiru. Haa taʼu malee kubbaan beezboolii hanga saʼaatii 12:30⁠tti taphatamuuf sagantaan qabamee ture.

Taphini beezboolii inni lammaffaan utuu geggeeffamaa jiru bakakkaanii fi kakawween namoonni taphichi utuu hin xumuramin dhiisanii akka baʼan taasise. Sana booda, haali qilleensa isaa ni sirreeffamee, Dhugaa Baatonni 50,000 taʼan istaadiyomii sana keessatti sagantaa isa galgalaa irratti argamuu dandaʼaniiru.

Walgaʼii guddaan “Saboota Gamadoo” jedhamu kana irratti barruu haaraan Dammaqaa! jedhamu, akkasumas kitaabni “Waaqayyo Dhuga Qabeessa haa Taʼu” jedhamuu fi Kitaaba Qulqulluu qoʼchiisuuf gaargaaru ni baʼe. Kana malees, obboleessi keenya Noor bakki maxxansaa Birukliin Niiwu Yoorki Ameerikaa akka babalʼatuu fi waajjironni damee biyoota jaʼa kan birootti akka banaman beeksise.

Yeroon baayʼee gammachiisaa taʼe namoonni 2,602, jechuunis obboloonni 903 fi obboleettonni 1,699 taʼan haroo dhihoo sana jiruu fi Iirii jedhamutti cuuphamuu isaanii ture. Wantooni adda taʼan kanbiroon immo Qoʼannaa Masaraa Eegumsaa fi Mana Barumsaa Tajaajila Tiʼookraasii, akkasumas muziqaa namoota 160n qindeeffame kan dabalatanidha.

Walgaʼiin guddaa kun walgaʼiiwwan sana booda godhamaniif fakkeenya kan taʼu ture. Fakkeenyaaf, dipaartimantiiwwan walgaʼii guddaa, kanneen akka keessummeessitoota, Biroo Obboloonni Dura Taaʼaa Taʼanii Tajaajilan, Gargaarsa Jalqabaa, Instaaleshinii, Bakka Meeshaaleen Badanii Argaman Kaaʼaman jiran ni hundeeffaman.

Obboleessi keenya Roon Liitil, yeroo ammaatti gumii Meekiispooti Peenselvaaniyaa Ameerikaa keessatti jaarsa gumii taʼee tajaajilu yeroo sanatti abbaa isaa fi obboleessa isaa wajjin walgaʼii gudaa kana irratti yeroo argamu umuriin isaa waggaa 11 ture. Guyyoota saddeettan walgaʼiin sun geggeeffametti sadan isaanii iyyuu konkolaataa abbaa isaa keessa bulaa turan.

Obboleessi keenya Liitil yeroo itti barruun Dammaqaa! baʼe amma iyyuu sirriitti yaadata. Akkana jedheera: “Yeroon barruun Dammaqaa! beeksisan hundi keenya barruu tokko argachuuf fiigna turre. namni hundi barruu sana yoo argachuu baatte sii kennuuf yaalii godha ture.”

Obboleessi keenya Liitil yeroo ammaatti umuriin isaa waggaa 86 taʼeera, Dhugaa Baatni hedduun walitti qabamanii arguun isaa baayʼee isa dinqisiisee akka tures ni yaadata. Akkana jedheera: “Walgaʼiin isaa akka xumuramu akka hin barbaanne natti dhagaʼamee akka ture nan yaadadha. Yeroo baayʼee nama gammachiisu ture.”

Yihowaan “walgaʼiiwwan qulqulluu” keenya waan nuu eebbiseef guddaa isa galateeffannaa.— Leewwota 23:2.