Waajjirri damee Dhugaa Baatota Yihowaa Arjantiinaa inni Boonas Aayirasitti argamu Muddee 11, 2019⁠tti godambaa haaraa baneera. Godambaan kun agarsiisa lama kan qabu yeroo taʼu, inni tokko “Fakkeenya Amantii Isaanii Hordofaa,” inni lammaffaan immoo, “Dubbiin Kee Bara Baraaf Jiraata” kan jedhu dha.

“Fakkeenya Amantii Isaanii Hordofaa” inni jedhu seenaa Dhugaa Baatota Yihowaa Arjantiinaa fi Uraagaay isa jalqabbii isaanii bara 1920mmanii irraa kaasee hamma seenaa isaanii isa ammayyaatti jiru kan qabate dha. Qabiyyeen addaa agarsiisni kun qabu seenaa sochii obboloonni keenya yeroo hojiin isaanii Arjantiinaa keessatti dhorkaa jala turetti gochaa turan kan argisiisu taʼuu isaa ti. Agarsiisni kun ijoolleen Dhugaa Baatota Yihowaa alaabaadhaaf kabaja adda taʼe kennuu diduu isaaniitiin barumsa irraa kan ariʼaman, dargaggoonni immoo waraana irratti hirmaachuu diduu isaaniitiin kan kaʼe yeroo dheeraadhaaf kan hidhaman akkamitti akka taʼe argisiisa. Dargaggoonni amanamoo taʼan hedduun rukutamaniiru, akkasumas dararamni guddaan irra gaʼeera; yoo xinnaate obboloonni sadii immoo sababii amantii isaaniitiif ajjeefamaniiru.

“Dubbiin Kee Bara Baraaf Jiraata” inni jedhu immoo Kitaabota Qulqulluu hedduu kan qabatee fi carraaqqii Kitaaba Qulqulluu gara Afaan Ispeenitti hiikuuf waggoota hedduudhaaf godhame kan qabate dha. Kuusaa kana keessatti warra baayʼinaan hin argamnee fi baayʼee barbaachisoo taʼan dabalatee Kitaabonni Qulqulluun 47 kan argaman yeroo taʼu, isaan keessaa tokko Ferrara Bible isa bara 1630⁠tti qophaaʼe dha. Kitaabni kun hiikkaa Kitaabota Qulqulluu Afaan Ibrootaa Afaan Ispeeniin qophaaʼe yeroo taʼu, baafata mata duree irratti maqaa Waaqayyoo qabateera. Dabalataanis, agarsiisni kun kitaaba jalqabaa Reina-Valera Bible jedhamuu fi bara 1602⁠tti qophaaʼe kan qabate dha. Hiikkaan Kitaaba Qulqulluu kun guutummaa kakuu moofaa keessatti maqaa Waaqayyoo isa Yihowaa jedhu ni fayyadama. Kitaabni Reina-Valera Bible jedhamu kun Kitaaba Qulqulluu Afaan Ispeeniin baayʼinaan hojii irra oolaa ture dha.

Namoonni hedduun biyyoota biraadhaa gara Arjantiinaatti waan godaananiif agarsiisni kun hiikkaawwan Kitaaba Qulqulluu afaan godaantota jaarraa 19⁠ffaa keessa gara Arjantiinaatti godaananiin qophaaʼan kan qabate dha. Daawwattoonni Kitaabota Qulqulluu Afaan Armeeniyaa, Kirooʼeeshiyaa, Ingiliffa, Jarman, Ibroota, Hangaarii, Aayirish Gaaʼeliik, Xaaliyaanii, Poortugaalii fi Weelsiin qophaaʼan daawwachuu dandaʼu.

Kana malees kuusaan kun hiikkaawwan Arjantiinaa keessatti qophaaʼan kan akka Nuevo Testamento isa Paabloo Beesaniin bara 1919⁠tti qophaaʼe, kana malees hiikkaawwan ammayyaa kan akka, afaan Choorotee, Maapundungun, Mochoovii, Pilaagaa, Toobaal del Ooʼestee, Toobaa Qoomii fi Wiichiitiin qophaaʼan kan qabate dha.

Obboleessi keenya Tiimootiyoo Koostaantiinoo inni waajjira damee Arjantiinaa keessaa hojjetu akkana jedheera: “Warra Kitaabota Qulqulluu kana agarsiisa kanaaf qopheessan hunda baayʼee galateeffanna. Warri Arjantiinaa keessaas taʼe biyyoota biraa irraa dhufanii godambaa kana daawwatan waaʼee seenaa Kitaaba Qulqulluus taʼe Dhugaa Baatota Yihowaa Arjantiinaa fi Uraagaay keessa jiranii wanta hedduu barataniiru.