Sadaasa 28, 2020, Kitaaba Qulqulluu Hiika Addunyaa Haaraa guutuun isaa inni maxxanfamee fi bifa elektiroonikiitiin qophaaʼe afaanota Indooneeshiyaa afuriin kan baʼe siʼa taʼu, isaanis: Baataak Kaaroo, Baataak Toobaa, Jaavaaneesee fi Niyaasi dha. Obboleessi Jeefrii Jaaksan inni miseensa Qaama Ol Aanaa taʼe, Kitaabota Qulqulluu kana sagantaa addaa dursee waraabamee fi gumiiwwan odoola Indooneeshiyaa hedduutti argaman akka ilaalan taasifame irratti baaseera. Saganticha namoonni gara 41,265 ilaalaniiru. Dabalataanis Obboleessi Jeefrii Jaaksan Kitaabni Qulqulluun Hiika Addunyaa Haaraa Afaan Giriikii, afaan Suundaatiin bifa elektiroonikiitiin dhiheenyatti akka baʼu beeksiseera.

Hiikkawwan Kitaaba Qulqulluu kun buʼaa hiiktota pirojektii kana irratti waggaa sadii fi walakkaa oliif jabaatanii hojjetanii ti. Afaanota hiikkawwan haaraan kun ittiin baʼan afur keessa isa tokko yoo xinnaate namoonni miliyoona 100 ol ni dubbatu. Dabalataanis babalʼistoonni 2,600 ol taʼan afaanota kana tajaajilaa fi walgaʼii gumii irratti ni fayyadamu.

Namoonni yeroo harʼaa jiran qubeewwanii fi jechoota durii hiikkaa Kitaaba Qulqulluu duraanii keessa jiran yeroo baayʼee hin beekan. Warra hiikan keessaa tokkoon yaadni itti aanu dubbatameera: “Kitaaba Qulqulluu Hiika Addunyaa Haaraa guutuu isaa ammayyaa taʼe kana qabaachuun, Yihowaan namni hundi afaan salphaatti hubatamuu fi garaa isaa tuquun Dubbii isaa akka dhagaʼu akka barbaadu caalaatti na amansiiseera.”

Daaniʼel Puurnomoo inni miseensa Koree Waajjira Damee Indooneeshiyaa taʼe akkas jedheera: “Keessumaa sababa COVID-19tiin yeroo rakkisaa keessa jiraanna. Obboloonnii fi obboleettonni keenya jaallatamoon afaanota kana dubbatan kennaa hafuura yeroo sirriitti argame kana ni dinqisiifatu.”

Yihowaan Dubbii isaa isa kennaa dinqisiisaa taʼe namoonni dabalataa akka argatan gochuu isaatti isa galateeffanna. Namoonni afaanota kana dubbatan dabalataa barumsa Kitaaba Qulqulluu irraa akka fayyadaman hawwii keenya dha.—Yaaqoob 1:17.