Adoolessa 23, 2023, Obboleessi keenya Lammaa Koyiraa, inni miseensa Koree Waajjira Damee Itoophiyaa taʼe, Kitaaba Qulqulluu-Wangeela Maatewos Afaan Sidaamaa fi Afaan Walaayittaatiin bifa dijitaalaatiin baʼuu isaa beeksise. Kitaabni kun baʼuun isaa kan beeksifame, walgaʼii addaa Galma Walgaʼii guguddaa Finfinnee, Itoophiyaatti godhame irrattidha. Sagantaa kana irratti namoonni gara 1,800 taʼan qaamaan kan argaman yommuu taʼu, namoonni dabalataa 12,669 taʼanimmoo viidiyoo konfiransii fi televizyinii saatalaayiitiin darbuun hordofaniiru. Beeksisicha booda kitaabicha yeruma sana bifa dijitaalaatiin buufachuun dandaʼameera. Jiʼoottan itti aananitti Kitaabni Maatewos inni maxxanfame gumiiwwan ni gaʼa.

Afaan Walaayittaa fi Sidaamaan harka caalaa kibba Itoophiyaatti dubbatama. Gareen hiikkaa Afaan Walaayittaa bara 2005​tti hundeeffame; gareen hiikkaa Afaan Sidaamaa immoo bara 2007​tti hundeeffame. Gareewwan lamaanuu biiroo hiikkaa fagoo naannoo afaanichi baayʼinaan itti dubbatamutti hojjechaa jiru.

Afaan lamaaniinuu Kitaabni Qulqulluun kan hiikame taʼus, salphaatti kan hin argamnee fi baayʼee miʼaadha. Namni hiikkaa Afaan Sidaamaa irratti hojjetu tokko akkana jechuudhaan haala obboloonnii fi obboleettonni Afaan Sidaamaa dubbatan hedduun keessa jiran ibseera: “Gumiiwwan hedduun Kitaaba Qulqulluu tokkitti qofa qabu. Walgaʼii irratti Kitaaba Qulqulluutti kan fayyadamu nama haasaa dhiheessu qofadha. Dubbisa Kitaaba Qulqulluu dhuunfaati dubbisuuf, Kitaaba Qulqulluu tokkittii sana fayyadamuuf gara Galma Walgaʼii dhaquu qabna. Kitaaba Maatewos argachuun keenya Dubbii Waaqayyoo mana keenya teenyee dubbisuu fi qoʼachuuf nu gargaara.”

Namni hiikkaa Afaan Walaayittaa irratti hojjetu tokkommoo akkana jechuudhaan dinqisiifannaa jechoota Hiikni Addunyaa Haaraa itti fayyadamuuf qabu ibseera. Akkana jedheera: “Hiikaan Kitaaba Qulqulluu tokko Maatewos 28:19 irratti hafuura qulqulluu qaama mataa isaa akka qabu godhee ibsa. Kun immoo tajaajila irratti garaa garummaa Abbaa, Ilmaa fi hafuura qulqulluu gidduu jiru ibsuun ulfaataa akka taʼu godha. Karaa biraatiin garuu Hiikni Addunyaa Haaraan, hafuurri qulqulluun humna akka taʼe sirriitti ibsa. Kitaaba Maatewos Afaan Walaayittaatiin argachuun keenya, hojii lallabaa keenya irratti jijjiirama guddaa akka fidu amanannaa guutuun qaba.”

Kitaaba Qulqulluu-Wangeela Maatewos Afaan Sidaamaa fi Afaan Walaayittaatiin baʼuun isaa, misiraachoon “saba, gosa, qooqaa fi nama hundumaaf” dhihaachaa akka jiru ragaa guddaa taʼa.—Mulʼata 14:6.