Taphni Dargaggootaa Olompikii Gannaa 2024, magaalota Kooriyaa Kibbaa afuritti Amajjii 19 hanga Guraandhala 1, 2024​tti godhamee ture. Atleetonni, gaazexeessitoonni, akkasumas namoonni saganticha hordofanii fi kumaan lakkaaʼaman biyyoota 70 ol keessaa dhufanii turan. Yeroo kanatti Dhugaa Baatonni Yihowaa 2,600 ol taʼan duula lallabaa addaa qophaaʼerratti hirmaatanii turan. Gaariin barreeffamoota Kitaaba Qulqulluurratti hundaaʼan qabate bakkawwan 34​tti afaan afuriin qopheeffamee ture.

Dargaggeessi Afaan Chaayinaa Mandariin jedhamu dubbatu tokko gara obboloota lamaatti dhihaate, gaariiwwan keenya magaalattii keessatti bakka adda addaatti akka arge isaanitti hime. Haa taʼu malee, gaarii poostarii waaʼee gammachuu maatii ibsu erga argee booda itti goree caalaatti beekuuf murteesse. Obboloonni sunis jw.org irraa birooshura Maatiin Keessan Gammachuu Qabaachuu Ni Dandaʼa jedhamu Afaan Mandariiniin akkamitti buufachuu akka dandaʼu isaaf ibsan. Dargaggeessi sunis yeruma sana moobaayilii isaarraa weebsaayitii keenya kan banate yommuu taʼu, obboloonni waan isa gargaaraniif isaan galateeffate.

Hiriyoonni gaaʼelaa Dhugaa Baatota taʼan tokko, nama Yuukreenii dhufee wajjin akkasumatti haasaʼuu jalqaban. Afaan isaa dubbachuu waan hin dandeenyeef, appilikeeshinii moobaayilii isaanii irra jiru fayyadamuudhaan waliin haasaʼuu jalqaban. Utuma waliin mariʼatanii, namni sun suuraa magaalaa isaa ishii miisaayiliidhaan rukutamte mulʼisu isaaniitti argisiise. Hiriyoonni gaaʼelaa sun haalli isaa akka isaan gaddisiise erga ibsaniifii booda, caqasa dhiheenyatti waraanni akka balleeffamu dubbatu isatti argisiisan. Abdii Kitaaba Qulqulluu keessatti argamu kana afaanuma dubbatuun dubbisuun isaa baayʼee isa jajjabeesse. Hiriyoonni gaaʼelaa kun isaa wajjin maree isaanii itti fufuuf beellama qabatan.

Obboleettiin Iin-Suuk jedhamtu shamarree dandeettii cabbii irra sigigaachuu qabduu fi haadha ishii wajjin Fiinlaandii dhuftee wajjin Ingiliffaan maree jalqabde. Utuma waliin haasaʼaa jiranii, obboleettiin keenya dhimmoota hedduu weebsaayitii keenya kutaa, “Ijoollee Dargaggoota Taʼan Guddisuu” jedhu jala jiran ibsiteef. Haati odeeffannoo kana argachuu ishiitti kan gammadde taʼuu isaa irrayyuu, deebitee weebsaayitii keenya akka ilaaltu dubbatte.

Obboloonnii fi obboleettonni keenya Kooriyaa Kibbaa jiran, qophii biyyoolessaa kanatti fayyadamanii, namoota hedduu argachuuf carraaqqii gochuu isaanii fi ‘maqaa Yihowaa jajachuu’ isaaniitti gammanneerra.—Faarfannaa 148:13.