Amajjii 7, 2024, obboleessi keenya Juul Baazii inni miseensa Koree Waajjira Damee Koot Diivuwaar taʼe, sagantaa addaa Maan, Koot Diivuwaaritti godhame irratti Kitaaba Qulqulluu—Wangeela Maatewos Afaan Yaakuubaatiin baʼuu isaa beeksise. Walumatti qabaatti, saganticha irratti namoonni 302 qaamaan kan argaman yommuu taʼu, namoonni 257 taʼan immoo viidiyoo konfiransiidhaan hordofaniiru. Inni bifa dijitaalaatiin baʼee fi sagaleen isaa yeruma sana baʼuun isaa ibsameera. Bifa maxxansaatiin immoo dhiheenyatti baʼa.

Tilmaamaan namoonni miliyoona 1.5 taʼanii fi Koot Diivuwaar, Giinii fi Laayibeeriyaa keessa jiraatan Afaan Yaakuubaa dubbatu. Yeroo ammaatti Koot Diivuwaar keessa obboloonnii fi obboleettonni gara 254 taʼan gumii Afaan Yaakuubaatiin geggeeffamu afurii fi garee jaʼa keessa tajaajilaa jiru.

Afaan Yaakuubaatiin hiikkaan Kitaaba Qulqulluu guutuun isaa hin jiru. Kitaaba Qulqulluu—Maatewos-Mulʼataa lama Afaan Yaakuubaatiin hiikamaniiru. Haa taʼu malee, lamaan isaaniiyyuu maqaa Yihowaa hin fayyadaman, jechoonni isaan itti fayyadamanis hubachuuf ulfaataadha. Kanaan kan kaʼe, jechoonni ammayyaa Kitaaba Qulqulluu—Wangeela Maatewos itti fayyadamee fi hubachuuf salphaa taʼe ammuma iyyuu namoota gargaaraa jira. Obboleessi tokko akkana jedheera: “Yeroo baayʼee caqasoota hiikkaawwan kana irra jiran tokko tokko hubachuuf, baayʼee suuta jechuu, yeroo tokko tokkommoo siʼa tokkoo ol dubbisuun barbaachisa taʼuu dandaʼa. Haa taʼu malee, amma kitaaba Maatewos dubbisuu fi sirriitti hubachuuf carraa guddaa arganneerra!”

Obbolootaa fi obboleettota Afaan Yaakuubaa dubbatan, kennaa dinqisiisaa isaaniis taʼan namoonni kan biroo hedduu ‘hundumaa dura Mootummicha barbaaduuf’ isaan gargaaru argachuu isaanitti Yihowaa guddaa galateeffanna.—Maatewos 6:33.