AMAJJII 17, 2023
MEEKSIKOO
Kitaabni Qulqulluun Hiika Addunyaa Haaraa Guutuun Isaa Afaan Mallattoo Meeksikootiin Baʼe
Amajjii 1, 2023 obboleessi Armaandoo Ookaa inni Miseensa Koree Waajjira Damee Giddu Gala Ameerikaa taʼe Kitaabni Qulqulluun Hiika Addunyaa Haaraa Guutuun Isaa Afaan Mallattoo Meeksikootiin jw.org fi JW Library appilikeeshinii Afaan Mallattoo irratti akka argamu beeksise. Obboleessi Ookaa walgaʼii addaa Galma Walgaʼii Guddaa Eel Tehokotee keessatti godhame irratti oduu nama gammachiisu beeksise.
Obboleessa (mirga) sagantaa Kitaaba Qulqulluu haaraa namoota dhagaʼuu hin dandeenyeef hiikaa jiru akkasumas babalʼisaa mallattoo afaaniitti fayyadamaa jiru
Kun weerarri dhibee Kooviid-19 erga gaʼee kaasee walgaʼii Dhugaa Baatonni Yihowaa waajjira damee Giddu Gala Ameerikaa jala jiran qaamaan irratti argaman keessaa isa guddaadha. Dimshaashumatti obboloonnii fi obboleettonni 2,317 walgaʼii kana irratti qaamaan argamaniiru. Obboloonni kuma hedduutti lakkaaʼaman immoo Galmawwan Walgaʼii guguddaa fi Galmawwan Walgaʼiitti sagantaan kun yeroo darbu hordofaniiru.
Obbo Sarjoo Peenaa kan jedhamanii fi hayyuun Afaan Mallattoo Ameerikaa akkasumas Aadde Maariyaa Tereesaa Vaaskuweez, Bulchiinsa Mootummaa Yuukataanitti daayireektara dhaabbata namoota rakkina qaamaa qabanii kan taate walgaʼii kana irratti argamaniiru.
Obbo Peenaan akkana jedhaniiru: “Dhugaa Baatota Yihowaa Meeksikoo jiran baayʼee galateeffanna. Hanga Amajjii 1, 2023tti namoonni gurri isaanii hin dhageenye Kitaaba Qulqulluu Guutuu Isaa Afaan Mallattoo Meksikootiin argataniiru. Baayʼeen dinqisiifadha; hojii ajaaʼibsiisaa taʼedha.”
Bara 2008 Kitaaba Qulqulluu Hiika Addunyaa Haaraa Maatewos-Mulʼata Afaan Mallattoo Meeksikootti hiikuu jalqabame. Waggoota 14 darbanitti kitaabonni Kitaaba Qulqulluu akkuma hiikamee xumurameen baʼaniiru. Kun Kitaaba Qulqulluu Afaan Mallattoo Meeksikootiin hiikamee baʼe isa jalqabaati.
Weerarri dhibee Kooviid-19 yeroo turetti illee babalʼistoonni gurri isaanii hin dhageenye kitaabota Kitaaba Qulqulluu baʼan hedduu irraa faayidaa argataniiru. Obboleessi tokko akkana jedheera: “Yeroo weerara dhibeetti kitaabonni Kitaaba Qulqulluu hedduun akka baʼan godhamuu isaatti baayʼeen galateeffadha. Yihowaan gama hafuuraatiin nu sooruu isaa itti fufee ture.”
Obboleettiin gurri ishii hin dhageenye tokko akkana jetteetti: “Kitaaba Qulqulluu Hiika Addunyaa Haaraa Afaan Mallattoo Meeksikootiin argachuu keenya dura obboloonni caqasoota Kitaaba Qulqulluu naaf hiiku turan. Haa taʼu malee, obboloonni caqasoota haala wal fakkaatuun hiikuun isaan rakkisa. Kun immoo caqasoota Kitaaba Qulqulluu yaadatti qabachuun akka natti ulfaatu godheera. Amma garuu Kitaaba Qulqulluu hubachuuf gargaarsi warra kaanii na hin barbaachisu.”
Obboloonnii fi obboleettonni keenya dhagaʼuu hin dandeenye Kitaaba Qulqulluu guutuu argachuusaanii baayʼee akka isaan fayyadu amanna. Yihowaan carraaqqii ergaa isaa isa abdii gara fuulduraa qabate hiruuf godhamu akka eebbisu ni kadhanna.—Ermiyaas 29:11.
Kanneen Armaan Gadiis ni Jaallatta Taʼa
GAAFFIIWWAN YEROO BAAYʼEE GAAFATAMAN
Dhugaa Baatonni Yihowaa Macaafa Qulqulluu Mataasaanii Qabuu?
Hiika Macaafa Qulqulluu addaddaatti fayyadamuunkee hubannaa balʼaa argachuuf si gargaara. Sababiiwwan sadan Macaafni Qulqulluun Hiikni Addunyaa Haaraa adda itti taʼan, qayyabannaakee keessatti hiika kana dabaluuf si kakaasuu dandaʼu.
BUUSIIN GOOTAN FAAYIDAA IRRA OOLAA KAN JIRU AKKAMITTI?
Kitaaba Hunda Caalaa Barbaachisaa Taʼe Qopheessuu
Hiika Addunyaa Haaraa hiikuu, maxxansuu fi qopheessuun isa ati yaaddu caalaa waan hedduu dabalata.
GAAFFIIWWAN YEROO BAAYʼEE GAAFATAMAN
Dhugaa Baatonni Yihowaa Kakuu Moofaatti Ni Amanuu?
Kutaan Macaafa Qulqulluu yeroon itti darbe jiraa? Kiristiyaanonni seenaa sirrii fi gorsa hojii irra ooluu dandaʼu Caaffata Qulqullaaʼoo afaan Ibrootaa keessa argachuu akkaataa itti dandaʼan bari.