GURAANDHALA 9, 2024
RAASHIYAA

Haala Sodaachisaa Amantiidhaan Moʼuu

BANI

Manni Murtii Magaalaa Bilaagoovesheeniskii Naannoo Amuur dhimma obboleettota keenya Kiristiinaa Gooliik, Yekaatarinaa Olisheeviskaayaa, Maariyaa Miyaasniikoovaa fi Vaalantiinaa Yermiiloovaa irratti dhiheenyatti murtoo kenna jedhamee eegama. Abbaan alangaa hanga ammaatti wanta obboleessa keenyarratti akka murteeffamu barbaadu hin beeksisne.

Chaartii Yeroo

Kiristiinaa Gooliik

Bara Dhalootaa: 1992 (Yuukreen)

Seenaa Jireenyaa: Giraafiiksii fi diizaayinii weebii baratteetti

Dhugaa Baatota Yihowaa taʼuudhaan dhaloota shanaffaa. Bara 2006tti cuuphamte

Bara 2012tti Dimitrii wajjin gaaʼela godhatan. Dimitriin Waxabajjii 2021 erga itti murteeffamee booda waggaa jaʼaa fi jiʼa lama hidhameera

Yaada Dhuunfaa

Caqasni Kitaaba Qulqulluu gammachuu qabaattee akka itti fuftu si gargaare jiraa?

Anii fi Dimitriin akka gargar baanu yeroo godhametti jalʼina haqaa nurra gaʼe kana dandaʼuun baayʼee natti ulfaatee ture. Jajjabinaa fi deggersa isaa waanan dhabeef baayʼee natti dhagaʼameera. Yihowaan akka na gargaarun isa kadhadhe. Dubbisa Kitaaba Qulqulluu koorratti Faarfannaa 17 irra yommuun gaʼu lakkoofsi 15ffaan baayʼee na tuqe. Caqasichi akkana jedha: “Ani garuu, qajeelummaadhaan fuula kee nan arga; si arguuf yommuun dammaqu nan gammada.” Yeroo hunda ganama yommuun hirribaa dammaqu, Waaqni koo Yihowaan eenyuyyuu caalaa jajjabina naaf kennuu kan dandaʼu taʼuu isaan of yaadachiisa. Rakkinni hedduun na mudatus, yeroo hunda gammachuu koo eeguuf carraaqqiin godha.

Yekaatarinaa Olisheeviskaayaa

Bara Dhalootaa: 1984 (Bilaagoovesheeniskii)

Seenaa Jireenyaa: Bara 2010tti Antoonii wajjin gaaʼela godhatan. Ilma umurii waggaa afurii qabu

Antoonii fi abbaan Yekaatarinaa Sargee Afaanaasiiyeev Muddee 2022 erga isaanitti murteeffamee booda waggaa jaʼaa oliif mana hidhaa jiru

Yaada Dhuunfaa

Yeroo baayʼee rakkisaa taʼe kanatti hariiroon Yihowaa wajjin qabdu caalaatti kan cime akkamitti?

Waggoota shanan darbanitti himanni yakkaa abbaa koo, abbaa manaa koo fi ammammoo ana ilaalchisee dhaddacha irratti dhihaatu baayʼee na dadhabsiiseera. Mana hidhaa na galchuu hin oolan; kunimmoo ilmi keenya umurii waggaa shanii warra malee akka hafu godha. Kun kan na dhiphisu taʼus yaada Iyyoob dubbatetu nattii dhagaʼama. Iyyoob 42:5, “Gurri koo waaʼee kee dhagaʼee ture, amma garuu ijuma kootiin si argeera.” Haala rakkisaa keessa kanan jiraadhu, abbaan manaa kiyya na gargaaru na cinaa jiraachuu baatus Yihowaan yeroo kamiyyuu caalaa natti dhihoo akka taʼe natti dhagaʼama. Antoon gaaf tokko akkas naan jedhee ture: “Mana hidhaa galus, wanta isin barbaachisu isinii dhiheessuu baadhus, Yihowaan mataa maatii hundarra caalu akka taʼe argitu. Inni isin kunuunsa.” Yihowaan gaarummaa akkasii natti argisiiseera. Miirri gaddaa qofti itti dhagaʼamuudhaan cal jedhee si hin ilaalu. Gama miiraa fi qaamaatiin utuun hin gaafatinillee yeroo hunda wanta na barbaachisu naaf dhiheessa.

Maariyaa Miyaasniikoovaa

Bara Dhalootaa: 1994 (Cheerniigoovkaa, Naannoo Amuur)

Seenaa Jireenyaa: Itti gaafatamtuu waajjiraa taatee hojjetteetti

Haati Maariyaa Kitaaba Qulqulluu ishii wajjin qoʼatteetti. Raawwiin raajii Kitaaba Qulqulluu fi abdiin jireenya bara baraa baayʼee ishii tuqeera. Bara 2006tti cuuphamte

Bara 2021tti Niikolii wajjin gaaʼela godhatan

Yaada Dhuunfaa

Haala baayʼee rakkisaa keessa jiraattus ilaalcha sirrii akka qabaattu kan si gargaare maalidha?

Qorumsa na mudatuuf ilaalcha hin taane qabaachuu utuu hin taʼin, carraa amala Kiristiyaanummaa tiyya naaf fooyyessu godheen ilaala. Warqiin ibiddaan qulqullaaʼa. Rakkoowwan amma na mudatan, amalawwan Yihowaan akkan qabaadhu narraa barbaaduu fi gara fuulduraatti na gargaaran horachuuf na fayyadu. Gorsa 1 Yohaannis 2:17 jirus nan yaadadha: “Kana malees, addunyaanii fi hawwiin isaa darbaa jiru, namni fedhii Waaqayyoo raawwatu garuu bara baraaf jiraata.” Wantoonni yeroo harʼatti nu mudatan hundi yeroof qofa kan turanidha. Kana beekuun koo Yihowaa tajaajiluu koo itti fufuuf na gargaareera.

Vaalantiinaa Yermiiloovaa

Bara Dhalootaa: 1970 (Shiimaanooviski, Naannoo Amuur)

Seenaa Jireenyaa: Teeknishaana laaboraatorii taatee hojjetteetti

Bara 1995tti Sargee wajjin gaaʼela godhatan. Ilma tokko qabu

Waaʼee abdiin duʼaa kaʼuu baayʼee ishii gammachiiseera. Bara 2009tti cuuphamte

Sargeen Muddee 2022 erga itti murteeffamee booda, waggaa jaʼaa fi jiʼa sadiif mana hidhaa jira

Yaada Dhuunfaa

Haala rakkisaa si mudate kanarraa barumsa akkamii argatte?

Haalan keessa jirurratti garmalee xiyyeeffachuun faayidaa akka hin qabne arguu dandaʼeera. Kanaa mannaa, wanti hunda caalu Yihowaadhaaf ulfina argamsiisuu akka taʼen of yaadachiisa. Namoonni hedduun biyya isaaniitiif aarsaa of gochuu akka ulfinaatti ilaalu. Maqaa Yihowaatiif falmuuf mirga argachuu koo akka mirga guddaattan ilaala. Yihowaadhaaf wanta hunda irra caalu kennuu fi ulfina isaaf fiduun barbaada. Matumaa akka inni na hin ganne beeka.

Yihowaatti amanamuu ilaalchisee fakkeenya obboleettonni kun nuuf taʼaniif baayʼee isa galateeffanna. Yihowaan isaan gargaaruu isaa fi baayʼee isaan eebbisuu isaa akka itti fufuu ni amanna.—Faarfannaa 27:3.

Chaartii Yeroo

Adoolessa 20, 2018

Manneen isaanii sakattaʼamaniiru
Adoolessa 22, 2021

Obboleettota arfanuu irratti himanni yakkaa dhihaateera
Adoolessa 27, 2021

Kiristiinaa fi Maariyaan imala akka hin goone ni dhorkaman
Hagayya 3, 2021

Yekaatarinaan imala akka hin goone ni dhorkamte
Hagayya 4, 2021

Vaalantiinaan imala akka hin goone ni dhorkamte
Caamsaa 26, 2023

Himanni yakkaa isaan irratti dhihaate mana murtiitti ilaalamuu jalqabe

Kanneen Armaan Gadiis ni Jaallatta Taʼa

ODUU HAARAA

Sababii Amantii Isaaniitiin Hidhamaniiru—Raashiyaa

Dhugaa Baatonni Yihowaa Raashiyaa keessa jiran sababii amantii isaaniitiin hidhamaniiru. Seenaa isaanii dubbisi, maqaa Dhugaa Baatota Yihowaa yeroo ammaatti hidhamanii jiranii ilaali.

ODUU HAARAA