ADOOLESSA 10, 2023
RAASHIYAA

Koomsoomooliski Naa Aamuuritti Obboleettota Keenya Sadiitti ni Murteeffame

BANI

Bitootessa 23, 2023, Manni Murtii Koonyaa Koomsoomooliski Naa Aamuurii obboleettota keenya Taatyaanaa Boondaarenkoo, Yeeleenaa Neesteroovaa fi Taatyaanaa Sivoobooda irratti yakkamtoota akka taʼan murteesse. Sadan isaanii irratti iyyuu hidhaa daangaa waggaa shanii isaanitti murteeffameera. Yeroo ammaatti mana hidhaa galuun isaan hin barbaachisu.

Ibsa Gabaabaa

Taatyaanaa Boondaarenkoo

Bara Dhalootaa: 1960 (Koomsoomooliski Naa Aamuuritti, Naannoo Kaabaaraviskii)

Seenaa Jireenyaa: Warshaa baabura midhaan daaku suphuu keessa, booda immoo mana qulqulleessuu irratti hojjetti turte

Bara 1992 Vilaadimiir wajjin gaaʼela godhatan. Ijoollee dhiiraa sadii qabu

Kitaaba Qulqulluu qoʼachuu kan jalqabde kaayyoo Waaqayyo ilmaan namootaatiif qabuu fi abdii Waaqayyo lafa jannata taatu ilaalchisee kenne yommuu beektuttidha. Bara 2005tti cuuphamte

Yaada Dhuunfaa

Yeroo baayʼee rakkisaa taʼe kanatti gargaarsa Yihowaa kan argatte akkamitti?

Yeroo manni keenya sakattaʼamutti abbaan manaa koo inni Dhugaa Baatuu Yihowaa hin taane mana yaalaa ture. Yaalii isaa xumuree gara manaatti deebiʼuuf akka jedhu bilbilaan natti himuu barbaadee ture, garuu abbootiin taayitaa bilbila isaa waan isa harkaa fudhataniif naa bilbiluu hin dandeenye. Bilbila haaraa argadhee isaaf bilbiluu fi wanta raawwatame isaaf ibsuu kanan dandaʼe galgala qorannaan sun erga xumuramee boodadha. Haalli isaa baayʼee kan nama dhiphisu ture. Taʼus Yihowaan akka na tasgabbeessu kadhadheen ture, inni kadhannaa kootiif deebii naa kenneera. Gaafas galgala anii fi abbaan manaa koo yeroo manatti gallu, gaarummaa guddaa kan natti argisiise taʼuu isaa irra iyyuu mana keenya bajabajame sisirreessuu irratti na gargaare. Kun caalaatti Yihowaatti akkan amanamu na gargaareera.

Yeeleenaa Neesteroovaa

Bara Dhalootaa: 1967 (Koomsoomooliski Naa Aamuurii)

Seenaa Jireenyaa: Ogeettii herregaa taatee hojjeteetti

Ijoollee durbaa lama kan qabdu yommuu taʼu, ishiin tokko bara 1998tti jalaa duute

Waaʼee Dhugaa Baatota Yihowaa kan beekte, yeroo abukaatoo Dhugaa Baatuu taʼe qacaratetti ture. Amanamummaa isaanii fi akkaataa gaaffiiwwan ishii Kitaaba Qulqulluutti fayyadamanii ishiidhaaf deebisan baayʼee ishii ajaaʼibsiisee ture. Bara 1997tti cuuphamte

Yaada dhuunfaa

Yeroo rakkisaa kana keessatti maal baratte?

Gorsa akka ajajamnu nuuf kenname hordofuun faayidaa guddaa akka qabu caalaatti hubachuu dandaʼeera. Yakka raawwatteetta jedhamee ergan himatamee booda, obboleessi tokko deebii xumuraa mana murtiitti kennu irratti yaaduu akkan jalqabu natti hime. Yaada koo xumuraa kanan kennu himanni na irratti dhihaate erga dhumee booda ture; kanaaf ‘Hamma yoonaatti wanti jalqabe tokkollee hin jiru’ jedheen yaade. Dhimmicha irratti ergan kadhadhee booda garuu, wantan jechuu barbaadu barreessuufan murteesse. Qorannaan geggeeffamu dafee waan xumurameef, utuun dursee qophaaʼuu baadhee, dhaddacha duratti sirriitti dhugaa baʼuu hin dandaʼuun ture. Yeroon sababii isaa guutummaatti hin hubannetti illee obboloota dhaggeeffachuun baayʼee baayʼee faayidaa qaba.

Yihowaan obboleettota keenya rakkina dandamatanii amanamoo taʼaan kana eebbisuu isaa fi isaan cimsuu isaa akka itti fufu ni kadhanna.—Ruut 2:12.

Chaartii Yeroo

Fulbaana 21, 2021

Himanni yakkaa Taatyaanaa Sivooboodaa irratti ni baname
Onkoloolessa 18, 2021

Poolisoonni Taatyaanaa Boondaarenkoo fi Yeeleenaa Neesteroovaa irrattis qorannaa geggeessuu jalqaban
Onkoloolessa 20, 2021

Manni isaanii ni sakattaʼame
Hagayya 28, 2022

Himanni isaani irratti baname
Muddee 28, 2022

Himanni yakkaa ilaalamuu jalqabe
Bitootessa 23, 2023

Yakkamtoota akka taʼan itti murteeffamee, hidhaan daangaa waggaa shanii isaanitti murteeffame

Dabalataan Ilaali

ODUU HAARAA

Sababii Amantii Isaaniitiin Hidhamaniiru—Raashiyaa

Dhugaa Baatonni Yihowaa Raashiyaa keessa jiran sababii amantii isaaniitiin hidhamaniiru. Seenaa isaanii dubbisi, maqaa Dhugaa Baatota Yihowaa yeroo ammaatti hidhamanii jiranii ilaali.

ODUU HAARAA