HAGAYYA 2, 2021
RAASHIYAA

Maanguddoota Amanamoo Yakki Isaanitti Murtaaʼu Iyyuu Gammadoo Taʼan

BANI

Raashiyaatti dhaabileen Dhugaa Baatota Yihowaa beekamtii seeraa qaban, bara 2017⁠tti erga dhorkamanii eegalee, aangawoonni biyyatti dargaggeessa umurii 18 irraa kaasee hanga maanguddoo umurii 89⁠tti obbolootaa fi obboleettota biyyicha keessa jiran irra ariʼatama geessisaa jiru. Hanga Adoolessa 2021⁠tti, obboloonnii fi obboleettonni umuriin isaanii 60 fi isaa ol taʼe 18 nagaadhaan waan waaqeffataniif qofa yakki itti murtaaʼee adabamaniiru. Yeroo ammaa obboloonni sadii mana hidhaa jiru. a Gabaasni Qaama Ol Aanaa 2021 Lakk. 4 halellaa obbolootaa fi obboleettota keenya maanguddoo irratti raawwatamu ibsee ture.

Maanguddoonni keenya jaallatamoon ariʼatama cimaa kana dadamachaa kan jiran akkamitti? Yaada nama jajjabeessuu fi obboloonni keenya amanamoon dubbatan tokko tokko yommuu isinitti himnu gammachuutu nutti dhagaʼama.

Alaksandar Gaaniin

Bara dhalootaa: 1957

Murtii: Dhorkaa waggaa sadiif turu tokko tokkoo fi dhorkaa imalaa jiʼa sagalii

Bara cuuphaa: 1997

Yaada dhuunfaa

Yeroo rakkisaa kanatti gammachuu fi ilaalcha gaarii qabaachuu kan dandeesse akkamitti?

Haala akkasii keessatti dhiphina dandamachuu fi ilaalcha gaarii qabaachuun akkamitti akka dandaʼamu Yihowaan karaa jaarmiyaa isaa qajeelfama ifaa kenneera. Hidhamuu koo dura iyyuu anii fi haati manaa koo dhibee fayyaa qabna turre. Taʼus hojiidhaan qabamna turre, akkasumas nageenya hafuuraa keenyaaf kunuunsa wal irraa hin cinne waan goonuuf wanta caalaatti barbaachisaa taʼe irraa xiyyeeffannaan keenya hin hihhiramne.

Ariʼatamni kun sii fi maatii kee irratti jijjiirama akkamii fide?

Amantiin keenya cimeera, akkasumas caalaatti walitti dhihaaneerra. Raajjiiwwan Kitaaba Qulqulluu akkuma dursee dubbatametti raawwatamaa akka jiranii fi yeroo jijjiiramni gugguddaan taʼutti baayʼee akka dhihaanne amanannaa qabaadheera. Beekumsi akkasii yaadni koo utuu hin hihhiramni tajaajiluu akkan itti fufu jabina naaf kenna.

Yuurii Saaveelyeevi

Bara dhalootaa: 1952

Murtii: Waggaa shaniif hordoffiin akka irratti godhamuu fi waggaa tokkoof akka hin imalle dhorkamuu dabalatee waggaa jaʼaaf dhorkaa tokko tokko jala akka turu itti murtaaʼe

Bara cuuphaa: 1998

Yaada dhuunfaa

Dhorkaan tokko tokko sitti murtaaʼuun isaa maatii kee irratti rakkina akkamii fide?

Dhorkaa tokko tokko jala turuun mana hidhaa galuu irra akka wayyu beekamaa dha. Haa taʼu malee, yakkaan himatamee utuun jiruu umurii koo kanatti hojii argachuun ulfaataa dha. Kana malees, sooramni koo xinnoo waan taʼeef, baasii nyaataaf, qorichaa fi yaalii fayyaaf na barbaachisuuf na hin gahu.

Dhibee fayyaa akkamii qabda, dandamachaa kan jirtu hoo akkamitti?

Mogolee koo artiraayatisiitu na dhukkuba. Kutaan itti hidhame keessa namoonni tamboo xuuxan jiru waan turaniif, mana hidhaatii kanan baʼe dhukkubni sombaa waan natti hammaateef ture. Sombi koo amma iyyuu rakkina qaba. Fedha Yihowaa raawwachuu koo itti fufuu akkan dandaʼuuf, gorsa doktarri koo naa kenne horfofuudhaan hamma naaf dandaʼame fayyaa koo eeggachaan jira.

Manni murtii erga sitti murteessee booda Yihowaan karaawwan kamiin si gargaare?

Obboloonnii fi obboleettonni gargaarsa guddaa naa godhaniiru. Jechoonni Faarfannaa 133:1 irra jiran dhugaa taʼuu isaanii hubadheera. Jaalala akkasii beekuu fi argachuun miidhaa hidhaan na irraan geessise irra baayʼee waan caaluuf kun eebba guddaa dha. Obbolootaa fi obboleettota hamma kanaa wajjin michoota taʼuu keenya matuma yaadnee hin beeknu. Yihowaan waan hundumaa akkamitti akka qindeessu, karaa obbolootaa akkamitti akka nu kunuunsu, hangam akka garaa nuuf laafuu fi haalawwan baayʼee rakkisoo taʼan keessatti eebbawwan akkamii akka nuu kennu argeera. Kana hunda ergan argee booda Waaqa jaalala qabeessaa fi guddaa kana akkamittan tajaajiluu dhiisa? Wanta kanaan ala taʼe gochuun waan hin yaadamne dha.

Liyuudmiilaa Poonoomaaryankoo

Bara dhalootaa: 1950

Murtii: Dhorkaa tokko tokko jala waggaa lamaaf turuu fi hordoffii waggaa tokkoo

Bara cuuppaa: 1998

Yaada Dhuunfaa

Dhorkaan amma si irratti godhame jireenya kee guyyaa guyyaa irratti dhiibba kan godhe akkamitti?

Dhaabbata mootummaa namoota dhorkaan tokko tokko irratti godhame toʼatu utuu hin beeksisin, mana jireenyaa koo jijjjiiruu hin dandaʼu. Dabalataanis jiʼatti al tokko dhaabbata kana bira deemee of argisiisuun qaba.

Kun fayyaa kee irratti dhiibbaa akkamii godhe?

Mataa dhukkubbiin irra deddeebiʼee natti kaʼuu fi yeroo dheeraaf turu na qabeera. Wanti baayʼee na gargaare madaallii koo eeggachuu fi wantan jijjiiruu hin dandeenyeef ilaalcha sirrii akkan qabaadhu kadhachuu koo ti.

Yihowaan kan si gargaare akkamitti?

Dhimmi koo mana murtiitti ilaalamee erga xumuramee kaasee Yihowaan guddaa na eebbiseera. Jabina isa waaqeffachuu koo itti fufuuf na gargaaru naa kenneera, akkasuams gargaarsa malee na hin dhiisne. Obboloonni koo jaallatamoon na cinaa jiru, yeroo rakkinni uumamu na gargaaruuf qophaaʼoo dha. Yeroo wantoonni ulfaatoon na mudatanii fi haalawwan tokko tokko humnaa ol fakkaatan illee, dhuma irratti Yiowaan na eebbiseera. Caalaatti Yihowaatti amanamuu baradheera. Yihowaan aangawoota mana murtiitiif akkan dhugaa baʼu itti gaafatama waan naa kenneef isan galateeffadha. Kana gochuun anaaf mirga guddaa dha. Abdii kutachuuf sababii hin qabu, dorgommicha hanga dhumaatti fiiguuf kutadheera, warri kaanis hanga sarara dhumaatti akka fiigan gargaaruu nan barbaada.

Genaadii Shipaakooviskiin

Bara dhalootaa: 1958

Murtii: Jalqaba hidhaa waggaa jaʼaa fi walakka. Ol iyyannoo booda garuu, manni murtii waggaa lamaaf dhorkaan tokko tokko jala taʼee hordoffiin akka na irratti godhamu murteesse

Bara cuuphaa: 1995

Yaada Dhuunfaa

Dhimmi kee mana murtiitti ilaalamee erga xumuramee booda dhorkaawwan akkamii jala jirta?

Sochii jaarmiyaa qindeessuu ykn sochii jaarmiyaa amantii ifatti godhamu kam irratti iyyuu waggaa sadiif hirmaachuu hin dandaʼu. Halkan saatii 5 kaasee hanga ganama saatii 12⁠tti manaa baʼuu hin dandaʼu. Heyyama malee magaalaa kootii ala baʼus taʼe, bakka jireenyaa koo jijjiiruu hin dandaʼu. Akkasumas jiʼatti al lama dhaabbata bakka buʼaa mootummaa duratti dhihaachuun qaba.

Yeroo kanatti obboloonnii fi obboleettonni kee kan si gargaaran akkamitti?

Gargaarsa hunda argachaan jira. Guyyaan jalqaba hidhamee kaasee, anii fi maatiin koo xalayaawwan, kaardota, fakkiiwwanii fi ergaa gabaabaa jechoonni nama jajjabeessan, ibsa jaalalaa qabatanii fi gargaarsa barbaachisu gochuuf qophaaʼoo akka taʼan ibsan irratti barreeffaman nu gaʼaa jiru.

Murtoon Yihowaa tajaajiluu kee itti fufuuf goote kan cime akkamitti?

Waggoota dhihoodhaa asitti wanti anaa fi maatii koo irra gaʼe hundi Yihowaa isa Waaqa dhugaa taʼe tajaajilaa akkan jiru amanannaan qabu naaf cimsaniiru! Waaʼee taateewwan Kitaabni Qulqulluun ‘bara dhumaa’ jechuudhaan ibsuu dubbisuun, irratti xiinxaluunii fi kallattiidhaan irratti hirmaachuun daandii sirrii gara addunyaa haaraatti geessu irra akkan jiru mirkanaaʼaa na taasiseera.

Vaalentiinaa Suuvuroovaa

Bara dhalootaa: 1948

Seenaa Jireenyaa: Waggaa lamaaf dhorkaa tokko tokko jala ture

Bara cuuphaa: 1996

Yaada Dhuunfaa

Himanni yakkaa kun maaltu akka sitti dhagaʼamu taasise?

Ani nama Waaqa jaalalaa, gammachuu fi gara laafinaatti amanu waanan taʼeef, yakkama akkan taʼetti natti murteessuun kan nama qaanessu dha. Yeroo hunda nan dhiphadhan ture. Yeroo tokko tokko halkan rafuu hin dandaʼu, akkasumas mataa dhukkubbii, dhiibbaa dhiigaa cimaa fi dhukkuba dugdaa qaba.

Ilaalcha gaarii akka qabaattu maaltu si gargaare?

Wanti na gargaare Yihowaaf, seerawwanii fi qajeelfamoota isaaf, akkasumas jaarmiyaa keenyaaf jaalala, galateeffannaa fi dinqisiifannaa qabachuu koo ti. Kanaan dura, waaʼee jaalala, gara laafinaa fi jajjabina Waaqa keenya kan taʼe Abbaan keenya inni samii kennuu beekan ture. Amma garuu karaa qaamaas taʼe karaa hafuuraa hangam akka inni na gargaaru caalaatti beekeera. Obboloota keenya jaallatamoof, michoota koof, obboloota itti gaafatama qabaniif, gumiif akkasumas guutummaa jaarmiyaa keenyaaf galanni haa taʼuutii kana beekuu dandaʼeera. Hundi keessan iyyuu galatoomaa!

Fakkeenya gaarii maanguddoonni keenya Raashiyaa jiran nuu taʼaniif isaan galateeffanna. Ejjennoo cimaan isaan qajeelummaa cinaa dhaabbachuuf fudhatan fakkeenya hordofuu qabnu dha, hunda caalaa immoo Waaqayyo duratti iddoo guddaa qaba.—Fakkeenya 16:31.

a Obboleettii Valentina Baranovskaya ishiin umurii 70 waggaan lama itti murtaaʼee mana hidhaa jirti. Obboleessi Aleeksaandar Iivshin inni umurii waggaa 63 waggaa torbaa fi walakkaan itti murtaaʼee mana hidhaa jira. Akkasumas obboleessi Yuurii Saaveelyeevi inni umurii waggaa 68 waggaan jaʼa itti murtaaʼee mana hidhaa jira.

Kanneen Armaan Gadiis ni Jaallatta Taʼa

ODUU HAARAA

Sababii Amantii Isaaniitiin Hidhamaniiru—Raashiyaa

Dhugaa Baatonni Yihowaa Raashiyaa keessa jiran sababii amantii isaaniitiin hidhamaniiru. Seenaa isaanii dubbisi, maqaa Dhugaa Baatota Yihowaa yeroo ammaatti hidhamanii jiranii ilaali.

ODUU HAARAA