SADAASA 29, 2023
RAASHIYAA

Manni Murtii Raashiyaa Naannoo Saaraatoov Obboloota Shan Irratti Yakkamtoota Akka Taʼan Murteesse

BANI

Sadaasa 23, 2023, Manni Murtii Godina Boolookoovskii Naannoo Saaraatoov dhimma obboloota keenya Aleeksii Boogotoov, Yeevgenii Faamooshiin, Vilaadimiir Moovriin, Andiree Muurichii fi Sargee Tuuriin irratti murtii kenneera. Obboloonni shananuu yakkamtoota akka taʼan isaanitti murteeffameera. Aleeksii fi Vilaadimiir tokkoon tokkoo isaanii hidhaan daangaa waggaa jaʼaa isaanitti murteeffameera. Andiree, Sargee fi Yeevgeniin immoo tokkoon tokkoo isaanii ruubilii 300,000 (doolaara Ameerikaa 3,362) adabamaniiru. Haa taʼu malee, yeroo kanatti tokkoon isaanii iyyuu mana hidhaa hin galan.

Ibsa Gabaabaa

Aleeksii Boogotoov

Bara Dhalootaa: 1960 (Bookluushii, Naannoo Ulyoonooviskii)

Seenaa Jireenyaa: Konkolaachisaa ambuulaansii taʼee hojjeteera

Bara 1982tti Liyyuuboov wajjin gaaʼela godhateera. Ijoollee dhiiraa sadii godhataniiru

Dhugaa Baatota Yihowaa wajjin Kitaaba Qulqulluu qoʼachuun isaa, guutummaa ilmaan namootaatiif haqa kan argamsiisu Mootummaa Waaqayyoo taʼuu isaa akka hubatuu isa gargaareera. Bara 1994tti cuuphame

Yaada Dhuunfaa

Yeroo mana hidhaa hamma mana murtiitti dhihaatanitti keessa tursiifaman turtetti gargaarsa Yihowaa akka argatte kan sitti dhagaʼame akkamitti?

Jiʼa jalqabaa mana hidhaa hamma mana murtiitti dhihaatanitti keessa tursiifaman yeroon turtetti Kitaaba Qulqulluu hin qabun ture; garuu qalamaa fi daftara yaadannoo qaban ture. Yihowaan caqasoota akkan yaadadhu akka na gargaaru guyyaa guyyaadhaan kadhannaan dhiheesse. Dhuma jiʼichaatti caqasoota 112n yaadadhee barreessuu dandaʼeera. Kun yeroo hunda Kitaaba Qulqulluu dubbisee utuun irratti xiinxalee, Yihowaan hafuura qulqulluu isaatti fayyadamee akkan yaadadhu akka na gargaaru naaf mirkaneesseera. Gargaarsa isaatiif Yihowaa guddaan galateeffadha.

Yeevgenii Faamooshiin

Bara Dhalootaa: 1977 (Baalookoovoo)

Seenaa Jireenyaa: Ogeessa elektiriikii taʼee hojjeteera

Abdiin Kitaaba Qulqulluu nagaa fi tokkummaan lafa irra akka jiraatu ibsu baayʼee isa hawwate. Bara 2013tti cuuphame. Namoota naannoo isaatti duudaa taʼan gargaaruuf afaan mallattoo barate

Yaada Dhuunfaa

Fakkeenyi obboloota kanaan dura mana hidhaa hamma mana murtiitti dhihaatanitti keessa tursiifaman keessatti hidhamanii turan kan si gargaare akkamitti?

Yeroon mana hidhaa hamma mana murtiitti dhihaatanitti keessa tursiifaman keessa turetti, waaʼee obboloota keenya kanneen akka Konstaantiin Baazyeenoov, Aleeksii Budanchuuk, Gennaadii Giirmaanii, Roomaan Giriidaasoov Fiiliiksi Maakmaadiiyeevii fi Aleeksii Miireetiskii jiran warra bara 2018-2019tti gamoodhuma kana keessatti hidhamanii turaniin yaade. Fakkeenyi amantii isaanii na cimseera. Kana malees, obbolootaa fi obboleettota hedduu addunyaa maratti rakkinni garaa garaa isaan irra gaʼullee amanamummaa isaanii eeganii jiraataniitiin jajjabaachuu koo ittan fufa. Akkuma waan hundi keenya wal cinaa dhaabbannee rakkoowwan kana dandamachaa jirutti natti dhagaʼama.

Vilaadimiir Moovriin

Bara Dhalootaa: 1962 (Koomiishoovkaa, Naannoo Saaraatoov)

Seenaa Jireenyaa: Hojii ijaarsaa fi gamoo bareechuu hojjeta

Bara 1994tti cuuphame

Bara 2004tti haati manaa isaa yommuu jalaa duutu, ilma isaa isa umurii kurnanii keessa ture kophaa isaa guddise. Bara 2013tti Iriinaa wajjin gaaʼela godhatan

Yaada Dhuunfaa

Haala rakkisaa kana yommuu dandamattu waaʼee Yihowaa maal baratte?

Waadaa Yihowaan Ibroota 13:5 irratti, “Ani matumaa si hin dhiisu, matumaas si hin gatu” jechuudhaan gale beeka. Ergan qabamee mana hidhaa hamma mana murtiitti dhihaatanitti keessa tursiifaman keessatti hidhamee booda garuu, karaa adda taʼeen kunuunsa Yihowaa akkan argadhe natti dhagaʼama. Tasgabbii, nagaa fi jabina baayʼisee naa kenneera. Kana malees, Yihowaan yeroo hundumaa karaa hunda irra wayyuun kadhannaa kootiif deebii akka naa kennu hubadheera. Yeroo rakkisaa kana hunda keessatti, matumaa kophaa koo akkan taʼe natti dhagaʼamee hin beeku.

Andiree Muurich

Bara Dhalootaa: 1991 (Baalookoovoo)

Seenaa Jireenyaa: Warshaa sibiilaa keessa hojjeta

Waaʼee Kitaaba Qulqulluu jalqaba kan dhagaʼe akkoo isaa irraati. Raajiiwwan Kitaaba Qulqulluu raawwii isaanii argatan isa dinqisiisu. Bara 2007tti cuuphame

Bara 2009tti Anistaasiyaa wajjin gaaʼela godhatan. Intala tokko godhataniiru

Yaada Dhuunfaa

Haala rakkisaa yeroo mana hidhaa hamma mana murtiitti dhihaatanitti keessa tursiifaman keessa turtetti si mudate akka dandamattu kan si gargaare maalidha?

Yeroon mana hidhaa hamma mana murtiitti dhihaatanitti keessa tursiifaman keessa ture keessumaa jiʼoota lamaan jalqabaatti gammachuu koo eegee itti fufuun baayʼee natti ulfaatee ture. Wantoota na gargaaran keessaa tokko, amalli koo haala rakkisaa keessattillee wanta Yihowaan naa godhe hundumaaf kanan galateeffadhu taʼuuf dhiisuu koo kan argisiisu taʼuu isaa yaaduu kooti. Gammachuudhaan amanamummaa koo eegee jiraachuun koo, karaan amanamummaa koo akkan eegu itti argisiisu keessaa isa hunda irra caaludha. Kana malees, gargaarsa Yihowaatiin wanta na mudatu kamiyyuu dandamachuu akkan dandaʼu caalaatti amanee fudhadheera. Yihowaan haala kamii keessattiyyuu nagaa naaf kennuu ni dandaʼa.

Sargee Tuuriin

Bara Dhalootaa: 1994 (Baalookoovoo)

Seenaa Jireenyaa: Ogeessa elektiriikii taʼee hojjeteera

Waaʼee Kitaaba Qulqulluu kan barate akkoo isaa irraati. Jireenya milkaaʼina qabu jiraachuuf qajeelfamoota Kitaaba Qulqulluu hordofuun murteessaa akka taʼe hubateera. Bara 2012tti cuuphame

Bara 2018tti Yeliizooviyetaa wajjin gaaʼela godhatan

Yaada Dhuunfaa

Sababii amantii keetiin ariʼatamni si irra gaʼuu isaatiin maal baratteetta?

Wantoota sadii baradheera. Tokkoffaa, Yihowaan na gargaaruuf yeroo hundumaa qophaaʼaadha. Wanta caalaatti na barbaachisu beeka; yeroo baayʼee karaatti na gargaarus beeka. Lammaffaa, nagaa keessaa koo eeggadhee itti fufuuf abdii Yihowaan kenne irratti amanannaa qabaachuun koo baayʼee barbaachisaadha. Ariʼatamni matumaa salphaa taʼuu baatus, eebbawwan bara baraa nu eeggatanii wajjin wal bira qabamee yommuu ilaalamu, yeroo gabaabaadhaaf qofa kan turudha. Yeroo dhihootti, qorumsawwan kana tokkoon isaaniillee hin yaadadhu. Sadaffaa, tokkummaan obbolummaa keenya wanta gatiidhaan hin shallagamnedha. Rakkoowwan dandamachuun salphaa akka taʼu godha; eegamuus qaba.

Fakkeenyi obboloota shanan amanamoo taʼan kanaa, humna Waaqayyootti kan amanamnu yoo taʼe, rakkina misiraachichaan kan kaʼe nu irra gaʼu dandamachuu akka dandeenyu nu yaadachiisa.—2 Ximotewos 1:8.

Chaartii Yeroo

Guraandhala 11, 2022

Himanni yakkaa isaan irratti dhihaate
Bitootessa 23, 2022

Miseensonni Tajaajila Nageenya Federaalaa taʼan manneen obboloota shanan kanaa ni sakattaʼan. Tokkoon tokkoon isaanii irratti qorannaan erga geggeeffamee booda yeroodhaaf gara mana hidhaa hamma mana murtiitti dhihaatanitti keessa tursiifaman keessatti hidhaman
Bitootessa 25, 2022

Obboloonni mana hidhaa hamma mana murtiitti dhihaatanitti keessa tursiifaman keessatti hidhaman
Amajjii 23, 2023

Obboloonni mana hidhaa hamma mana murtiitti dhihaatanitti keessa tursiifaman keessaa gadhiifamanii akka hin imalle dhorkaman
Adoolessa 21, 2023

Himanni yakkaa isaan irratti dhihaate ilaalamuu jalqabe
Sadaasa 23, 2023

Yakkamtoota akka taʼan itti murtaaʼeera

Dabalataan Ilaali

ODUU HAARAA

Sababii Amantii Isaaniitiin Hidhamaniiru—Raashiyaa

Dhugaa Baatonni Yihowaa Raashiyaa keessa jiran sababii amantii isaaniitiin hidhamaniiru. Seenaa isaanii dubbisi, maqaa Dhugaa Baatota Yihowaa yeroo ammaatti hidhamanii jiranii ilaali.

ODUU HAARAA