ONKOLOOLESSA 17, 2022| ODUU HAAREFFAME: BITOOTESSA 7, 2024
RAASHIYAA

ODUU HAAREFFAME—ISAANITTI MURTEEFFAME |Maagaadaanitti Dhugaa Baatonni 13 Mana Murtiitti Dhihaatan

BANI

Muddee 6, 2024, Manni Murtii Magaalaa Maagaadaan Naannoo Maagaadaan obbolootaa fi obboleettota keenya armaan gadiirratti murtii dabarseera: Sargee Agadzyanoov, Liiyuboov Asratiryaan, Gaaliinaa Dergecheyoova, Iinaa Kaardekovaa, Irinaa Kivostovaa, Gaaliinaa Pechikoo, Konistaantiin Peetrov, Ivaan Puuydaa, Viktoor Reevaakiin, Mikaahel Soolnitiseev, Oksaanaa Soolnitiseev, Sargee Yerkiinii fi Yevgiyeenii Zyeebloov.

Sargee Agadzyanoov, Liiyuboov, Gaaliinaa Dergecheyoova, Iinaa, Irinaa, Gaaliinaa Pechikoo, Viktoor, Mikaahelii fi Oksaanaa tokkoon tokkoon isaanii irratti hidhaan daangaa waggaa sadii isaanitti murteeffameera. Yevgiyeenii irratti immoo hidhan daangaa waggaa shanii isatti murteeffameera. Konistaantiin, Ivaanii fi Sargeen immoo tokkoon tokkoo isaanii hidhaan daangaa waggaa torbaa isaanitti murteeffameera. Yeroo kanatti mana hidhaa galuun isaan hin barbaachisu.

Chaartii Yeroo

Caamsaa 30, 2018

Ivaan, Konistaantiin, Sargee Yerkiinii fi Yevgiyeeniin sochii jaarmiyaa finxaalessaa taʼe qindeessitanittu jedhamanii himanni yakkaa isaanirratti baname
Waxabajjii 1, 2018

Obboloonni arfanuu waajjira poolisiitti hidhaman
Hagayya 3, 2018

Konistaantiin waajjira poolisiitii gadhiifamee manaa akka hin baane dhorkame
Onkoloolessa 5, 2018

Ivaan, Sargee Yerkiinii fi Yevgiyeeniin kan gadhiifaman taʼus, mana isaaniitii akka hin baane dhorkaman
Bitootessa 20, 2019

Himanni yakkaa Sargee Agadzyanoov, Gaaliinaa Dergecheyoova, Iinaa, Irinaa, Liiyuboov, Mikaahel, Oksaanaa fi Viktoor irratti baname. Hundisaanii iyyuu akka hin imalle dhorkaman
Bitootessa 27, 2019

Ivaan, Konistaantiin, Sargee Yerkiinii fi Yevgiyeenii dhorkaa manaa akka hin baane isaanirratti godhamerraa bilisa kan baʼan taʼus akka hin imalle dhorkaman
Ebla 1, 2019

Walumatti qabaatti hundumasaanii irratti himanni yakkaa ni baname
Bitootessa 2, 2021

Gaaliinaa Pechikoon akka hin imalle dhorkamte
Bitootessa 5, 2021

Gaaliinaa Pechikoon sochii jaarmiyaa finxaalessaa taʼe irratti hirmaatteetta jedhamte himanni yakka ishiirratti baname, akkasumas himanni yakkaa ishiirratti dhihaate himata obbolootaa fi obboleettota 12 kaanitti dabalame
Ebla 25, 2022

Himanni yakkaa isaanirratti baname ilaalamuu jalqabe

Ibsa Gabaabaa

Liiyuboov Asratiryaan

Bara Dhalootaa: 1951 (Gaanzyaa, Azarbaajaan)

Seenaa Jireenyaa: Obbolaa jaʼa keessaa ishiin quxusuu hundumaati. Kaampaanii qoricha oomishu keessatti ogeessa laaboraatorii taatee hojjeteetti

Jeequmsi naannoo ishiitti raawwatamu yeroo hunda ishii gaddisiisa ture. Waaqayyo dhiheenyatti hammeenya hundumaa akka balleessu Kitaaba Qulqulluu irraa barachuun ishii baayʼee ishii gammachiiseera. Bara 1991tti cuuphamte

Yaada Dhuunfaa

Tasgabbii akka qabaattu maaltu si gargaare?

Shakkiin akka natti uumamu na taasisuu akka dandaʼu waanan beekuuf sodaan akka na toʼatu heyyamuu dhiisuuf murteesseen ture. Tarkaanfiiwwan murteessaa taʼan fudhachuu, jechuunis irra deddeebiʼee kadhachuu, miira koo iftoominaan Yihowaatti himachuu, guutummaatti isatti amanamuu fi humna inni qabu of yaadachiisuu akkan qabu hubadheen ture. Wantoota kana gochuu koo yoon itti fufe Abbaan koo inni samii jaalala qabeessa taʼe akka natti gammadu amanannaa guutuun qaba.—Fakkeenya 27:11.

Iinaa Kaardekovaa

Bara Dhalootaa: 1980 (Bilaagovyeeshayeeniski, Naannoo Aamuur)

Seenaa Jireenyaa: Qabduu herregaa taatee hojjetti

Warri ishii Dhugaa Baatota Yihowaa wajjin Kitaaba Qulqulluu qoʼachuu kan jalqaban yommuu ishiin umurii waggaa 15 turtettidha. Bara 1997tti cuuphamte

Yaada Dhuunfaa

Qajeelfama tiʼookraasii hordofuun kee kan si gargaare akkamitti?

Biyya keenyatti ariʼatamni akka eegale jalqaba yommuun dhagaʼu, akkamitti dhuunfaatti akka na tuqu baayʼee irratti hin yaannen ture. Haa taʼu malee ariʼatamaaf of qopheessuuf mata dureewwan tokko tokko akka dubbisnu yeroo baayʼee yommuu jajjabeeffamnun dhagaʼe. Tarkaanfiiwwan fudhachuu qabnu tokko tokko ilaalchisees qajeelfamni nuu kennamee ture. Yaadawwan kana hojiirra oolchuun koo baayʼee na gammachiiseera. Of qopheessee waanan tureef, manni koo yommuu sakattaʼamuu fi poolisoonni gaaffii na gaggaafachuu yommuu jalqaban tasgabbii qaban ture.

Irinaa Kivostovaa

Bara Dhalootaa: 1992 (Istakaanoov)

Seenaa Jireenyaa: Injinara kemikaalaa taatee hojjetti

Bara 2013tti heerumte

Jireenyi ilmaan namootaa kaayyoo akkamii akka qabu gaaffiin yeroo hundumaa ishiitti uumama ture. Kitaaba Qulqulluu qoʼachuudhaan gaaffii ishiitiif deebii argateetti. Bara 2016tti cuuphamte

Yaada Dhuunfaa

Gargaarsa Yihowaa kan argatte karaawwan kamiini?

Himanni, dubbii gadheenii fi arrabsoon Dhugaa Baatota Yihowaa irratti taasifamu akka na hin aarsineef yeroo baayʼee akkan tasgabbaaʼu akka na gargaaru Yihowaatti kadhannaan dhiheessa ture. Yihowaanis tasgabbii, hunda caalaammoo gammachuu naaf kenneera. Kun Yihowaan wanta hundumaa toʼachuu akka dandaʼu akkan yaadadhu na gargaareera. Mormitoonni maqaa isaa arrabsuuf hangam carraaqqii kan godhan taʼu illee, dhuma irratti maqaan isaa ulfina guddaa argata.

Konistaantiin Peetrov

Bara Dhalootaa: 1986 (Nizyniivaartoviski, Hoontii-Moonsiikii Awutoonoomoos Yuugroo)

Seenaa Jireenyaa: Hojii elektirikii fi suphaa meeshaalee elektiriikii hojjeta ture

Dhugaa Baatota Yihowaa wajjin qoʼannaa kan jalqabe yeroo umurii waggoota kurnanii keessa turetti yommuu taʼu bara 2005tti cuuphame. Tajaajila loltummaa kennuu diduu isaatiin waggaa sadii fi walakkaaf tajaajila siviilii bakka tajaajila loltummaa kenneera

Bara 2017tti Taatiyaanaa fuudhe

Yaada Dhuunfaa

Dararama dhiheenya kana si irra gaʼe irratti murtoon kee maal ture?

Itti gaafatamummaan koo inni guddaan addunyaa jalʼina haqaatiin guutame keessatti haqa argachuu ykn maqaa koo qulqulleessuuf carraaqqii gochuu miti. Wantin irratti xiyyeeffachuu qabu inni guddaan maqaan Waaqayyoo qulqulleeffamuusaati. Akkana yoon godhe, wanta hafe hunda Yihowaan ni raawwata.

Ivaan Puuydaa

Bara Dhalootaa: 1978 (Kiviitooki, Naannoo Irikuutiski)

Seenaa Jireenyaa: Konkolaachisaa taʼee hojjeteera

Abbaansaa fi akaakayyuunsaa bara bulchiinsa Sooviyeetitti sababii amantii isaaniitiin hidhamanii turan. Ivaan bara 1993tti cuuphame

Bara 2005tti Anaastaasiyaa fuudhe

Yaada Dhuunfaa

Amalawwan keessumaa jabaattee dhaabachuuf si gargaaran kamfaʼi?

Yaanni Miikiyaas 7:7 irra jiru anaaf hiika addaa qaba. Akkana jedha: “Ani garuu dammaqinaan Yihowaa eeggachuu koo ittan fufa. Waaqa fayyinaa koo obsaan nan eeggadha. Waaqni koo na dhagaʼa.” Amala obsaan eeggachuu gabbifachuun na gargaareera. Yihowaan tajaajiltootasaa matumaa akka hin dhiisne beeka. Isaan gargaara, akkasumas isaan deggera. Yihowaa na cinaa dhaabbatee waan jiruuf tasgabbii fi amanannaa qabaachuu dandaʼeera.

Viktoor Reevaakiin

Bara Dhalootaa: 1957 (Noovoosiibiiriskii, Naannoo Noovoosiibiiriskii)

Seenaa Jireenyaa: Barsiisaa sochii qaamaa taʼee hojjeta

Dhugaa Baatota Yihowaa wajjin jalqaba kan wal bare afeerrii Ayyaana Yaadannoo duʼa Kiristoos irratti akka argamu isaaf dhihaate erga fudhatee boodadha. Bara 2002tti cuuphame

Bara 2013tti Naataaliyaa fuudhe

Yaada Dhuunfaa

Yeroo ammaatti haala rakkisaa keessa kan jirtu taʼus ilaalcha sirrii qabaattee itti fufuuf maaltu si gargaare?

Hojii gooftaarratti dammaqinaan hirmaachuufan yaala, obbolootaa fi obboleettota koo wajjin yeroo nan dabarsa, akkasumas fakkeenya tajaajiltoota amanamoo Kitaaba Qulqulluu keessa jiranirratti nan xiinxala. Kana malees, haalawwan abdii nama kutachiisan akka na qulqulleessanii fi Kiristiyaana gaarii akkan taʼuuf akka na gargaaran nan heyyama. Amma anaaf caalaatti Yihowaatti dhihaachuun baayʼee barbaachisaadha, hariiroon isaa wajjin qabus caalaatti cimeera.

Mikaahel Soolnitiseev

Bara Dhalootaa: 1962 (Noovoosiibiiriskii, Naannoo Noovoosiibiiriskii)

Seenaa Jireenyaa: Toʼataa tiraafiikii qilleensaa fi barsiisaa taʼee hojjeteera

Bara 1988tti Oksaanaa fuudhe

Kitaaba Qulqulluu qoʼachuu kan jalqabe yommuu taʼu, yaada amansiisaa Kitaabni Qulqulluun kennu baayʼee isa dinqisiisa ture. Bara 2013tti cuuphame

Yaada Dhuunfaa

Yaada nama jajjabeessu akkamiitu si gargaare?

Yaada obboleessi tokko anaa fi haadha manaa kootti hime nan yaadadha. Akka sodaanne nu gaafate. Nutis Yihowaan tasgabbiin akka nutti dhagaʼamu nu gargaaraa akka ture isatti himne. Achiis Seexannii fi tajaajiltoonnisaa galmisaanii sodaa nutti naquu akka taʼe nu yaadachiise. Ariʼatama yoo sodaachuu dhiisne, ni injifanna. Yaada Isaayyaas 44:8rra jiruu fi “Hin naʼinaa, sodaadhaan hin hadoodinaa. . . . Isin dhugaa baatota koo ti” jedhu baayʼeen jaalladha.

Obboloonnii fi obboleettonni keenya ‘maqaa Kiristoosiif jedhanii kan arrabsaman taʼus, hafuurri Waaqayyoo waan isaan irra buufateef’gammadoo taʼuu isaanii arguu keenyatti baayʼee jajjabaanneerra.—1 Pheexiros 4:14.

a Obboleessi keenya Sargee Agadzyanoov yaada dhuunfaa hin kennine.

Kanneen Armaan Gadiis ni Jaallatta Taʼa

ODUU HAARAA

Sababii Amantii Isaaniitiin Hidhamaniiru—Raashiyaa

Dhugaa Baatonni Yihowaa Raashiyaa keessa jiran sababii amantii isaaniitiin hidhamaniiru. Seenaa isaanii dubbisi, maqaa Dhugaa Baatota Yihowaa yeroo ammaatti hidhamanii jiranii ilaali.

ODUU HAARAA