BITOOTESSA 22, 2023| KAN HAAREFFAME: EBLA 28, 2023
RAASHIYAA

ODUU HAAREFFAME—OBBOLEESSA TOKKOTTI MURTAAʼE | “Wanta Yihowaan Na Gaafatu Kamiyyuu Gochuuf Kutadheera”

BANI

Ebla 28, 2023tti, Manni Murtii Godina Cheliyaabiiniski inni Magaalaa Ashiinskii Obboleessa Keenya Vaadiim Fedoroov irratti hidhaa daangaa waggaa jaʼaa murteesseera. Yeroo ammaatti mana hidhaa galuun isa hin barbaachisu.

Ibsa Gabaabaa

Vaadiim Fedoroov

Bara Dhalootaa: 1968 (Ruudnii, Kaazaakistaan)

Seenaa Jireenyaa: Konkolaataa feʼumsaa oofa

Bara 1991tti Luuboov wajjin gaaʼela godhate. Ijoollee shan godhataniiru

Abdii Kitaabni Qulqulluun waaʼee jireenya bara baraa dubbatu jaallata. Innii fi haati manaasaa bara 1993tti cuuphamanii Dhugaa Baatota Yihowaa taʼan

Yaada Dhuunfaa

Fakkeenyi namoota ariʼatamni isaanirra gaʼe kaanii kan si jajjabeesse akkamitti?

Obbolootaa fi obboleettota sababa amantii isaaniitiin dhiheenyatti ariʼatamni isaanirra gaʼe hedduu wajjin dubbachuuf carraa argadheen ture. Keessumaa Obboleessa Niikoolaay Kuuziichikiinii wajjin ergan dubbadhee booda jajjabina guddaa argadheera. Mana hidhaa yeroo turetti dhibee fayyaa cimaan isa mudatee ture. Haala umurii fi fayyaa isaa gaarii taʼuu baatus dandeettii inni caqasoota Kitaaba Qulqulluu hedduu yaadachuuf qabu baayʼee na tuqe. Dubbii Waaqayyoo hangam akka jaallatuu fi Yihowaa wajjin walitti dhufeenya cimaa akka qabu kanarraa hubachuun ni dandaʼama. Dullumni, fayyaa dhabuun ykn haalli fayyaa akkamiiyyuu Yihowaa wajjin walitti dhufeenya cimaa qabaachuu irraa nu dhorkuu akka hin dandeenye na hubachiiseera. Yeroon Niikoolaayiin dhageeffachaa turetti humni humna caalu Yihowaa biraa qofa akka argamu akkan yaadadhu na godheera.

Haalawwan rakkisaa taʼan kun amala akkamii akka guddifattu si gargaaru?

Nama miira isaa toʼachuu hin dandeenyen ture. Yeroo tokko tokko miiraan kakaʼeen murtoo godha. Haala rakkisaa akkasii keessa darbuun keessumaa jireenya koo keessatti haalawwan koo akka naaf qajeelchu heyyamuuf Yihowaa eeggachuu ilaalchisee obsa akkan horadhu na gargaareera. Wanta Yihowaan na gaafatu kamiyyuu gochuuf kutadheera.

Akkuma Vaadiim, Yihowaan warra isa abdatan akkasumas ‘daandii isaa hordofuu’ isaanii itti fufan akka eebbisuu fi jajjabeessu ni amanna.—Faarfannaa 37:34.

Chaartii Yeroo

Waxabajjii 11, 2021

Humnoonni nageenyaa mana Vaadiimii fi mana ilmasaa Andiree weeraran
Ebla 29, 2022

Vaadiim yakkaan himatame
Muddee 1, 2022

Himanni yakkaa ilaalamuu jalqabe

Kanneen Armaan Gadiis ni Jaallatta Taʼa

ODUU HAARAA

Sababii Amantii Isaaniitiin Hidhamaniiru—Raashiyaa

Dhugaa Baatonni Yihowaa Raashiyaa keessa jiran sababii amantii isaaniitiin hidhamaniiru. Seenaa isaanii dubbisi, maqaa Dhugaa Baatota Yihowaa yeroo ammaatti hidhamanii jiranii ilaali.

ODUU HAARAA