GURAANDHALA 5, 2024 | ODUU HAAREFFAME: ONKOLOOLESSA 9 2024—
RAASHIYAA

ODUU HAAREFFAME—OBBOLEESSI KEENYA ADABNI MAALLAQAA ITTI MURTAAʼE | “Daandii Kee Yihowaatti Kennadhu”

BANI

Manni Murtii Godinaa Shoodriiniskii Naannoo Kurgaan Onkoloolessa 7, 2024tti obboleessa keenya Aleeksaandar Lubiinirratti murtii dabarsuudhaan adaba maallaqaa rubilii 500,000 (doolaara Ameerikaa 5,180) itti murteesse.

Ibsa Gabaabaa

Aleeksaandar Lubiin

Bara Dhalootaa: 1956 (Oogoonyook, Naannoo Kurgaan)

Seenaa Jireenyaa: Soorama baʼuu isaa dura, kaampaanii anniisaa keessatti injiinara balaa eegu taʼee hojjeteera

Hagayya 2001tti Taatyaanaa wajjin gaaʼela godhatan. Ijoollee lama qabu

Taatyaanaan Dhugaa Baatota Yihowaa wajjin Kitaaba Qulqulluu qoʼachuu eegalte. Dhibeen istirookii erga ishii qabee booda, Aleeksaandar Kitaaba Qulqulluu ishiidhaaf dubbisuu eegale; achiis waaʼee Kitaaba Qulqulluu beekuuf fedhii qabaate. Aleeksaandar, Taatyaanaa fi ijoolleen isaanii lamaan bara 2003tti waliin cuuphaman

Aleeksaandar dhukkuba artiraayitasii cimaa luqqeettuu isaa dararuun kan dhiphatu yommuu taʼu, kazaraadhaan deema. Kana malees, dhukkuba dandeettii qaamni dhibee of irra ittisuu laaffisus qaba.

Yaada Dhuunfaa

Yeroo mana hidhaa hamma mana murtiitti dhihaatanitti keessa tursiifaman keessa turtetti abdii kutachuu dandamachuuf kan si gargaare maalidha?

Mana hidhaa hamma mana murtiitti dhihaatanitti keessa tursiifaman keessatti hidhamuun baayʼee ulfaataa ture. Qoricha dhukkuba artiraayitasii cimaa natti dhagaʼamu tasgabbeessuuf na gargaaru tokkollee fudhachuun naaf hin heyyamamu ture. Jalqabarratti Yihowaan hatattamaan mana hidhaa kana keessaa akka na baasu kadhachaan ture. Yeroo booda garuu, obsaa fi tasgabbii akka naaf kennu kadhachuun eegale. Obbolootaa fi obboleettota mana hidhaa turan kan biroofis baayʼee kadhachaan ture. “Kun yerumaaf qofadha” jedheen of yaadachiisa ture. Achiis eebbawwan Yihowaan naaf kennaa jiru irrattin xiyyeeffachuu jalqabe. Akkas gochuun koo gammachuu koo eeggadhee akkan itti fufu na gargaareera. Yeroo booda, mana hidhaa hamma mana murtiitti dhihaatanitti keessa tursiifaman keessaan gadhiifame. Faarfannaan 37:5, “Daandii kee Yihowaatti kennadhu; isatti amanami, innis siif jecha tarkaanfii ni fudhata” jedhee na jajjabeesse. Yihowaa wanta baachuu dandeenyuu oliin akka qoramnu akka hin heyyamne amma hubadheera. Inni hamma guutummaatti isatti amanamnetti yeroo hundumaa haala rakkisaa akkamiiyyuu akka dandamannu nu gargaara.

Akkuma Aleeksaandar haala baayʼee nama gaddisiisu keessattillee hamma deggersa Yihowaatti amanamnetti, amanamummaadhaan jabaannee dhaabbachuu akka dandeenyu amanannaa guutuu qabna.—Isaayyaas 38:14.

Chaartii Yeroo

Adoolessa 13, 2021

Himanni yakkaa isarratti baname
Adoolessa 14, 2021

Manneen Dhugaa Baatota Yihowaa saddeet ni sakattaʼame. Aleeksaandar ni qabame, qorannaan isa irratti geggeeffame, achiis mana hidhaa hamma murtiitti keessa tursiifaman keessatti yeroodhaaf hidhame
Adoolessa 16, 2021

Mana hidhaa hamma murtiitti keessa tursiifaman keessatti dabarfame
Adoolessa 19, 2021

Dhibee fayyaa isaatiin kan kaʼe ol iyyannoon ni dhihaate
Hagayya 28, 2021

Gaaffii Mana Murtii Mirgoota Namoomaa Awurooppaa fi falmitoota mirga namoomaatiin, Aleeksaandar gadhiifamee akka hin imalle dhorkame
Adoolessa 14, 2023

Himanni yakkaa isa irratti dhihaate ilaalamuu jalqabe
Fulbaana 7, 2023

Aleeksaandar mana yaalaa waan ciiseef guyyaan mana murtiitti dhihaatu yeroo biraatti dabarfame

Kanneen Armaan Gadiis ni Jaallatta Taʼa

ODUU HAARAA

Sababii Amantii Isaaniitiin Hidhamaniiru—Raashiyaa

Dhugaa Baatonni Yihowaa Raashiyaa keessa jiran sababii amantii isaaniitiin hidhamaniiru. Seenaa isaanii dubbisi, maqaa Dhugaa Baatota Yihowaa yeroo ammaatti hidhamanii jiranii ilaali.

ODUU HAARAA