WAXABAJJII 1, 2022 | ODUU HAAREFFAME: FULBAANA 6, 2023
RAASHIYAA

ODUU HAAREFFAME—OBBOLOONNI KEENYA YAKKAMTOOTA AKKA TAʼAN ISAANITTI MURTAAʼE | Yihowaan Isaan Cinaa Waan Jiruuf Jabaatanii Dhaabbachuu Dandaʼaniiru

BANI

Fulbaana 5, 2023, Manni Murtii Magaalaa Niizyinyakaamski inni Riippabliika Taataaristaanitti argamu obboloonni keenya Deenis Filaatoov, Istaaniislaav Kiliinchiinkoovii fi Dimiitrii Yoorkak yakkamtoota akka taʼan murteesse. Sadan isaaniitti iyyuu hidhaan daangaa waggaa jaʼa murtaaʼeera. Haataʼu malee yeroo kanatti mana hidhaa hin galan.

Chaartii Yeroo

Sadaasa 18, 2020

Poolisoonni Tajaajila Nageenyaa Federaalaa fi poolisoonni meeshaalee waraanaa guguddaa hidhatan manneen maatii Dhugaa Baatota Yihowaa magaalaa Niizyinyakaamski 12 sakattaʼan. Obboloonni sagalii fi obboleettonni sadii qorannoodhaaf gara waajjira poolisiitti geeffaman
Hagayya 24, 2021

Qorannoo sana booda, Deenis, Istaaniislaavii fi Dimitriin akka hin imalle dhorkaan isaan irratti godhame
Onkoloolessa 7, 2021

Deenis, Istaaniislaavii fi Dimitriin himanni yakkaa isaan irratti baname. Kan himatamanis ‘faarfannaawwan amantii addaa waan faarfatanii fi kadhannaa waan dhiheessaniifi dha’
Amajjii 27, 2022

Himanni yakkaa isaan irratti dhihaate Mana Murtii Magaalaa Niizyinyakaamski isa Riippabliika Taataaristaanitti argamutti dabarfame

Ibsa Gabaabaa

Deenis Filaatoov

Bara Dhalootaa: 1980 (Niizyinyakaamski)

Seenaa Jireenyaa: Dhugaa Baatota Yihowaa wajjin kan wal arge bara 1996tti dha. Waaqayyo maqaa dhuunfaa kan qabu taʼuu isaa fi haala namoonni duʼan keessa jiran dhugaa isaa beekuun isaa baayʼee isa ajaaʼibsiiseera. Bara 1998tti cuuphame

Yaada Dhuunfaa

Haala rakkisaa keessa jiraattus Yihowaa tajaajiluu kee irratti akka xiyyeeffattu kan si gargaare maali dha?

Seexannii fi addunyaan inni bulchu amma iyyuu waraana nu irratti banaa akka jiran sirriitti hubadheera. Kitaaba Qulqulluu dubbisuun koo kan injifatee fi kan injifatame eenyu akka taʼe sirriitti akkan beeku na gargaareera. Taʼeewwan addunyaa saffisaan jijjiiramaa jiru, addunyaa haaraanis baayʼee dhihaachaa jira. Wanti nu irraa eegamu yeroo xinnoodhaaf qofa jabaannee dhaabbachuu, Yihowaadhaaf amanamoo taʼuu, akkasumas obbolootaa fi obboleettota keenyaa wajjin walitti dhihaannee hojjechuu keenya itti fufuu dha.

Istaaniislaav Kiliinchiinkoov

Bara Dhalootaa: 1982 (Niizyinyakaamski)

Seenaa Jireenyaa: Kaampaanii viidiyoo qopheessu qaba. Teembirii walitti qabuu fi iddoowwan garaa garaa dhaqee bashananuu jaallata

Dhugaa Baatota Yihowaa wajjin kan wal bare dargaggumaa isaatti yommuu taʼu, gaarummaanii fi jaalalli isatti argisiifame baayʼee isa ajaaʼibsiisee ture. Bara 1998tti cuuphame

Bara 2003tti haadha manaa isaa Oksaanaa wajjin gaaʼela godhatan. Intala tokko godhataniiru

Yaada Dhuunfaa

Jabaattee akka dhaabbattu kan si gargaare maali dha?

Fedhiin ani daandii dhiphaa gara jireenya isa dhugaatti geessu irra deemuu koo itti fufuuf qabu matumaa abdii akkan hin kutanne na gargaareera. Akkuma Peexiros Yohaannis 6:68 irratti, “Yaa Gooftaa, gara eenyuu dhaqna? Ati dubbii jireenya bara baraa qabda” jedhe dha. Wanti inni dubbate kun Seexanni daandicha irraa nu maqsuuf hammam iyyuu yaalii godhus, daandii sirriin gara Waaqa dhugaatti geessu tokko qofa akka ta‵e argisiisa. Qaama nu gargaaru, nu deggeruu fi nu cinaa dhaabbatu ganuun wanta matumaa hin fakkaanne dha!

Dimitrii Yoorkak

Bara Dhalootaa: 1984 (Niizyinyakaamski)

Seenaa Jireenyaa: Dhukkuba Serebiral Poolzii (dhukkuba miidhaa sammuu irra gaʼeen sochii qaamaa toʼachuun rakkisaa taasisu) jedhamu qaba. Mana barumsaa sadarkaa lammaffaa erga xumuree booda, bakka ijoolleen hirʼana qaamaa qaban itti walʼaanaman keessatti hojjetaa herregaa taʼee hojjeteera. Dhiheenya kana immoo telekominikeeshinii keessatti itti gaafatamaa kutaa gurgurtaa taʼee hojjechaa ture

Kitaab Qulqulluu qoʼachuu kan jalqabe yeroo umurii waggoota kurnanii keessa turetti dha. Wanti waaʼee amalawwan Yihowaa barate baayʼee isa ajaaʼibsiiseera. Bara 1998tti cuuphame

Bara 2010tti Isveetlaanaa wajjin gaaʼela godhatan

Yaada Dhuunfaa

Qophiiwwan Yihowaan godhe keessaa caalaatti kan si fayyade isa kami?

Yeroo hunda kadhannaa dhiheessuun baayʼee na gammachiisa. Abbaan koo guutummaa jireenya koo keessatti yeroo hunda na cinaa akka ture natti dhagaʼama, amma iyyuu taanaan ana cinaa jira. Isatti kadhannaa nan dhiheessa, ogummaa wanta sirrii raawwachuuf na barbaachisu akka naaf kennun isa kadhadha. Kana malees, akka na tasgabbeessuu fi haalan keessa jiruuf ilaalcha sirrii qabaadhee akkan itti fufuun isa gaafadha.

Obboloonni keenya hamma jabina Yihowaan kennutti amanamuu isaanii itti fufanitti, akkuma Daawit farfatichi, “Ani Waaqayyo na cinaa akka jiru mirkanaaʼaa dha” jedhee akka isaanitti dhagaʼamu amanannaa guutuu qabna.—Faarfannaa 56:9.

Kanneen Armaan Gadiis ni Jaallatta Taʼa

ODUU HAARAA

Sababii Amantii Isaaniitiin Hidhamaniiru—Raashiyaa

Dhugaa Baatonni Yihowaa Raashiyaa keessa jiran sababii amantii isaaniitiin hidhamaniiru. Seenaa isaanii dubbisi, maqaa Dhugaa Baatota Yihowaa yeroo ammaatti hidhamanii jiranii ilaali.

ODUU HAARAA