BITOOTESSA 27, 2024 | ODUU HAAREFFAME: CAAMSAA 13, 2024
RAASHIYAA

ODUU HAAREFFAME—OBBOLOOTA KEENYATTI NI MURTAAʼE | Amanannaa Qabaachuu, Qophaaʼuu fi Ilaalcha Sirrii Qabaachuu

BANI

Caamsaa 13, 2024, Naannoo Altaayitti Manni Murtii Godinaa Baarnaawul dhiheenyatti obboloota keenya Yuurii Kolotiniskii, Mikaʼeel Reshiyetinekoov fi Anaatoliyaa Saarichiyeev yakkamtoota akka taʼan isaanitti murteesse. Tokkoon tokkoon isaanii irratti hidhaan daangaa waggaa lamaa fi jiʼa sadii isaanitti murteeffameera.

Ibsa Gabaabaa

Yuurii Kolotiniskii

Bara Dhalootaa: 1955 (Moldoovaa)

Seenaa Jireenyaa: Albuuda baasuu keessatti maashinii ulfaataa irratti hojjeteera

Bara 1977tti Naataaliyaa wajjin gaaʼela godhate

Rakkinni akkas baayʼachuunsaa baayʼee gaafii itti taʼa ture. Dhugaa Baatota Yihowaa wajjin erga qoʼatee booda Kitaaba Qulqulluu irraa deebii quubsaa argateera. Yuurii fi Naataaliyaan bara 1995 cuuphaman

Yaada Dhuunfaa

Seenaan Kitaaba Qulqulluu Yihowaan akka si gargaaru amanannaa akka qabaattu si gargaare kami?

Seenaa Israaʼelootaa biyya Gibxii erga baʼanii booda jiru yeroo baayʼeen yaada. Lafa onaa keessa yommuu turan hundatti Yihowaan isaan geggeesseera akkasumas isaan eegeera. Anaafis akkasuma akka godhu natti dhagaʼama. Yeroon mana murtii deemu hundatti Yihowaan na dura akka jirutti natti dhagaʼama. Yihowaan akka na gargaaru natti dhagaʼama; kunimmoo akka na jaallatuu fi haalli akkamii na mudatus akkan dandamadhu humna akka naaf kennu akkasumas isaaf amanamaa akkan taʼu na amansiisa. Amantiin koo isa yeroo kamiiyyuu caalaa naaf cimeera akkasumas wanta sirrii taʼen gochaa jira; waan fedhe illee dhufu maqaa Yihowaatiif falmuuf qophaaʼeera.

Mikaʼeel Reshiyetinekoov

Bara Dhalootaa: 1949 (Maaksiiner, Naannoo Kiroov)

Seenaa Jireenyaa: Atoobisii fi konkolaataa feʼumsaa waggaa 50 ol oofeera

Haadha manaa isaa duraanii wajjin dhiira tokkoo fi durba tokko guddisaniiru; haati manaa isaa dhibee kaansariitiin duute. Bara 2021tti Antooneenaa wajjin gaaʼela godhate

Kitaaba Qulqulluu ilaalchisee gaaffii kan qabu taʼus waldaa dhaqu irraa deebii hin arganne. Dhugaa Baatota Yihowaa wajjin qoʼachuudhaan deebii waan argateef gammadeera. Bara 2000 cuuphame

Yaada Dhuunfaa

Ariʼatamaaf qophaaʼuun kan si gargaare akkamitti?

Obbolootaa fi obboleettota keenya qabanii hidhuu akkuma jalqabaniin Yihowaan akkan of qopheessuuf ogummaa fi obsa akka naaf kennun kadhachuu jalqabe. Yihowaan yeroo baayʼee kan na gargaare yommuu taʼu kun Yihowaan yeroo hunda yeroo sirrii taʼetti deebii akka kennu naaf mirkaneesseera. Inni akka na faana jiru shakkii hin qabu. Kanaan kan kaʼes manni murtichaa murtii akkamii illee yoo narratti dabarse hin sodaadhu. Gargaarsa Yihowaatiin amanamaa taʼee akkan dhaabbadhu beeka.

Anaatoliyaa Saarichiyeev

Bara Dhalootaa: 1949 (Karapoovoo, Naannoo Altaay)

Seenaa Jireenyaa: Soorama baʼuu isaa dura giraafiik diizaayinarii ture

Bara 1990tti Nadiyezadaa wajjin gaaʼela godhate. Ilma tokko qabu

Yaaliin baqaqsanii hodhuu erga godhameefii booda bayaannachaa utuu jiruu Dhugaa Baatota Yihowaa wajjin wal bare. Yihowaan hamminaa fi rakkina akka balleessu waadaa akka gale yommuu baretti baayʼee gammadde. Nadiyezadaan 2001, Anaatoliyaan immoo 2002 cuuphaman

Yaada Dhuunfaa

Wanti ilaalcha sirrii qabaachuuf si gargaare maalidha?

Gorsa 1 Pheexiros 3:14 irra jiru irrattan yaada. Caqasichi akkana jedha: “Qajeelummaadhaaf jettanii rakkinni yoo isin irra gaʼe illee isin gammadoo dha.” Ergamoonni lallabuu dhaabuu waan didaniif Fariisonni isaan ariʼataniiru. Ergamoonni ariʼatama maqaa Yesuusiif isaan irra gaʼe dandamataniiru, kanattis gammadaniiru. Anis fakkeenya isaanii hordofuun barbaada. Ariʼatamni narra gaʼuunsaa abdii kutadhuuf sababa hin ta‵u. Kanaa mannaa fakkeenya Kiristiyaanota jaarraa tokkoffaa fi Yesuus Kiristoos hordofaa akkan jiru beekuun koo jajjabina guddaa naaf kenna.

Obboloota kanneen akka armaan olii bara keenyatti argamanii fi amantii akkasumas Yihowaa irratti amanannaa qabaachuudhaan fakkeenya taʼan ni galateeffanna. Yihowaan waan isaan jaallatuu fi waan isaan hin irraanfanneef isaan gargaaruu isaa akka itti fufu amanannaa qabna.—Faarfannaa 25:10.

Chaartii Yeroo

Caamsaa 25, 2021

Himanni yakkaa Mikaʼeel irratti baname
Caamsaa 27, 2021

Manni Mikaʼeel ni sakattaʼame. Innii fi Antooneenaan ni qorataman. Mikaʼeel imaluu akka hin dandeenye dhorkaan irratti taasifame
Onkoloolessa 6, 2022

Himanni yakkaa Anaatoliyaa fi Yuurii himata Mikaʼeel irratti dabalame
Onkoloolessa 7, 2022

Anaatoliyaa fi Yuriin imaluu akka hin dandeenye dhorkaan isaan irratti taasifame
Amajjii 19, 2023

Himanni yakkaa ni baname

Dabalataan Ilaali

ODUU HAARAA

Sababii Amantii Isaaniitiin Hidhamaniiru—Raashiyaa

Dhugaa Baatonni Yihowaa Raashiyaa keessa jiran sababii amantii isaaniitiin hidhamaniiru. Seenaa isaanii dubbisi, maqaa Dhugaa Baatota Yihowaa yeroo ammaatti hidhamanii jiranii ilaali.

ODUU HAARAA