ONKOLOLEESSA 1, 2021 | ODUU HAAREFFAME: HAGAYYA 29, 2023
RAASHIYAA

ODUU HAAREFFAME—OBBOLOOTA KEENYATTI NI MURTAAʼE | Obboloonni Shan Ariʼatamni Isaan Irra Gaʼus Jabaatanii Dhaabbachuuf Kutataniiru

BANI

Hagayya 28, 2023, Manni Murtii Koonyaa Piramoshliinii inni Oreenbargitti argamu obboleessa Vilaadmiir Koochineev, Vilaadislaav Koobaanoov, Paavel Leekontiseev, Sergee Loogunoovii fi Nikoolaayi Zihuugiin yakkamtoota akka taʼan isaanitti murteesse. Hidhaan daangaa waggaa lamaa fi jiʼa jaʼaa hanga waggaa sadii fi jiʼa jaʼaa taʼu isaanitti murtaaʼeera. Kanaaf yeroo kanatti mana hidhaa hin galani.

Chaartii Yeroo

Bitootessa 1, 2021

Dhimmi kun waajjira abbaa alangaatti erga deebiʼee waggaa tokko booda, Mana Murtii Koonyaa Industiryaalnii isa Oreenbargi jirutti ilaalamuu eegale
Amajjii 14, 2020

Himanni yakkaa kun yaadni isaa ifa waan hin taaneef gara waajjira abbaa alangaatti akka deebifamu godhame
Hagayya 3, 2018

Vilaadmiir guyyaa 79 booda waajjira poolisiittii baafamee mana isaatti akka hidhamu taasifame
Caamsaa 16, 2018

Angawoonni manneen maatiiwwan Naannoo Oreenbargitti argaman 19 sakattaʼan. Viladmiirii fi Vilaadislaav bakka tursiisa shakkamtootaa galfaman. Vilaadislaav guyyaa sadii booda mana isaatti hidhamuu irraa bilisa taʼe
Caamsaa 14, 2018

Daayreektooreetiin Qorannoo, Koree Qorannoo Federeeshinii Raashiyaa inni Naannoo Oreenbargitti argamu obboloota kana shanan irratti iyyuu himata yakkaa bane

Ibsa Gabaabaa

Vilaadmiir Koochineev

Bara Dhalootaa: 1979 (Oreenbargi)

Seenaa Jireenyaa: Ijoollummaatti qurxummii qabuu fi kubbaa miillaa taphachuu jaallata ture. Hojii sibiilaa, akkasumas televijinii fi raadiyoo suphuu hojjeteera. Bara 1993tti cuuphamee Dhugaa Baatuu Yihowaa taʼe. Haadha manaa isaa Gaalinaa wajjin bara 2003tti gaaʼela godhatan

Yaada Dhuunfaa

Ariʼatamni Hariiroo Yihowaa Waliin Qabdu Kan Siif Cimse Akkamitti?

Yeroon wiirtuu tursiisa shakkamtootaa keessatti dabarsetti hariiroon Waaqayyoo wajjin qabu baayʼee gaarii akka ture afaan guutee dubbachuu nan dandaʼa. Kophaa koo waanan taʼee fi haala koo jijjiiruu waan hin dandeenyeef, caalaatti Yihowaa amanachuu baradheera.

Ariʼatamaaf qophaaʼuu irratti warri kaan yeroo isaanii akkamitti akka fayyadaman gorsita?

Ariʼatamni namni tokko aluma tokkotti nama gaarii ykn hamaa akka hin taasisne beekamaa dha. Kanaa mannaa namni tokko keessi isaa nama akkamii akka taʼe mulʼisa. Yihowaa waaqeffachuu irratti barsiifata gaarii yoo qabaanne, jechuunis dhaabbataadhaan kan kadhannu, Dubbii isaa kan qoʼanuu fi walgaʼii irratti kan hirmaannu yoo taʼe amantiin keenya ni cima. Hariiroo Yihowaa wajjin qabnu cimsachuuf yeroo addaa eeguu hin qabnu. Fakkeenyaaf, Kitaaba Qulqulluu dubbisuu eegaluuf ykn dhaabataadhaan kadhachuuf yeroo addaa eeguu hin qabnu.

Vilaadislaav Koobaanoov

Bara Dhalootaa: 1992 (Oreenbargi)

Seenaa Jireenyaa: Haati isaa yeroo inni waggaa jaʼa turetti Kitaaba Qulqulluu qoʼachuu eegalte. Bara 2008 cuuphamee Dhugaa Baatuu Yihowaa taʼe. Umurii isaa waggaa 18titti bakka tajaajila loltummaa, tajaajila siiviilii akka kennu gaafatame. Bakka maanguddoota kunuunsanitti maanguddoota kunuunsuudhaan tajaajila siiviilii raawwateera

Yaada Dhuunfaa

Haalli kun murtoo Yihowaa tajaajiluuf goote kan siif cimse akkamitti?

Namoonni kaan carraa kan biraa utuun argadhee, himata yakkaa kana irraa bilisa taʼuu kanan barbaaduu taʼuu koo yeroo baayʼee na gaafatu. Gaaffii kanaaf ofuma kootiif yommuun deebii kennu, wanta ana irra gaʼetti gaabbiin tokko illee akka natti hin dhagaʼamne nan hubadha. . . . Jireenya koo keessatti Yihowaan na gargaaraa akka jiru hubadheera, obboloonnii fi obboleettonni na gargaaraa akka jiranis beeka.

Sababa qorumsa kanaatiin amala jabaadhee dhaabachuu akkan horadhe, amantiin Yihowaa irratti qabu akka cimee fi jaalalli ani isaaf qabu akka guddate hubadheera.

Paavel Leekontiseev

Bara Dhalootaa: 1981 (Kitaat, Naannoo Kiraansnaayaarsik)

Seenaa Jireenyaa: Ijoollummaadhaa kaasee uumama dinqisiifachuu jaallata. Cabbii irra sigigaachuu, qurxummii qabuu fi waakkoo oomishuu jaallata. Hojii ijaarsaa wajjin wal qabate keessatti hojjeteera. Bara 1990 gara dhumaatti Dhugaa Baatota Yihowaa wajjin Kitaaba Qulqulluu qoʼachuu eegale. Gammachuu argachuuf wanti murteessaan ulaagaa Kitaaba Qulqulluutiin jiraachuu akka taʼe hubate. Bara 1999tti cuuphame. Bara 2017tti haadha manaa isaa Oksaanaa wajjin gaaʼela godhatan

Yaada Dhuunfaa

Yeroo qoratamaa turtee fi himanni yakkaa si irratti banametti maal goote?

Yeroo poolisoonni humnaan mana kootti seenanitti, kadhannaa gabaabaan tarii ani jireenya koo keessatti yeroo jalqabaaf dhiheesse dafee naa deebiʼuun isaa na dinqisiiseera. Tasgabbii argachuuf kadhadheen ture. Deebii isaa kanan argadhe saʼaatii ykn daqiiqaa hedduu booda utuu hin taʼin, sekondii muraasa gidduutti dha. Nan tasgabbaaʼe, akkasumas sirriitti yaaduun dandaʼe.

Manni murtii maali iyyuu yoo murteesse ati maal gochuuf kutatteetta?

Manni murtii maal akka murteessu beekuun hin dandaʼamu. Taʼus Yihowaan na jabeessuu isaa akka itti fufu mirkanaaʼaa dha. Manni murtii maal iyyuu yoo murteesse kan injifatu nuyi dha! Qorumsi jiru baayʼee ulfaataa taʼus, Yihowaan hafuura qulqulluu hamma nu barbaachisu nuu kenna. Yeroon Yihowaa tajaajiluudhaan dabarsetti kana irra deddeebiʼee hubadheera! Kanaafuu, dorgommicha hanga dhumaatti fiiguuf murteesseera.—2 Ximotewos 4:7.

Sergee Loogunoov

Bara Dhalootaa: 1962 (Oreenbargi)

Seenaa Jireenyaa: Maashinii irratti hojjechuu irratti leenjii guddaa argateera. Raayyaa waraanaa keessatti erga tajaajilee booda, suuraa kaasuu irratti beekamaa taʼeera. Dhiheenya kana hojii biqiltuu kunuunsuu hojjeteera. Yeroo boqonnaa isaatti suuraa kaasuu itti fufeera. Dabalataanis yeroo hunda gitaara taphata. Jalqaba bara 1990maatti Dhugaa Baatota Yihowaa wajjin Kitaaba Qulqulluu qoʼachuu eegale. Bara 1992tti cuuphame. Haadha manaa isaa Laarisaa wajjin bara 1994tti gaaʼela godhatan

Yaada Dhuunfaa

Ariʼatamaaf qophaaʼuu ilaalchisee warra kaaniif gorsa akkamii kennita?

Amanamummaan keenya kan qoramu yeroo haalli rakkisaan uumamutti akka taʼe beekamaa dha. Rakkina kanaaf qophaaʼuuf, ammuma hariiroo Yihowaa fi Yesuus wajjin qabnu cimsachuu qabna. Kun goraadee wajjin wal fakkaata. Namoonni goraadee hojjetan, sibiilicha cimsuu fi waraana irratti akka hin cabne gochuuf ni jabeessu. Loltuun tokko goraadee amansiisaa yoo qabaate yeroo waraanaatti caalaatti amanannaan isatti dhagaʼama. Yesuus namni “wanta xinnoo irratti amanamaa taʼe, wanta hedduu irrattis amanamaa taʼa” jedheera. (Luqaas 16:10) Kanaafuu namni tokko amma waan hunda irratti Waaqayyoof yoo amanamaa taʼe, yeroo ariʼatamni gaʼutti amanamaa taʼuuf carraan inni qabu guddaa dha.

Nikoolaayi Zihuugiin

Bara Dhalootaa: 1976 (Kaazaaksitaan)

Seenaa Jireenyaa: Ijoollummaatti ispoortii hojjechuu jaallata. Hojii sibiilaa hojjeteera. Kitaaba Qulqulluu Dhugaa Baatotaa Yihowaa wajjin qoʼachuu kan eegale, walakkeessa bara 1990tti dha. Bara 1996tti cuuphame. Haati manaa isaa Gaalinaan Dhugaa Baatuu miti; taʼus gaaʼela gammachiisaa qabu, akkaumas ilmaa tokko fi intala tokko qabu

Yaada Dhuunfaa

Yeroo kanatti Yihowaan maal akka siif godhu gaafatta?

Yihowaan rakkinaa fi ariʼatama hunda irraa nu hin oolchu. Wantoonni kun tajaajiltoota isaa irra akka gaʼan ni heyyama. Kanaafuu, qorumsa hunda dandamachuu akkan dandaʼuuf, Yihowaan hafuura qulqulluu akka naa kennu nan kadhadha, kadhachuu koos ittan fufa. Yihowaan yeroo qorannaan na irratti geggeeffamuu fi rakkinni ana irra gaʼaa jiru kanatti gammachuu koo akkan eeggadhu na gargaaraa akka jiru natti dhagaʼama. Utuun gargaarsa isaa hin qabu taʼee kana dandamachuu akkan hin dandeenye sirriitti beeka!

Waraanni seeraa amantii isaanii irra gaʼu waggaa sadii oliif kan itti fufe taʼus, obboloonni keenya Yihowaaf amanamoo taʼanii jiraachuuf akka kutatan ifa dha. Yihowaanis amanamaa isaaniif taʼaa akka jiru ifatti mulʼachaa jira.—2 Saamuʼel 22:26.

Kanneen Armaan Gadiis ni Jaallatta Taʼa

ODUU HAARAA

Sababii Amantii Isaaniitiin Hidhamaniiru—Raashiyaa

Dhugaa Baatonni Yihowaa Raashiyaa keessa jiran sababii amantii isaaniitiin hidhamaniiru. Seenaa isaanii dubbisi, maqaa Dhugaa Baatota Yihowaa yeroo ammaatti hidhamanii jiranii ilaali.

ODUU HAARAA