ADOOLESSA 26, 2022 | ODUU HAAREFFAME: MUDDEE 6, 2023
RAASHIYAA

ODUU HAAREFFAME—OBBOLOOTAA FI OBBOLEETTI KEENYA TOKKOTTI NI MURTAAʼE | Ija Jabinaa fi Gammachuudhaan Dandamachuu

BANI

Muddee 5, 2023, Manni Murtii Magaalaa Surgut, inni Naannoo Hantii-Mansiiski Awutoonoomas Yugraatti argamu obboloonni 17 fi obboleettiin keenya tokkoo yakkamtoota akka taʼan murteesse. Obboloonni kun, Vaasilii Buuryenyeskuu, Viiktoor Fiyefiiloov, Iigoor Koobootoov, Iigoor Peetroov, Liiyoonid Riisiikoov, Iigoor Tiriifonoovii fi obboleessa keenya Paavel Roomaashoovii fi haadha manaa isaa Viyoolaa Shepeelidha. a Obboloota 17 kanatti hidhaan daangaa waggaa jaʼaa fi jiʼa sadii hanga waggaa torbaa taʼu isaanitti murtaaʼeera. Obboleettii Sheepeelitti immoo hidhaan daangaa waggaa jaʼaa fi jiʼa sadii ishiitti murtaaʼeera. Haataʼu malee yeroo kanatti mana hidhaa hin galan.

Chaartii Yeroo

Guraandhala 15, 2019

Poolisoonni mana Dhugaa Baatota Yihowaa magaalaa Surgutii fi magaalota naannoo ishiitti argaman hedduu sakattaʼan. Obboloonni torba, yeroo qoratamaa turanitti akka reebaman gabaasaniiru. Obboloonni sadii waajjira poolisiitti hidhamaniiru, obboleessi tokko immoo yeroo booda mana yaalaa sammuu akka deemu ajajameera
Onkoloolessa 3, 2019

Viiktoor, Iigoor Koobootoov, Iigoor Peetroov, Liiyoonid, Iigoor Tiriifonoov, Paavelii fi Viyoolaan galmee namoonni finxaaleyyii taʼan irratti galmeeffamanitti dabalaman
Onkoloolessa 10, 2019

Vaasiliin galmee namoonni finxaaleyyii taʼan irratti galmeeffamanitti dabalame
Adoolessa 23, 2020

Manni obboleessa keenya Iigoor Peetroov yeroo lammaffaatiif sakattaʼame, miʼawwan isaa hedduunis jalaa fudhataman
Onkoloolessa 29, 2021

Himanni yakkaa isaan irratti baname qoratamuu jalqabe

Ibsa Gabaabaa

Vaasilii Buuryenyeskuu

Bara Dhalootaa: 1958 (Baayelsii, Moldoovaa)

Seenaa Jireenyaa: Haadha isaatu kophaa ishii isa guddise. Mana barumsaa ijoollee harka qalleeyyii taʼaniif qophaaʼe keessa jiraachaa ture. Hojii konkolaataa suphuu hojjeteera

Bara 1977tti Naataaliyaa wajjin gaaʼela dhaabbate. Ijoollee lama qabu. Bara 2000tti Dhugaa Baatota Yihowaa wajjin Kitaaba Qulqulluu qoʼachuu kan jalqabe yommuu taʼu, gaaffiiwwan isatti uumamaniifis deebii quubsaa argateera. Bara 2009tti cuuphame

Yaada Dhuunfaa

Caqasni jabaattee akka dhaabbattu si gargaare isa kami?

Roomaan 12:16, “Ogeeyyii akka taatanitti of hin ilaalinaa” jedha. Yihowaan amala gadi of qabuu akka horannu nu gargaara, innis amala kana ni argisiisa. Ani ‘garbicha gatii hin qabne’ yoon taʼes Uumaan koo na jaallata. (Luqaas 17:10) Waaʼee kanaa yaaduun koo na cimsa. Abdii akkan hin kutannee fi fuulduratti adeemuu koo akkan itti fufu na gargaara.

Viiktoor Feefiloov

Bara Dhalootaa: 1962 (Uyiiniskooye, Naannoo Peermi)

Seenaa Jireenyaa: Mana barumsaa sadarkaa lammaffaa erga xumuree booda leenjii maashinii irra hojjechuu fudhateera. Dhiheenya kana immoo tajaajila geejjibaa irra hojjeteera

Bara 1997tti Naataaliyaa wajjin gaaʼela dhaabbate. Kitaaba Qulqulluu qoʼachuuf jalqaba irratti fedhii kan argisiiste ishiidha, innis yeroo booda fedhii akka qabu argisiiseera. Lamaan isaanii iyyuu hammeenya, jalʼina haqaa fi waraana ilaalchisee gaaffiiwwan isaan jeeqaa turaniif deebii argataniiru. Viiktoor bara 2000tti cuuphame

Yaada Dhuunfaa

Wanti ija jabeessa taatee akka itti fuftu si gargaare maalidha?

Isaayyaas 12:2, “Waaqayyo fayyisaa koo ti. Ani amanannaa qaba, homaas hin sodaadhu. . . . Yihowaan cimina koo fi jabina koo ti” jedha. Caqasni kun ija jabeessa taʼee itti fufuu akkan dandaʼuu fi wanti na sodaachisu tokko illee akka hin jirre naaf mirkaneesseera.

Iigoor Koobootoov

Bara Dhalootaa: 1973 (Abshiiyerooniskii, Naannoo Kiraasnoodaar)

Seenaa Jireenyaa: Mana barumsaa muuziqaatii eebbifameera. Waggoota lamaaf loltuu taʼee tajaajileera. Kaampaanii zayitii fi gaazii keessaa hojjeta

Umurii isaa 23tti Kitaaba Qulqulluu qoʼachuudhaan jireenya kaayyoo qabu jiraachuu jalqabe. Bara 1996tti cuuphame. Bara 2005tti Yuuliyaa wajjin gaaʼela dhaabbate. Ilma tokko qabu

Yaada Dhuunfaa

Haala keessa jirtuuf ilaalcha sirrii akka qabaattu kan si gargaare maalidha?

Fakkeenya Daaniʼelii fi akkamitti boolla leencotaa keessatti akka darbatame nan yaadadha . . . Daaniʼel abukaatoo hin qabu ture, bakka itti ol iyyannoo dhiheeffatus hin qabu, obbolootaa fi obboleettota addunyaa mara irraa xalayaa isaaf barreessanis hin qabu ture. Seenaawwan Kitaaba Qulqulluu irratti xiinxaluun koo addunyaa kana keessatti haqa argachuun akka hin dandaʼamne na hubachiiseera. Haalawwan kun hundi utuma nu mudachaa jiranii Yihowaan nu gargaaraa kan jiru akkamitti akka taʼe hubachuun barbaachisaadha.

Iigoor Peetroov

Bara Dhalootaa: 1969 (Turdookoovoo, Riippabliika Chuuvaashiyaa)

Seenaa Jireenyaa: Kaazaakistaan keessatti guddate. Maashinoota guguddaa oofa

Ulaagaaleen Kitaaba Qulqulluu xiyyeeffannaa isaa kan harkisan yeroo taʼu, hojiirra oolchuunis faayidaa akka qabu hubateera. Bara 2001tti Laariisaa wajjin gaaʼela erga godhatanii booda, wagguma sana keessa cuuphaman. Ilma tokko qabu

Yaada Dhuunfaa

Qorumsi si mudate sirreeffama gochuuf kan si gargaare akkamitti?

Yeroon abdii itti kutadhu tokko tokko akka jiru beekamaadha. Ariʼatamni dadhabinni koo ifatti akka mulʼatu godha. Dadhabina ofii of irratti baruun akka nama hin gammachiisne beekamaadha, ergan of irratti baree booda garuu maal irratti hojjechuu akkan qabun hubadha. Yihowaan qorumsi kun hundi akka ana irra gaʼu kan heyyame faayidaama kootiif, jechuunis sirreeffama barbaachisaa taʼe akkan godhuuf akka taʼe natti dhagaʼama.

Paavel Romashov

Bara Dhalootaa: 1974 (Toomiskii, Naannoo Toomiskii)

Seenaa Jireenyaa: Hadhaa isaatu kophaa ishii isa guddise. Kaampaanii zayitii fi gaazii keessaa gamoo supha. Bara 2003tti Viyoolaa wajjin gaaʼela dhaabbate. Intala durbaa tokko qabu

Paavelii fi Viyoolaan Dhugaa Baatota Yihowaa wajjin Kitaaba Qulqulluu kan qoʼatan wal faana ture. Paavel dhugaan Kitaaba Qulqulluu maatii isaa irratti jijjiirama gaarii akka fide hubateera. Jaalallii fi michummaan gumii keessatti argamu baayʼee isa jajjabeesseera. Bara 2004tti Viyoolaa wajjin cuuphaman

Yaada Dhuunfaa

Yeroo manni keessan sakattaʼametti akka tasgabbooftu wanti si gargaare maalidha?

Dhugaa Baatuu Yihowaa taʼuu koo dura Ministeera Dhimma Biyya Keessaa jalatti eegduu taʼee gara waggaa shaniif tajaajileera; kanaaf waaʼee sakattaʼiinsaa, qorannoo fi dhimma yakkaa sirriittan beeka.

Manni koo yeroo sakattaʼamu haalli isaa maal akka fakkaatu ykn amala akkamii argisiisuu akkan qabu yeroo baayʼee yaadeen ture; haataʼu malee namoonni maaskii godhatan balbala mana kootii yeroo humnaan rurrukutan amanuu hin dandeenye. Yeroo kanatti, . . . wantoota lama, jechuunis sodaadhaan akkan hin romʼinee fi namoota sanatti jaalala argisiisuu akkan dandaʼun kadhadhe. Isaan hojii isaanii hojjechaa jiru malee dhugaa jiru hin beekan.

Liiyoonid Riisiikoov

Bara Dhalootaa: 1950 (Siriidinii Maangaarekii, Naannoo Kiraasnooyaariskii)

Seenaa Jireenyaa: Ijoollee saddeettan warri isaa qaban keessaa isa tokkodha. Hojii elektiriikii fi konkolaataa suphuu hojjeta

Bara 1982tti Yeevgeeniyaa wajjin gaaʼela dhaabbatan. Ishiitu jalqaba cuuphame. Liiyoonid jalqaba irratti mormee kan ture taʼus, sabni Yihowaa kan nama jaallatanii fi garaa qulqulluu kan qaban taʼuun isaanii dhugaa akka fudhatu isa taasiseera. Bara 1996tti cuuphame

Yaada Dhuunfaa

Yeroo himanni yakkaa sirratti dhihaate ilaalamaa turetti wanti ilaalcha sirrii qabaachuuf si gargaare maalidha?

Yeroo rakkisaa taʼe kanatti namoota kaan gargaaruuf fedhii guddaan qaban ture. Wantoota tokko tokkos kolfeen dabarsan ture. Ariʼatamni kan narra gaʼu maaliif akka taʼe beeka, Yihowaan wanta sirrii taʼe yeroo raawwannu hundatti akka nu eebbisus adeemsa keessa caalaatti mirkanaaʼaa taʼeera. Kun immoo gammachuu guddaa naaf kenna.

Viyoolaa Sheepeel b

Bara Dhalootaa: 1976 (Istiipinoogoriskii, Kaazaakistaan)

Seenaa Jireenyaa: Yaalii ijoollee irratti narsii taatee hojjetti. Bara 2003tti Paavelitti heerumte. Mucaa durbaa tokko qabu

Viyoolaa fi Paavel, wal faana Dhugaa Baatota Yihowaa wajjin Kitaaba Qulqulluu qoʼatan. Viyoolaan wanta Kitaabni Qulqulluun jiraachuu Waaqayyoo, kaayyoo jireenyaa fi namoota kaanii wajjin hariiroo gaarii qabaachuu ilaalchisee barsiisu baayʼee jaallatte. Bara 2004tti Paavelii wajjin cuuphaman

Yaada Dhuunfaa

Yihowaan gargaarsa akkamii siif godhe?

Waggoota hedduudhaaf dhiphina sammuu wajjin walʼaansoo gochaan ture. Yeroo dhiphinni natti dhagaʼamuu jalqabutti, ofuma kootiin moʼuu waanan hin dandeenyeef wantin jalqaba godhu Yihowaatti kadhannaa dhiheessuu ture. Achiis obboleettota koof bilbileen haala isaan irra jiran gaafadha. Hundumtuu rakkina wajjin qabsaaʼan waan qabaniif tarii tokkoon isaanii gargaarsi koo ni barbaachisa taʼa. Yeroo tokko tokko immoo nama isaan haasofsiisu barbaadu taʼa. Yeroon isaanii wajjin haasaʼu suutuma suuta miirri gaariin natti dhagaʼamuu jalqaba. Kun immoo yeroo hunda kophaa koo akkan hin taanee fi miseensa maatii balʼaa qabu keessaa tokko akkan taʼe hubachuuf na gargaara.

Iigoor Tiriifonoov

Bara Dhalootaa: 1969 (Siriibriyooniskii, Naannoo Murmaaniskii)

Seenaa Jireenyaa: Ijoollummaa isaatti Belaarus keessa jiraachaa ture. Dhaabbata ibidda dhaamsu keessaa hojjeta

Bara 1993tti jireenyi Yesuus Kiristoos waan isa hawwateef, dhuunfaa isaatti Kitaaba Qulqulluu dubbisuu jalqabe. Utuma baayʼee hin turin, Dhugaa Baatota Yihowaa wajjin wal argee Kitaaba Qulqulluu qoʼachuuf walii gale. Bara 1995tti cuuphame. Bara 1997tti Oolgaa wajjin gaaʼela dhaabbate. Ijoollee sadii godhataniiru

Yaada Dhuunfaa

Hariiroon Yihowaa wajjin qabdu caalaatti kan cime akkamitti?

Yihowaa irratti amanannaa guddaan qaba. ‘Itti aansee hoo maaltu taʼa laata?’ jedhee dhiphachuu dhiiseera. Yihowaan si cinaa jira taanaan wanta si sodaachisu tokko illee hin qabaattu. . . . Wanti ani barbaadu, wanti fedhe iyyuu yoo na mudate Yihowaadhaaf amanamaa taʼee jiraachuu qofadha.

‘Rakkinni, dhiphinni, ariʼatamni ykn balaan’ akkamii iyyuu obboloota keenya irra yoo gaʼe, jaalalaa fi deggersa Yihowaatiin ‘guutummaatti injifannoo akka argatan’ amanannaa guutuu qabna.—Roomaa 8:35, 37.

a b Erga gaaʼela dhaabbattee boodas maquma abbaa ishiitiin waamamuu itti fufte.

Kanneen Armaan Gadiis ni Jaallatta Taʼa

ODUU HAARAA

Sababii Amantii Isaaniitiin Hidhamaniiru—Raashiyaa

Dhugaa Baatonni Yihowaa Raashiyaa keessa jiran sababii amantii isaaniitiin hidhamaniiru. Seenaa isaanii dubbisi, maqaa Dhugaa Baatota Yihowaa yeroo ammaatti hidhamanii jiranii ilaali.

ODUU HAARAA