MUDDEE 14, 2023 | ODUU HAAREFFAME: AMAJJII 30, 2024
RAASHIYAA

ODUU HAAREFFAME—OBBOLOOTATTI HIDHAAN NI MURTEEFFAME | “Wanti Baayʼee Barbaachisaa Taʼe Yihowaatti Amanamuudha”

BANI

Amajjii 25, 2024, Manni Murtii Saamaaraa inni Godinaa Saamaariskiitti argamu obboloota keenya Araam Daaniyeliyaan, Deenis Kuziyaniin, Sargee Poloosenkoo fi Niikoolaay Vaasiiliiyeev irratti yakkamtoota akka taʼan isaanitti murteesse. Tokkoon tokkoon isaanii hidhaan waggaa torbaa isaanitti murteeffameera. Yeruma sana mana murtiitii gara mana hidhaatti geeffamaniiru.

Ibsa Gabaabaa

Araam Daaniyeliyaan

Bara Dhalootaa: 1990 (Armeeniyaa)

Seenaa Jireenyaa: Maatiin isaa yeroo inni umurii jiʼa jaʼa turetti gara Raashiyaa dhaqan

Hojii ijaarsaa fi miʼa bituu irratti hojjeteera

Waaʼee Kitaaba Qulqulluu kan barate adaadaa isaa fi haadha isaa irraati. Kadhannaan isaa deebii argachuun isaa jaalalli inni Yihowaadhaaf qabu akka guddatu godheera. Bara 2011tti cuuphamee Dhugaa Baatuu Yihowaa taʼe

Bara 2017 Eliinaa wajjin gaaʼela godhatan. Ilma tokko qabu

Yaada Dhuunfaa

Garmalee abdii akka hin kutanne wanti si gargaare maalidha?

Haalan keessa jiru ilaalchisee yeroo tokko tokko gaddi natti dhagaʼama. Taʼus yeroo miirri kun natti dhagaʼamu, tajaajiltoota Yihowaa keessaa tokko taʼuudhaan akkan filatame of yaadachiisuun koo na gargaara. Ariʼatama irraa ooluuf jedhee waaqeffannaan Yihowaaf dhiheessu yoon dhiise, dhuma irratti maalan taʼa? Maqaa Yihowaa qulqulleessuu fi akka beekamu gochuu irratti qooda fudhachaa akkan jiru beekuun koo baayʼee na gammachiisa. Hidhaa qofa utuu hin taʼin, duʼaaf yoon saaxilamellee Yihowaa tajaajiluu koo itti fufuudhaan Seexanni sobduu taʼuu isaa mirkaneessuuf murteesseera.

Deenis Kuziyaniin

Bara Dhalootaa: 1984 (Nooriiliski, Naannoo Kiraasnayaariski)

Seenaa Jireenyaa: Hojii mataa isaa hojjeta

Deenisii fi haati isaa Dhugaa Baatota Yihowaa wajjin Kitaaba Qulqulluu qoʼachuu kan jalqaban, yeroo inni mucaa umurii waggaa kudhanii turettidha. Bara 2001tti cuuphame

Bara 2012tti Yeeleenaa wajjin gaaʼela godhatan. Intala tokko qabu

Yaada Dhuunfaa

Seenaan Kitaaba Qulqulluu haala rakkisaa si mudachaa jiruuf ilaalcha sirrii akka qabaattu si gargaare isa kami?

Keessumaa kitaabni Iyyoob naaf hiika guddaa qaba. Boqonnaa 38 irraa eegalee, Yihowaan humna uumuuf qabu ilaalchisee Iyyoobii wajjin dubbachaa ture. Wanta Yihowaan uumee fi gara fuulduraatti raawwatu irratti xiinxaluun, wanti jireenya koo keessatti bakka guddaa qabaachuu qabu maal akka taʼe hubachuuf na gargaareera. Wanti hunda caalaa baayʼee barbaachisaa taʼe Yihowaadhaaf ajajamuudha. Isa duratti fudhatama yoon argadhe, rakkoon akkamiiyyuu yoo na mudate akka na gargaaru beeka.

Sargee Poloosenkoo

Bara Dhalootaa: 1968 (Uzbeekistaan)

Seenaa Jireenyaa: Hogganaa mana miidhaginaa taʼee hojjeta

Bara 1993 Liidiyaa wajjin gaaʼela godhatan

Maatii Dhugaa Baatota Yihowaa taʼe keessatti guddate, bara 1982 cuuphame

Yaada Dhuunfaa

Yeroon ati mana hidhaa hanga murtiitti dhihaatanitti keessa tursiifaman keessatti dabarsite hariiroo Yihowaa wajjin qabdu irratti dhiibbaa akkamii geessise?

Mana hidhaa hamma murtiitti dhihaatanitti keessa tursiifaman keessa yeroon turetti, haala koo ilaalchisee wantin jijjiiruu dandaʼu tokkollee hin turre. Anaa fi Yihowaa qofatu ture. Yihowaan na eegeera, na gargaareera, hunda caalaa immoo michuu koo naaf taʼeera. Yeroo sana hundumaatti naa wajjin akka taʼe hubadheera. Michummaan kunimmoo tasgabbii fi jabina guddaa naaf argamsiiseera. Haalli koo yeroo yerootti kan jijjiiramu taʼuyyuu, Yihowaan karaa adda taʼeen amala isaa natti argisiisuu isaa itti fufa. Kanaafis guddaan isa galateeffadha.

Niikoolaay Vaasiiliyeev

Bara Dhalootaa: 1984 (Ayishaa, Riippabliika Taataaristan)

Seenaa Jireenyaa: Ogeessa kompiitaraa taʼee hojjeteera

Waaqayyotti hin amanu ture. Kitaaba Qulqulluu erga qoʼatee booda, akkaataa barumsi isaa itti ibsame waan hubateef Waaqayyoo jiraachuu isaa amane. Bara 2005tti cuuphame

Yaada Dhuunfaa

Amanannaa qabdu eegdee akka itti fuftu kan si gargaare maalidha?

Kan nama dinqu, mana hidhaa hamma murtiitti keessa tursiifaman keessa galuu koo dura mana hidhaa galuu baayʼeen sodaadha ture. Amma mana hidhaa hamma murtiitti keessa tursiifaman keessa galuu fi Yihowaan akka nu kunuunsu waanan beekeef sodaan koo badeera. Himanni yakkaa na irratti dhihaate yeroo hangamiitiif akka turuu fi wanta na irratti murteeffamu beekuu dhiisuun ulfaataa taʼus, Yihowaan yoomiyyuu na duukaa akka jiru hubadheera. Nagaa sammuu fi wantoonni hundi gaarii akka taʼan amanannaa qabaachuuf Yihowaatti amanamuun barbaachisaadha.

Yihowaan namoota sababii amantii isaaniitiin rakkinni isaani irra gaʼaa jiru hunda, hojii gaarii fi dubbii gaarii hundumaan isaan cimsuudhaan’ jajjabeessuu isaa akka itti fufu amanannaa guutuu qabna.—2 Tasalonqee 2:16, 17.

Chaartii Yeroo

Muddee 14, 2021

Deenis, irratti himanni yakkaa dhihaate
Muddee 15, 2021

Manni Deenis, Niikoolaayii fi Sargee ni sakattaʼame. Qabamanii yeroodhaaf mana hidhaa hamma murtiitti keessa tursiifaman keessatti hidhaman
Muddee 16, 2021

Deenis, Niikoolaayii fi Sargeen mana hidhaa hamma murtiitti keessa tursiifaman keessatti hidhaman
Amajjii 6, 2022

Himanni yakkaa obboleessa keenya Araam irratti dhihaate. Buufata xiyyaaraatti qabame
Amajjii 7, 2022

Araam mana hidhaa hamma murtiitti keessa tursiifaman keessatti hidhame
Muddee 12-14, 2022

Obboloonni arfanuu mana hidhaa hamma murtiitti keessa tursiifaman keessaa gadhiifamanii akka hin imalle dhorkaman
Waxabajjii 16, 2023

Himanni yakkaa isaan irratti dhihaate ilaalamuu jalqabe

Kanneen Armaan Gadiis ni Jaallatta Taʼa

ODUU HAARAA

Sababii Amantii Isaaniitiin Hidhamaniiru—Raashiyaa

Dhugaa Baatonni Yihowaa Raashiyaa keessa jiran sababii amantii isaaniitiin hidhamaniiru. Seenaa isaanii dubbisi, maqaa Dhugaa Baatota Yihowaa yeroo ammaatti hidhamanii jiranii ilaali.

ODUU HAARAA