Muddee 16, 2021
RAASHIYAA

ODUU HAAREFFAME | Obboloonni Shanii fi Obboleettiin Takka Dubbisni Kitaaba Qulqulluu Dhuunfaa Ariʼatama Akka Dandamatan Isaan Gargaareera

BANI

Hagayya 25, 2022tti, Manni Murtii Koonyaa Leeniinsikii magaalaa Saaransikii obboloota keenya Deenis Antoonoov, Vilaadimiir Atriyaakin, Aleeksaandar Koroolev, Geʼoorgii Nikuliin, obboleettii keenya Yooleenaa Nikuliinii fi obboleessa keenya Aleeksaandar Shevchuuk irratti murtii dabarse. Deenis, Aleeksaandar Koroolevii fi Aleeksaandar Shevchuukitti hidhaa waggaa lamaatu murtaaʼe. Geʼoorgii fi Yooleenaatti hidhaa waggaa afurii fi jiʼa lamaa, Vilaadimiiritti immoo hidhaa waggaa 6tu murtaaʼe. Murtoowwan kun hatattamaan hojiirra oolu.

Chaartii Yeroo

Waxabajjii 11, 2021

Mana Murtii Koonyaa Leeniinsikii magaalaa Saaransikiitti himanni jalqabaa ni dhihaate
Ebla 2, 2021

Yooleenaa sochii finxaaleyyii irratti hirmaatteetti, namoonni kaanis akka irratti hirmaatan gooteetti jedhamtee himatamte
Bitootessa 31, 2021

Vilaadimiir sochii finxaaleyyii qindeesseera jedhamee himatame
Adoolessa 2, 2019

Aleeksaandar Shevchuukii fi Geʼoorgii mana hidhaa hanga murtiitti itti tursiifamanii gadhiifaman, achiis naannoo isaaniitii akka hin baane ajajaman
Bitootessa 28, 2019

Vilaadimiir mana hidhaa hanga murtiitti itti tursiifamanii gadhiifame, achiis naannoo isaatii akka hin baane ajajame
Guraandhala 8, 2019

Aleeksaandar Shevchuuk, Vilaadimiirii fi Geʼoorgii mana hidhaa hanga murtiitti itti tursiifamanitti ergaman
Guraandhala 4, 2019

Tajaajilli Nageenyaa Federaalaa (FSB) sochii finxaaleyyii qindeessaniiru jedhee obbolootaa shanii fi Yooleenaa irratti himata bane

Ibsa Gabaabaa

Deenis Antoonoov

Bara Dhalootaa 1976 (Siktiivkaar, Rippabliikii Koomii)

Seenaa Jireenyaa: Yeroo ijoollee turetti sababii hojii abbaa isaatiin maatiin isaa bakka jireenyaa jijjiiru turan. Teeknishaanii fi makaanikii meeshaalee albuuda baasanii taʼuu waan barbaaduuf mana barumsaa teeknikaa galee barateera

Waggaa shaniif bakka albuuda baasanitti hojii elektiriikaa hojjechaa ture. Suuraa kaasuu fi cheezii taphachuu jaallata

Waaʼee Waaqayyoo gaaffii hedduu qaba ture, barreeffamoota amantaa fi Kitaaba Qulqulluu dubbisuus hubachuu hin dandeenye. Yeroo loltuu taʼee tajaajilaa turetti hiriyaa isaa Dhugaa Baatota Yihowaa wajjin qoʼachaa ture wajjin mariʼachuu jalqaban. Kitaabni Qulqulluun sirrii taʼuu isaa fi maqaa Waaqayyoo isa Yihowaa jedhamu beekuun isaa garaa Deenis tuqe. Bara 1998tti cuuphamuudhaan Dhugaa Baatuu Yihowaa taʼe. Bara 2015tti immoo Oolgaa fuudhe

Yaada Dhuunfaa

Caqasni Kitaaba Qulqulluu ija jabina akka qabaattuu fi jabaattee akka dhaabbatu si gargaare isa kami?

Caqasoota ani jaalladhu keessaa inni tokko Uumama 15:1 dha. . . . Caqasni kun yeroo Tajaajilli Nageenya Federaalaa galgala dhufanii qorannoodhaaf manaa na fuudhanii deemanitti sammuu koo keessa deddeebiʼaa ture. . . . Tasgabbii akkan qabaadhuu fi amanamaa akkan taʼu na gargaareera.

Vilaadimiir Atriyaakin

Bara Dhalootaa 1987 (Rozydiyastivyoono, Riipablika Moordooviyaa)

Seenaa Jireenyaa: Warra qeenxeedhaan guddate. Obboleessa quxusuu tokko qaba. Kubbaa miillaa, kubbaa harkaa fi tapha hookii jedhamu taphachuu jaallata. Koompiitar piroograamiingii barate. Siistamis administreetar (systems administrator) taʼee hojjeta

Barachaa utuma jiruu Kitaaba Qulqulluu qoʼachuuf fedhii qabaachuu jalqabe. Bara 2004tti cuuphamuudhaan Dhugaa Baatuu Yihowaa taʼe. Bara 2009tti Maariyaa wajjin gaaʼela godhatan. Hiriyoonni gaaʼelaa kun yeroo abbaan isaanii qabametti ijoollee xixinnoo jiʼa sagalii fi waggaa lamaa qabu turan

Yaada Dhuunfaa

Yeroowwan rakkisoo taʼan kanatti hariiroon Yihowaa wajjin qabdu caalaatti kan cime akkamitti?

Maatii koo irraa adda baʼuun kootiin garmalee gaddee fi dhiphadheen ture. Bakka hamma hidhamanitti keessa turfamanitti yommuun geeffame hojjetaan tokko foormiiwwan tokko tokko guutaa ture. Namichi sun maaliif akkan hidhame na gaafate. Anis wanta na yaaddessen [waaʼee maatii koo] isatti hime. Innis shakki tokko malee, “Isin maatii keessan matumaa hin dhiistan” naan jedhe. . . . Namoonni hidhata amantii koo taʼan maatii koo akka naaf kunuunsan mirkanaaʼaa ture . . . Yihowaan isatti amanamuu akkan dandaʼu waardiyyaa kanatti fayyadamee na yaadachiisaa akka jiru natti dhagaʼame. Mana hidhaa hamma murtiitti dhihaatanitti keessatti hidhaman keessaa baʼee haadha manaa koo yommuun haasofsiisu, Yihowaan namoota hidhata amantii koo taʼanitti fayyadamee maatii koo hangam kunuunsaa akka ture yommuu natti himtu baayʼeen dinqisiifame.

Aleeksaandar Koroolev

Bara Dhalootaa 1978 (Zametchiinoo, Naannoo Peensaa)

Seenaa Jireenyaa: Kan guddate abbaa malee ti. Qurxummii qabuu fi kubbaa miillaa taphachuu jaallata. Mana barumsaa sadarkaa lammaffaa erga xumuree booda konkolaachisaa konkolaataa feʼumsaa fi ogeessa maashinii taʼee hojjeteera. Tiksee fi horii horsiisuu irrattis hirmaateera. Yeroo ammaatti immoo anaaxii taʼee hojjechaa jira

Dhugaa Baatota Yihowaa wajjin yeroo qoʼatutti gaaffiiwwan waggoota hedduudhaaf isa jeeqa turaniif deebii argate. Bara 1998tti cuuphame. Bara 2006tti Naataaliyaa wajjin gaaʼela erga godhatanii booda ilma isaanii waliin guddisaa jiru

Yaada dhuunfaa

Walgaʼiiwwan gumii irratti argamuun kee faayidaa akkamii siif argamsiiseera?

Dubbisni Kitaaba Qulqulluu walgaʼii torban gidduutti godhamu irratti dhihaatu baayʼee na fayyadeera. Fakkeenya tajaajiltoota Yihowaa bara durii irratti yommuun xiinxalu ija jabinnii fi amantii isaan argisiisan baayʼee na jajjabeessa. Gorsawwan walgaʼiiwwan irratti kennaman hojii irra oolchuun koo namootatti gaarummaa akkan argisiisu na gargaara. Amala gaarii qabaachuu fi . . . wanta maqaa Yihowaa irratti arrabsoo fidu raawwachuu irraa akkan of eeggadhu akka na gargaarus yeroo hundan kadhadha.

Geʼoorgii Niikulin

Bara Dhalootaa 1963 (Roovenkii, Yuukreen)

Seenaa Jireenyaa: Leenjii konkolaachisummaa fi makaanikii fudhateera. Kana malees, dandeettiiwwan akka giraafik dizaayinii, suphaa raadiyoo saatalaayitii, suphaawwan meeshaalee adda addaa fi ogummaa hojii mukaa qaba

Durii kaasee wantoota haaraa qoʼachuu fi barachuun isa gammachiisa. Keessummaa immoo akkaataa ilmaan namootaa itti uumaman beekuuf fedhii guddaa qaba. Dhugaa Baatota Yihowaa wajjin Kitaaba Qulqulluu qoʼachuun isaa gaaffiiwwan hedduu qabuuf deebii akka argatu isa gargaareera

Yaadaa Dhuunfaa

Mana hidhaa hamma murtiitti dhihaatanitti keessa turfaman yeroo turtetti amantii kee akka eeggattuu fi ija jabina akka qabaattu kan si gargaare maali dha?

Caqasawwan Kitaaba Qulqulluu irratti qorannaa gochuu fi irratti xiinxaluun na gargaareera. [Kitaabni Qulqulluun] tajaajiltoota Yihowaa amantii fi ija jabina argisiisan hedduu qabateera. Fakkeenya isaanii hordofuu dandaʼuun koo baayʼee na gammachiisa.

Seexanni sobawwan buʼuura hin qabnetti fayyadamee ejjennoo keenya laaffisuuf yaalii akka godhu wantoota bara duriitti raawwataman irraa hubachuu dandeenya. Nuu wajjin haala wal qabateenis akkasuma akka godhu waan beeknuuf sobawwan buʼuura hin qabne kanaaf iddoo kennuu hin qabnu.

Yeeleenaa Niikulinaa

Bara Dhalootaa 1968 (Monaastirskooyee, Riippabliika Mordoviyaa)

Seenaa Jireenyaa: Yeroo ijoollee turtetti cabbii irra sigigaachuu fi uffata hodhuu jaallatti turte. Uffata hodhaa leenjiteetti; yeroo booda immoo huccuu irratti diizaayinii baasanii muruu baratteetti. Hojii barbaacha gara Saaraanskii fi Tooliyaatii dhaqteetti. Uffata hodhuus hojjetteetti. Yeroo ammaatti hojii qulqulleessuu hojjetti

Bara 2016tti Geʼoorgiitti heerumte. Hiriyoonni gaaʼelaa kun waaʼee Kitaaba Qulqulluu barachuu jalqaban. Waaqayyo rakkina ilmaan namootaa irra gaʼu calluma jedhee akka hin ilaalle, akkasumas miira keenya kan hubatuu fi jaalala qabeessa taʼuu isaa baratte. Bara 2017 cuuphamuudhaan Dhugaa Baatuu Yihowaa taate

Yaada dhuunfaa

Gargaarsa obboloonnii fi obboleettonni kee siif godhan kan si fayyade akkamitti?

[Poolisoonni] mana keenya erga sakattaʼanii waggaa tokko booda manni keenya ibiddaan gubate. . . . Firoonni keenya gargaarsa obboloonnii fi obboleettonni keenya nuuf godhan yommuu argan baayʼee dinqisiifaman. Yeroo ammaatti gorsa Kitaaba Qulqulluu hojii irra oolchaa fi [karaa hafuuraa guddina gochaa] jiru.

Aleeksaandar Sheevchuuk

Bara Dhalootaa 1989 (Piyaatigorsikii, Naannoo Istaaviroopool)

Seenaa Jireenyaa: Leenjii diizaayinii taaʼumsa lafaa fi ijaarsaa fudhateera. Yeroo booda gara Saaraansikii deemee jiraachuu jalqabe. Dhaabbata miʼa biroo hojjetu keessa qacaramee hojjeteera. Kubbaa kaachoo fi teebil teenisii taphachuu jaallata

Abaabileewwan isaa Dhugaa Baatota Yihowaa waan taʼaniif Saayibeeriyaatti geeffamanii turan. Haati isaa fi abbaan isaas Saayibeeriyaatti dhalatan

Bara 2006tti cuuphame. Bakka tajaajila loltummaa hojii humnaa hojjeteera

Yaada dhuunfaa

Barsiifatawwan hafuuraa yeroo mana hidhaa keessa jiʼoota afuriif turtetti haalawwan rakkisoo si mudatan dandamachuuf si gargaaran kamfaʼi?

Barsiifata yeroo hundumaa ganama ganama ciree dura caqasa guyyaa maatiidhaan waliin dubbisuu qabna turre; yeroon ani baayʼee xinnoo turetti illee jechuu dha. Barsiifanni kun jireenya koo keessatti hidda gadi fageefateera jechuun ni dandaʼama, yeroon mana hidhaa galetti illee barsiifata koo kana itti fufeera. Jalqaba irratti Kitaaba Qulqulluu waanan hin qabneef caqasawwan ykn fakkeenya tajaajilaa Yihowaa tokkoo yaadachuu fi isa irratti xiinxaluufan yaala ture. Caqasootan yaadadhe keessaa inni jalqabaa Isaayyaas 40:26-31 dha. Caqasootan baayʼee jaalladhu keessaa isa tokko dha. Caqasni kun Yihowaan Uumaa taʼuu isaa fi humna guddaa akka qabu akkan hin daganne na gargaareera. Humna isaa kanas ilmaan namootaa dadhaboo taʼan gargaaruuf itti fayyadama, haala rakkisaa keessa yeroo galluttis humna isaa kennuudhaan nu jabeessa.

Yihowaan obbolootaa fi obboleettota keenya Raashiyaa keessatti rakkinni isaan irra gaʼaa jiruu fi isatti amanaman jaalala amanamaa isaanitti argisiisuu isaa akka itti fufu amantii guutuu qabna.—Uumama 32:10.

Kanneen Armaan Gadiis ni Jaallatta Taʼa

ODUU HAARAA

Sababii Amantii Isaaniitiin Hidhamaniiru—Raashiyaa

Dhugaa Baatonni Yihowaa Raashiyaa keessa jiran sababii amantii isaaniitiin hidhamaniiru. Seenaa isaanii dubbisi, maqaa Dhugaa Baatota Yihowaa yeroo ammaatti hidhamanii jiranii ilaali.

ODUU HAARAA