GURAANDHALA 13, 2023 | ODUU HAAREFFAME: SADAASA 6, 2023
RAASHIYAA

ODUU HAAREFFAME—Ol IYYANNOO | Yaaroosilaavel Keessatti Ariʼatamni Maatiiwwan Sadii Irratti Dhiibbaa Geessise

BANI

Onkoloolessa 30, 2023 Manni Murtii Naannoo Zerzyiiniskii Yaaroosilaavel ol iyyannoo obboleessi Piyootir Felezinoovii fi obboleessi Andireey Viyusheen dhiheessan hamma tokko fudhateera. Hidhaan daangaa waggaa jaʼaa fi jiʼa jaʼaaf isaanitti murtaaʼe waggaa lamaa fi jiʼa jaʼatti hirʼateera. Murtiin obboleessa Aleeksaandar Kuuznetisoovaa fi haadha manaa isaa Maariyaa akkuma jirutti itti fufa.

Hagayya 3, 2023, Manni Murtii Naannoo Zerzyiiniskii Yaaroosilaavel Obboleessa Piyootir Felezinoov; Obboleessa Aleeksaandar Kuuznetisoovaa fi haadha manaa isaa Obboleettii Maariyaa Kuuznetisoov akkasumas Obboleessa Andireey Viyusheen yakkamtoota jedhee murteesse. Tokkon tokkoon isaanitti hidhaan daangaa murtaaʼeera. Andireeyii fi Piyootiritti hidhaan daangaa waggaa jaʼaa fi jiʼa jaʼaa murtaaʼeera. Aleeksaandarii fi Maariyaattimmoo hidhaan daangaa waggaa jaʼaa fi jiʼa jaʼaa murtaaʼeera. Haa taʼu malee yeroo kanatti mana hidhaa hin galan.

Ibsa Gabaabaa

Aleeksaandar Kuuznetisoov

Bara Dhalootaa: 1982 (Mooskoo, Naannoo Mooskoo)

Seenaa Jireenyaa: Barsiisaa Ingiliffaa fi herregaa

Bitootessa bara 2000tti Kitaaba Qulqulluu qoʼachuu jalqabe. Jaalalli Dhugaa Baatonni Yihowaa isatti argisiisan baayʼee isa tuqe. Bara 2002tti ni cuuphame

Bara 2017tti Maariyaa wajjin gaaʼela godhate. Mana hidhaatii erga baʼee booda dhukkuba Kaansariitiin qabame

Yaada Dhuunfaa

Dhibee qabduu fi ariʼatamaa wajjin waldhaansoo gochaa gammachuu kee eeguu kan dandeesse akkamitti?

Yeroo baayʼee miira abdii kutannaa wajjin waldhaansoo kanan godhu yeroo taʼu yeroo tokko tokko rakkoowwan na mudatan jala darbuu akkan hin dandeenye natti dhagaʼama. Haa taʼu malee Yihowaan yeroo hunda ‘karaan keessaa baʼu’ naaf qopheessa. (1 Qorontos 10:13) Kadhannaan garaadhaa, takka takkammoo imimmaan koo dhangalaasaa dhiheessu na gargaareera. Faarfannaawwan keenya faarfachuu, Kitaaba Qulqulluu qoʼachuu fi abdii keenya irratti xiinxaluunis na jajjabeesseera. Haati manaa koo fi ani obbolootaa fi obboleettota keenya jajjabeessuuf carraaqqii goona turre. Akkana gochuun rakkoowwan keenya irratti garmalee akka hin xiyyeeffanne nu gargaareera. Hunda caalaa, Yihowaan hafuurasaatti fayyadamee jajjabinaa fi nagaa nu barbaachisu nuu kenneef dinqisiifannaa guddaa qabna.

Maariyaa Kuuznetisoova

Bara Dhalootaa: 1988 (Shaariyopoovoo, Naannoo Kiraasnayaariski)

Seenaa Jireenyaa: Hojii dhuunfaa hojjeta

Maatii Dhugaa Baatota Yihowaa keessatti guddate. Raajiiwwan Kitaaba Qulqulluu qoʼachuu baayʼee jaallatti turte. Bara 2002tti cuuphamte

Bara 2017tti Aleeksaandar wajjin gaaʼela godhatan

Yaada Dhuunfaa

Caqasni baayʼee si jajjabeesse kamidha?

Caqasootan jaalladhu keessaa tokko Qolosiyaas 1:11 yeroo taʼu akkana jedha: “Obsaa fi gammachuudhaan guutummaatti jabaattanii akka dhaabbattaniif Waaqayyo akka jabina isaa isa ulfina qabeessa taʼeetti humna hundumaan cimina isiniif haa kennu.” Jireenya koo keessatti Yihowaatti guutummaatti yoon amanamee fi akka na gargaaru yoon isa kadhadhe na gargaaruu akka hin dhiisne argeera. Tajaajiltoota isaa amanamoo taʼanitti karaa hedduutiin jaalala amanamaa argisiisa; araarasa isaanitti argisiisuus hin dhiisu.

Andireey Viyusheen

Bara Dhalootaa: 1975 (Yaaroosilaavel, Naannoo Yaaroosilaavel)

Seenaa Jireenyaa: Haadhaa isaa fi akkoo isaatu isa guddise. Ogeessa neetworkii kompiitaraati. Haadha isaa dhibee qaamaa qabdu kunuunsa

Karaa michuu isaa Kitaaba Qulqulluu qoʼachuu jalqabe tokkoo Dhugaa Baatota Yihowaa wajjin wal bare. Dhugaa Baatonni gaaffiiwwan isaatiif deebii kan kennan yeroo taʼu, wanta lallaban hojiirra kan oolchan taʼuu isaaniis argeera. Bara 1995tti cuuphame

Bara 2013tti Anistaasiyaa wajjin gaaʼela godhatan. Intala tokko godhataniiru

Yaada Dhuunfaa

Atii fi haati manaa kee muuxannoo keessanitti fayyadamuudhaan warra kaan kan gargaartan akkamitti?

Haati manaa koo fi ani qorumsawwan Deenis Kiristeensan keessa darbe irraa jajjabina guddaa arganneerra. Obboloota jalqaba hidhaman keessaa tokko yeroo taʼu amanamummaa isaa eegeera. Fakkeenyi isaa nutis akkana gochuu akka dandeenyu amanannaa nuuf kenneera. Obbolootaa fi obboleettota sodaan isaanitti dhagaʼame yeroo arginu wantoonni mudatan akka isaan yaadan baayʼee kan nama hin sodaachisne taʼuu isaa isaan jajjabeessuuf wanta nuuf dandaʼame hunda goona. Ariʼatamni maal akka fakkaatu yaaduudhaan sodaadhaan akka hin liqimfamne michoota keenya yaadachiisna. Kanaa mannaa, ariʼatamni carraa Yihowaa irratti amantaa akka qabnu mirkaneessuuf nu gargaaru akka taʼetti ilaalla.

Akkuma tajaajiltoota Yihowaa amanamoo taʼan arfan kanaa nutis ‘warra Yihowaatti amanamanii fi hin raafamne’ keessaa tokko akka taanu ni amanna.—Faarfannaa 125:1.

Chaartii Yeroo

Bitootessa 13, 2021

Abbootiin taayitaa mana isaanii erga sakattaaʼanii booda buufata poolisiitti hidhame
Bitootessa 15, 2021

Mana hidhaa hanga murtiitti itti tursiisan gale
Adoolessa 14, 2021

Mana hidhaa hanga murtiitti itti tursiisanii hiikamee naannoodhaa akka hin deemne daangeffame
Fulbaana 9, 2022

Himanni yakkaa ilaalamuu jalqabe

Kanneen Armaan Gadiis ni Jaallatta Taʼa

ODUU HAARAA

Sababii Amantii Isaaniitiin Hidhamaniiru—Raashiyaa

Dhugaa Baatonni Yihowaa Raashiyaa keessa jiran sababii amantii isaaniitiin hidhamaniiru. Seenaa isaanii dubbisi, maqaa Dhugaa Baatota Yihowaa yeroo ammaatti hidhamanii jiranii ilaali.

ODUU HAARAA