Roomaan Baranooviskii

• Bara Dhalootaa: 1974 (Baalaakoovoo, Naannoo Saaraatov)

• Seenaa Jireenyaa: Wanta isaa fi haadha isaatiif barbaachisu guuttachuuf hojii mana haaromsuu hojjeta. Gitaara, cheezii fi kubbaa miillaa taphachuu jaalata

  Yommuu ijoollee turetti waaʼeen kaayyoo jireenyaa isa yaaddessa ture. “Yeroo tokko tokko Waaqayyo daandii isa sirrii akka natti argisiisu nan kadhadhan ture” jedheera. Bara 1993​tti Dhugaa Baatota Yihowaa wajjin Kitaaba Qulqulluu qoʼachuu jalqabe. Bara 1997​tti immoo ni cuuphame

Vaalentiinaa Baranooviskaayaa

• Bara Dhalootaa: 1951 (Vaanoovkaa, Kaazaakistaan)

• Seenaa Jireenyaa: Hanga bara 2006​tti soorama baatutti, hojii herregaa hojjechaa fi dhimmoota maallaqaa irratti gorsituu taatee hojjeteetti. Nyaata bilcheessuu, akkasumas faarfannaa fi walaloo barreessuu jaalatti

  Bara 1995​tti, ilma ishii wajjin taatee Dhugaa Baatota Yihowaa waliin Kitaaba Qulqulluu qoʼachuu jalqabde. Keessumaa Waaqayyo akka hin sobne beekuun ishii ishii gammachiisee ture. Bara 1996​tti cuuphamte

Halkan Ebla 10, 2019​tti, poolisoonni meeshaa waraanaa hidhatan mana obboleessa Roomaan Baranooviskii fi haadha isaa Vaalentiinaa dabalatee manneen magaalaa Abaakaan jiran afur weeraran. Achiis Kitaabota Qulqulluu, meeshaalee elektirooniksii fi dookmantoota isaanii fudhatan. Roomaanii fi Vaalentiinaa irratti himanni yakkaa ni baname.

Roomaan akkas jedheera: “Yeroo isaan weerara kana geggeessanitti walgaʼii torban gidduu irratti 1 Qorontos 10:13 irratti mariʼachaa turre. Caqasni kun wanta barbaachisaa tokko nu barsiiseera. Yihowaan qorumsa nu irra gaʼu nuuf hin filatu. Inni, ‘Ati jabaadha, kanaafuu qorumsa kana dandamachuu ni dandeessa. Ati immoo laafaa waan taateef qorumsa isa salphaa kana dandamachuu dandeessa’ jedhee hin yaadu. Utuu akkas taʼee qorumsa dandamachuun jabina keenya irratti kan hundaaʼe taʼa ture. Qorumsi garaa garaa hunda keenya irra iyyuu gaʼuu dandaʼa. Taʼus, jabina Yihowaan nuu kennutti yoo amanamne rakkina kam iyyuu dandamachuu dandeenya.”

Adoolessa 2020, Vaalentiinaan sammuu ishii keessatti dhiigni ni dhangalaʼe. Akkas jetteetti: “Fayyaan koo caalaatti gad buʼaa yommuu adeemetti, Yihowaan na gargaaraa akka jiru caalaatti ifa naaf taʼaa deeme. Kun kan taʼe matumaa kadhachuu koo waanan addaan hin kunneefi. Akkuma Yihowaan na hammatee na jajjabeessaa jirutti natti dhagaʼama. Nagaa fi tasgabbii guddaa qaba, kana immoo guutummaatti ibsuu hin dandaʼu.”

Haalli kun hundi Vaalentiinaan Yihowaadhaaf amanamtuu taatee itti fufuuf akka murteessitu ishii taasiseera. Akkas jetteetti: “Wanti akkamii iyyuu yoo na mudate Abbaa keenya bara baraaf tajaajiluu fi isaaf amanamaa taʼee jiraachuuf kutadheera.”

Roomaan, jabaatanii dhaabbachuu irratti fakkeenyota Kitaaba Qulqulluu keessatti ibsamanii fi bara keenya jiran irratti xiinxaluun isaa amantii isaa cimsachuuf akka isa gargaare dubbateera. Roomaan waaʼee fakkeenyota kanaa yommuu yaadu, yeroo baayʼee akkas jedhee of gaafata: ‘Namoonni kun haala akkamii dandamachuun isaan barbaachiseera? Maaliifi? Wanti amanamoo taʼanii itti fufuuf isaan gargaare maalidha? Yihowaan hafuura isaatiin kan isaan gargaare akkamitti?’ Deebiin gaaffiiwwan kanaa, Roomaan qorumsi akkamii iyyuu yoo isa irra gaʼe, “Yihowaan barbaachisaa taanaan, jabina humna namaa caalu akka isaaf kennu” isaaf mirkaneesseera.

Roomaan, Vaalentiinaa fi obboloonni keenya Raashiyaa jiran hundi, Yihowaa iddoo kooluu itti galanii fi jabina isaanii godhachuu akka itti fufan ni kadhanna.—Faarfannaa 46:1.