HAGAYYA 3, 2021
RAASHIYAA

Obboleessi Keenya Andiree Ooremichaak Jabina Yihowaan Isaa Kennutti Amanamaa Jira

BANI

ODEEFFANNOO HAARAA | Guraandhala 3, 2022, Manni Murtii Ol Iyyannoo Sadarkaa Arfaffaa iyyata Obboleessa keenya Andiree Ooremichaak fudhachuu dide. Murtiin jalqaba waggaa afuriif dhorkaa tokko tokko jala akka turu itti murtaaʼe akkuma jirutti itti fufa. Haa taʼu malee yeroo kanatti mana hidhaa hin galu.

Chaartii Yeroo

Caamsaa 22, 2019

Poolisoonni fuula haguuggatan ganama bariidhaan manaa fi konkolaataa Andiree sakattaʼan
Onkoloolessa 29, 2020

Himanni yakkaa ni dhihaate. Walgaʼii amantii seeraa ala taʼe irratti hirmaateera, akkasumas sochii jaarmiyaa finxaalessaa deggereera jedhamee himatame
Ebla 5, 2021

Himanni yakkaa ilaalamuu eegale
Hagayya 2, 2021

Manni Murtii koonyaa Leeniiniskii inni Roostoov Oon Doon jiru Andireen yakkamaa dha jedhee murteesse. Manni murtichaa waggaa afuriif dhorkaa tokko tokko jala akka turu itti murteesseera
Onkoloolessa 4, 2021

Manni Murtii Naannoo Roostoov ol iyyannoo Andireen dhiheesse fudhachuu dide. Murtiin jalqaba itti murtaaʼe akkuma jirutti itti fufa

Ibsa Gabaabaa

Andiree Ooremichaak

Bara Dhalootaa: 1979 (Koroosteen, Yuukireen)

Seenaa Jireenyaa: Makaanikaal Injinarii barateera. Dhugaa Baatuu Yihowaa taʼuu isaa dura waraana keessatti tajaajileera

Innii fi haati manaa isaa Yekaateerinaan ishiin inni bara 2006tti fuudhe raajiiwwan Kitaaba Qulqulluu sirriitti raawwataman isaan ajaaʼibsiise. Bara 2007tti cuuphaman. Mucaa durbaa tokko qabu

Yaada Dhuunfaa

Yeroowwan rakkisoo kanatti hariiroon Yihowaa waliin qabdu kan cime akkamitti?

Gargaarsa Yihowaa utuun hin arganne taʼee qorumsawwan kana dandamachuu nan dandaʼa jedhee hin yaadu. Jireenya koo keessatti akkasitti kadhadhee hin beeku. Wantoota na dhiphisan Yihowaatti nan hima, akkasumas wanta ykn nama kam iyyuu akkan hin sodaanne amantii dabalataa fi ija jabina akka naa kennu nan kadhadha. Yihowaan akka na dhagaʼuu fi waan hundumaa akka toʼatu nan hubadhan ture.

Yeroo qorumsawwan kanaatti Yihowaaf amanamaa akka taatu maaltu si kakaase?

Yohaannis 6:67, 68 irratti maal akka jedhu nan yaadadhe. Achi irratti Yesuus isaanis isa dhiisanii deemuu ni barbaadu yoo taʼe ergamoota isaa yommuu gaafatutti Pheexiros deebisee, “Gara eenyuu dhaqna?” jedheera. Anas akkasuma natti dhagaʼama. Bakka biraa eessan deemuu dandaʼa. Dubbiin jireenya bara baraa kan jiru Dubbii Yihowaa keessa qofa dha, haqa dhugaa kan fidu isa qofa dha. Akkasumas Isaayyaas 30:15 na gargaareera. Haalawwan abdii nama kutachiisanii fi toʼannaa kootii ala taʼan yommuu na mudatan, caqasni kun akkan tasgabbaaʼuu fi Yihowaatti amanamu na gargaareera.

Obboloota ariʼatama fuulduratti isaan mudatuuf qophaaʼaa jiraniif yaada akkamii kennita?

Jabina keessanitti hin amanaminaa. Kanaa mannaa Yihowaan amantii dabalataa fi ija jabina dabalataa akka isiniif kennu gaafadhaa. Yeroo jireenyi baayʼee isinitti ulfaatu nama yaaddoo keessan itti himattan akka qabaattaniif, michummaa obbolootaa fi obboleettotaa wajjin qabdan cimsadhaa.

Amantii cimaan obboloonnii fi obboleettonni keenya Raashiyaa jiran argisiisan hunda keenyaafuu fakkeenyaa gaarii taʼa. Andiree fi maatiin isaa abbaa keenya isa samii Yihowaatti guutummaatti amanamuu isaanii hamma itti fufanitti qorumsa kana akka dandamatan beekna.—Faarfannaa 37:5.

Kanneen Armaan Gadiis ni Jaallatta Taʼa

ODUU HAARAA

Sababii Amantii Isaaniitiin Hidhamaniiru—Raashiyaa

Dhugaa Baatonni Yihowaa Raashiyaa keessa jiran sababii amantii isaaniitiin hidhamaniiru. Seenaa isaanii dubbisi, maqaa Dhugaa Baatota Yihowaa yeroo ammaatti hidhamanii jiranii ilaali.

ODUU HAARAA