AMAJJII 27, 2022
RAASHIYAA

Obboloonni Lama Yihowaan Akka Isaan Gargaare Hubachuudhaan Ija Jabeeyyii Taʼaniiru

BANI

Manni Murtii Godinaa Kirsaanooviskii naannoo Tamboov keessatti argamu, himata obboloota kenya Antoon Karzihaakoovii fi Nikoolaa Pirookhoroov irratti banamerratti Dhiheenyatti murtii dabarsa. Hanga ammaatti abbaan alangaa wanta obboloota keenya irratti akka murteeffamu barbaadu hin beeksisne.

Chaartii Yeroo

Muddee 21, 2020

Obboloonni keenya Antoonii fi Nikoolaan, hojii jaarmiyaa mankaraarsaa taʼee waan gurmeessaniif himanni seeraa isaan irratti baname
Muddee 24, 2020

Qorattoonni, mana Antoon dabalatee naannoowwan 19 sakattaʼan. Achiis Antoon irratti qorannaa geggeessuuf mana isaa irraa Kiilomeetira 350 fageessanii fuudhanii deeman. Nikoolaa irrattis qorannaa erga geggeessanii booda naannoo sanaa akka hin baane isa ajajan
Muddee 25, 2020

Antoon, manatti akka hin deebine kan dhowwame yeroo taʼu, achiis mana hidhaa yeroodhaaf keessa turfamanitti ergame
Hagayya 30, 2021

Antoon, mana hidhaa keessa turfamu kan biraatti isa geessan

Ibsa Gabaabaa

Antoon Karzihaakoovii

Bara dhalootaa: 1993 (Soortaashaalaa, Bulchiinsa Kaafiiliyaa)

Seenaa jireenyaa: Obbolaa dhiiraa quxisuu isaa taʼan sadii qaba. Ijoollummaa isaatti, qurxummii qabuu fi cabbiirra sigigaachuu jaallata. Hojii ijaarsaa abbaa isaa irraa barateera

Bara 2007tti cuuphame. Bara 2015tti Aliyoonaa fuudhe

Yaada Dhuunfaa Aliyoonaa, Haati Manaa Antoon Kennite a

Antooniin gaafachuu yeroo deemtetti rakkoowwan akkamii si mudatanii turan?

Yeroo muraasaaf akkan isa gaafadhu yeroo naaf heyyamamu hundumaatti, jiʼatti siʼa lama qorataa bira deemee heyyama gaafachuun qaban ture. Kunimmoo yeroo hundumaa baayʼee na dhiphisa ture. Akkasumas, bakka yeroodhaaf itti hidhamanii turan keessa seenuu yoon barbaade qorannoo KOOVIID-19 irraa bilisa taʼuu koo argisiisu gochuun qaban ture. Qorannoowwan akkasiimmoo miʼaa dha.

Yeroo ammatti gaafannoon eenyuufiyyuu kan hin heyyamamne taʼuun isaa abdii nama kutachiisa. Gama biraatiin immoo, manni murtii himata isa irratti baname dhaggeeffachuu waan jalqabeef, gara mana murtichaa akkan seenu naaf heyyamameera. Haata‵u malee, dhimmichi ilaalamaa kan jiru magaalaa mana koo irraa kiilomeetira 100 fagaatu keessatti dha.

Bakka yeroodhaaf itti hidhaman kana keessa jabinaan akka turu wanti abbaa manaa kee gargaaraa jiru maalidha?

Kadhannaa garaadhaa madde, yeroo tokko tokkommoo wawwaannaa booʼicha of keessaa qabu dhiheessuun isaa jabinaan turuuf isa gargaaraa jira. Wanta isa mudatu hundumaa keessatti harka Yihowaa arguu dandaʼeera. . . . Akkasumas uumama daawwachuuf ni yaala. Fakkeenyaaf, mana hidhaa keessa yeroo asiif achi deemu yeroo baayʼee simbirroota ni arga. . . . Ogummaa Uumaan qabu irrattii fi fakkeenya Yesuus dimbiixiiwwan ilaalchisee dubbate irratti ni xiinxala. . . . Wantoonni kun gammachuu isaa qabatee itti fufuuf isa gargaaraa jiru.

Nikoolaa Pirookhoroov

Bara dhalootaa: 1964 (Moorshan, Naannoo Taamboov)

Seenaa jireenyaa: Raayyaa waraanaa keessa tajaajileera. Bishaan daakuu fi iddoo garaagaraa deemuu jaallata

Bara 2008tti Yelenaa fuudhe. Ilma tokkoo fi intala tokko qabu. Amala gaarii Dhugaa Baatonni Yihowaa argisiisan dinqisiifachuudhaan Kitaaba Qulqulluu qayyabachuu jalqabe. Bara 2008tti cuuphame

Yaada Dhuunfaa

Waa‵ee yeroo gargaarsa Yihowaa akka argatte sitti dhagaʼame tokkoo nutti himuu dandeessaa?

Yeroowwan ani baayʼee rakkadhetti Yihowaan yeroo hundumaa deggersa cimaa naaf godheera. . . . Yeroo tokko, bakka buutonni mootummaa akkan isaanii wajjin walii galuuf, yoo taʼuu baate immoo “yakka raawwachuudhaan” na himachuuf karoorfatanii turan na qabatan . . . Yeroon taaʼee ‘dhuguma sodaa koo moʼuudhaan amanamummaa koo hanga dhumaatti nan eegaa?’ jedhee itti yaadellee qaba. Yihowaan jabinaa fi nagaa keessaa akka naaf kennuufan kadhadhe. Yeroo kanatti Poolisoota keessaa inni tokko, mataa koo gadi qabuudhaan kadhachaa akkan jiru hubatee, “Waa‵ee maalii kadhachaa jirta?” jedhee na gaafate. Anis, “Akkan hin sodaanne akka na gargaarun kadhachaa jira” jedheen isaaf deebise. Achiis Isaayyaas 54:17n yaadadhe. Waa tokkoyyuu na gochuu akka isaan hin dandeenye hubadheen ture. Kunimmoo keessi koo amanannaadhaan akka guutu kan godhe yeroo ta‵u, poolisoonni sun illee kana narraa hubatanii turan. Dhumarrattis, na sossodaachisuu isaanii ni dhiisan. Akkan haaloo isaanitti hin qabannellee na gaafataniiru.

Obboloonni, siinis taʼe haadha manaa kee kan gargaaran karaawwan kamiini?

Gumichi gargaarsa nuuf gochuu irratti shoora ol aanaa taphateera. Xiyyeeffannaa bakka buutota mootummaa keessa galuu kan danda‵an taʼus, obboloonni gumichaa hedduun dhufanii nu gaafatu turan. Akkasumas, Guutummaa Raashiyaa keessa fi biyyoota kaan irraa bilbilli nuuf bilbilama ture.

Yeroo rakkisaa taʼe kanatti hundumtuu nu deggeraniiru. Yeroo dhimmi keenya mana murtiitti ilaalamutti, nu deggeruuf achitti argamu turan . . . Jaalalli tokkummaa Kiristiyaanummaa keenya keessatti mulʼate kun warra murtii kana irraatti hirmaatan hundaaf akka gaariitti dhugaa baʼeera. Deggersi nuuf godhame kun, anis taʼe haati manaa koo yeroo baayʼee rakkisaa taʼe kanatti Yihowaatti amanamuu keenya itti fufuuf nu gargaareera.

Yihowaan obboloota keenya ariʼatamni isaan irra gaʼaa jiruuf jabinaa fi deggersa kennuu isaa akka itti fufu matumaa hin shakkinu.—Fakkeenya 1:33.

a Yeroo ammaatti obboleessi keenya Karzihaakoovii mana hidhaa hanga guyyaa murtiitti keessa turan keessa jira. Yeroo kanatti isa irraa yaada fudhachuun hin dandaʼamu ture.

Kanneen Armaan Gadiis ni Jaallatta Taʼa

ODUU HAARAA

Sababii Amantii Isaaniitiin Hidhamaniiru—Raashiyaa

Dhugaa Baatonni Yihowaa Raashiyaa keessa jiran sababii amantii isaaniitiin hidhamaniiru. Seenaa isaanii dubbisi, maqaa Dhugaa Baatota Yihowaa yeroo ammaatti hidhamanii jiranii ilaali.

ODUU HAARAA