CAAMSAA 23, 2024
RAASHIYAA

“Yihowaan Naa Wajjin Taʼa”

BANI

Manni Murtii Koonyaa Uruupiskii Kaarachaayevoo-Chiirikeesiyaa dhiheenyatti dhimma obboleessa keenya Aleeksi Paasinkoov irratti murtii dabarsa jedhamee eegama. Abbaan alangaa wanta akka isa irratti murteeffamu barbaadu ifa hin goone.

Ibsa Gabaabaa

Aleeksi Paasinkoov

Bara Dhalootaa: 1988 (Mooskoo, Naannoo Mooskoo)

Seenaa Jireenyaa: Haadha qeenxeetu isa guddise. Aleeksi hojii boombaa fi mana ijaaramee sadarkaa dhumaa irra jiru bareechee xumuruu irratti hojjeta

Haati isaa Dhugaa Baatota Yihowaa wajjin qoʼannaa Kitaaba Qulqulluu kan jalqabde yeroo inni waggaa kudhan turettidha. Dhugaa Baatonni Yihowaa Kitaaba Qulqulluuf kabaja akka qabanii fi jaalala kan argisiisan taʼuun isaanii baayʼee ishii dinqisiise. Haati Aleeksi bara 2000 cuuphamte, Aleeksiinimmoo bara 2002tti cuuphame

Bara 2013tti Yuliyaa wajjin gaaʼela godhatan. Ilma qaama miidhamaa taʼe tokko qabu

Yaada Dhuunfaa

Caqasni Kitaaba Qulqulluu atii fi haati manaa kee jabaattanii akka dhaabbattan isin cimse isa kami?

Yeroo baayʼee yaada 1 Qorontos 10:13 isa akkana jedhuirrattin xiinxala: “Qorumsi namoota kaan irra gaʼu irraa adda taʼe isin irra hin geenye. Haa taʼu malee, Waaqayyo amanamaa waan taʼeef, hamma baachuu dandeessan caalaa akka qoramtan hin heyyamu; kanaa mannaa, jabaattanii dhaabbachuu akka dandeessaniif, yeroo qoramtanitti karaa ittiin keessaa baatan isiniif qopheessa.” Anaa fi haadha manaa koo waggoottan muraasa darbanitti rakkoowwan hedduun nu mudataniiru. Ilmi keenya dhibee sammuu cimaa wajjin dhalate. Amma umuriin isaa waggaa saddeet taʼus, kunuunsa wal irraa hin cinnetu isa barbaachisa. Bara 2021, warra haadha manaa koo irra, balaan konkolaataa isaanirra gaʼe. Abbaan ishii yommuu duʼaan boqotan, haati ishiimmoo miidhaan qaamaa isaan irra gaʼe. Achiis ariʼatamni kun ni jalqabe. Caqasni kun qorumsawwan kunneen sirna Seexanaa keessatti kanuma jiru akka taʼe na yaadachiisa. Haa taʼu malee, yeroo baayʼee Yihowaan nutti dhihoo akka taʼee fi jabina dandamachuuf nu barbaachisu akka nuuf kenne nutti dhagaʼama. Rakkoowwan kunneen hundi furmaata utuu argatanii baayʼee natti tola. Garuu qorumsi narra gaʼu yeroo dheeraadhaaf kan itti fufu yoo taʼe, Yihowaan naa wajjin akka taʼu amanannaa guutuun qaba.

Rakkoowwan garagaraa nu irra gaʼaa kan jiran taʼus, yeroo hundumaa Yihowaatti kooluu galuu fi isatti gammaduu akka dandeenyu beekuu keenyatti guddaa galateeffanna.—Faarfannaa 5:11.

Chaartii Yeroo

Sadaasa 23, 2021

Abbootiin taayitaa bakka hojii isaatti isa qaban; achiis manni isaa ni sakattaʼame
Muddee 8, 2022

Himanni yakkaa isa irratti baname.
Bitootessa 3, 2023

Manni isaanii siʼa lammaffaadhaaf sakattaʼame. Aleeksii fi Yuliyaa irratti qorannaan ni geggeeffamee
Bitootessa 31, 2023

Manni haadha Aleeksii fi obboloota isaa ni sakattaʼame
Onkoloolessa 4, 2023

Akka hin imalle dhorkame
Muddee 14, 2023

Himanni yakkaa isa irratti dhihaate mana murtiitti ilaalamuu jalqabe

Kanneen Armaan Gadiis ni Jaallatta Taʼa

ODUU HAARAA

Sababii Amantii Isaaniitiin Hidhamaniiru—Raashiyaa

Dhugaa Baatonni Yihowaa Raashiyaa keessa jiran sababii amantii isaaniitiin hidhamaniiru. Seenaa isaanii dubbisi, maqaa Dhugaa Baatota Yihowaa yeroo ammaatti hidhamanii jiranii ilaali.

ODUU HAARAA