Muddee 1, 2019 hanga Amajjii 31, 2020⁠tti obboloonni gumiiwwan Afaan Taay dubbatanii fi biyyoota 11 keessatti argaman keessaa dhufan duula lallabaa adda taʼe irratti hirmaachuudhaaf gara Taayilaandi dhaqanii turan. Duulli kun kan qophaaʼe namoota Afaan Taay dubbatanii fi magaalaa guddittii Taayilaandi kan taate Baankook keessattii fi naannoo ishiitti argamaniif lallabuu irratti babalʼistoota biyyattii Afaan Taay dubbatanii fi gara 4,800 taʼan gargaaruuf ture. Babalʼistoonni 600 taʼanii fi duula kana irratti hirmaatan tajaajila irratti saʼaatii 34,625 dabarsaniiru, barreeffamoota 32,718 raabsaniiru, viidiyoowwan 6,637 argisiisaniiru, akkasumas qoʼannaawwan Kitaaba Qulqulluu 310 jalqabsiisaniiru.

Duulli kun waggoota lamaa asitti Taayilaandiif duula isa lammaffaa dha. Duula isa jalqabaa, jechuunis isa Muddee 2018 hanga Amajjii 2019⁠tti godhame ilaalchisee miseensa Koree Waajjira Damee Taayilaandi kan taʼe obboleessi keenya Pestaniyeen akkana jedheera: “Qoʼannaawwan Kitaaba Qulqulluu hedduun jalqabamaniiru, dhiibbaan duulli kun gumiiwwan irratti geessises isa eegame caalaa gaarii ture.” Duulli inni jalqabaa buʼaa gaarii waan argamsiiseef, waajjirri damee duula lammaffaa kana qopheesseera.

Duula isa dhiheenya kana godhame irratti babalʼistoonni bakka biraatii dhufan tokko tokko namoonni dabalataa waaʼee Yihowaa akka beekan gargaaruuf jedhanii yeroo itti gara biyya isaaniitti deebiʼan dheeressaniiru. Hiriyoonni gaaʼelaa Kooriyaadhaa dhufan tokko Taayilaandi keessa turuuf kan karoorfatan jiʼa tokko ture. Namoota fedhii qaban hedduu waan argataniif garuu torbee lama dabalataniiru. Obboleettiin Kooriyaadhaa dhuftee fi duula kana irratti hirmaachuuf jettee hojii ishii dhaabde immoo Taayilaandi keessa jiraachuuf murteessiteetti.

Carraaqqiin babalʼistoonni yeroo duula kana irratti hirmaatanitti godhan buʼaa gaarii argamsiiseera. Dhugaa Baatonni lama, jechuunis haati takkaa fi intalli ishii bakka hojii ishiitti dubartii takka haasofsiisan. Guyyaa jalqabaatti barru Dammaqaa! Lakk. 2, 2019 (Afaan Oromootiin hin argamu) isa mata dureen isaa, “Wantoota Ijoolleen Barachuu Qaban Jaʼa” jedhu ishiidhaaf kennan. Yommuu obboleettonni sun deebiʼan, dubartittiin barruu Dammaqaa! isa babalʼistoonni sun duraan kennaniif isaanitti raastee gammachuudhaan nagaa isaan gaafatte. Achiis, “Odeeffannoon kun gaarii dha! Waaʼee isaa caalaatti beekuun barbaada” jette. Babalʼistoonni sunis torbanitti al tokko saʼaatii laaqanaatti ishii wajjin qoʼachuuf haala mijeessan. Appilikeeshinii JW Library akka daawunloodii godhattus ishii gargaaran. Yeroo ammaatti torbanitti siʼa lama kan qoʼattu yeroo taʼu, viidiyoowwan kan akka animeeshinii gabatee adiis ijoollee ishiitti argisiisuun ishii gammachiisa.

Babalʼistuu kan biraan immoo dubartii akkaataan Dhugaa Baatonni itti uffatanii fi akkaataan isaan itti namoota qaban xiyyeeffannaa ishii harkise takka argatte. Dubartittiin michoota barbaacha gara waldaawwan hedduu dhaqaa kan turte taʼus akka ishiidhaaf hin milkoofne dubbatte. Babalʼistuun sun walgaʼii guyyuma sanatti geggeeffamu irratti akka argamtu ishii affeerte. Dubartittiin walgaʼii irratti kan argamte yeroo taʼu, obbolootaa fi obboleettota aadaa fi akkaataa guddinaa garaa garaa keessaa dhufanii wajjin wal barteetti. Birooshura Misiraachoo Waaqayyo Biraa Dhufe! jedhamuun qoʼannaa kan jalqabde yeroo taʼu, walgaʼiiwwan irratti argamuu ishii itti fufuus ni barbaaddi.

Obboleettiin takka immoo godina Baankook keessatti argamuu fi Baang Naa jedhamu keessatti dubartii umuriin ishii gara waggaa 50 taʼuu wajjin wal argite. Dubartittiin gara waldaa kan deemtu taʼus, Kitaaba Qulqulluu akka hin qabne dubbatte. Achiis obboleettiin sun appilikeeshinii JW Library fi Kitaaba Qulqulluu Hiika Addunyaa Haaraa daawunloodii akka godhattu ishii gargaarte. Yeroo babalʼistuun sun ishii gaafachuuf deebitee dhuftu, appilikeeshinii dhihoo daawunloodii godhattetti fayyadamuudhaan Kitaaba Qulqulluu dubbisaa akka turte itti himte. Obboleettonni dhaqanii ishii gaafatan gaaffiiwwan duuba birooshura Misiraachoo jedhamu irratti argaman ishiitti argisiisanii tokko tokkoon ishiidhaaf dubbisan. Dubartittiinis deebii gaaffiiwwan hundumaa beekuu akka barbaaddu dubbatte. Obboleettonnis qoʼannaa Kitaaba Qulqulluu kan ishii jalqabsiisan yeroo taʼu, yeroo ammaatti obboleettiin achi jiraattu ishii qoʼachiisaa jirti. Dubartittiin qoʼannaa ishii baayʼee akka jaallattu dubbatteetti; sababiin isaas, jireenya ishii keessatti yeroo jalqabaatiif dhimmoota hafuuraa irratti ofuma ishiitii qorannaa gochuu dandeesseetti.

Obboleettiin takka immoo manaa gara manaa utuu tajaajiltuu namicha Taayii fi haadha manaa isaa ishii nama Laaʼos taate argatte. Obboleettiin sunis wanti jireenya keessatti iddoo guddaa qabu maal akka taʼe isaan gaafatte. “Maatii” jedhanii deebisan. Obboleettiin sunis odeeffannoo waaʼee maatii dubbatuu fi birooshura Misiraachoo Waaqayyo Biraa Dhufe jedhamu irratti argamu ishiidhaaf kennite. Hiriyoonni gaaʼelaa sunis gorsi achi irra jiru faayidaa akka qabu ibsan; qoʼannaa Kitaaba Qulqulluus ni jalqaban. Utuu baayʼee hin turin walgaʼii gumii irratti argaman. Namni achi jiru hundi akka michuutti miira hoʼaadhaan waan isaan simateef walgaʼicha akka jaallatanii fi irratti argamuu isaaniis akka itti fufan dubbataniiru.

Muuxannoowwan kunneenii fi kan biroon duula lallabaa Taayilaanditti godhame kana irraa argaman bara dhumaa kanatti saba Yihowaatiif ‘hojiin Gooftaa baayʼachuu isaa’ argisiisa.—1 Qorontos 15:58.