୧-୨. ଯିହୋବା ନିଜ ବିଶ୍ୱସ୍ତ ସେବକମାନଙ୍କୁ କʼଣ ନିମନ୍ତ୍ରଣ ଦେଇଛନ୍ତି ?

 ଆପଣ ଯିହୋବାଙ୍କୁ କʼଣ ମନେ କରନ୍ତି ? ହୁଏତ ଆପଣ କହିବେ ଯେ ଯିହୋବା ଆମ ପିତା ଏବଂ ଆମେ ତାଙ୍କ ପିଲା କିମ୍ବା ସେ ଆମ ଈଶ୍ୱର ଏବଂ ଆମେ ତାଙ୍କ ସେବକ । କିମ୍ବା ହୁଏତ ଆପଣ କହିବେ ଯେ ଯିହୋବା ଆପଣଙ୍କ ସାଙ୍ଗ ଅଟନ୍ତି । କିନ୍ତୁ କʼଣ କେବେ ଆପଣ ଏପରି ଭାବିଛନ୍ତି ଯେ ଯିହୋବା ଆପଣଙ୍କୁ ନିଜ ତମ୍ବୁରେ ଡାକିଛନ୍ତି ଏବଂ ଆପଣ ତାଙ୍କ ଅତିଥି ଅଟନ୍ତି ?

^୨ ରାଜା ଦାଉଦ ଯିହୋବାଙ୍କ ବିଷୟରେ ଏପରି ହିଁ କହିଥିଲେ । ସେ କହିଲେ, “ଯିହୋବା, ତୁମ୍ଭ ଆବାସରେ (ତମ୍ବୁରେ) କିଏ ପ୍ରବାସ କରିବ ? ତୁମ୍ଭ ପବିତ୍ର ପର୍ବତରେ କିଏ ବାସ କରିବ ?” (ଗୀତ. ୧୫:୧) ଦାଉଦ କହିଲେ ଯେ ଯିହୋବା ନିଜ ବିଶ୍ୱସ୍ତ ସେବକମାନଙ୍କୁ ନିଜ ତମ୍ବୁରେ ରହିବା ପାଇଁ ଡାକିଛନ୍ତି, ସେ ତାଙ୍କ ସାଙ୍ଗ ଅଟନ୍ତି । ଏହାର ଅର୍ଥ ଆମେ ସମସ୍ତେ ଯିହୋବାଙ୍କ ଅତିଥି କିମ୍ବା ତାଙ୍କ ସାଙ୍ଗ ହୋଇପାରିବା । ଟିକେ ଭାବନ୍ତୁ, ଏହା କେତେ ସମ୍ମାନର କଥା ଯେ ସାରା ପୃଥିବୀର ମାଲିକ ଆପଣଙ୍କୁ ନିଜ ତମ୍ବୁରେ ଆସିବାର ନିମନ୍ତ୍ରଣ ଦେଇଛନ୍ତି !

ଯିହୋବା ଚାହାନ୍ତି ଯେ ଆମେ ତାଙ୍କ ତମ୍ବୁରେ ଆସୁ

୩. (କ) ଯିହୋବାଙ୍କ ତମ୍ବୁରେ ପ୍ରଥମ ଅତିଥି କିଏ ଥିଲେ ? (ଖ) ଯିହୋବା ଓ ତାଙ୍କ ପୁଅ ପରସ୍ପର ବିଷୟରେ କିପରି ଅନୁଭବ କରୁଥିଲେ ?

^୩ ସୃଷ୍ଟି କରିବା ପୂର୍ବରୁ ଯିହୋବା ଏକୁଟିଆ ଥିଲେ । କିନ୍ତୁ ପରେ ସେ ନିଜ ପ୍ରଥମଜାତ ପୁଅକୁ ସୃଷ୍ଟି କଲେ ଏବଂ ତାଙ୍କୁ ନିଜ ତମ୍ବୁରେ ଡାକିଲେ । ସେ ଯିହୋବାଙ୍କ ପ୍ରଥମ ଅତିଥି ଥିଲେ ଏବଂ ତାଙ୍କୁ ନିଜ ତମ୍ବୁରେ ଡାକି ଯିହୋବାଙ୍କୁ ବହୁତ ଭଲ ଲାଗିଲା । ବାଇବଲରେ କୁହାଯାଇଛି ଯେ ସେ ନିଜ ପୁଅ ଯୀଶୁଙ୍କଠାରୁ ‘ଆନନ୍ଦିତ’ ଥିଲେ ଏବଂ ତାଙ୍କ ପୁଅ ମଧ୍ୟ ତାହାଙ୍କ “ସମ୍ମୁଖରେ ସର୍ବଦା ଆନନ୍ଦ” କରୁଥିଲେ ।—ହିତୋ. ୮:୩୦.

୪. ଆଗକୁ ଯାଇ ଯିହୋବା ଆଉ କେଉଁମାନଙ୍କୁ ନିଜ ତମ୍ବୁରେ ଡାକିଲେ ?

^୪ ଏହା ପରେ ଯିହୋବା ସ୍ୱର୍ଗଦୂତମାନଙ୍କୁ ସୃଷ୍ଟି କଲେ ଏବଂ ସେମାନଙ୍କୁ ମଧ୍ୟ ନିଜ ତମ୍ବୁରେ ଡାକିଲେ । ବାଇବଲରେ ସ୍ୱର୍ଗଦୂତମାନଙ୍କୁ “ପରମେଶ୍ୱରଙ୍କ ସନ୍ତାନଗଣ” କୁହାଯାଇଛି ଓ କୁହାଯାଇଛି ଯେ ସେମାନଙ୍କୁ ଯିହୋବାଙ୍କ ସହିତ ରହି ବହୁତ ଖୁସି ମିଳେ । (ଆୟୁ. ୩୮:୭; ଦାନି. ୭:୧୦) ଅନେକ ବର୍ଷ ଯାଏଁ କେବଳ ଯୀଶୁ ଓ ସ୍ୱର୍ଗଦୂତମାନେ ହିଁ ଯିହୋବାଙ୍କ ଅତିଥି କିମ୍ବା ସାଙ୍ଗ ଥିଲେ । କିନ୍ତୁ ପରେ  ଯିହୋବା ମଣିଷମାନଙ୍କୁ ସୃଷ୍ଟି କଲେ ଏବଂ ସେମାନଙ୍କୁ ମଧ୍ୟ ନିଜ ତମ୍ବୁରେ ଡାକିଲେ । ଆଗକୁ ଯାଇ ହନୋକ, ନୋହ, ଅବ୍ରହାମ ଏବଂ ଆୟୁବଙ୍କ ଭଳି ବିଶ୍ୱସ୍ତ ଲୋକମାନେ ମଧ୍ୟ ତାଙ୍କ ଅତିଥି ହେଲେ । ବାଇବଲରେ କୁହାଯାଇଛି ଯେ ଏହି ଲୋକମାନେ ଯିହୋବାଙ୍କ ସହିତ “ଗମନାଗମନ” କରୁଥିଲେ ଅର୍ଥାତ୍‌ ତାଙ୍କ ପ୍ରତ୍ୟେକ କଥା ମାନୁଥିଲେ । ଆଉ ଏହି କାରଣ ଯୋଗୁଁ ସେମାନେ ତାଙ୍କ ସାଙ୍ଗ କିମ୍ବା ଅତିଥି ଥିଲେ ।—ଆଦି. ୫:୨୪; ୬:୯; ଆୟୁ. ୨୯:୪; ଯିଶା. ୪୧:୮

୫. ଯିହିଜିକଲ ୩୭:୨୬, ୨୭ ପଦରେ ଲେଖାଥିବା ଭବିଷ୍ୟତବାଣୀରୁ କʼଣ ଜଣାପଡ଼େ ?

^୫ ଅନେକ ବର୍ଷରୁ ଯିହୋବା ନିଜ ସାଙ୍ଗମାନଙ୍କୁ ନିଜ ତମ୍ବୁରେ ଡାକୁଛନ୍ତି । (ଯିହିଜିକଲ ୩୭:୨୬, ୨୭ ପଢ଼ନ୍ତୁ ।) ଯିହିଜିକଲଙ୍କ ଭବିଷ୍ୟତବାଣୀରୁ ଜଣାପଡ଼େ ଯେ ଯିହୋବା ଚାହାନ୍ତି ଯେ ତାଙ୍କ ସେବକମାନଙ୍କର ତାଙ୍କ ସହ ଭଲ ସମ୍ପର୍କ ରହୁ । ସେ ପ୍ରତିଜ୍ଞା କରିଥିଲେ ଯେ ସେ ସେମାନଙ୍କ ସହ “ଶାନ୍ତିର ଏକ ନିୟମ” କରିବେ । ଏହି ପ୍ରତିଜ୍ଞା ଆଜି ଆମ ସମୟରେ ପୂରା ହେଉଛି । ଯେଉଁମାନଙ୍କୁ ସ୍ୱର୍ଗରେ ବଞ୍ଚିବାର ଆଶା ଅଛି ଏବଂ ଯେଉଁମାନଙ୍କୁ ପୃଥିବୀରେ ବଞ୍ଚିବାର ଆଶା ଅଛି, ସେମାନେ ଆଜି ମିଶି ଯିହୋବାଙ୍କ ସେବା କରୁଛନ୍ତି ଏବଂ “ଗୋଟିଏ ପଲ” ଭଳି ତାଙ୍କ ତମ୍ବୁରେ ରହୁଛନ୍ତି ।—ଯୋହ. ୧୦:୧୬.

ଆମେ ଯେଉଁଠି ବି ରହୁ, ଯିହୋବା ଆମର ଯତ୍ନ ନିଅନ୍ତି

୬. (କ) ଜଣେ ବ୍ୟକ୍ତି କେବେ ଯିହୋବାଙ୍କ ତମ୍ବୁରେ ଅତିଥି ହୋଇଯାଏ ? (ଖ) ଯିହୋବାଙ୍କ ତମ୍ବୁ କେଉଁଠି ଅଛି ?

^୬ ପ୍ରାଚୀନ ସମୟରେ ଜଣେ ବ୍ୟକ୍ତି ନିଜ ତମ୍ବୁରେ ଆରାମ କରୁଥିଲା ଏବଂ ଖରା ଓ ବର୍ଷାରୁ ବି ତାʼର ସୁରକ୍ଷା ହେଉଥିଲା । ଯେବେ ତାଙ୍କ ତମ୍ବୁରେ କୌଣସି ଅତିଥି ଆସୁଥିଲେ, ତେବେ ସେ ତାଙ୍କର ବି ଭଲ ଯତ୍ନ ନେଉଥିଲେ । ଆଜି ଯେବେ ଆମେ ଯିହୋବାଙ୍କୁ ନିଜ ଜୀବନ ସମର୍ପଣ କରୁ, ତେବେ ଆମେ ତାଙ୍କ ତମ୍ବୁରେ ଅତିଥି ହୋଇଯାଉ । (ଗୀତ. ୬୧:୪) ଏହି ତମ୍ବୁରେ ଆମକୁ ଖାଇବାର କୌଣସି ଅଭାବ ନାହିଁ, ଆମେ ପାଖରେ ସେ ସବୁ କିଛି ଅଛି ଯାହାଦ୍ୱାରା ଆମେ ଯିହୋବାଙ୍କ ସହ ନିଜ ମିତ୍ରତାକୁ ଦୃଢ଼ କରିପାରିବା । ଏହାଛଡ଼ା, ଏହି ତମ୍ବୁରେ ଆମ ସହ ଆହୁରି ଅତିଥି ଅଛନ୍ତି ଯେଉଁମାନେ ଆମ ସାଙ୍ଗ ହୋଇଯାଇଛନ୍ତି । ଯଦି ଆପଣ କେବେ ଅନ୍ୟ ଦେଶରେ ବିଶେଷ ଅଧିବେଶନ ପାଇଁ ଯାʼନ୍ତି, ତେବେ ସେଠାରେ ଆପଣ ଅନେକ ଭାଇଭଉଣୀଙ୍କୁ ଭେଟି ଥିବେ । ସେମାନେ ସମସ୍ତେ ଯିହୋବାଙ୍କ ତମ୍ବୁର ଅତିଥି । ଏଥିରୁ ଜଣାପଡ଼େ ଯେ ଯିହୋବାଙ୍କ ତମ୍ବୁ କୌଣସି ଗୋଟିଏ ଜାଗାରେ ନାହିଁ, ବରଂ ପ୍ରତ୍ୟେକ ଜାଗାରେ ବ୍ୟାପିଛି, କାରଣ ତାଙ୍କ ସେବକ ଦୁନିଆର ସମସ୍ତ ଜାଗାରେ ଅଛନ୍ତି ।—ପ୍ରକା. ୨୧:୩.

୭. ଆମେ କାହିଁକି କହିପାରିବା ଯେ ଯିହୋବାଙ୍କ ଯେଉଁ ସେବକମାନଙ୍କ ମୃତ୍ୟୁ ହୋଇଯାଇଛି, ସେମାନେ ଏବେ ବି ତାଙ୍କ ତମ୍ବୁରେ ଅଛନ୍ତି ? (ଚିତ୍ର ମଧ୍ୟ ଦେଖନ୍ତୁ ।)

^୭ କିନ୍ତୁ ଯିହୋବାଙ୍କ ଯେଉଁ ସେବକମାନଙ୍କ ମୃତ୍ୟୁ ହେଇଯାଇଛି, ସେମାନଙ୍କ ବିଷୟରେ କʼଣ କୁହାଯାଇପାରିବ ? କʼଣ ସେମାନେ ବି ତାଙ୍କ ତମ୍ବୁରେ ଅଛନ୍ତି ? ହଁ । ଆମେ ଏହା କାହିଁକି କହିପାରିବା ? କାରଣ ସେମାନେ ଯିହୋବାଙ୍କ ସ୍ମୃତିରେ ଅଛନ୍ତି । ତାଙ୍କ ପାଇଁ ସେମାନେ ଏବେ ବି ଜୀବିତ ଅଛନ୍ତି । ଏବିଷୟରେ ଯୀଶୁ କହିଥିଲେ, “ମୃତମାନେ ଯେ ଉତ୍‌ଥିତ ହୁଅନ୍ତି, ଏହା ମୋଶା ମଧ୍ୟ ବୁଦାର ବୃତ୍ତାନ୍ତରେ ପ୍ରଭୁଙ୍କୁ ଅବ୍ରହାମଙ୍କ ଈଶ୍ୱର, ଇସ୍‌ହାକଙ୍କ ଈଶ୍ୱର ଓ ଯାକୁବଙ୍କ ଈଶ୍ୱର ବୋଲି କହି ସୂଚନା ଦେଇଅଛନ୍ତି । ସେ ତ ମୃତମାନଙ୍କ ଈଶ୍ୱର ନୁହନ୍ତି, ମାତ୍ର ଜୀବିତମାନଙ୍କର; କାରଣ ସମସ୍ତେ ତାହାଙ୍କ ସାକ୍ଷାତରେ ଜୀବିତ ଅଟନ୍ତି ।”—ଲୂକ ୨୦:୩୭, ୩୮.

ଆଶିଷ ଓ ଦାୟିତ୍ୱ ମଧ୍ୟ

୮. ଯିହୋବାଙ୍କ ତମ୍ବୁରେ ରହୁଥିବା ଲୋକମାନଙ୍କୁ ଆଜି ଓ ଭବିଷ୍ୟତରେ ମଧ୍ୟ କେଉଁ ଆଶିଷଗୁଡ଼ିକ ମିଳିବ ?

^୮ ଗୋଟିଏ ତମ୍ବୁରେ ଜଣେ ବ୍ୟକ୍ତି ଆରାମ କରିପାରେ ଏବଂ ସୁରକ୍ଷିତ  ରହେ । ଠିକ୍‌ ସେହିଭଳି ଆମେ ଯିହୋବାଙ୍କ ତମ୍ବୁରେ ସୁରକ୍ଷିତ ରହୁ । ଆମେ ଏପରି ପ୍ରତି ବିପଦରୁ ରକ୍ଷା ପାଉ, ଯାହାଦ୍ୱାରା ଯିହୋବାଙ୍କ ସହ ଆମ ସମ୍ପର୍କ ଖରାପ ହୋଇପାରେ । ତାʼସହ ଆମକୁ ଭବିଷ୍ୟତରେ ଗୋଟିଏ ବଢ଼ିଆ ଆଶା ମଧ୍ୟ ମିଳିଛି । ଯେବେ ଆମେ ଯିହୋବାଙ୍କ ନିକଟତର ରହୁ, ତେବେ ଶୟତାନ ଏପରି କିଛି କରିପାରିବ ନାହିଁ ଯାହାଦ୍ୱାରା ଆମକୁ ସବୁଦିନ ପାଇଁ କ୍ଷତି ସହିବାକୁ ପଡ଼ିବ । (ଗୀତ. ୩୧:୨୩; ୧ ଯୋହ. ୩:୮) ଆଉ ନୂଆ ଦୁନିଆରେ ମଧ୍ୟ ଯିହୋବା ଆମକୁ ଏପରି ବିପଦଗୁଡ଼ିକରୁ ରକ୍ଷା କରିବେ ଯେଉଁଥିରୁ ତାଙ୍କ ସହିତ ଆମ ସମ୍ପର୍କ ଖରାପ ହୋଇପାରେ । କେବଳ ଏତିକି ନୁହେଁ, ସେ ଆମକୁ ମୃତ୍ୟୁରୁ ମଧ୍ୟ ରକ୍ଷା କରିବେ ।—ପ୍ରକା. ୨୧:୪.

୯. ଯେଉଁମାନେ ଯିହୋବାଙ୍କ ତମ୍ବୁରେ ରହିବା ପାଇଁ ଚାହାନ୍ତି, ସେ ସେମାନଙ୍କଠାରୁ କʼଣ ଆଶା କରନ୍ତି ?

^୯ ଯିହୋବାଙ୍କ ତମ୍ବୁରେ ଅତିଥି ହେବା ଓ ତାଙ୍କ ସାଙ୍ଗ ହେବା ବହୁତ ବଡ଼ ଆଶିଷ ! ଆଉ ଆମେ ସବୁଦିନ ପାଇଁ ତାଙ୍କ ସାଙ୍ଗ ହୋଇ ରହିପାରିବା । କିନ୍ତୁ ଏହା ପାଇଁ ଆମକୁ କʼଣ କରିବାକୁ ପଡ଼ିବ ? ଭାବନ୍ତୁ, ଆପଣଙ୍କ ଜଣେ ସାଙ୍ଗ ଆପଣଙ୍କୁ ନିଜ ଘରେ ଡାକନ୍ତି, ଏପରି ସମୟରେ ଆପଣ ତାହା ହିଁ କରିବେ ଯେଉଁଥିରୁ ଆପଣଙ୍କ ସାଙ୍ଗ ଖୁସି ହେବ । ଯେପରି ଯଦି ସେ ଚାହାନ୍ତି ଯେ ଆପଣ ଭିତରକୁ ଆସିବା ପୂର୍ବରୁ ପ୍ରଥମେ ଜୋତା ଖୋଲନ୍ତୁ, ତେବେ ଆପଣ ସେପରି ହିଁ କରିବେ । ଠିକ୍‌ ସେହିପରି ଯିହୋବା ଆମକୁ ନିଜ ତମ୍ବୁରେ ଡାକିଛନ୍ତି ଏବଂ ଆମେ ସବୁବେଳେ ତାଙ୍କ ତମ୍ବୁରେ ରହିବାକୁ ଚାହୁଁ । ତେଣୁ ଆମକୁ ଜାଣିବାକୁ ପଡ଼ିବ ଯେ ସେ କʼଣ ଚାହାନ୍ତି ଓ ତାʼପରେ ଆମେ ସେପରି ହିଁ କରିବା । କାରଣ ଆମେ ତାଙ୍କୁ ପ୍ରେମ କରୁ ଏବଂ ତାଙ୍କୁ “ସର୍ବପ୍ରକାରେ ସନ୍ତୁଷ୍ଟ କରିବା” ପାଇଁ ଚାହୁଁ । (କଲ. ୧:୧୦) କିନ୍ତୁ ଆମେ ଏହା ବି ଭୁଲିବାନି ଯେ ସାଙ୍ଗ ହେବା ସହ ଯିହୋବା ଆମ ପିତା ଏବଂ ଈଶ୍ୱର ଅଟନ୍ତି, ତେଣୁ ଆମେ ତାଙ୍କ ଆଦର କରୁ । (ଗୀତ. ୨୫:୧୪) ଆମ ହୃଦୟରେ ଯିହୋବାଙ୍କ ପାଇଁ ଶ୍ରଦ୍ଧା ଥିଲେ ଆମେ ଏପରି କିଛି କରିବାନି ଯେଉଁଥିରୁ ସେ ଦୁଃଖି ହେବେ । ଆମ ଇଚ୍ଛା ଏହା ଯେ “ନମ୍ର ଭାବରେ ଆମେ ପରମେଶ୍ୱରଙ୍କ ସହିତ ଗମନାଗମନ କରିବା ।”—ମୀଖା ୬:୮.

ଯିହୋବା କୌଣସି ଇସ୍ରାଏଲୀୟ ସହ ଭେଦଭାବ କଲେ ନାହିଁ

୧୦-୧୧. ଯିହୋବା ଇସ୍ରାଏଲୀୟମାନଙ୍କ ସହ ଯେପରି ଭାବେ ବ୍ୟବହାର କଲେ, ସେଥିରୁ କିପରି ଜଣାପଡ଼େ ଯେ ସେ ଭେଦଭାବ କରନ୍ତି ନାହିଁ ?

^୧୦ ଯିହୋବା ନିଜ ସମସ୍ତ ଅତିଥିମାନଙ୍କ ସହ ଏକାଭଳି ବ୍ୟବହାର କରନ୍ତି, ସେ କାହାରି ସହ ଭେଦଭାବ କରନ୍ତି ନାହିଁ । (ରୋମୀ. ୨:୧୧) ଏ ବିଷୟରେ ଆହୁରି ଜାଣିବା ପାଇଁ ଆସନ୍ତୁ ଦେଖିବା ଯେ ସୀନୟ ପ୍ରାନ୍ତରରେ ସେ ଇସ୍ରାଏଲୀୟମାନଙ୍କ ସହ କିପରି ବ୍ୟବହାର କରିଥିଲେ ।

^୧୧ ନିଜ ଲୋକମାନଙ୍କୁ ମିଶରରୁ ଛଡ଼ାଇବା ପରେ, ପବିତ୍ର ତମ୍ବୁରେ ସେବା କରିବା ପାଇଁ ଯିହୋବା ଯାଜକମାନଙ୍କୁ ନିଯୁକ୍ତ କଲେ । ଏହାଛଡ଼ା, ସେ ଲେବୀୟମାନଙ୍କୁ ପବିତ୍ର ତମ୍ବୁ ସହ ଜଡ଼ିତ ଆହୁରି କିଛି ଦାୟିତ୍ୱଗୁଡ଼ିକ ମଧ୍ୟ ଦେଲେ । କିନ୍ତୁ ଯେଉଁ ଲୋକମାନେ ପବିତ୍ର ତମ୍ବୁରେ ସେବା କରୁଥିଲେ କିମ୍ବା ତାʼର ଆଖପାଖରେ ରହୁଥିଲେ, କʼଣ ଯିହୋବା ସେମାନଙ୍କର ଅନ୍ୟମାନଙ୍କଠୁ ଅଧିକ ଯତ୍ନ ନେଉଥିଲେ ? ନା । ସେ ସମସ୍ତଙ୍କ ଯତ୍ନ ନେଲେ ଏବଂ କାହାରି ସହ ଭେଦଭାବ କଲେ ନାହିଁ । ଆସନ୍ତୁ ଏବିଷୟରେ ଆହୁରି ଜାଣିବା ।

୧୨. କେଉଁ କଥାଗୁଡ଼ିକରୁ ଜଣାପଡ଼େ ଯେ ଯିହୋବା କୌଣସି ଇସ୍ରାଏଲୀୟ ସହ ଭେଦଭାବ କଲେ ନାହିଁ ? (ଯାତ୍ରା ପୁସ୍ତକ ୪୦:୩୮) (ଚିତ୍ର ମଧ୍ୟ ଦେଖନ୍ତୁ ।)

^୧୨ ଯିହୋବା ପ୍ରତ୍ୟେକ ଇସ୍ରାଏଲୀୟକୁ ତାଙ୍କ ସାଙ୍ଗ ହେବାର ସୁଯୋଗ ଦେଇଥିଲେ ଯଦିଓ ସେ ପବିତ୍ର ତମ୍ବୁରେ ସେବା କରୁଥିଲେ ବା ନୁହେଁ ଓ ତମ୍ବୁ ପାଖରେ ରହୁଥିଲେ ବା ଦୂରରେ । ଉଦାହରଣ ପାଇଁ, ଯିହୋବା ଏ କଥାର ଧ୍ୟାନ ରଖିଲେ ଯେ ଜଣେ ଇସ୍ରାଏଲୀୟ ଛାଉଣିରେ ଯେଉଁଠି ବି ରହୁ, ସେ ମେଘ ଓ ଅଗ୍ନି ସ୍ତମ୍ଭକୁ ଦେଖିପାରୁ ଯାହା ପବିତ୍ର ତମ୍ବୁର ଉପରେ ରହୁଥିଲା । (ଯାତ୍ରା ପୁସ୍ତକ ୪୦:୩୮ ପଢ଼ନ୍ତୁ ।) ଯେବେ ବି ତମ୍ବୁ ଉପରୁ ମେଘ ହଟୁଥିଲା, ତେବେ ସବୁଠୁ ଦୂରରେ ରହୁଥିବା ଜଣେ ଇସ୍ରାଏଲୀୟ ବ୍ୟକ୍ତି ମଧ୍ୟ ଏହା ସ୍ପଷ୍ଟ ଦେଖିପାରୁଥିଲା । ସେ ତାʼର ସବୁ ଜିନିଷ ବାନ୍ଧି, ନିଜ ପରିବାରର ତମ୍ବୁ ଉଠାଇ ଓ ବାକି ଇସ୍ରାଏଲୀୟମାନଙ୍କ ସହ ମେଘର ପଛେ ପଛେ ଯାଉଥିଲା । (ଗଣ. ୯:୧୫-୨୩) ଏହାଛଡ଼ା ଯେବେ ରୂପାର ଦୁଇ ତୂରୀ ବଜା ଯାଉଥିଲା, ତେବେ ସମସ୍ତ ଇସ୍ରାଏଲୀୟ ତାʼର ଜୋରଦାର ଆୱାଜ ସ୍ପଷ୍ଟ ଶୁଣି ପାରୁଥିଲେ । ପ୍ରତ୍ୟେକଙ୍କୁ ଜଣା ପଡ଼ି ଯାଉଥିଲା ଯେ ଏବେ ବାହାରିବାର ସମୟ ହୋଇଯାଇଛି । (ଗଣ. ୧୦:୨) ଏଥିରୁ ଜଣାପଡ଼େ ଯେ ଯିହୋବା କାହାରି ସହ ଭେଦଭାବ କଲେ ନାହିଁ । ପ୍ରତ୍ୟେକ ଜଣ ଯିହୋବାଙ୍କ ପାଇଁ ଖାସ୍‌ ଥିଲେ, ଏପରିକି ସେହି ବ୍ୟକ୍ତି ତମ୍ବୁ ପାଖରେ ରହୁଥାଉ କିମ୍ବା ଦୂରରେ । ପ୍ରତ୍ୟେକ ଇସ୍ରାଏଲୀୟ ଯିହୋବାଙ୍କ ଅତିଥି ବା ସାଙ୍ଗ ହୋଇପାରନ୍ତେ ଏବଂ ଭରସା ରଖିପାରନ୍ତେ ଯେ ଯିହୋବା ସେମାନଙ୍କୁ ସୁରକ୍ଷା ଦେବେ ଏବଂ ସେମାନଙ୍କୁ ସଠିକ୍‌ ବାଟ ଦେଖାଇବେ । ଠିକ୍‌ ସେହିଭଳି ଆଜି ଆମେ ଦୁନିଆର ଯେକୌଣସି କୋଣରେ ଥାଉ ଆମେ ଭରସା ରଖିପାରିବା ଯେ ଯିହୋବା ଆମକୁ ପ୍ରେମ କରନ୍ତି, ଆମ ଯତ୍ନ ନିଅନ୍ତି ଏବଂ ସବୁଦିନ ପାଇଁ ଆମର ସୁରକ୍ଷା କରିବେ ।

ଯିହୋବା ଆଜି ବି କାହାରି ସହ ଭେଦଭାବ କରନ୍ତି ନାହିଁ

୧୩. ଆମେ କାହିଁକି କହିପାରିବା ଯେ ଯିହୋବା ଆଜି ବି କାହାରି ସହ ଭେଦଭାବ କରନ୍ତି ନାହିଁ ?

^୧୩ ଆଜି କିଛି ଭାଇଭଉଣୀ ଯିହୋବାଙ୍କ ସାକ୍ଷୀମାନଙ୍କ ବିଶ୍ୱ ମୁଖ୍ୟାଳୟ କିମ୍ବା କୌଣସି ଶାଖା କାର୍ଯ୍ୟାଳୟ ପାଖରେ ରହନ୍ତି ଏବଂ କିଛି ଭାଇଭଉଣୀ ସେଠାରେ ସେବା କରନ୍ତି । ଏହା ଯୋଗୁଁ ସେମାନେ  ବୈଥେଲ କାମଗୁଡ଼ିକରେ ସାହାଯ୍ୟ କରିପାରନ୍ତି ଏବଂ ନେତୃତ୍ୱ ନେଉଥିବା ଭାଇମାନଙ୍କୁ ଭଲଭାବେ ଜାଣନ୍ତି । କିଛି ଭାଇ ଏପରି ଅଛନ୍ତି ଯେଉଁମାନେ ସର୍କିଟ ଅଧ୍ୟକ୍ଷ ଭାବେ ସେବା କରନ୍ତି । ଆଉ କିଛି ଭାଇଭଉଣୀ ଅନ୍ୟ ଉପାୟରେ ବିଶେଷ ପୂର୍ଣ୍ଣ ସମୟର ସେବା କରୁଛନ୍ତି । କିନ୍ତୁ ଦେଖିବାକୁ ଗଲେ, ଅଧିକାଂଶ ଭାଇଭଉଣୀ ବିଶେଷ ପୂର୍ଣ୍ଣ ସମୟରେ ସେବା କରୁ ନାହାନ୍ତି କିମ୍ବା କୌଣସି ଶାଖା କାର୍ଯ୍ୟାଳୟର ପାଖରେ ରହନ୍ତି ନାହିଁ । ଯଦି ଆପଣ ସେମାନଙ୍କ ମଧ୍ୟରୁ ଜଣେ, ତେବେ ଭରସା ରଖନ୍ତୁ ଯେ ଆପଣ ବି ଯିହୋବାଙ୍କ ଅତିଥି ବା ସାଙ୍ଗ ଅଟନ୍ତି ଏବଂ ସେ ଆପଣଙ୍କୁ ବହୁତ ଭଲ ପାଆନ୍ତି । ଯିହୋବା ଆମମାନଙ୍କ ମଧ୍ୟରୁ ପ୍ରତ୍ୟେକଙ୍କୁ ଭଲଭାବେ ଜାଣନ୍ତି ଏବଂ ଆମ ସମସ୍ତଙ୍କ ଯତ୍ନ ନିଅନ୍ତି । (୧ ପିତ. ୫:୭) ଯିହୋବା ନିଜ ପ୍ରତ୍ୟେକ ସେବକମାନଙ୍କୁ ସଠିକ୍‌ ସମୟରେ ଖାଦ୍ୟ ଦିଅନ୍ତି, ସେମାନଙ୍କୁ ସଠିକ୍‌ ବାଟ ଦେଖାନ୍ତି ଏବଂ ସେମାନଙ୍କ ସୁରକ୍ଷା କରନ୍ତି ।

୧୪. ଆଉ କେଉଁ କଥାରୁ ଜଣାପଡ଼େ ଯେ ଯିହୋବା ଭେଦଭାବ କରନ୍ତି ନାହିଁ ?

^୧୪ ଆଉ ଗୋଟିଏ କଥାରୁ ଜଣାପଡ଼େ ଯେ ଯିହୋବା ଭେଦଭାବ କରନ୍ତି ନାହିଁ । ତାହା ହେଉଛି ଯେ ସେ ଦୁନିଆର ପ୍ରତ୍ୟେକ ମଣିଷ ପାଇଁ ବାଇବଲ ଉପଲବ୍ଧ କରାଇଛନ୍ତି । ଆରମ୍ଭରେ ବାଇବଲ ଏବ୍ରୀ, ଆରାମୀ ଓ ଗ୍ରୀକ୍‌ ଭାଷାରେ ଲେଖାଯାଇଥିଲା । କିନ୍ତୁ ଆଜି ବହୁତ କମ୍‌ ଲୋକ ଏହି ଭାଷାଗୁଡ଼ିକୁ ଜାଣନ୍ତି । ତେବେ ପ୍ରଶ୍ନ ଉଠେ ଯେ ଯେଉଁ ଲୋକମାନେ ଏହି ଭାଷାଗୁଡ଼ିକୁ ଜାଣନ୍ତି କʼଣ କେବଳ ସେମାନଙ୍କ ଯିହୋବାଙ୍କ ସହ ଦୃଢ଼ ସମ୍ପର୍କ ଅଛି ? ଏପରି ନୁହେଁ ।—ମାଥିଉ ୧୧:୨୫.

୧୫. ବାଇବଲର କʼଣ ବିଶେଷ କଥା ରହିଛି ଯେଉଁଥିରୁ ଜଣାପଡ଼େ ଯେ ଯିହୋବା ଭେଦଭାବ କରନ୍ତି ନାହିଁ ? (ଚିତ୍ର ମଧ୍ୟ ଦେଖନ୍ତୁ ।)

^୧୫ ଯିହୋବାଙ୍କ ସାଙ୍ଗ ହେବା ପାଇଁ ଏହା ଜରୁରୀ ନୁହେଁ ଯେ ଆମେ ବହୁତ ଲେଖାପଢ଼ା ଜାଣିଥିବା କିମ୍ବା ଆମକୁ ଏବ୍ରୀ, ଆରାମୀ କିମ୍ବା ଗ୍ରୀକ୍‌ ଭାଷା ଜଣାଥିବ । ସେ ଚାହାନ୍ତି ଯେ ଦୁନିଆରେ ଥିବା ପ୍ରତ୍ୟେକ ବ୍ୟକ୍ତିକୁ ବାଇବଲରେ ଲେଖାଥିବା ବଢ଼ିଆ ପରାମର୍ଶରୁ ଲାଭ ହେଉ, ଏପରିକି ସେହି ବ୍ୟକ୍ତି କମ୍‌ ପାଠ ପଢ଼ିଥାଉ ନା କାହିଁକି । ତେଣୁ ସେ ହଜାର ହଜାର ଭାଷାରେ ବାଇବଲର ଅନୁବାଦ କରାଇଛନ୍ତି ଓ ଏହା ଯୋଗୁଁ ଆଜି ସାରା ଦୁନିଆରେ ଥିବା ଲୋକମାନେ ବାଇବଲ ପଢ଼ିପାରୁଛନ୍ତି, ସେଥିରେ ଲେଖାଥିବା କଥାଗୁଡ଼ିକରୁ ଲାଭ ପାଇପାରୁଛନ୍ତି ଏବଂ ଜାଣିପାରୁଛନ୍ତି ଯେ ସେମାନେ କିପରି ଯିହୋବାଙ୍କ ସାଙ୍ଗ ହୋଇପାରିବେ ।—୨ ତୀମ. ୩:୧୬, ୧୭.

ଯିହୋବାଙ୍କ ତମ୍ବୁକୁ କେବେ ବି ଛାଡ଼ନ୍ତୁ ନାହିଁ

୧୬. ପ୍ରେରିତ ୧୦:୩୪, ୩୫ ପଦ ଅନୁସାରେ ଆମକୁ କʼଣ କରିବାକୁ ହେବ ଯାହାଦ୍ୱାରା ଆମେ ଯିହୋବାଙ୍କ ତମ୍ବୁରେ ରହିପାରିବା ?

^୧୬ ଯିହୋବା ଆମକୁ ନିଜ ତମ୍ବୁରେ ଡାକିଛନ୍ତି, ଏହା ବଡ଼ ସମ୍ମାନର କଥା ! ସେ ଆମକୁ ଯେତେ ପ୍ରେମ କରନ୍ତି ଏବଂ ଯେପରି ଭାବେ ଆମର ଯତ୍ନ ନିଅନ୍ତି, ସେତିକି କେହି ବି କରିପାରିବେ ନାହିଁ । ଯିହୋବା କାହାରି ସହ ଭେଦଭାବ କରନ୍ତି ନାହିଁ । ଜଣେ ବ୍ୟକ୍ତି ଯେଉଁଠି ବି ରହୁ, କମ୍‌ ଲେଖାପଢ଼ା ହେଉ ବା ବେଶି, ଯେକୌଣସି ଦେଶ, ଜାତି କିମ୍ବା  କୌଣସି ବି ବୟସର ହେଉ, ପୁରୁଷ ହେଉ ବା ସ୍ତ୍ରୀ, ଯିହୋବା ପ୍ରତ୍ୟେକଙ୍କୁ ନିଜ ସାଙ୍ଗ କରିବା ପାଇଁ ଚାହାନ୍ତି । କିନ୍ତୁ ଯେଉଁମାନେ ତାଙ୍କ ସ୍ତରଗୁଡ଼ିକୁ ମାନନ୍ତି, କେବଳ ସେମାନଙ୍କୁ ହିଁ ସେ “ଗ୍ରାହ୍ୟ” କରନ୍ତି ଏବଂ ନିଜ ତମ୍ବୁରେ ରହିବାକୁ ଦିଅନ୍ତି ।—ପ୍ରେରିତ ୧୦:୩୪, ୩୫ ପଢ଼ନ୍ତୁ ।

୧୭. ପରବର୍ତ୍ତୀ ଲେଖାରେ ଆମେ କʼଣ ଜାଣିବା ?

^୧୭ ଗୀତସଂହିତା ୧୫:୧ ପଦରେ ଦାଉଦ କହିଲେ, ‘ହେ ଯିହୋବା, ତୁମ୍ଭ ଆବାସରେ କିଏ ପ୍ରବାସ କରିବ ? ତୁମ୍ଭ ପବିତ୍ର ପର୍ବତରେ କିଏ ବାସ କରିବ ?’ ତାʼପରେ ଯିହୋବା ଦାଉଦଙ୍କ ଜରିଆରେ ଏହି ଗୀତସଂହିତାରେ ଏହି ପ୍ରଶ୍ନଗୁଡ଼ିକର ଉତ୍ତର ଲେଖାଇଲେ । ପରବର୍ତ୍ତୀ ଲେଖାରେ ଆମେ ଏଗୁଡ଼ିକ ଉପରେ ଚର୍ଚ୍ଚା କରିବା ଆଉ ଦେଖିବା ଯେ ଆମେ କିପରି ଯିହୋବାଙ୍କ ସହ ଏକ ଭଲ ସମ୍ପର୍କ ରଖିପାରିବା ଏବଂ ତାଙ୍କ ହୃଦୟ ଖୁସି କରିପାରିବା ।