୧. ନିଜ ମୃତ୍ୟୁ ପୂର୍ବେ ଯୀଶୁ ଜଣେ ଅପରାଧୀକୁ କʼଣ କହିଲେ ? (ଲୂକ ୨୩:୩୯-୪୩)

 ଯୀଶୁ ଓ ଦୁଇ ଅପରାଧୀକୁ କାଠରେ ଲଟକାଇ ଦିଆଯାଇଛି । ସେମାନଙ୍କୁ ବହୁତ ବ୍ୟଥା ହେଉଛି ଓ ସେମାନଙ୍କ ପାଇଁ ନିଶ୍ୱାସ ନେବା ବି ବହୁତ କଷ୍ଟ ହୋଇଯାଉଛି । (ଲୂକ ୨୩:୩୨, ୩୩) ଟିକେ ସମୟ ପୂର୍ବରୁ ସେ ଦୁଇଜଣ ଅପରାଧୀ ଯୀଶୁଙ୍କୁ ନିନ୍ଦା କରୁଥିଲେ, ତେଣୁ ସେମାନେ ଯୀଶୁଙ୍କ ଶିଷ୍ୟ ହୋଇ ନ ଥିବେ । (ମାଥି. ୨୭:୪୪; ମାର୍କ ୧୫:୩୨) କିନ୍ତୁ ତାʼପରେ ସେ ମଧ୍ୟରୁ ଜଣେ ଯୀଶୁଙ୍କ ଉପରେ ବିଶ୍ୱାସ କରିବାକୁ ଲାଗିଲା ଓ ସେ କହେ, “ହେ ଯୀଶୁ, ଆପଣ ନିଜ ରାଜ୍ୟରେ ପ୍ରବେଶ କଲେ ମୋତେ ସ୍ମରଣ କରିବେ ।” ତେବେ ଯୀଶୁ ତାକୁ କହିଲେ, “ମୁଁ ତୁମ୍ଭକୁ ସତ୍ୟ କହୁଅଛି, ଆଜି ତୁମ୍ଭେ ମୋହର ସହିତ ପାରଦୀଶରେ ଉପସ୍ଥିତ ହେବ ।” (ଲୂକ ୨୩ :୩୯-୪୩ ପଢ଼ନ୍ତୁ ।) ଯୀଶୁ ତାକୁ ଏହା କହୁ ନ ଥିଲେ ଯେ ସେ ସ୍ୱର୍ଗ ଯିବ । ଆଉ ବାଇବଲରେ ମଧ୍ୟ ଏପରି ଲେଖା ନାହିଁ ଯେ ଯୀଶୁ ଯେଉଁ “ସ୍ୱର୍ଗରାଜ୍ୟ” ବିଷୟରେ ଶିଖାଉଥିଲେ, ସେ ଅପରାଧୀ ତାʼ ଉପରେ ବିଶ୍ୱାସ କରୁଥିଲା । (ମାଥି. ୪:୧୭) ଯୀଶୁ ପ୍ରକୃତରେ ସେହି ପାରଦୀଶ ବିଷୟରେ କଥା ହେଉଥିଲେ ଯାହା ଆଗକୁ ଯାଇ ଏହି ପୃଥିବୀରେ ଆସନ୍ତା । ଆମେ ଏହା କାହିଁକି କହିପାରିବା ?

୨. ଆମେ କାହିଁକି କହିପାରିବା ଯେ ଯେଉଁ ଅପରାଧୀ ଯୀଶୁଙ୍କ ଉପରେ ବିଶ୍ୱାସ କଲା, ସେ ଜଣେ ଯିହୁଦୀ ଥିଲା ?

^୨ ଯେଉଁ ଅପରାଧୀ ଯୀଶୁଙ୍କ ଉପରେ ବିଶ୍ୱାସ କଲା, ସେ ହୁଏତ ଜଣେ ଯିହୁଦୀ ହୋଇଥିବ । ଆମେ ଏପରି କାହିଁକି କହିପାରିବା ? ଧ୍ୟାନ ଦିଅନ୍ତୁ ଯେ ସେ ଅନ୍ୟ ଅପରାଧୀକୁ କʼଣ କହିଲା, “ତୁ ଈଶ୍ୱରଙ୍କୁ କଅଣ ଭୟ ମଧ୍ୟ କରୁ ନାହୁଁ ?” (ଲୂକ ୨୩:୪୦) ଯିହୁଦୀମାନେ ମାନୁଥିଲେ ଯେ କେବଳ ଜଣେ ହିଁ ସତ୍ୟ ଈଶ୍ୱର ଅଛନ୍ତି, କିନ୍ତୁ ଅଣଯିହୁଦୀମାନେ ଅନେକ ଈଶ୍ୱରମାନଙ୍କୁ ମାନୁଥିଲେ । (ଯାତ୍ରା. ୨୦:୨, ୩; ୧ କରି. ୮:୫, ୬) ଯଦି ସେ ଅପରାଧୀ ଜଣେ ଅଣଯିହୁଦୀ ହୋଇଥାʼନ୍ତା, ତେବେ ହୁଏତ ସେ ଅନ୍ୟ ଅପରାଧୀକୁ ଏପରି କହିଥାʼନ୍ତା, “ତୁ ଈଶ୍ୱରମାନଙ୍କୁ କଅଣ ଭୟ ମଧ୍ୟ କରୁ ନାହୁଁ ?” କିନ୍ତୁ ସେ ଏପରି କହିଲାନି । ଆଉ ଗୋଟିଏ ଉଦାହରଣ ଉପରେ ଧ୍ୟାନ ଦିଅନ୍ତୁ । ଯୀଶୁ ସାଧାରଣତଃ ଅଣ ଯିହୁଦୀମାନଙ୍କୁ ପ୍ରଚାର କରୁ ନ ଥିଲେ, କାରଣ ତାଙ୍କୁ “ଇସ୍ରାଏଲ-ବଂଶର ହଜିଯାଇଥିବା ମେଷମାନଙ୍କ” ନିକଟକୁ ପଠାଯାଇଥିଲା । (ମାଥି. ୧୫:୨୪) ତାʼଛଡ଼ା ଯିହୋବା କେବଳ ଇସ୍ରାଏଲୀୟମାନଙ୍କୁ କହିଥିଲେ ଯେ ସେ ମୃତ ଲୋକମାନଙ୍କୁ ଜୀବିତ କରିବେ । ସେ ଅପରାଧୀ ହୁଏତ ଏହି କଥା ଜାଣୁଥିଲା । ଆଉ ସେ ଯାହା କହିଲା ସେଥିରୁ ଜଣାପଡ଼େ ଯେ ତାକୁ ଲାଗୁଥିଲା ଯେ ଯିହୋବା ଯୀଶୁଙ୍କୁ ମଧ୍ୟ ଜୀବିତ କରିଦେବେ ଓ ତାଙ୍କୁ ନିଜ ରାଜ୍ୟର ରାଜା କରିବେ । ତାକୁ ଏହା ବି ଆଶା ଥିଲା ଯେ ଯିହୋବା ତାକୁ ମଧ୍ୟ ଜୀବିତ କରିଦେବେ ।

୩. ଯେବେ ଯୀଶୁ ସେ ଅପରାଧୀକୁ ପାରଦୀଶ ବିଷୟରେ କହିଲେ, ତେବେ ହୁଏତ ସେ କେଉଁ ବିଷୟରେ ଭାବିଥିବ ? ବୁଝାନ୍ତୁ । (ଆଦି ପୁସ୍ତକ ୨:୧୫)

 ^୩ ସେ ଅପରାଧୀ ଜଣେ ଯିହୁଦୀ ଥିଲା, ତେଣୁ ସେ ଆଦମ ଓ ହବା ବିଷୟରେ ଜାଣିଥିବ । ତାକୁ ଏହା ବି ଜଣାଥିବ ଯେ ଯିହୋବା ଆଦମ ଓ ହବା ପାଇଁ ଏହି ପୃଥିବୀରେ ଗୋଟିଏ ପାରଦୀଶ ତିଆରି କରିଥିଲେ । ତେଣୁ ଆମେ କହିପାରିବା ଯେ ଯେବେ ଯୀଶୁ ତାକୁ ପାରଦୀଶ ବିଷୟରେ କହିଲେ, ତେବେ ହୁଏତ ସେ ଗୋଟିଏ ସୁନ୍ଦର ପୃଥିବୀ ବିଷୟରେ ହିଁ ଭାବିଥିବ ।—ଆଦି ପୁସ୍ତକ ୨:୧୫ ପଢ଼ନ୍ତୁ ।

୪. ଆମେ କେଉଁ ବିଷୟରେ ଭାବିବା ଉଚିତ୍‌ ?

^୪ ଏହି ଘଟଣା ବିଷୟରେ ପଢ଼ି ହୁଏତ ଆମେ ଏହା ଭାବୁ ଯେ ପାରଦୀଶରେ ଆମର ଜୀବନ କିପରି ଥିବ । ଆଉ ଆମକୁ ଏବିଷୟରେ ଭାବିବା ବି ଉଚିତ୍‌ । ପାରଦୀଶ କିପରି ଥିବ, ଏହାର ଗୋଟିଏ ଝଲକ ଆମକୁ ରାଜା ଶଲୋମନଙ୍କ ଶାସନରୁ ମିଳେ । ତାଙ୍କ ରାଜ୍ୟରେ ବହୁତ ଶାନ୍ତି ଥିଲା । ଆଉ ଯୀଶୁ ତ ଶଲୋମନଙ୍କଠାରୁ ବି ଅଧିକ ମହାନ ଅଟନ୍ତି । ତେଣୁ ଆମେ ଭରସା ରଖିପାରିବା ଯେ ଯୀଶୁ ୧,୪୪,୦୦୦ ଜଣ ଲୋକଙ୍କ ସହିତ ମିଶି ଏହି ପୃଥିବୀକୁ ଗୋଟିଏ ସୁନ୍ଦର ପାରଦୀଶ କରିବେ ଯେଉଁଠି ଚାରିଆଡ଼େ ଶାନ୍ତି ରହିବ । (ମାଥି. ୧୨:୪୨) ଯଦି ଅନ୍ୟ ମେଷର ଲୋକମାନେ ପାରଦୀଶରେ ସବୁଦିନ ଯାଏ ବଞ୍ଚିବା ପାଇଁ ଚାହାନ୍ତି, ତେବେ ସେମାନଙ୍କୁ ଏହା ଭାବିବା ଉଚିତ୍‌ ଯେ ସେଇଠି ବଞ୍ଚିବା ପାଇଁ ସେମାନଙ୍କୁ ଆଜି କʼଣ କରିବାକୁ ପଡ଼ିବ ।—ଯୋହ. ୧୦:୧୬.

୫. ଯେବେ ଆପଣ ପାରଦୀଶ ବିଷୟରେ ଭାବନ୍ତି, ତେବେ ଆପଣଙ୍କ ମନରେ କʼଣ ଆସେ ?

^୫ ଯେବେ ଆପଣ ପାରଦୀଶ ବିଷୟରେ ଭାବନ୍ତି, ତେବେ ଆପଣଙ୍କ ମନରେ କʼଣ ଆସେ ? ହୁଏତ ଆପଣ ଭାବୁଥିବେ ଯେ ଆପଣ ଗୋଟିଏ ସୁନ୍ଦର ବଗିଚାରେ ଅଛନ୍ତି ଯାହା ଏଦନ ବଗିଚା ଭଳି ଅଛି । ଚାରିଆଡ଼େ ଗଛଲତା ଓ ରଙ୍ଗବେରଙ୍ଗର ଫୁଲ ଅଛି ଓ ପବନରେ ଫୁଲଗୁଡ଼ିକର ସୁଗନ୍ଧ ଭରି ରହିଛି । (ଆଦି. ୨:୭-୯) ହୁଏତ, ଆପଣଙ୍କୁ ମୀଖାଙ୍କ ଭବିଷ୍ୟତବାଣୀ ମନେ ପଡ଼ିବ ଯେଉଁଠି ଲେଖାଅଛି, “ସେମାନେ ଆପଣା ଆପଣା ଦ୍ରାକ୍ଷାଲତା ଓ ଡିମିରି ବୃକ୍ଷ ତଳେ ବସିବେ ।” (ମୀଖା ୪:୩, ୪) ହୁଏତ ଆପଣଙ୍କୁ ଏହା ବି ମନେ ପଡ଼ିବ ଯେ ନୂଆ ଦୁନିଆରେ ଖାଦ୍ୟର କୌଣସି ଅଭାବ ନ ଥିବ । (ଗୀତ. ୭୨:୧୬; ଯିଶା. ୬୫:୨୧, ୨୨) ଆପଣ ହୁଏତ କଳ୍ପନା କରୁଥିବେ ଯେ ସେହି ବଗିଚା ମଝିରେ ଗୋଟିଏ ଟେବୁଲ ରଖା ହୋଇଛି ଯାହା ଉପରେ ଭିନ୍ନ ଭିନ୍ନ ପ୍ରକାରର ସ୍ୱାଦିଷ୍ଟ ଖାଦ୍ୟ ରଖା ହୋଇଛି ଓ ଆପଣ ନିଜ ସାଙ୍ଗ ଓ ପରିବାର ଲୋକଙ୍କ ସହିତ ତାʼର ମଜା ନେଉଛନ୍ତି । ସେମଧ୍ୟରୁ କିଛି ଏପରି ବି ଅଛନ୍ତି ଯେଉଁମାନଙ୍କୁ ଯିହୋବା ପୁଣିଥରେ ଜୀବିତ କରି ଦେଇଛନ୍ତି । ସେମାନଙ୍କ ସହ ସମୟ ବିତାଇ, ସେମାନଙ୍କ କଥାଗୁଡ଼ିକ ଓ ହସ ଶୁଣି ଆପଣଙ୍କୁ ବହୁତ ଭଲ ଲାଗୁଛି । ଏସବୁ କେବଳ ଗୋଟିଏ ସ୍ୱପ୍ନ ନୁହେଁ । ଦିନେ ସାରା ପୃଥିବୀ ପ୍ରକୃତରେ ଏପରି ହୋଇଯିବ ! ଏସବୁ ଜିନିଷର ମଜା ନେବା ସହିତ ନୂଆ ଦୁନିଆରେ ଆମେ ଏପରି କାମ ମଧ୍ୟ କରିବା ଯେଉଁଥିରୁ ଆମକୁ ଖୁସି ମିଳେ ।

୬. ଆମେ ପାରଦୀଶରେ କʼଣ କʼଣ କରିବା ? (ଚିତ୍ର ଦେଖନ୍ତୁ ।)

^୬ ଯିହୋବା ଆମକୁ ଏପରି ସୃଷ୍ଟି କରିଛନ୍ତି ଯେ ଯେବେ ଆମେ କୌଣସି କାମ କରୁ, ପରିଶ୍ରମ କରୁ, ତେବେ ଆମକୁ ବହୁତ ଖୁସି ମିଳେ । (ଉପ. ୨:୨୪) ଆଉ ଖ୍ରୀଷ୍ଟଙ୍କ ହଜାର ବର୍ଷର ଶାସନ ସମୟରେ ଆମ ପାଖରେ କରିବା ପାଇଁ ବହୁତ କିଛି ଥିବ । ଯେଉଁ ଲୋକମାନେ ମହାକ୍ଳେଶରୁ ବାହାରି ଆସିବେ ଓ ଯେଉଁ ଲକ୍ଷ ଲକ୍ଷ ଲୋକମାନଙ୍କୁ ଜୀବିତ କରାଯିବ, ସେମାନଙ୍କୁ କପଡ଼ା, ଖାଇବା ଓ ରହିବା ପାଇଁ ଜାଗା ଦରକାର ପଡ଼ିବ । ସେହି ସବୁ ଜିନିଷର ବ୍ୟବସ୍ଥା କରି ଆମକୁ ବହୁତ ଖୁସି ମିଳିବ । ଆଉ ଯେପରି ଆଦମ ଓ ହବାକୁ ସାରା ପୃଥିବୀକୁ ପାରଦୀଶ କରିବାର ଥିଲା, ସେହିପରି ଆମକୁ ମଧ୍ୟ ସାରା ପୃଥିବୀକୁ ପାରଦୀଶ କରିବାକୁ ପଡ଼ିବ । ତାʼଛଡ଼ା ଯେଉଁ ଲୋକମାନଙ୍କୁ ନୂଆ ଦୁନିଆରେ ଜୀବିତ କରାଯିବ ସେମାନଙ୍କୁ ଶିଖାଇ ମଧ୍ୟ ଆମକୁ ବହୁତ ଖୁସି ମିଳିବ । ଏପରି ଅନେକ ଲୋକମାନଙ୍କୁ ଜୀବିତ କରାଯିବ ଯେଉଁମାନେ ଯିହୋବାଙ୍କୁ ଭଲଭାବେ ଜାଣି ନ ଥିଲେ । ଆମେ ସେମାନଙ୍କୁ ଯିହୋବା ଓ ତାଙ୍କ ଉଦ୍ଦେଶ୍ୟ ବିଷୟରେ ଶିଖାଇବା । ଯିହୋବା ପ୍ରାଚୀନ ସମୟର ସେହି ବିଶ୍ୱସ୍ତ ଲୋକମାନଙ୍କୁ ମଧ୍ୟ ଜୀବିତ କରିବେ ଯେଉଁମାନେ ଯୀଶୁଙ୍କ ବିଷୟରେ  ଜାଣି ନ ଥିଲେ । ଆମକୁ ସେମାନଙ୍କୁ କହିବାକୁ ପଡ଼ିବ ଯେ ସେମାନଙ୍କ ମୃତ୍ୟୁ ପରେ କʼଣ କʼଣ ହେଲା ।

୭. ଆମେ କେଉଁ କଥାର ଭରସା ରଖିପାରିବା ଓ କାହିଁକି ?

^୭ ଆମେ ଭରସା ରଖିପାରିବା ଯେ ପାରଦୀଶରେ ଚାରିଆଡ଼େ ଶାନ୍ତି ରହିବ, ଆମ ସବୁ ଆବଶ୍ୟକତା ପୂରା ହେବ ଓ ସବୁକିଛି ବ୍ୟବସ୍ଥିତ ଭାବରେ ହେବ । ଆମେ ଏପରି କାହିଁକି କହିପାରିବା ? କାରଣ ଯିହୋବା ଆମକୁ ପୂର୍ବରୁ ହିଁ ଏହାର ଗୋଟିଏ ଝଲକ ଦେଖାଇ ଦେଇଛନ୍ତି । ଯେବେ ଯୀଶୁ ଶାସନ କରିବେ, ତେବେ ପୃଥିବୀରେ ସେହିଭଳି ପରିସ୍ଥିତି ହେବ ଯେପରି ରାଜା ଶଲୋମନଙ୍କ ଶାସନ ସମୟରେ ଥିଲା ।

୮. ଗୀତସଂହିତା ୩୭:୧୦, ୧୧, ୨୯ ପଦରେ ଲେଖାଥିବା କଥା ପ୍ରାଚୀନ ସମୟରେ କିପରି ପୂରା ହେଲା ? (ଏହି ସଂଖ୍ୟାରେ ଦିଆଯାଇଥିବା ଲେଖା “ଆପଣଙ୍କ ପ୍ରଶ୍ନ” ଦେଖନ୍ତୁ ।)

^୮ ରାଜା ଦାଉଦ ଈଶ୍ୱରଙ୍କ ପ୍ରେରଣାରେ କହିଲେ ଯେ ଯେବେ ଜଣେ ଏପରି ରାଜା ଶାସନ କରିବ ଯିଏ ବୁଦ୍ଧିମାନ ଥିବ ଓ ଯିହୋବାଙ୍କ ବିଶ୍ୱସ୍ତ ଥିବ, ସେସମୟରେ ପରିସ୍ଥିତି କିପରି ହେବ । (ଗୀତସଂହିତା ୩୭:୧୦, ୧୧, ୨୯ ପଢ଼ନ୍ତୁ ।) ସାଧାରଣତଃ ଆମେ ଗୀତସଂହିତା ୩୭:୧୧ ପଦ ତେବେ ପଢ଼ୁ ଯେବେ ଆମେ ଲୋକମାନଙ୍କୁ ପାରଦୀଶ ବିଷୟରେ କହିବା ପାଇଁ ଚାହୁଁ । ଆଉ ଏପରି କରିବା ଠିକ୍‌ ବି ଅଟେ । ପାର୍ବତ୍ୟ ଉପଦେଶ ଦେବା ସମୟରେ, ଯେବେ ଯୀଶୁ ଲୋକମାନଙ୍କୁ କହୁଥିଲେ ଯେ ନୂଆ ଦୁନିଆରେ କିପରି ଲୋକେ ରହିବେ, ତେବେ ସେ ଦାଉଦଙ୍କ ଏହି ଶବ୍ଦଗୁଡ଼ିକୁ ପୁଣିଥରେ କହିଲେ । ଏଥିରୁ ଜଣାପଡ଼େ ଯେ ଗୀତସଂହିତା ୩୭:୧୧ ପଦରେ ଲେଖାଥିବା କଥା ଆଗକୁ ଯାଇ ନିଶ୍ଚୟ ପୂରା ହେବ । (ମାଥି. ୫:୫) କିନ୍ତୁ ଏହି କଥା ଶଲୋମନଙ୍କ ଶାସନ ସମୟରେ ମଧ୍ୟ ପୂରା ହେଲା । ଯେବେ ଶଲୋମନ ଶାସନ କରୁଥିଲେ, ତେବେ ଇସ୍ରାଏଲରେ ବହୁତ ଶାନ୍ତି ଥିଲା ଓ ଲୋକମାନଙ୍କୁ କୌଣସି ବି ଜିନିଷର ଅଭାବ ନ ଥିଲା । ଯିହୋବା ପ୍ରତିଜ୍ଞା କରିଥିଲେ ଯେ ଇସ୍ରାଏଲ ଦେଶରେ ‘ଦୁଗ୍ଧମଧୁପ୍ରବାହ’ ହେବ ଓ ସେ ନିଜ ଲୋକମାନଙ୍କୁ ଏହା ବି କହିଥିଲେ, ‘ଯେବେ ତୁମ୍ଭେମାନେ ଆମ୍ଭର ବିଧି ଅନୁସାରେ ଚଳିବ, ତେବେ ଆମ୍ଭେ ଦେଶରେ ଶାନ୍ତି ପ୍ରଦାନ କରିବା, ତହିଁରେ ତୁମ୍ଭେମାନେ ଶୟନ କଲେ, କେହି ତୁମ୍ଭମାନଙ୍କୁ ଭୟ ଦେଖାଇବ ନାହିଁ ।’ (ଲେବୀ. ୨୦:୨୪; ୨୬:୩, ୬) ଶଲୋମନଙ୍କ ଶାସନରେ ଯିହୋବାଙ୍କ ଏସମସ୍ତ ପ୍ରତିଜ୍ଞା ପୂରା ହେଲା । (୧ ବଂଶା. ୨୨:୯; ୨୯:୨୬-୨୮) ଆଉ ଯଦି ଶଲୋମନଙ୍କ ଶାସନରେ ସମସ୍ତେ ଯିହୋବାଙ୍କ ଆଜ୍ଞା ପାଳନ କରିଥାʼନ୍ତେ, ତାହେଲେ ଟିକେ ସମୟ ପରେ ‘ଦୁଷ୍ଟ ଲୋକମାନେ ଆଉ ନ ଥାʼନ୍ତେ ।’ (ଗୀତ. ୩୭:୧୦) ତେବେ ଆମେ କହିପାରିବା ଯେ ଗୀତସଂହିତା ୩୭:୧୦, ୧୧, ୨୯ ପଦରେ ଲେଖାଥିବା କଥା ପ୍ରାଚୀନ ସମୟରେ ମଧ୍ୟ ପୂରା ହେଲା ଓ ଆଗକୁ ଯାଇ ମଧ୍ୟ ପୂରା ହେବ ।

୯. ଶଲୋମନଙ୍କ ଶାସନର ସମୃଦ୍ଧି ଦେଖି ଶିବାର ରାଣୀ କʼଣ କହିଲେ ?

^୯ ଶଲୋମନଙ୍କ ଶାସନ ସମୟରେ ଲୋକମାନଙ୍କୁ କୌଣସି ବି ଜିନିଷର ଅଭାବ ନ ଥିଲା । ପୂରା ଦେଶରେ ଏତେ ଶାନ୍ତି ଓ ଖୁସିର ପରିସ୍ଥିତି ଥିଲା ଯେ ତାʼ ବିଷୟରେ ଦୂର ଦୂର ଯାଏ ଚର୍ଚ୍ଚା ହେଉଥିଲା । (୧ ରାଜା. ୧୦:୧) ଶିବାର ରାଣୀ ମଧ୍ୟ ଏବିଷୟରେ ଶୁଣିଲେ ଓ ବହୁତ ଦୂରରୁ ଯିରୂଶାଲମକୁ ଆସିଲେ, କାରଣ ସେ ନିଜ ଆଖିରୁ ସବୁକିଛି ଦେଖିବା ପାଇଁ ଚାହୁଁଥିଲେ । ଶଲୋମନଙ୍କ ଶାସନର ସମୃଦ୍ଧି ଦେଖି ସେ କହିଲେ, “ଆଉ ଦେଖନ୍ତୁ, ଅର୍ଦ୍ଧେକ ମୋତେ କୁହାଯାଇ ନ ଥିଲା । . . . ଆପଣଙ୍କ ଲୋକମାନେ  ଧନ୍ୟ, ଆପଣଙ୍କ ଏହି ଦାସମାନେ ଧନ୍ୟ, ସେମାନେ ନିତ୍ୟ ଆପଣଙ୍କ ସମ୍ମୁଖରେ ଛିଡ଼ା ହୋଇ ଆପଣଙ୍କ ଜ୍ଞାନର କଥା ଶୁଣନ୍ତି !” (୧ ରାଜା. ୧୦:୬-୮) କିନ୍ତୁ ଶଲୋମନଙ୍କ ଶାସନ ତ କେବଳ ଏକଥାର ଗୋଟିଏ ଝଲକ ଥିଲା ଯେ ଯେବେ ଯୀଶୁ ଶାସନ କରିବେ ତେବେ ଆମ ଜୀବନ କିପରି ହେବ ।

୧୦. ଆମେ କାହିଁକି କହିପାରିବା ଯେ ଯୀଶୁ ଶଲୋମନଙ୍କଠାରୁ ଭଲ ରାଜା ଅଟନ୍ତି ?

^୧୦ ଯୀଶୁ ସବୁ କ୍ଷେତ୍ରରେ ଶଲୋମନଙ୍କଠାରୁ ଭଲ ରାଜା ଅଟନ୍ତି । ଶଲୋମନ ଅପରିପୂର୍ଣ୍ଣ ଥିଲେ ଓ ସେ ଅନେକଥର ଏପରି ଭୁଲଗୁଡ଼ିକ କରିଥିଲେ ଯେଉଁଥିରୁ ଈଶ୍ୱରଙ୍କ ଲୋକମାନଙ୍କ ଉପରେ ଦୁଃଖକଷ୍ଟ ଆସିଲା । କିନ୍ତୁ ଯୀଶୁ ପରିପୂର୍ଣ୍ଣ ଅଟନ୍ତି ଓ ସେ କେବେ ବି କୌଣସି ଭୁଲ କରି ନାହାନ୍ତି । (ଲୂକ ୧:୩୨; ଏବ୍ରୀ ୪:୧୪, ୧୫) ଯେବେ ଶୟତାନ ତାଙ୍କ ଉପରେ ବଡ଼ ବଡ଼ ପରୀକ୍ଷା ଆଣିଲା, ତେବେ ବି ସେ ଯିହୋବାଙ୍କ ବିଶ୍ୱସ୍ତ ରହିଲେ । ଏପରି ଭାବେ ଯୀଶୁ ପ୍ରମାଣିତ କଲେ ଯେ ସେ କେବେ ବି ପାପ କରିବେ ନାହିଁ ଓ ଏପରି କିଛି କରିବେ ନାହିଁ ଯେଉଁଥିରୁ ତାଙ୍କ ପ୍ରଜାମାନଙ୍କୁ କୌଣସି କଷ୍ଟ ସହିବାକୁ ପଡ଼ିବ । ସତରେ, ଯୀଶୁଙ୍କଠାରୁ ଭଲ ରାଜା ଆଉ କେହି ବି ହୋଇପାରିବେ ନାହିଁ !

୧୧. କେଉଁମାନେ ଯୀଶୁଙ୍କ ସହିତ ମିଶି ଶାସନ କରିବେ ?

^୧୧ ଯୀଶୁଙ୍କ ସହିତ ଶାସନ କରିବା ପାଇଁ ପୃଥିବୀରୁ ୧,୪୪,୦୦୦ ଜଣ ପୁରୁଷ ଓ ସ୍ତ୍ରୀମାନଙ୍କୁ ଏକାଠି କରାଯାଉଛି । (ପ୍ରକା. ୧୪:୧-୩) ସେମାନେ ଯୀଶୁଙ୍କ ସହିତ ମିଶି ମଣିଷମାନଙ୍କ ଆବଶ୍ୟକତା ପୂରା କରିବେ ଓ ସେମାନଙ୍କୁ ସାହାଯ୍ୟ କରିବେ । ଏହି ପୃଥିବୀ ପାଇଁ ଯିହୋବାଙ୍କ ଯେଉଁ ଉଦ୍ଦେଶ୍ୟ ରହିଛି, ତାହା ବି ସେମାନେ ପୂରା କରିବେ । ସେମାନେ ପୃଥିବୀରେ ଅନେକ କଷ୍ଟ ଓ ଦୁଃଖ ସହିଛନ୍ତି । ତେଣୁ ସେମାନେ ଆମ କଷ୍ଟ ଭଲଭାବେ ବୁଝିପାରିବେ । କିନ୍ତୁ ସେମାନେ ୧,୦୦୦ ବର୍ଷର ଶାସନ ସମୟରେ କʼଣ କʼଣ କରିବେ ?

୧୨. ଯିହୋବା ୧,୪୪,୦୦୦ ଜଣ ଲୋକଙ୍କୁ କʼଣ ଦାୟିତ୍ୱ ଦେବେ ?

^୧୨ ଶଲୋମନଙ୍କୁ ଯେତେ ଲୋକମାନଙ୍କ ଉପରେ ଅଧିକାର ଦିଆଯାଇଥିଲା, ତାʼଠୁ ବି ଅଧିକ ଲୋକମାନଙ୍କ ଉପରେ ଯୀଶୁ ଓ ୧,୪୪,୦୦୦ ଜଣ ଲୋକଙ୍କୁ ଅଧିକାର ଦିଆଯାଇଛି । ଶଲୋମନ ଇସ୍ରାଏଲ ଦେଶରେ ରାଜା ଥିଲେ ଓ ତାଙ୍କୁ କେବଳ କିଛି ଲକ୍ଷ ଲୋକମାନଙ୍କ ଉପରେ ଅଧିକାର ଦିଆଯାଇଥିଲା । କିନ୍ତୁ ଯୀଶୁ ଓ ୧,୪୪,୦୦୦ ଜଣ ଲୋକମାନେ ସାରା ପୃଥିବୀରେ ଶାସନ କରିବେ ଓ ସେମାନଙ୍କୁ ଲକ୍ଷ ଲକ୍ଷ ଲୋକମାନଙ୍କ ଉପରେ ଅଧିକାର ଦିଆଯାଇଛି । ଯିହୋବା ସେମାନଙ୍କୁ କେତେ ବଡ଼ ଦାୟିତ୍ୱ ଦେବେ !

୧୩. ଯୀଶୁଙ୍କ ସହିତ ଯେଉଁ ୧,୪୪,୦୦୦ ଜଣ ଲୋକ ଶାସନ କରିବେ, ସେମାନେ କେଉଁ ବିଶେଷ କାମ କରିବେ ?

^୧୩ ଯୀଶୁଙ୍କ ଭଳି ୧,୪୪,୦୦୦ ଜଣ ଲୋକ ମଧ୍ୟ ରାଜା ଓ ଯାଜକ ଭାବେ ସେବା କରିବେ । (ପ୍ରକା. ୫:୧୦) ପ୍ରାଚୀନ ସମୟରେ ଯେବେ ଇସ୍ରାଏଲୀୟମାନଙ୍କୁ ମୋଶାଙ୍କ ବ୍ୟବସ୍ଥା ଦିଆଯାଇଥିଲା, ତେବେ ସେଥିରେ ଯାଜକମାନଙ୍କୁ କୁହାଯାଇଥିଲା ଯେ ସେମାନେ ଏକଥାର ଧ୍ୟାନ ରଖନ୍ତୁ ଯେ ସମସ୍ତଙ୍କ ସ୍ୱାସ୍ଥ୍ୟ ଭଲ ରହୁ ଓ ସମସ୍ତେ ଯିହୋବାଙ୍କ ନିକଟତର ହୋଇ ରହନ୍ତୁ । ଆଉ ଆମେ ଜାଣୁ ଯେ ମୋଶାଙ୍କ ବ୍ୟବସ୍ଥା “ଆଗାମୀ ଉତ୍ତମ ଉତ୍ତମ ବିଷୟର ଛାୟା ସ୍ୱରୂପ ।” ତେଣୁ ଆମେ କହିପାରିବା ଯେ ୧,୪୪,୦୦୦ ଜଣ ଲୋକ ଯାଜକ ଭାବେ ଏକଥାର ଧ୍ୟାନ ରଖିବେ ଯେ ସମସ୍ତ ମନୁଷ୍ୟମାନଙ୍କ ସ୍ୱାସ୍ଥ୍ୟ ଭଲ ରହୁ ଓ ସେମାନେ ଯିହୋବାଙ୍କ ନିକଟତର ହୋଇ ରହନ୍ତୁ । (ଏବ୍ରୀ ୧୦:୧) ଆମେ ଏହା ତ ଜାଣି ନାହୁଁ ଯେ ଏହି ରାଜା ଓ ଯାଜକମାନେ ପାରଦୀଶରେ କିପରି ଭାବେ ଈଶ୍ୱରଙ୍କ ରାଜ୍ୟର ପ୍ରଜାମାନଙ୍କ ସହିତ କଥା ହେବେ କିମ୍ବା ସେମାନଙ୍କୁ ପରାମର୍ଶ ଦେବେ । କିନ୍ତୁ ଏବିଷୟରେ ଯିହୋବା ଯାହା ବି ବ୍ୟବସ୍ଥା କରିବେ, ଆମେ ଭରସା ରଖିପାରିବା ଯେ ସେ ନିଜ ଲୋକମାନଙ୍କୁ ଠିକ୍‌ ବାଟ ଦେଖାଇବା ଜାରି ରଖିବେ ।—ପ୍ରକା. ୨୧:୩, ୪.

୧୪. ବାଇବଲରେ “ସାନ ପଲ” ଓ ‘ଅନ୍ୟ ମେଷର’ ଲୋକମାନଙ୍କ ବିଷୟରେ କʼଣ ଲେଖାଅଛି ଓ ଏହି କଥା ଆଜି କିପରି ପୂରା ହେଉଛି ?

^୧୪ ଯେଉଁ ଲୋକମାନେ ଯୀଶୁଙ୍କ ସହ ସ୍ୱର୍ଗରେ ଶାସନ କରିବେ, ସେମାନଙ୍କୁ ସେ “ସାନ ପଲ” କହିଲେ । (ଲୂକ ୧୨:୩୨) ଯୀଶୁ ଆଉ ଗୋଟିଏ ସମୂହ ବିଷୟରେ କହିଲେ, ଯେଉଁମାନଙ୍କୁ ସେ “ଅନ୍ୟ ମେଷ” କହିଲେ । ବାଇବଲରେ ଲେଖାଅଛି ଯେ ଏହି ଦୁଇପ୍ରକାରର ସମୂହ ମିଶି ଗୋଟିଏ ପଲ ହୁଅନ୍ତେ । (ଯୋହ. ୧୦:୧୬) ଆଜି ଏହି ଦୁଇ ସମୂହ ମିଶି କାମ କରୁଛନ୍ତି ଓ ସେମାନେ ପାରଦୀଶରେ ମଧ୍ୟ ଏପରି ହିଁ କରୁଥିବେ । ସେସମୟ ଯାଏ ସାନପଲର ସବୁଲୋକମାନେ ସ୍ୱର୍ଗ ଯାଇ ସାରିଥିବେ ଓ “ଅନ୍ୟ ମେଷଗୁଡ଼ିକ” ପାଖରେ ପୃଥିବୀରେ ସବୁଦିନ ଯାଏ ବଞ୍ଚି ରହିବାର ସୁଯୋଗ ଥିବ । କିନ୍ତୁ ପାରଦୀଶରେ ବଞ୍ଚିବା ପାଇଁ ଅନ୍ୟ ମେଷର ଲୋକମାନଙ୍କୁ ଆଜି କʼଣ କରିବାକୁ ପଡ଼ିବ ?

୧୫. (କ) ‘ଅନ୍ୟ ମେଷର’ ଲୋକମାନେ ଖ୍ରୀଷ୍ଟଙ୍କ ଭାଇମାନଙ୍କୁ କିପରି ସହଯୋଗ କରନ୍ତି ? (ଖ) ଚିତ୍ରରେ ଦିଆଯାଇଥିବା ଭାଇଙ୍କ ଭଳି ଆପଣ କʼଣ କରିପାରିବେ ?

^୧୫ ଯୀଶୁଙ୍କ ସହ ଯେଉଁ ଅପରାଧୀକୁ କାଠରେ ଲଟକା ଯାଇଥିଲା, ସେ ଯୀଶୁଙ୍କ ଉପରେ ବିଶ୍ୱାସ ତ କଲା । କିନ୍ତୁ ତାକୁ ଏହା ଦେଖାଇବାର ସୁଯୋଗ ମିଳିନାହିଁ ଯେ ସେ ଯୀଶୁଙ୍କର କେତେ କୃତଜ୍ଞ ଅଟେ । କିନ୍ତୁ ‘ଅନ୍ୟ ମେଷର’ ଲୋକମାନେ ଆଜି ଏହା ଅନେକ ଉପାୟରେ ଦେଖାଇପାରିବେ । ଯେପରି ସେମାନେ ଅଭିଷିକ୍ତ ଖ୍ରୀଷ୍ଟିୟାନମାନଙ୍କୁ ସହଯୋଗ କରି ଏହା ଦେଖାଇପାରିବେ ଯେ ସେମାନେ ଯୀଶୁଙ୍କୁ କେତେ ପ୍ରେମ କରନ୍ତି । ଯୀଶୁ ମଧ୍ୟ କହିଥିଲେ ଯେ ଆମେ ଯେପରି ଭାବେ ତାଙ୍କ ଭାଇମାନଙ୍କ  ସହ, ଅର୍ଥାତ୍‌ ଅଭିଷିକ୍ତ ଖ୍ରୀଷ୍ଟିୟାନମାନଙ୍କ ସହ ବ୍ୟବହାର କରୁ, ତାʼ ଆଧାରରେ ସେ ଆମର ନ୍ୟାୟ କରିବେ । (ମାଥି. ୨୫:୩୧-୪୦) ଆମେ ପ୍ରଚାର ଓ ଶିଷ୍ୟ କରିବା କାମରେ ଅଧିକରୁ ଅଧିକ ଭାଗ ନେଇ ମଧ୍ୟ ଅଭିଷିକ୍ତ ଖ୍ରୀଷ୍ଟିୟାନମାନଙ୍କୁ ସହଯୋଗ କରିପାରିବା । (ମାଥି. ୨୮:୧୮-୨୦) ଲୋକମାନଙ୍କୁ ଶିଖାଇବା ପାଇଁ ଆଜି ଆମ ପାଖରେ ଅନେକ ପ୍ରକାଶନ ଅଛି, ଯେପରି ଆମ ନୂଆ ବହି ଖୁସିଭରା ଜୀବନ ଆଜି ଓ ଭବିଷ୍ୟତରେ ! ତାହେଲେ ଏହାର ଭଲ ବ୍ୟବହାର କରିବା ପାଇଁ ଆପଣ ପୂରା ଚେଷ୍ଟା କରନ୍ତୁ । ଯଦି ଆପଣ କାହାରି ବାଇବଲ ଅଧ୍ୟୟନ କରାଉ ନାହାନ୍ତି, ତାହେଲେ ଯେଉଁ ଲୋକମାନଙ୍କୁ ଆପଣ ଖୁସିର ଖବର ଶୁଣାନ୍ତି ତାଙ୍କ ସହ ବାଇବଲ ଅଧ୍ୟୟନ ଆରମ୍ଭ କରିବା ପାଇଁ ପୂରା ଚେଷ୍ଟା କରନ୍ତୁ ।

୧୬. ପାରଦୀଶରେ ବଞ୍ଚିବା ପାଇଁ ଆମେ ଏବେଠୁ କʼଣ କରିପାରିବା ?

^୧୬ ଜଣେ ଭଲ ବ୍ୟକ୍ତି ହେବା ପାଇଁ ଆମକୁ ନୂଆ ଦୁନିଆର ଅପେକ୍ଷା କରିବା ଦରକାର ନାହିଁ । ତାʼ ପାଇଁ ଆମେ ଏବେଠୁ ପ୍ରସ୍ତୁତି କରିପାରିବା । ଆମେ ଏବେଠୁ ନିଜ ଭିତରେ ଭଲ ଗୁଣ ବଢ଼ାଇପାରିବା । ଆମେ ସଚ୍ଚୋଟ ହୋଇପାରିବା, ସବୁବେଳେ ସତ କହିବା ପାଇଁ ଚେଷ୍ଟା କରିପାରିବା ଓ ଧ୍ୟାନ ରଖିପାରିବା ଯେ ଆମ କାମ ଓ ବ୍ୟବହାରରୁ ଯିହୋବା ଖୁସି ହୁଅନ୍ତୁ । ଆମେ ଯିହୋବା, ନିଜ ଜୀବନସାଥୀ ଓ ଭାଇଭଉଣୀମାନଙ୍କର ବିଶ୍ୱସ୍ତ ରହିପାରିବା । ଆଜି ଏହି ଦୁନିଆରେ ଯିହୋବାଙ୍କ ସ୍ତରଗୁଡ଼ିକୁ ମାନିବା ଏତେ ସହଜ କଥା ନୁହେଁ, କିନ୍ତୁ ଯଦି ଆମେ ଏବେଠାରୁ ଏପରି କରିବା, ତାହେଲେ ପାରଦୀଶରେ ମଧ୍ୟ ଆମେ ସହଜରେ ଏପରି କରିପାରିବା । ତାʼଛଡ଼ା ଆମେ ଏବେଠାରୁ କିଛି ଏପରି ଦକ୍ଷତାଗୁଡ଼ିକ ବଢ଼ାଇପାରିବା ଯାହା ନୂଆ ଦୁନିଆରେ ଆମ କାମରେ ଆସିବ ଓ ଭଲ ଅଭ୍ୟାସଗୁଡ଼ିକୁ ମଧ୍ୟ କରିପାରିବା ।—ଏହି ସଂଖ୍ୟାରେ ଦିଆଯାଇଥିବା ଲେଖା “କʼଣ ଆପଣ ‘ପୃଥିବୀର ଅଧିକାରୀ’ ହେବା ପାଇଁ ପ୍ରସ୍ତୁତ ଅଛନ୍ତି ?” ଦେଖନ୍ତୁ ।

୧୭. ଯଦି ଆମେ ପୂର୍ବେ କୌଣସି ପାପ କରିଥିଲୁ, ତାହେଲେ କʼଣ ସେବିଷୟରେ ଭାବି ଆମେ ଦୁଃଖି ହେବା ଉଚିତ୍‌ ? ବୁଝାନ୍ତୁ ।

^୧୭ ଯଦି ଆମେ ପୂର୍ବେ କୌଣସି ଗମ୍ଭୀର ପାପ କରିଥିଲୁ, ତାହେଲେ ଆମକୁ ସେବିଷୟରେ ଭାବି ଭାବି ବହୁତ ବେଶି ଦୁଃଖି ହେବା ଉଚିତ୍‌ ନୁହେଁ । ମନେରଖନ୍ତୁ, ଯୀଶୁ ଫାରୂଶୀମାନଙ୍କୁ କହିଥିଲେ, “ମୁଁ ଧାର୍ମିକମାନଙ୍କୁ ଆହ୍ୱାନ କରିବା ନିମନ୍ତେ ଆସି ନାହିଁ, ମାତ୍ର ପାପୀମାନଙ୍କୁ ଆହ୍ୱାନ କରିବା ନିମନ୍ତେ ଆସିଅଛି ।” (ମାଥି. ୯:୧୩) ଯୀଶୁଙ୍କ ମୁକ୍ତିର ମୂଲ୍ୟ ଆଧାରରେ ଆମକୁ ନିଜ ପାପଗୁଡ଼ିକରୁ କ୍ଷମା ମିଳିପାରେ । ଏପରିକି ତାହା ଯେତେ ବଡ଼ ପାପ ହୋଇଥାଉ ନା କାହିଁକି । କିନ୍ତୁ ତାʼ ଅର୍ଥ ଏହା ନୁହେଁ ଯେ ଆମେ ‘ସ୍ୱେଚ୍ଛାପୂର୍ବକ ପାପ କରୁଥିବା’ ବା ଜାଣିଶୁଣି ପାପ କରୁଥିବା ଓ ଭାବିବା ଯେ ଯିହୋବାଙ୍କ ମୁକ୍ତିର ମୂଲ୍ୟର ଆଧାରରେ ସେ ଆମକୁ କ୍ଷମା କରି ହିଁ ଦେବେ । (ଏବ୍ରୀ ୧୦:୨୬-୩୧) କିନ୍ତୁ ଯଦି ଆମେ ପଶ୍ଚାତାପ କରିଛୁ, ଯିହୋବାଙ୍କୁ କ୍ଷମା ମାଗିଛୁ, ପ୍ରାଚୀନମାନଙ୍କର ସାହାଯ୍ୟ ନେଇଛୁ ଓ ନିଜ ଭିତରେ ପରିବର୍ତ୍ତନ କରିଛୁ, ତାହେଲେ ଆମେ ଭରସା ରଖିପାରିବା ଯେ ଯିହୋବା ଆମକୁ କ୍ଷମା କରି ଦେଇଛନ୍ତି ।—ଯିଶା. ୫୫:୭; ପ୍ରେରି. ୩:୧୯.

୧୮. ଯେବେ ଆପଣ ନୂଆ ଦୁନିଆରେ ସେହି ଅପରାଧୀକୁ ଭେଟିବେ ଯେ ଯୀଶୁଙ୍କ ଉପରେ ବିଶ୍ୱାସ କରିଥିଲା, ତେବେ ଆପଣ ତାʼ ସହିତ କେଉଁ ବିଷୟରେ କଥା ହେବେ ?

 ^୧୮ କଳ୍ପନା କରନ୍ତୁ ଯେ ଆପଣ ପାରଦୀଶରେ ଅଛନ୍ତି ଓ ସେହି ଅପରାଧୀ ସହିତ କଥା ହେଉଛନ୍ତି ଯେ ଯୀଶୁଙ୍କ ଉପରେ ବିଶ୍ୱାସ କରିଥିଲା । ସବୁଠୁ ପ୍ରଥମେ ହୁଏତ ଆପଣ ପରସ୍ପରକୁ କହିବେ ଯେ ଯୀଶୁ ଆପଣଙ୍କ ପାଇଁ ଯାହା କରିଲେ, ତାʼ ପାଇଁ ଆପଣ କେତେ କୃତଜ୍ଞ ଅଟନ୍ତି । ତାʼପରେ ହୁଏତ ଆପଣ ସେହି ଅଧିକାରୀକୁ ପଚାରିପାରିବେ ଯେ ଯେବେ ତାକୁ ଯୀଶୁଙ୍କ ସହିତ କାଠରେ ଲଟକାଇ ଦିଆଗଲା, ତାʼପରେ କʼଣ କʼଣ ହେଲା ଓ ଯେବେ ଯୀଶୁ ତାକୁ କହିଲେ ଯେ ସେ ତାଙ୍କ ସହିତ ପାରଦୀଶରେ ଥିବେ, ତେବେ ତାକୁ କିପରି ଲାଗିଲା । ତାʼପରେ ହୁଏତ ସେ ଆପଣଙ୍କୁ ମଧ୍ୟ ପଚାରି ପାରିବ ଯେ ଶେଷ କାଳରେ ଆପଣଙ୍କ ଜୀବନ କିପରି ଥିଲା । ଭାବନ୍ତୁ ଏହା କେତେ ବଡ଼ କଥା ଅଟେ ଯେ ଆମେ ଏପରି ଲୋକମାନଙ୍କୁ ଈଶ୍ୱରଙ୍କ ବାକ୍ୟରୁ ଶିଖାଇ ପାରିବା !—ଏଫି. ୪:୨୨-୨୪.

୧୯. ଆମେ ପାରଦୀଶରେ କାହିଁକି ବୋର ହେବାନି ? (ବାହାରେ ଦିଆଯାଇଥିବା ଚିତ୍ର ଦେଖନ୍ତୁ ।)

^୧୯ ପାରଦୀଶରେ ସବୁଦିନ ବଞ୍ଚି, ଆମେ ବୋର ହେବାନି । ଆମେ ନୂଆ ନୂଆ ଲୋକଙ୍କ ସହିତ ଭେଟିବା ଓ ଆମ ପାଖରେ କରିବା ପାଇଁ ବହୁତ କିଛି ଥିବ । ସବୁଠୁ ବଢ଼ିଆ କଥା ଆମେ ପ୍ରତିଦିନ ଯିହୋବାଙ୍କୁ ଆହୁରି ଭଲଭାବେ ଜାଣିପାରିବା । ଆମ ପାଖରେ ସବୁଦିନ ତାଙ୍କ ବିଷୟରେ ଶିଖିବା ପାଇଁ କିଛି ନା କିଛି ରହିବ । ଆଉ ଯେପରି ସମୟ ଗଡ଼ି ଚାଲିବ, ଆମେ ତାଙ୍କୁ ଆହୁରି ପ୍ରେମ କରିବାକୁ ଲାଗିବା । ତାʼଛଡ଼ା ଯିହୋବା ଯାହା ବି ସୃଷ୍ଟି କରିଛନ୍ତି, ଆମେ ସେହି ସୃଷ୍ଟି ବିଷୟରେ ଶିଖିବା ଜାରି ରଖିବା ଓ ତାʼର ମଜା ନେଇ ପାରିବା । ଆମେ କେତେ ଖୁସି ଯେ ଯିହୋବା ଓ ଯୀଶୁ ଆମକୁ ପ୍ରତିଜ୍ଞା କରିଛନ୍ତି ଯେ ଆମେ ପାରଦୀଶରେ ସବୁଦିନ ଯାଏ ବଞ୍ଚିବା !