୧. ଆଜି ସବୁ ଲୋକମାନଙ୍କୁ କେଉଁ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେବାର ଅଛି ?

 ଆଜି ସବୁ ଲୋକମାନଙ୍କୁ ଗୋଟିଏ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେବାର ଅଛି । ସେମାନଙ୍କୁ ନିଷ୍ପତ୍ତି ନେବାର ଅଛି ଯେ ସେମାନେ କାହା ପକ୍ଷରେ ଛିଡ଼ା ହେବେ, ଯିହୋବାଙ୍କ ପକ୍ଷରେ ନା ଶୟତାନର ପକ୍ଷରେ । ସେମାନେ ଦୁଇଟି ଡଙ୍ଗାରେ ଗୋଡ଼ ଦେଇପାରିବେ ନାହିଁ । ଆଜି ସେମାନେ ଯାହା ନିଷ୍ପତ୍ତି ନେବେ, ସେଥିରୁ ନିର୍ଦ୍ଧାରିତ ହେବ ଯେ ସେମାନଙ୍କର ଭବିଷ୍ୟତ କିପରି ହେବ । (ମାଥି. ୨୫:୩୧-୩୩, ୪୬) “ମହାକ୍ଳେଶ” ସମୟରେ ଯେତେବେଳେ ମଣିଷମାନଙ୍କର ନ୍ୟାୟ କରାଯିବ, ସେତେବେଳେ ଏହାର ନିଷ୍ପତ୍ତି ନିଆଯିବ ଯେ କିଏ ବଞ୍ଚିବ ଓ କାହାର ବିନାଶ କରିଦିଆଯିବ ।—ପ୍ରକା. ୭:୧୪; ୧୪:୯-୧୧; ଯିହି. ୯:୪, ୬.

୨. (କ) ଏବ୍ରୀ ୧୦:୩୫-୩୯ ପଦରେ ଆମକୁ କʼଣ କରିବା ପାଇଁ ପ୍ରୋତ୍ସାହନ ଦିଆଯାଇଛି ? (ଖ) ପ୍ରକାଶିତ ବାକ୍ୟର କଥାଗୁଡ଼ିକୁ ଧ୍ୟାନରେ ରଖିଲେ ଆମେ କʼଣ କରିପାରିବା ?

^୨ ଏବ୍ରୀ ୧୦:୩୫-୩୯ ପଢ଼ନ୍ତୁ । ଯଦି ଆପଣ ଯିହୋବାଙ୍କ ରାଜ୍ୟର ପକ୍ଷ ନେବା ପାଇଁ ନିଷ୍ପତ୍ତି ନେଇଛନ୍ତି, ତାହେଲେ ଆପଣ ସଠିକ୍‌ ନିଷ୍ପତ୍ତି ନେଇଛନ୍ତି । ଏବେ ହୁଏତ ଆପଣ ଅନ୍ୟମାନଙ୍କୁ ମଧ୍ୟ ଏହି ନିଷ୍ପତ୍ତି ନେବା ପାଇଁ ସାହାଯ୍ୟ କରିବାକୁ ଚାହୁଁଥିବେ । ତାʼପାଇଁ ଆପଣ ପ୍ରକାଶିତ ବାକ୍ୟ ବହିରେ ଦିଆଯାଇଥିବା କଥାଗୁଡ଼ିକୁ ଧ୍ୟାନରେ ରଖିପାରିବେ । ସେଥିରେ କେବଳ ଏହା କୁହାଯାଇନି ଯେ ଈଶ୍ୱରଙ୍କ ଶତ୍ରୁମାନଙ୍କର କʼଣ ହେବ, ବରଂ ଏହା ମଧ୍ୟ କୁହାଯାଇଛି ଯେ ଯେଉଁ ଲୋକମାନେ ଯିହୋବାଙ୍କର ବିଶ୍ୱସ୍ତ ରହିବେ, ସେମାନଙ୍କୁ କʼଣ କʼଣ ଆଶିଷ ମିଳିବ । ଯଦି ଆପଣ ଏହି କଥାଗୁଡ଼ିକୁ ପଢ଼ିବେ ଓ ସେବିଷୟରେ ଭାବିବେ, ତାହେଲେ ସମସ୍ୟା ଆସିଲେ ମଧ୍ୟ ଆପଣ ଯିହୋବାଙ୍କ ସେବା କରିବା ଜାରି ରଖିପାରିବେ । ତାʼସହ ଆପଣ ଅନ୍ୟମାନଙ୍କୁ ମଧ୍ୟ ସାହାଯ୍ୟ କରିପାରିବେ ଯେ ସେମାନେ ଯିହୋବାଙ୍କର ସେବା କରିବାର ନିଷ୍ପତ୍ତି ନିଅନ୍ତୁ ଓ ଏପରି କରିବା ଜାରି ରଖନ୍ତୁ ।

୩. ଏହି ଲେଖାରେ ଆମେ କେଉଁ ପ୍ରଶ୍ନଗୁଡ଼ିକ ଉପରେ ଆଲୋଚନା କରିବା ?

^୩ ଏହି ଲେଖାରେ ଆମେ ବିଶେଷ କରି ଦୁଇଟି ପ୍ରଶ୍ନ ଉପରେ ଆଲୋଚନା କରିବା ।  (୧) ଯେଉଁ ଲୋକମାନେ ଯିହୋବାଙ୍କ ରାଜ୍ୟର ପକ୍ଷ ନେବେ, ସେମାନଙ୍କର କʼଣ ହେବ ? (୨) ଯେଉଁ ଲୋକମାନେ ଲୋହିତବର୍ଣ୍ଣର ଜଙ୍ଗଲୀ ପଶୁର ପକ୍ଷ ନେବେ ସେମାନଙ୍କର କʼଣ ହେବ ?

୪. ଯୋହନ ସ୍ୱର୍ଗରେ ଯୀଶୁ ସହ କେଉଁମାନଙ୍କୁ ଛିଡ଼ା ହେବାର ଦେଖନ୍ତି ?

^୪ ଗୋଟିଏ ଦର୍ଶନରେ ପ୍ରେରିତ ଯୋହନ ଦୁଇଟି ସମୂହର ଲୋକମାନଙ୍କୁ ଦେଖନ୍ତି, ଯେଉଁମାନେ ଯିହୋବାଙ୍କ ରାଜ୍ୟର ପକ୍ଷ ନିଅନ୍ତି ଓ ଯେଉଁମାନଙ୍କୁ ଅନନ୍ତ ଜୀବନ ଦିଆଯିବ । ପ୍ରଥମ ସମୂହରେ ୧,୪୪,୦୦୦ ଜଣ ଲୋକ ଅଛନ୍ତି । (ପ୍ରକା. ୭:୪) ସେମାନଙ୍କୁ ପୃଥିବୀରୁ ବଛାଯାଇଛି, ଯାହାଫଳରେ ସେମାନେ ସ୍ୱର୍ଗକୁ ଯାଇ ଯୀଶୁଙ୍କ ସହ ମିଶି ପୃଥିବୀ ଉପରେ ଶାସନ କରିବେ । (ପ୍ରକା. ୫:୯, ୧୦; ୧୪:୩, ୪) ଯୋହନ ଦେଖନ୍ତି ଯେ ଏହି ୧,୪୪,୦୦୦ ଜଣ ଯୀଶୁଙ୍କ ସହ ସିୟୋନ ପର୍ବତ ଉପରେ ଅର୍ଥାତ୍‌ ସ୍ୱର୍ଗରେ ଛିଡ଼ା ହୋଇଛନ୍ତି ।—ପ୍ରକା. ୧୪:୧.

୫ . ଅବଶିଷ୍ଟ ଅଭିଷିକ୍ତ ଖ୍ରୀଷ୍ଟିୟାନମାନଙ୍କର ଭବିଷ୍ୟତରେ କʼଣ ହେବ ?

^୫ ଏହି ୧,୪୪,୦୦୦ ଜଣକୁ ବଛାଯିବା କାମ ପ୍ରଥମ ଶତାବ୍ଦୀରେ ଆରମ୍ଭ ହୋଇଯାଇଥିଲା ଆଉ ଏମଧ୍ୟରୁ ଅଧିକାଂଶ ସ୍ୱର୍ଗ ଯାଇସାରିଛନ୍ତି । (ଲୂକ ୧୨:୩୨; ରୋମୀ. ୮:୧୭) ଯୋହନଙ୍କୁ କୁହାଗଲା ଯେ ଶେଷକାଳରେ ପୃଥିବୀରେ ଏମଧ୍ୟରୁ କେବଳ କିଛି “ଅବଶିଷ୍ଟ” ଥିବେ । ମହାକ୍ଳେଶ ଆରମ୍ଭ ହେବା ପୂର୍ବରୁ ସେମାନଙ୍କ ଉପରେ ଶେଷ “ମୁଦ୍ରାଙ୍କ” ଲଗାଯିବ । (ପ୍ରକା. ୭:୨, ୩; ୧୨:୧୭) ତାʼପରେ ମହାକ୍ଳେଶ ସମୟରେ ସେମାନଙ୍କୁ ସ୍ୱର୍ଗକୁ ଉଠାଇ ନିଆଯିବ । ସବୁ ୧,୪୪,୦୦୦ ଜଣ ଯୀଶୁଙ୍କ ସହ ମିଶି ଈଶ୍ୱରଙ୍କ ରାଜ୍ୟରେ ଶାସନ କରିବେ ।—ମାଥି. ୨୪:୩୧; ପ୍ରକା. ୫:୯, ୧୦.

୬-୭. (କ) ଅଭିଷିକ୍ତ ଖ୍ରୀଷ୍ଟିୟାନମାନଙ୍କୁ ଦେଖିବା ପରେ ଯୋହନ କʼଣ ଦେଖନ୍ତି ? (ଖ) ଅବଶିଷ୍ଟ ଅଭିଷିକ୍ତ ଖ୍ରୀଷ୍ଟିୟାନ ଓ ମହା ଜନତାର ଲୋକମାନେ କାହିଁକି ପ୍ରକାଶିତ ବାକ୍ୟ ୭ ଅଧ୍ୟାୟରେ ଦିଆଯାଇଥିବା ଭବିଷ୍ୟତବାଣୀକୁ ପୂରା ହେବାର ଦେଖିବାକୁ ଚାହାନ୍ତି ?

^୬ ସ୍ୱର୍ଗରେ ୧,୪୪,୦୦୦ ଜଣଙ୍କୁ ଦେଖିଲା ପରେ, ଯୋହନ ଏକ ‘ମହା ଜନତାକୁ’ ଦେଖନ୍ତି, ଯାହାକୁ କୌଣସି ବ୍ୟକ୍ତି ଗଣିପାରିବେ ନାହିଁ । (ପ୍ରକା. ୭:୯, ୧୦) ଏହି ‘ମହା ଜନତାରେ’ କେଉଁ ଲୋକମାନେ ଅଛନ୍ତି ? ଯୋହନ ଲେଖିଲେ, “ଏମାନେ ମହାକ୍ଳେଶରୁ ବାହାରି ଆସିଅଛନ୍ତି ଓ ମେଷଶାବକଙ୍କ ରକ୍ତରେ ଆପଣା ଆପଣା ବସ୍ତ୍ର ଧୋଇ ଶୁକ୍ଳବର୍ଣ୍ଣ କରିଅଛନ୍ତି ।” (ପ୍ରକା. ୭:୧୪) ମହାକ୍ଳେଶରୁ ବାହାରି ଆସିବା ପରେ ଏହି ‘ମହା ଜନତାର’ ଲୋକମାନେ ପୃଥିବୀରେ ସବୁଦିନ ଯାଏ ବଞ୍ଚିବେ ଓ ସେମାନଙ୍କୁ ଅନେକ ଆଶିଷ ମିଳିବ ।—ଗୀତ. ୩୭:୯-୧୧, ୨୭-୨୯; ହିତୋ. ୨:୨୧, ୨୨; ପ୍ରକା. ୭:୧୬, ୧୭.

^୭ ଟିକିଏ ଭାବନ୍ତୁ, ଯେତେବେଳେ ପ୍ରକାଶିତ ବାକ୍ୟ ୭ ଅଧ୍ୟାୟରେ ଦିଆଯାଇଥିବା କଥାଗୁଡ଼ିକ ପୂରା ହେବ, ସେତେବେଳେ ଆମକୁ କିପରି ଲାଗିବ ? ଆମ ସମସ୍ତଙ୍କୁ ବହୁତ ଖୁସି ଲାଗିବ । ଆମ ଆଶା ସ୍ୱର୍ଗରେ ବଞ୍ଚିବାର ଥାଉ କିମ୍ବା ପୃଥିବୀରେ ବଞ୍ଚିବାର, ସେସମୟରେ ଆମେ ସମସ୍ତେ ବହୁତ ଖୁସି ଥିବା ଯେ ଆମେ ଯିହୋବାଙ୍କ ରାଜ୍ୟର ପକ୍ଷ ନେଲୁ । ଏବେ ଆସନ୍ତୁ ଜାଣିବା ଯେ ମହାକ୍ଳେଶ ସମୟରେ ଈଶ୍ୱରଙ୍କ ଶତ୍ରୁମାନଙ୍କର କʼଣ ହେବ ।—ମାଥି. ୨୪:୨୧.

୮. (କ) କେଉଁ ଘଟଣାରୁ ମହାକ୍ଳେଶର ଆରମ୍ଭ ହେବ ? (ଖ) ସେସମୟରେ ଅଧିକାଂଶ ଲୋକମାନେ କʼଣ କରିବେ ?

^୮ ଯେପରି ଆମେ ପୂର୍ବ ଲେଖାରେ ଶିଖିଲୁ, ଦୁନିଆର ସରକାରଗୁଡ଼ିକ ଖୁବ୍‌ ଶୀଘ୍ର ମହାନଗରୀ ବାବିଲ ଅର୍ଥାତ୍‌ ସାରା ଦୁନିଆରେ ଥିବା ମିଥ୍ୟା ଧର୍ମଗୁଡ଼ିକୁ ବିନାଶ କରିଦେବ । (ପ୍ରକା. ୧୭:୧୬, ୧୭) ଏହି ଘଟଣାରୁ ମହାକ୍ଳେଶର ଆରମ୍ଭ ହେବ । ଯେତେବେଳେ ସବୁ ଧର୍ମଗୁଡ଼ିକର ବିନାଶ ହୋଇଯିବ, କʼଣ ସେତେବେଳେ ଅନେକ ଲୋକ ଯିହୋବାଙ୍କର ଉପାସନା କରିବାକୁ ଚାହିଁବେ ? ନୁହେଁ । ପ୍ରକାଶିତ ବାକ୍ୟ ୬ ଅଧ୍ୟାୟରେ ଲେଖାଅଛି ଯେ ସେମାନେ ପର୍ବତରେ ଯାଇ ଲୁଚିବେ, ଅର୍ଥାତ୍‌ ସେମାନେ ସରକାରଗୁଡ଼ିକ ଓ ବ୍ୟାପାର ଜଗତଗୁଡ଼ିକ ଉପରେ ଭରସା କରିବେ । ସେମାନେ ଈଶ୍ୱରଙ୍କ ରାଜ୍ୟକୁ ସହଯୋଗ କରିବେ ନାହିଁ । ତେଣୁ ଯିହୋବା ସେମାନଙ୍କୁ ବିରୋଧୀ ମନେ କରିବେ ।—ଲୂକ ୧୧:୨୩; ପ୍ରକା. ୬:୧୫-୧୭.

୯. ମହାକ୍ଳେଶ ସମୟରେ ଯିହୋବାଙ୍କ ଲୋକମାନେ କାହିଁକି ସବୁଠାରୁ ଅଲଗା ଦେଖାଯିବେ ଓ ସେମାନଙ୍କ ସହ କʼଣ ହେବ ?

^୯ ମହାକ୍ଳେଶର ସେହି କଷ୍ଟଭରା ସମୟରେ ଯିହୋବାଙ୍କ ଲୋକମାନେ ସବୁଠୁ ଅଲଗା ଦେଖାଯିବେ । କେବଳ ସେମାନେ ହିଁ ନିଜ ଈଶ୍ୱର ଯିହୋବାଙ୍କର ଉପାସନା କରୁଥିବେ ଓ ‘ଜଙ୍ଗଲୀ ପଶୁକୁ’ ସହଯୋଗ କରିବେ ନାହିଁ । (ପ୍ରକା. ୧୩:୧୪-୧୭) ଏହା ଦେଖି ଈଶ୍ୱରଙ୍କ ବିରୋଧୀମାନେ ବହୁତ ରାଗିଯିବେ ଓ  ଅନେକ ରାଷ୍ଟ୍ର ମିଶି ଈଶ୍ୱରଙ୍କ ଲୋକମାନଙ୍କ ଉପରେ ଆକ୍ରମଣ କରିବେ । ବାଇବଲରେ ଏହାକୁ ମାଗୋଗ୍‌ ଦେଶୀୟ ଗୋଗ୍‌ର ଆକ୍ରମଣ ବୋଲି କୁହାଯାଇଛି ।—ଯିହି. ୩୮:୧୪-୧୬.

୧୦. ଯେତେବେଳେ ଯିହୋବାଙ୍କ ଲୋକମାନଙ୍କ ଉପରେ ଆକ୍ରମଣ କରାଯିବ, ସେତେବେଳେ ସେ କʼଣ କରିବେ ? (ପ୍ରକାଶିତ ବାକ୍ୟ ୧୯:୧୯-୨୧)

^୧୦ ଯେତେବେଳେ ଯିହୋବାଙ୍କ ଲୋକମାନଙ୍କ ଉପରେ ଆକ୍ରମଣ ହେବ, ସେତେବେଳେ ତାଙ୍କୁ କିପରି ଲାଗିବ ? ସେ କହନ୍ତି, “ଆମ୍ଭର କୋପ ଆମ୍ଭର ନାସାରନ୍ଧ୍ରକୁ ଉଠିବ ।” (ଯିହି. ୩୮:୧୮, ୨୧-୨୩) ପ୍ରକାଶିତ ବାକ୍ୟ ୧୯ ଅଧ୍ୟାୟରେ କୁହାଯାଇଛି ଯେ ଯିହୋବା କʼଣ କରିବେ । ସେ ନିଜ ଲୋକମାନଙ୍କୁ ରକ୍ଷା କରିବା ପାଇଁ ଓ ନିଜ ଶତ୍ରୁମାନଙ୍କୁ ବିନାଶ କରିବା ପାଇଁ ନିଜ ପୁତ୍ରକୁ ପଠାଇବେ । ଯୀଶୁଙ୍କ ସହ “ସ୍ୱର୍ଗସ୍ଥ ସୈନ୍ୟବାହିନୀ” ମଧ୍ୟ ଥିବେ, ଅର୍ଥାତ୍‌ ବିଶ୍ୱସ୍ତ ସ୍ୱର୍ଗଦୂତ ଓ ସ୍ୱର୍ଗ ଯାଇଥିବା ୧,୪୪,୦୦୦ ଜଣ । (ପ୍ରକା. ୧୭:୧୪; ୧୯:୧୧-୧୫) ଏହି ଯୁଦ୍ଧର ପରିଣାମ କʼଣ ହେବ ? ଯେତେ ବି ଲୋକମାନେ ଓ ସଂଗଠନଗୁଡ଼ିକ ଯିହୋବାଙ୍କର ବିରୋଧ କରୁଥିବେ, ସେମାନଙ୍କୁ ବିନାଶ କରିଦିଆଯିବ ।—ପ୍ରକାଶିତ ବାକ୍ୟ ୧୯:୧୯-୨୧ ପଢ଼ନ୍ତୁ ।

୧୧. ପ୍ରକାଶିତ ବାକ୍ୟର ଶେଷରେ କେଉଁ ବିଶେଷ ଘଟଣା ବିଷୟରେ କୁହାଯାଇଛି ?

^୧୧ ଯେତେବେଳେ ଈଶ୍ୱରଙ୍କ ଶତ୍ରୁମାନଙ୍କର ବିନାଶ ହୋଇଯିବ, ସେତେବେଳେ ପୃଥିବୀରେ ଥିବା ବିଶ୍ୱସ୍ତ ଲୋକମାନେ ବହୁତ ଖୁସି ହେବେ । ସେସମୟରେ ସ୍ୱର୍ଗରେ ପରିସ୍ଥିତି କିପରି ଥିବ ? ମହାନଗରୀ ବାବିଲର ବିନାଶ ସମୟରେ ସ୍ୱର୍ଗରେ ବହୁତ ଆନନ୍ଦ ଓ ଉଲ୍ଲାସ ହେଲା । କିନ୍ତୁ ଏବେ ଏପରି କିଛି ହେବ ଯାହା ଯୋଗୁଁ ସ୍ୱର୍ଗରେ ଆହୁରି ଅଧିକ ଆନନ୍ଦ ଓ ଉଲ୍ଲାସ ହେବ । (ପ୍ରକା. ୧୯:୧-୩) ପ୍ରକାଶିତ ବାକ୍ୟ ବହିରେ ଗୋଟିଏ ବିଶେଷ ଘଟଣା ବିଷୟରେ କୁହାଯାଇଛି । ତାହା ହେଉଛି, “ମେଷଶାବକଙ୍କ ବିବାହ ।”—ପ୍ରକା. ୧୯:୬-୯.

୧୨. ପ୍ରକାଶିତ ବାକ୍ୟ ୨୧:୧, ୨ ପଦ ଅନୁସାରେ ମେଷଶାବକଙ୍କ ବିବାହ କେବେ ହେବ ?

^୧୨ ମେଷଶାବକଙ୍କ ବିବାହ କେବେ ହେବ ? ହର୍ମିଗିଦ୍ଦୋନ୍‌ ଯୁଦ୍ଧ ଆରମ୍ଭ ହେବାର ଠିକ୍‌ ପୂର୍ବରୁ, ସବୁ ୧,୪୪,୦୦୦ ଜଣ ସ୍ୱର୍ଗରେ ଏକତ୍ର ହୋଇଯିବେ । କିନ୍ତୁ ଏହି ବିବାହ ସେତେବେଳେ ହେବ ନାହିଁ । (ପ୍ରକାଶିତ ବାକ୍ୟ ୨୧:୧, ୨ ପଢ଼ନ୍ତୁ ।) ହର୍ମିଗିଦ୍ଦୋନ୍‌ ଯୁଦ୍ଧରେ ଯେତେବେଳେ ସବୁ ଶତ୍ରୁମାନଙ୍କର ବିନାଶ ହୋଇଯିବ, ତାʼପରେ ମେଷଶାବକଙ୍କ ବିବାହ ହେବ ।—ଗୀତ. ୪୫:୩, ୪, ୧୩-୧୭.

୧୩. ମେଷଶାବକଙ୍କ ବିବାହର ଅର୍ଥ କʼଣ ଅଟେ ?

^୧୩ ଯେତେବେଳେ ଜଣେ ପୁରୁଷ ଓ ସ୍ତ୍ରୀର ବିବାହ ହୁଏ, ସେତେବେଳେ ସେମାନେ ଏକତାର ବନ୍ଧନରେ ବାନ୍ଧିଯାʼନ୍ତି । ସେହିପରି ଯେତେବେଳେ ମେଷଶାବକଙ୍କ ବିବାହ ହେବ, ସେତେବେଳେ ଯୀଶୁ ଓ ତାଙ୍କ “କନ୍ୟା” ଅର୍ଥାତ୍‌ ୧,୪୪,୦୦୦ ଜଣ ଏକତାର ବନ୍ଧନରେ ବାନ୍ଧି ହୋଇଯିବେ । ସେମାନେ ଏକା ସହ ମିଶି ୧,୦୦୦ ବର୍ଷ ଯାଏ ପୃଥିବୀ ଉପରେ ଶାସନ କରିବେ ।—ପ୍ରକା. ୨୦:୬.

୧୪-୧୫ . ପ୍ରକାଶିତ ବାକ୍ୟ ୨୧ ଅଧ୍ୟାୟରେ ୧,୪୪,୦୦୦ ଜଣଙ୍କୁ କିପରି ଭାବେ ଦର୍ଶାଯାଇଛି ? (ବାହାରେ ଦିଆଯାଇଥିବା ଚିତ୍ର ଦେଖନ୍ତୁ ।)

^୧୪ ପ୍ରକାଶିତ ବାକ୍ୟ ୨୧ ଅଧ୍ୟାୟରେ ୧,୪୪,୦୦୦ ଜଣଙ୍କୁ ଏକ ସୁନ୍ଦର ନଗରୀ ଭାବେ ଦର୍ଶାଯାଇଛି । ଏହି ନଗରୀର ନାମ “ନୂତନ ଯିରୂଶାଲମ” ଅଟେ । (ପ୍ରକା. ୨୧:୨, ୯) ଏହି ନଗରୀ ଭିତ୍ତିମୂଳର ୧୨ଟି ପଥରରୁ ତିଆରି ହୋଇଛି । ଏହି ୧୨ଟି ପଥରଗୁଡ଼ିକ ଉପରେ “ମେଷଶାବକଙ୍କ ଦ୍ୱାଦଶ ପ୍ରେରିତଙ୍କ ଦ୍ୱାଦଶ ନାମ” ଲେଖାଅଛି । ଯେତେବେଳେ ଯୋହନ ଏହି ଦର୍ଶନ ଦେଖିଥିବେ, ସେତେବେଳେ ସେ ବହୁତ ଆଶ୍ଚର୍ଯ୍ୟ ହୋଇଯାଇଥିବେ । କାରଣ ଗୋଟିଏ ପଥର ଉପରେ ତାଙ୍କର ନିଜ ନାମ ଲେଖାଥିଲା । ଏହା ଦେଖି ତାଙ୍କୁ ବହୁତ ଖୁସି ହୋଇଥିବ ।—ପ୍ରକା. ୨୧:୧୦-୧୪; ଏଫି. ୨:୨୦.

^୧୫ ଏହି ନଗରୀ ବହୁତ ଅଲଗା ଅଛି । ଏହାର ଦୈର୍ଘ୍ୟ, ପ୍ରସ୍ଥ ଓ ଉଚ୍ଚତା ସମାନ ଅଛି । ନଗରୀର ମୁଖ୍ୟ ପଥ ଶୁଦ୍ଧ ସୁବର୍ଣ୍ଣ ବା ଶୁଦ୍ଧ ସୁନାରୁ ତିଆରି ହୋଇଛି । ତାʼର ୧୨ଟି ଫାଟକ ମୁକ୍ତାରେ ତିଆରି ହୋଇଛି ଓ ତାʼର ଭିତ୍ତିମୂଳ ବା ମୂଳଦୂଆ ଓ ପ୍ରାଚୀରଗୁଡ଼ିକ ବହୁମୂଲ୍ୟ ମଣିରେ ଭୂଷିତ ଅଛି । (ପ୍ରକା. ୨୧:୧୫-୨୧) କିନ୍ତୁ ସେହି ନଗରୀରେ ଗୋଟିଏ ଜିନିଷ ନାହିଁ । ଯୋହନ ଆଗକୁ କହନ୍ତି, “ମୁଁ ସେହି ନଗରୀରେ କୌଣସି ମନ୍ଦିର ଦେଖିଲି ନାହିଁ, କାରଣ ପ୍ରଭୁ, ସର୍ବଶକ୍ତିମାନ ଈଶ୍ୱର ଓ ମେଷଶାବକ ସେଥିର ମନ୍ଦିର ସ୍ୱରୂପ ଅଟନ୍ତି । ଆଲୋକ ନିମନ୍ତେ ସେହି ନଗରୀର ସୂର୍ଯ୍ୟ କି ଚନ୍ଦ୍ରର ପ୍ରୟୋଜନ ନାହିଁ, କାରଣ ଈଶ୍ୱରଙ୍କ  ଗୌରବ ତାହାକୁ ଆଲୋକିତ କରେ ଓ ମେଷଶାବକ ସେଥିର ପ୍ରଦୀପ ସ୍ୱରୂପ ।” (ପ୍ରକା. ୨୧:୨୨, ୨୩) ସବୁ ଅଭିଷିକ୍ତ ଖ୍ରୀଷ୍ଟିୟାନମାନେ ସ୍ୱର୍ଗରେ ଯିହୋବାଙ୍କ ସହ ଥିବେ, ତେଣୁ ସେମାନଙ୍କୁ କୌଣସି ମନ୍ଦିରର ଆବଶ୍ୟକତା ହେବ ନାହିଁ । ତାʼଛଡ଼ା ଯୀଶୁ ସ୍ୱର୍ଗରେ ମହାଯାଜକ ହୋଇସାରିଛନ୍ତି ଓ ତାଙ୍କ ନେତୃତ୍ୱରେ ସବୁ ଅଭିଷିକ୍ତ ଖ୍ରୀଷ୍ଟିୟାନମାନେ ଯିହୋବାଙ୍କର ପବିତ୍ର ସେବା କରିବେ । (ଏବ୍ରୀ ୭:୨୭; ପ୍ରକା. ୨୨:୩, ୪) ଏହି କାରଣଗୁଡ଼ିକରୁ ଯିହୋବା ଓ ଯୀଶୁଙ୍କୁ ନୂତନ ଯିରୂଶାଲମର ମନ୍ଦିର କୁହାଯାଇଛି ।

୧୬. ଈଶ୍ୱରଙ୍କ ରାଜ୍ୟର ହଜାର ବର୍ଷର ଶାସନରେ ମଣିଷମାନଙ୍କୁ କʼଣ କʼଣ ଆଶିଷ ମିଳିବ ?

^୧୬ ଏହା ସତ ଯେ ନୂତନ ଯିରୂଶାଲମର ଭବିଷ୍ୟତବାଣୀ ବିଶେଷ କରି ଅଭିଷିକ୍ତ ଖ୍ରୀଷ୍ଟିୟାନମାନଙ୍କ ପାଇଁ ଅଟେ, କିନ୍ତୁ ଯେଉଁ ଲୋକମାନଙ୍କର ଆଶା ପୃଥିବୀରେ ବଞ୍ଚିବାର ଅଛି, ସେମାନେ ମଧ୍ୟ ଏହା ଉପରେ ଧ୍ୟାନ ଦେବା ଉଚିତ୍‌ । ଈଶ୍ୱରଙ୍କ ରାଜ୍ୟର ହଜାର ବର୍ଷର ଶାସନରେ ନୂତନ ଯିରୂଶାଲମ ଯୋଗୁଁ ପୃଥିବୀରେ ରହୁଥିବା ଲୋକମାନଙ୍କୁ ଅନେକ ଆଶିଷ ମିଳିବ । ଯୋହନ ଏହି ଆଶିଷଗୁଡ଼ିକୁ “ଜୀବନଦାୟକ ଜଳର ଗୋଟିଏ ନଦୀ” ଭାବେ କହିଲେ । ସେ ଏହା ମଧ୍ୟ ଲେଖିଲେ ଯେ ନଦୀର ଉଭୟ ପାର୍ଶ୍ୱରେ ‘ଜୀବନବୃକ୍ଷଗୁଡ଼ିକ’ ଅଛି, ଯାହାର ପତ୍ରଗୁଡ଼ିକରୁ ‘ଜାତିସମୂହ ଆରୋଗ୍ୟ’ ହୋଇଯିବେ । (ପ୍ରକା. ୨୨:୧, ୨) “ନଦୀ” ଓ ‘ବୃକ୍ଷଗୁଡ଼ିକର’ ଅର୍ଥ ହେଉଛି, ଈଶ୍ୱରଙ୍କ ଏପରି ବ୍ୟବସ୍ଥାଗୁଡ଼ିକ ଯାହା ଜରିଆରେ ମଣିଷମାନେ ହଜାର ବର୍ଷ ଭିତରେ ଧୀରେ ଧୀରେ ପରିପୂର୍ଣ୍ଣ ହୋଇଯିବେ । ସେତେବେଳେ କୌଣସି ରୋଗ କି ଦୁଃଖକଷ୍ଟ ରହିବ ନାହିଁ ।—ପ୍ରକା. ୨୧:୩-୫.

୧୭. ହଜାର ବର୍ଷ ଭିତରେ କେଉଁ ଲୋକମାନଙ୍କୁ ଆଶିଷ ମିଳିବ ? (ପ୍ରକାଶିତ ବାକ୍ୟ ୨୦:୧୧-୧୩)

^୧୭ ହଜାର ବର୍ଷ ଭିତରେ କେଉଁ କେଉଁ ଲୋକମାନଙ୍କୁ ଏହି ଆଶିଷଗୁଡ଼ିକ ମିଳିବ ? ସବୁଠୁ ପ୍ରଥମେ ମହା ଜନତାର ଲୋକମାନଙ୍କୁ ଏହି ଆଶିଷ ମିଳିବ, ଯେଉଁମାନେ ହର୍ମିଗିଦ୍ଦୋନ୍‌ରୁ ରକ୍ଷା ପାଇଥିବେ । ଆଉ ଯଦି ନୂଆ ଦୁନିଆରେ ସେମାନଙ୍କର ପିଲା ହେବେ, ତାହେଲେ ସେମାନଙ୍କୁ ମଧ୍ୟ ଏହି ଆଶିଷଗୁଡ଼ିକ ମିଳିବ । ତାʼଛଡ଼ା, ପ୍ରକାଶିତ ବାକ୍ୟ ୨୦ ଅଧ୍ୟାୟରେ କୁହାଯାଇଛି ଯେ ମରିଯାଇଥିବା ଲୋକମାନଙ୍କୁ ପୁଣି ଜୀବିତ କରାଯିବ । (ପ୍ରକାଶିତ ବାକ୍ୟ ୨୦:୧୧-୧୩ ପଢ଼ନ୍ତୁ ।) ଏଥିରେ “ଧାର୍ମିକ ଓ ଅଧାର୍ମିକ” ଉଭୟେ ଥିବେ । କିନ୍ତୁ କʼଣ ଏହାର ଅର୍ଥ ମରିଯାଇଥିବା ସବୁ ଲୋକମାନଙ୍କୁ ଜୀବିତ କରାଯିବ ? ନୁହଁ । “ଧାର୍ମିକ” ଲୋକମାନଙ୍କର ଅର୍ଥ ହେଉଛି, ସେହି ଲୋକମାନେ ଯେଉଁମାନେ ଯିହୋବାଙ୍କର ବିଶ୍ୱସ୍ତ ଥିଲେ, ଆଉ ଯେଉଁମାନଙ୍କର ମୃତ୍ୟୁ ହୋଇଯାଇଛି । ଆଉ “ଅଧାର୍ମିକ” ଲୋକମାନଙ୍କର ଅର୍ଥ ହେଉଛି, ସେହି ଲୋକମାନେ ଯେଉଁମାନଙ୍କୁ ଯିହୋବାଙ୍କ ବିଷୟରେ ଶିଖିବା ପାଇଁ ସୁଯୋଗ ମିଳିଲା ନାହିଁ । (ପ୍ରେରି. ୨୪:୧୫; ଯୋହ. ୫:୨୮, ୨୯) କିନ୍ତୁ ଦୁଷ୍ଟ ଲୋକମାନଙ୍କୁ ଜୀବିତ କରାଯିବ ନାହିଁ, ଯେଉଁମାନଙ୍କୁ ଯିହୋବାଙ୍କ ସେବା କରିବାର ସୁଯୋଗ ମିଳିଥିଲା, କିନ୍ତୁ ସେମାନେ ସେପରି କଲେ  ନାହିଁ ।—ମାଥି. ୨୫:୪୬; ୨ ଥେସ. ୧:୯; ପ୍ରକା. ୧୭:୮; ୨୦:୧୫.

୧୮. ହଜାର ବର୍ଷର ଶାସନ ଶେଷ ହେଉ ହେଉ କʼଣ ହୋଇସାରିଥିବ ?

^୧୮ ହଜାର ବର୍ଷର ଶାସନ ଶେଷ ହେଉ ହେଉ ପୃଥିବୀରେ ରହୁଥିବା ସବୁ ମଣିଷମାନେ ପରିପୂର୍ଣ୍ଣ ହୋଇଯିବେ । ଆଦମରୁ ମିଳିଥିବା ପାପ ଓ ତାହାର ପ୍ରଭାବ ପୂରାପୂରି ଶେଷ ହୋଇଯାଇଥିବ । (ରୋମୀ. ୫:୧୨) ଏପରି ଭାବେ ମଣିଷମାନେ, ଯେଉଁମାନେ ପୂର୍ବେ ପାପ ଯୋଗୁଁ ମରିଯାଇଥିବା ଭଳି ଥିଲେ, ସେମାନେ ‘ସହସ୍ର [ହଜାର] ବର୍ଷ ଶେଷ ହେବା ପର୍ଯ୍ୟନ୍ତ ଜୀବିତ’ ହୋଇଯିବେ ।—ପ୍ରକା. ୨୦:୫.

୧୯. ଶେଷ ପରୀକ୍ଷା କାହିଁକି ହେବ ?

^୧୯ ହଜାର ବର୍ଷ ପୂରା ହେବା ପରେ ଶୟତାନକୁ ପାତାଳକୁଣ୍ଡରୁ ବାହାର କରାଯିବ ଓ ସେ ପୃଥିବୀରେ ରହୁଥିବା ସବୁ ପରିପୂର୍ଣ୍ଣ ମଣିଷମାନଙ୍କୁ ପରୀକ୍ଷା କରିବ । (ପ୍ରକା. ୨୦:୭) ସେ ପରିପୂର୍ଣ୍ଣ ଯୀଶୁଙ୍କୁ ମଧ୍ୟ ପରୀକ୍ଷା କରିଥିଲା । କିନ୍ତୁ ଯୀଶୁ, ଯିହୋବାଙ୍କର ବିଶ୍ୱସ୍ତ ରହିଲେ । ଶେଷ ପରୀକ୍ଷା ସମୟରେ ପ୍ରତ୍ୟେକ ପରିପୂର୍ଣ୍ଣ ମଣିଷମାନଙ୍କ ପାଖରେ ଏହା ପ୍ରମାଣ କରିବାର ସୁଯୋଗ ରହିବ ଯେ ସେ ଯିହୋବାଙ୍କ ବିଶ୍ୱସ୍ତ ରହିବ ନା ନାହିଁ । ସେତେବେଳେ ଯିଏ ଯିହୋବାଙ୍କର ବିଶ୍ୱସ୍ତ ରହିବ, ତାକୁ ଅନନ୍ତ ଜୀବନ ଓ ପ୍ରକୃତ ସ୍ୱାଧୀନତା ମିଳିବ । (ରୋମୀ. ୮:୨୧) କିନ୍ତୁ ଯିଏ ବିଶ୍ୱସ୍ତ ରହିବ ନାହିଁ, ତାକୁ ଶୟତାନ ଓ ଦୁଷ୍ଟ ସ୍ୱର୍ଗଦୂତମାନଙ୍କ ସହ ସବୁ ଦିନ ପାଇଁ ବିନାଶ କରିଦିଆଯିବ ।—ପ୍ରକା. ୨୦:୮-୧୦.

୨୦. ପ୍ରକାଶିତ ବାକ୍ୟରେ ଦିଆଯାଇଥିବା ଭବିଷ୍ୟତବାଣୀଗୁଡ଼ିକ ବିଷୟରେ ଭାବି ଆପଣଙ୍କୁ କିପରି ଲାଗେ ?

^୨୦ ପ୍ରକାଶିତ ବାକ୍ୟ ବହି ଉପରେ ଚର୍ଚ୍ଚା କରି ଆପଣଙ୍କୁ କିପରି ଲାଗିଲା ? ଯେତେବେଳେ ଆପଣ ଭାବିଲେ ଯେ ଏଥିରେ ଦିଆଯାଇଥିବା ଭବିଷ୍ୟତବାଣୀଗୁଡ଼ିକ କିପରି ପୂରା ହେବ ଓ ଆପଣ ମଧ୍ୟ ସେଠାରେ ଥିବେ, କʼଣ ସେତେବେଳେ ଆପଣଙ୍କୁ ଖୁସି ହେଲାନି ? କʼଣ ଆପଣଙ୍କ ଭିତରେ ଉତ୍ସାହ ଭରିଗଲାନି ଯେ ଆପଣ ମଧ୍ୟ ଅନ୍ୟମାନଙ୍କୁ ଯିହୋବାଙ୍କ ଉପାସନା କରିବା ପାଇଁ ପ୍ରୋତ୍ସାହନ ଦେବେ ? (ପ୍ରକା. ୨୨:୧୭) ନିଶ୍ଚୟ ଆମେ ସମସ୍ତେ ଏପରି ହିଁ ଅନୁଭବ କରିଥିବା ଓ ପ୍ରେରିତ ଯୋହନଙ୍କ ଭଳି ଆମେ ମଧ୍ୟ କହିବାକୁ ଚାହୁଁ, “ଆମେନ୍‌, ହେ ପ୍ରଭୁ ଯୀଶୁ, ଆସନ୍ତୁ ।”—ପ୍ରକା. ୨୨:୨୦.