୧. ଯିହୋବା ଅବ୍ରହାମଙ୍କୁ କେଉଁ ଜରୁରୀ କଥା ଶିଖାଇଲେ, ଯେଉଁଥିରୁ ଆମକୁ ବି ସାନ୍ତ୍ୱନା ମିଳେ ?

 ଅନେକ ବର୍ଷ ପୂର୍ବେ ଯିହୋବା ନିଜ ବିଶ୍ୱସ୍ତ ସେବକ ଅବ୍ରହାମଙ୍କୁ କହିଲେ ଯେ ସେ ସଦୋମ ଓ ହମୋରାର ବିନାଶ କରିବାକୁ ଯାଉଛନ୍ତି, ଏହା ଶୁଣି ଅବ୍ରହାମ ବହୁତ ଚିନ୍ତିତ ହୋଇଗଲେ । ସେ ବୁଝିପାରୁ ନ ଥିଲେ ଯେ ଈଶ୍ୱର ଏପରି କାହିଁକି କରୁଛନ୍ତି, ତେଣୁ ସେ ଈଶ୍ୱରଙ୍କୁ ପଚାରିଲେ, “ଆପଣ କି ଦୁଷ୍ଟ ସହିତ ଧାର୍ମିକକୁ ସଂହାର କରିବେ ? . . . ସମସ୍ତ ପୃଥିବୀର ବିଚାରକର୍ତ୍ତା କି ନ୍ୟାୟ ବିଚାର କରିବେ ନାହିଁ ?” ସେସମୟରେ ଯିହୋବା ବହୁତ ପ୍ରେମ ଓ ଧୈର୍ଯ୍ୟର ସହ ଅବ୍ରହାମଙ୍କୁ ଗୋଟିଏ ଜରୁରୀ କଥା ଶିଖାଇଲେ, ଯେଉଁଥିରୁ ଆଜି ଆମକୁ ବି ବହୁତ ଲାଭ ହୁଏ ଏବଂ ସାନ୍ତ୍ୱନା ମିଳେ । ତାହା ହେଉଛି, ଯିହୋବା କେବେ ବି ଧାର୍ମିକ ଲୋକମାନଙ୍କୁ ବିନାଶ କରିବେ ନାହିଁ ।—ଆଦି. ୧୮:୨୩-୩୩.

୨. ଆମେ କାହିଁକି କହିପାରିବା ଯେ ଯିହୋବା ନ୍ୟାୟ କରିବା ସହ ଦୟା ମଧ୍ୟ କରନ୍ତି ?

^୨ ଆମେ କାହିଁକି ଭରସା ରଖିପାରିବା ଯେ ଯିହୋବା ଯେବେ ବି ନ୍ୟାୟ କରନ୍ତି, ତାହା ସବୁବେଳେ ସଠିକ୍‌ ହୋଇଥାଏ ଏବଂ ସେ ନ୍ୟାୟ କରିବା ସହ ଦୟା ମଧ୍ୟ କରନ୍ତି ? କାରଣ ଯିହୋବା ଲୋକମାନଙ୍କ “ଅନ୍ତଃକରଣ ଦେଖନ୍ତି ।” (୧ ଶାମୁ. ୧୬:୭) ସେ ଜାଣନ୍ତି ଯେ “ସମୁଦାୟ ମନୁଷ୍ୟ ସନ୍ତାନର ଅନ୍ତଃକରଣ” କିପରି ଅଟେ । (୧ ରାଜା. ୮:୩୯; ୧ ବଂଶା. ୨୮:୯) ଏହା କେତେ ଅଦ୍ଭୁତ କଥା ! ଯିହୋବା ଆମଠୁ ବହୁତ ବୁଦ୍ଧିମାନ ଅଟନ୍ତି, ତେଣୁ ଆମେ ତାଙ୍କ କିଛି ନିଷ୍ପତ୍ତିକୁ ପୂରାପୂରି ବୁଝିପାରିବାନି । ଆଉ ସେଥିପାଇଁ ପ୍ରେରିତ ପାଉଲ ଈଶ୍ୱରଙ୍କ ପ୍ରେରଣାରେ ଏହା ଲେଖିଲେ, “ତାହାଙ୍କର ବିଚାରସବୁ କିପରି ବୋଧର ଅଗମ୍ୟ ।”—ରୋମୀ. ୧୧:୩୩.

୩-୪. (କ) ଆମ ମନରେ ହୁଏତ କେଉଁ ପ୍ରଶ୍ନ ଉଠିବ ? (ଖ) ଏହି ଲେଖାରେ ଆମେ କʼଣ ଜାଣିବା ? (ଯୋହନ ୫:୨୮, ୨୯)

^୩ ଏହା ଜାଣିବା ପରେ ବି ହୁଏତ ଆମେ ବେଳେବେଳେ ଅବ୍ରହାମଙ୍କ ଭଳି ପ୍ରଶ୍ନ କରିପାରୁ । ଆମେ ହୁଏତ ଭାବିପାରୁ ଯେ ‘ଯେଉଁ ଲୋକମାନଙ୍କ ବିନାଶ ଯିହୋବା ନିଜେ କରିଥିଲେ, କʼଣ ସେମାନଙ୍କୁ ବି ଜୀବିତ କରାଯିବ, ଯେପରି ସଦୋମ ଓ ହମୋରାର ଲୋକମାନଙ୍କୁ ? ଯେବେ “ଅଧାର୍ମିକ” ଲୋକମାନଙ୍କ “ପୁନରୁତ୍‌ଥାନ ହେବ,” ତେବେ କʼଣ ସେଥିରେ ସେହି ଲୋକମାନେ ବି ଥିବେ ?’—ପ୍ରେରି. ୨୪:୧୫.

^୪ ଆସନ୍ତୁ ଦେଖିବା ଯେ ମୃତ ଲୋକମାନଙ୍କୁ ଜୀବିତ କରାଯିବା ବିଷୟରେ ଆମେ କʼଣ ଜାଣିଛୁ । କିଛି ସମୟ ପୂର୍ବେ ଯୋହନ ୫:୨୮, ୨୯ ଉପରେ ଆମ ଜ୍ଞାନରେ ପରିବର୍ତ୍ତନ କରାଯାଇଥିଲା । (ପଢ଼ନ୍ତୁ ।) ଆମକୁ ବୁଝାଇ ଦିଆଯାଇଥିଲା ଯେ କିଛି ଲୋକଙ୍କୁ “ଜୀବନର ପୁନରୁତ୍‌ଥାନ ନିମନ୍ତେ”  ଏବଂ କିଛି ଲୋକଙ୍କୁ “ଦଣ୍ଡର [‘ନ୍ୟାୟ,’ NWT] ପୁନରୁତ୍‌ଥାନ ନିମନ୍ତେ” ଜୀବିତ କରିବାର ଅର୍ଥ କʼଣ । a ଏହାକୁ ଧ୍ୟାନରେ ରଖି ଆମ ଜ୍ଞାନରେ ଆହୁରି କିଛି ବି ପରିବର୍ତ୍ତନ କରାଯାଇଛି, ଯାହା ବିଷୟରେ ଆମେ ଏହି ଲେଖାରେ ଏବଂ ପରବର୍ତ୍ତୀ ଲେଖାରେ ଜାଣିବା । ଆମେ ଦେଖିବା ଯେ ଯିହୋବାଙ୍କ ନ୍ୟାୟ ବିଷୟରେ ଆମେ କʼଣ ଜାଣିନୁ ଏବଂ ଆମେ କʼଣ ଜାଣିଛୁ ।

ଆମେ କʼଣ ଜାଣିନୁ ?

୫. ଆମ ପ୍ରକାଶନଗୁଡ଼ିକରେ ପୂର୍ବେ ସଦୋମ ଓ ହମୋରାର ଲୋକମାନଙ୍କ ବିଷୟରେ କʼଣ କୁହାଯାଇଥିଲା ?

^୫ ପୂର୍ବରୁ ଆମ ପ୍ରକାଶନଗୁଡ଼ିକରେ କୁହାଯାଇଥିଲା ଯେ ସେହି ଅଧାର୍ମିକ ଲୋକମାନଙ୍କ କʼଣ ହେବ ଯେଉଁମାନଙ୍କୁ ଯିହୋବା ବିନାଶ କରି ଦେଇଥିଲେ । ଆମେ କହିଥିଲୁ ଯେ ଏପରି ଅଧାର୍ମିକ ଲୋକମାନଙ୍କୁ ଭବିଷ୍ୟତରେ ଜୀବିତ କରାଯିବ ନାହିଁ, ଯେପରି ସଦୋମ ଓ ହମୋରାର ଲୋକମାନଙ୍କୁ । କିନ୍ତୁ ଅନେକ ପ୍ରାର୍ଥନା ଓ ଅଧ୍ୟୟନ କଲା ପରେ ଆମେ ଜାଣିଲୁ ଯେ ଆମେ ଏହା ନିଶ୍ଚିତ ଭାବେ କହିପାରିବାନି । କାହିଁକି ?

୬. (କ) କିଛି ଘଟଣା ବିଷୟରେ କହନ୍ତୁ ଯେବେ ଯିହୋବା ଅଧାର୍ମିକ ଲୋକମାନଙ୍କୁ ବିନାଶ କରିଥିଲେ । (ଖ) ଏହି ଘଟଣାଗୁଡ଼ିକ ବିଷୟରେ ଆମେ କʼଣ ଜାଣିନୁ ?

^୬ ବାଇବଲରେ ଏପରି ଅନେକ ଘଟଣା ଦିଆଯାଇଛି ଯେବେ ଯିହୋବା ଅଧାର୍ମିକ ଲୋକମାନଙ୍କୁ ବିନାଶ କରିଥିଲେ । ଯେପରି, ଯିହୋବା ନୋହ ଓ ତାଙ୍କ ପରିବାର ଛଡ଼ା ବାକି ସମସ୍ତ ଲୋକଙ୍କୁ ଜଳପ୍ଳାବନରେ ବିନାଶ କରି ଦେଇଥିଲେ । ସେ ଇସ୍ରାଏଲୀୟମାନଙ୍କ ଜରିଆରେ ପ୍ରତିଜ୍ଞାତ ଦେଶରେ ରହୁଥିବା ସାତଟି ଜାତିକୁ ମଧ୍ୟ ବିନାଶ କରିଦେଇଥିଲେ । ଆଉ ସେ ଜଣେ ସ୍ୱର୍ଗଦୂତଙ୍କ ଜରିଆରେ ଗୋଟିଏ ରାତି ୧,୮୫,୦୦୦ ଅଶୂରୀୟ ସୈନିକମାନଙ୍କୁ ମଧ୍ୟ ମାରି ଦେଇଥିଲେ । (ଆଦି. ୭:୨୩; ଦ୍ୱିବି. ୭:୧-୩; ଯିଶା. ୩୭:୩୬, ୩୭) କିନ୍ତୁ ଏବେ ପ୍ରଶ୍ନ ଉଠେ ଯେ କʼଣ ବାଇବଲରେ ଏହାର ପ୍ରମାଣ ଦିଆଯାଇଛି ଯେ ଯିହୋବା ଏହି ସମସ୍ତ ଲୋକଙ୍କୁ ସବୁଦିନ ପାଇଁ ବିନାଶ କରିଦେଇଛନ୍ତି ଏବଂ ସେ ଏମାନଙ୍କ ମଧ୍ୟରୁ କାହାରିକୁ ବି ଜୀବିତ କରିବେ ନାହିଁ ? ନା, ବାଇବଲରେ ଏବିଷୟରେ କୌଣସି ପ୍ରମାଣ ଦିଆଯାଇ ନାହିଁ । ଆସନ୍ତୁ ଏବିଷୟରେ ଆହୁରି ଜାଣିବା ।

୭. ଜଳପ୍ଳାବନ ସମୟରେ ବିନାଶ ହୋଇଥିବା ଲୋକମାନଙ୍କ ବିଷୟରେ ଏବଂ କିଣାନର ଅଧାର୍ମିକ ଲୋକମାନଙ୍କ ବିଷୟରେ ଆମେ କେଉଁ କଥା ଜାଣିନୁ ? (ବାହାରେ ଦିଆଯାଇଥିବା ଚିତ୍ର ଦେଖନ୍ତୁ ।)

^୭ ଆମେ ଜାଣିନୁ ଯେ ଯେଉଁ ଲୋକମାନଙ୍କ ବିନାଶ କରାଯାଇଥିଲା, ସେମାନଙ୍କ ମଧ୍ୟରୁ ପ୍ରତ୍ୟେକ ବ୍ୟକ୍ତି ବିଷୟରେ ଯିହୋବା କʼଣ ଭାବିଥିଲେ । ଆଉ ନା ଆମେ ଏହା ଜାଣିଛୁ ଯେ ସେମାନଙ୍କୁ ଯିହୋବାଙ୍କ ବିଷୟରେ ଜାଣିବା ଏବଂ ପଶ୍ଚାତାପ କରିବାର ସୁଯୋଗ ମିଳିଥିଲା ନା ନାହିଁ । ଯେପରି, ଜଳପ୍ଳାବନ ସମୟ ବିଷୟରେ ଏହା ତ କୁହାଯାଇଛି ଯେ ନୋହ “ଧର୍ମପ୍ରଚାରକ” ଥିଲେ, କିନ୍ତୁ ଏହା କୁହାଯାଇନି ଯେ ନୋହ ସେସମୟର ସମସ୍ତ ଲୋକଙ୍କୁ ପ୍ରଚାର କରିଥିଲେ । (୨ ପିତ. ୨:୫) ଠିକ୍‌ ସେହିପରି କିଣାନ ଦେଶର ସେହି ସାତଟି ଜାତି ବିଷୟରେ ମଧ୍ୟ ଆମେ ଜାଣିନୁ ଯେ ସେହି ସମସ୍ତ ଅଧାର୍ମିକ ଲୋକମାନଙ୍କୁ ଈଶ୍ୱରଙ୍କ ବିଷୟରେ ଜାଣିବା ଏବଂ ନିଜଠାରେ ପରିବର୍ତ୍ତନ କରିବାର ସୁଯୋଗ ମିଳିଥିଲା ନା ନାହିଁ ।

୮. ସଦୋମ ଓ ହମୋରାର ଲୋକମାନଙ୍କ ବିଷୟରେ ଆମେ କʼଣ ଜାଣିନୁ ?

^୮ ସଦୋମ ଓ ହମୋରାର ଲୋକମାନଙ୍କ ବିଷୟରେ କʼଣ କୁହାଯାଇପାରିବ ? ଲୋଟ ସେହି ଲୋକମାନଙ୍କ ମଧ୍ୟରେ ରହୁଥିଲେ ଆଉ ସେ ଜଣେ ଧାର୍ମିକ ବ୍ୟକ୍ତି ଥିଲେ । କିନ୍ତୁ କʼଣ ସେ ସେଠାରେ ରହୁଥିବା ସମସ୍ତ ଲୋକଙ୍କୁ ପ୍ରଚାର କରିଥିଲେ ? ଏବିଷୟରେ ଆମେ କିଛି ଜାଣିନୁ । ଏହା ତ ସତ ଯେ ସଦୋମରେ ରହୁଥିବା ସମସ୍ତ ଲୋକ ଦୁଷ୍ଟ ଥିଲେ, କିନ୍ତୁ କʼଣ ସେମାନଙ୍କ ମଧ୍ୟରୁ ପ୍ରତ୍ୟେକ ଜଣ ଜାଣିଥିଲେ ଯେ ସେମାନେ ଯାହା କରୁଛନ୍ତି ତାହା ଭୁଲ ଅଟେ ? ମନେପକାନ୍ତୁ, ସଦୋମର ପୁରୁଷମାନେ ଲୋଟଙ୍କ ଘରେ ଆସିଥିବା ଅତିଥିମାନଙ୍କ ସହ ଖରାପ କାମ କରିବା ପାଇଁ ଚାହୁଁଥିଲେ, ସେବିଷୟରେ ବାଇବଲରେ କʼଣ କୁହାଯାଇଛି । ଏହା ଲେଖାଅଛି ଯେ ପୁରୁଷମାନଙ୍କ ମଧ୍ୟରେ ‘ଯୁବାରୁ ବୃଦ୍ଧା’ ଯାଏ ଥିଲେ । ହୁଏତ ଏମାନଙ୍କ ମଧ୍ୟରୁ ଅନେକଙ୍କ ଲାଳନପାଳନ ଖରାପ ପରିବେଶରେ ହୋଇଥିଲା, ତେଣୁ ସେମାନଙ୍କୁ ଅନୁଭବ ହେଉ ନ ଥିଲା ଯେ ସେମାନେ ଯାହା କରୁଛନ୍ତି ତାହା ଭୁଲ ଅଟେ । (ଆଦି. ୧୯:୪; ୨ ପିତ. ୨:୭) ଏବେ ଭାବନ୍ତୁ, କʼଣ ଦୟା କରୁଥିବା ଈଶ୍ୱର ସେହି ସମସ୍ତ ଲୋକମାନଙ୍କୁ ସବୁଦିନ ପାଇଁ ବିନାଶ କରିଦେଇଛନ୍ତି ଏବଂ ସେମାନଙ୍କୁ କେବେ ବି ଜୀବିତ କରିବେ ନାହିଁ । ସଦୋମର ଲୋକମାନେ ସତରେ ବହୁତ ଖରାପ ଥିଲେ । ତେଣୁ ଯିହୋବା ଅବ୍ରହାମଙ୍କୁ ଭରସାର ସହ କହିପାରିଲେ ଯେ ସଦୋମରେ ଦଶ ଜଣ ଧାର୍ମିକ ଲୋକ ନାହାନ୍ତି । (ଆଦି. ୧୮:୩୨) ଆଉ ସେମାନଙ୍କ ଦୁଷ୍ଟତା ଯୋଗୁଁ ହିଁ ଯିହୋବା ସେମାନଙ୍କୁ ଦଣ୍ଡ ଦେଲେ । ତ କʼଣ ଆମେ ପୂରା ଭରସାର ସହ କହିପାରିବା ଯେ ଯେବେ ନୂଆ ଦୁନିଆରେ ‘ଅଧାର୍ମିକ ଲୋକମାନଙ୍କ ପୁନରୁତ୍‌ଥାନ ହେବ,’ ତେବେ ସେଠାରେ ସଦୋମର ଜଣେ ବି ବ୍ୟକ୍ତି ନ ଥିବେ ? ନା, ଆମେ ଏହା ନିଶ୍ଚିତ ଭାବରେ କହିପାରିବା ନାହିଁ ।

୯. ଆମେ ଶଲୋମନଙ୍କ ବିଷୟରେ କʼଣ ଜାଣିନୁ ?

^୯ ବାଇବଲରେ କିଛି ଏପରି ଲୋକମାନଙ୍କ ବିଷୟରେ ମଧ୍ୟ କୁହାଯାଇଛି ଯେଉଁମାନେ ପୂର୍ବେ ଭଲ କାମ କରୁଥିଲେ କିନ୍ତୁ ପରେ ଦୁଷ୍ଟ ହୋଇଗଲେ । ଟିକେ ରାଜା ଶଲୋମନଙ୍କ ବିଷୟରେ ଭାବନ୍ତୁ । ସେ ଯିହୋବାଙ୍କ  ଆଜ୍ଞାଗୁଡ଼ିକୁ ଭଲଭାବେ ଜାଣିଥିଲେ ଏବଂ ଯିହୋବା ତାଙ୍କୁ ଅନେକ ଆଶିଷଗୁଡ଼ିକ ଦେଇଥିଲେ । କିନ୍ତୁ ପରେ ସେ ମିଥ୍ୟା ଦେବାଦେବୀମାନଙ୍କୁ ପୂଜା କରିବାକୁ ଲାଗିଲେ । ଏହା ଯୋଗୁଁ ଯିହୋବା ବହୁତ ରାଗିଗଲେ ଏବଂ ସାରା ଇସ୍ରାଏଲ ରାଷ୍ଟ୍ରକୁ ଅନେକ ବର୍ଷ ଯାଏ ଏହାର ଖରାପ ପରିଣାମ ଭୋଗିବାକୁ ପଡ଼ିଲା । କିନ୍ତୁ ବାଇବଲରେ ଲେଖାଇଛି ଯେ ଶଲୋମନଙ୍କ ମୃତ୍ୟୁ ପରେ ସେ “ଆପଣା ପିତୃଲୋକଙ୍କର ସହିତ ଶୟନ” କଲେ । ତାଙ୍କ ପିତୃଲୋକମାନେ ଯିହୋବାଙ୍କ ବିଶ୍ୱସ୍ତ ଥିଲେ ଏବଂ ଦାଉଦ ମଧ୍ୟ ସେମାନଙ୍କ ମଧ୍ୟରୁ ଜଣେ ଥିଲେ । (୧ ରାଜା. ୧୧:୫-୯, ୪୩; ୨ ରାଜା. ୨୩:୧୩) ଏହା ଯୋଗୁଁ ଆମେ ଅନେକ ବର୍ଷ ଯାଏ ମାନୁଥିଲୁ ଯେ ଶଲୋମନଙ୍କୁ ଜୀବିତ କରାଯିବ । କିନ୍ତୁ କʼଣ ଶଲୋମନଙ୍କୁ ତାଙ୍କ ପିତୃଲୋକଙ୍କ ସହ ପୋତି ଦେବା ଏହାର ଗ୍ୟାରେଣ୍ଟି ଅଟେ ଯେ ଯିହୋବା ତାଙ୍କୁ ନିଶ୍ଚୟ ଜୀବିତ କରିବେ ? ବାଇବଲରେ ଏହା ବିଷୟରେ କିଛି କୁହାଯାଇ ନାହିଁ । କିନ୍ତୁ ହୁଏତ କିଛି ଲୋକ ଭାବନ୍ତି, “ଯେ ମରିଅଛି, ସେ ପାପରୁ ମୁକ୍ତ ହୋଇଅଛି ।” (ରୋମୀ. ୬:୭) ଏହା ତ ସତ, କିନ୍ତୁ ଏହାର ଅର୍ଥ ଏହା ନୁହେଁ ଯେ ଯେତେ ବି ଲୋକଙ୍କ ମୃତ୍ୟୁ ହୋଇଯାଇଛି, ସେମାନଙ୍କୁ ପୁଣିଥରେ ଜୀବନ ମିଳିବ ହିଁ ମିଳିବ । ପୁଣିଥରେ ଜୀବିତ କରାଯିବା ଯିହୋବାଙ୍କ ତରଫରୁ ଗୋଟିଏ ଉପହାର ଏବଂ ସେ ହିଁ ନିର୍ଦ୍ଧାରିତ କରନ୍ତି ଯେ ସେ ଏହି ଉପହାର କାହାକୁ ଦେବେ ଯାହାଦ୍ୱାରା ସେ ସବୁଦିନ ପାଇଁ ତାଙ୍କ ସେବା କରିପାରିବ । (ଆୟୁ. ୧୪:୧୩, ୧୪; ଯୋହ. ୬:୪୪) କʼଣ ଯିହୋବା ଶଲୋମନଙ୍କୁ ଏହି ଉପହାର ଦେବେ ? ଏହା ଯିହୋବା ହିଁ ଜାଣନ୍ତି । କିନ୍ତୁ ଆମେ ଏହା ନିଶ୍ଚୟ ଜାଣୁ ଯେ ଯିହୋବା ଯାହା ବି କରିବେ, ତାହା ନିଶ୍ଚିତ ଠିକ୍‌ ହେବ ।

ଆମେ କʼଣ ଜାଣିଛୁ ?

୧୦. ଯେବେ ଯିହୋବା ଲୋକମାନଙ୍କ ନ୍ୟାୟ କରନ୍ତି ତେବେ କିପରି ଅନୁଭବ କରନ୍ତି ? (ଯିହିଜିକଲ ୩୩:୧୧) (ଚିତ୍ର ମଧ୍ୟ ଦେଖନ୍ତୁ ।)

^୧୦ ଯିହିଜିକଲ ୩୩:୧୧ ପଢ଼ନ୍ତୁ । ଯିହୋବା ଆମକୁ କହିଛନ୍ତି ଯେ ଯେବେ ସେ ଲୋକମାନଙ୍କ ନ୍ୟାୟ କରନ୍ତି, ତେବେ ତାଙ୍କୁ କିପରି ଲାଗେ । ପ୍ରେରିତ ପିତର ଈଶ୍ୱରଙ୍କ ପ୍ରେରଣାରେ ଯିହିଜିକଲଙ୍କ ଶବ୍ଦଗୁଡ଼ିକୁ ଦୋହରାଇଲେ ଏବଂ କହିଲେ, “ଯେପରି କେହି ବିନଷ୍ଟ ନ ହୁଅନ୍ତି,” ଯିହୋବା “ଏହା ଇଚ୍ଛା” କରନ୍ତି । (୨ ପିତ. ୩:୯) ଏହା ଜାଣି କେତେ ସାନ୍ତ୍ୱନା ମିଳେ ଯେ ଯିହୋବା କାହାରିକୁ ବି ସବୁଦିନ ପାଇଁ ବିନାଶ କରିବାକୁ ଚାହାନ୍ତି ନାହିଁ । ଯିହୋବା ବହୁତ ଦୟାଳୁ ଅଟନ୍ତି ଏବଂ ଯେବେ ବି ସମ୍ଭବ ହୁଏ ସେ ଦୟା କରନ୍ତି ।

୧୧. କେଉଁ ଲୋକମାନଙ୍କୁ ଜୀବିତ କରାଯିବ ନାହିଁ ଏବଂ ଆମେ ଏପରି କାହିଁକି କହିପାରିବା ?

^୧୧ ଆମେ ଏହା ବି ଜାଣୁ ଯେ କେଉଁମାନଙ୍କୁ ଜୀବିତ କରାଯିବ ନାହିଁ । ବାଇବଲରେ କେବଳ କିଛି ଲୋକମାନଙ୍କ ବିଷୟରେ ଏପରି କୁହାଯାଇଛି ଯେ ସେମାନଙ୍କୁ ଜୀବିତ କରାଯିବ ନାହିଁ । b ଯୀଶୁଙ୍କ କଥାଗୁଡ଼ିକରୁ ଜଣାପଡ଼େ ଯେ ଇଷ୍କାରିୟୋତୀୟ ଯିହୂଦାକୁ ଜୀବିତ କରାଯିବ ନାହିଁ, କାରଣ ସେ ଜାଣିଶୁଣି ଯିହୋବା ଈଶ୍ୱର ଏବଂ ତାଙ୍କ ପୁତ୍ରଙ୍କ ବିରୁଦ୍ଧରେ ପାପ କରିଥିଲା । c (ମାର୍କ ୩:୨୯; ୧୪:୨୧; ଯୋହ. ୧୭:୧୨) ଯୀଶୁ କିଛି ଧର୍ମଗୁରୁଙ୍କ ବିଷୟରେ ବି ଏହା କହିଥିଲେ ଯେ ସେମାନଙ୍କୁ ଜୀବିତ କରାଯିବ ନାହିଁ, କାରଣ ସେମାନେ ତାଙ୍କ ବିରୋଧ କରିଥିଲେ । d (ମାଥି. ୨୩:୩୩; ଯୋହ. ୧୯:୧୧) ପ୍ରେରିତ ପାଉଲ ବି କହିଲେ ଯେ ସେହି ଧର୍ମତ୍ୟାଗୀମାନଙ୍କୁ ଜୀବିତ କରାଯିବ ନାହିଁ ଯେଉଁମାନେ ପଶ୍ଚାତାପ କଲେ ନାହିଁ ।—ଏବ୍ରୀ ୬:୪-୮; ୧୦:୨୯.

୧୨. ଆମେ ଯିହୋବାଙ୍କ ଦୟା ବିଷୟରେ କ‘ଣ ଜାଣିଛୁ ? କିଛି ଉଦାହରଣ ଦିଅନ୍ତୁ ।

^୧୨ ଏବେ ଆସନ୍ତୁ ଯିହୋବାଙ୍କ ଦୟା ବିଷୟରେ କଥା ହେବା । ଆମେ ଏହି ବିଷୟରେ କ‘ଣ ଜାଣିଛୁ ? ଆମେ ଦେଖିଲୁ ଯେ ‘ଯେପରି କେହି ବିନଷ୍ଟ ନ ହୁଅନ୍ତି, ଏହା ସେ ଇଚ୍ଛା କରନ୍ତି ।’ ଏହି କଥା ଯିହୋବା କିପରି ପ୍ରମାଣିତ କଲେ ? ଟିକେ ଧ୍ୟାନ ଦିଅନ୍ତୁ ଯେ ସେ ସେହି ଲୋକମାନଙ୍କ ସହ କିପରି ବ୍ୟବହାର କଲେ ଯେଉଁମାନେ ଗମ୍ଭୀର ପାପ କରିଥିଲେ । ରାଜା ଦାଉଦ ବ୍ୟଭିଚାର କରିଥିଲେ ଏବଂ ଜଣେ ବ୍ୟକ୍ତିର ହତ୍ୟା ମଧ୍ୟ କରାଇଥିଲେ । କିନ୍ତୁ ସେ ହୃଦୟରୁ ପଶ୍ଚାତାପ କଲେ ତେଣୁ ଯିହୋବା ତାଙ୍କ ଉପରେ ଦୟା କଲେ ଏବଂ କ୍ଷମା କରିଦେଲେ । (୨ ଶାମୁ. ୧୨:୧-୧୩) ରାଜା ମନଃଶି ସାରା ଜୀବନ ଅନେକ ଖରାପ କାମ କରିଥିଲେ । କିନ୍ତୁ ସେ ଯେବେ ପଶ୍ଚାତାପ କଲେ ତେବେ ଯିହୋବା ତାଙ୍କ ହୃଦୟ ଦେଖି ତାଙ୍କ ଉପରେ ଦୟା କଲେ ଏବଂ କ୍ଷମା କରିଦେଲେ । (୨ ବଂଶା. ୩୩:୯-୧୬) ଏହି ଉଦାହରଣଗୁଡ଼ିକରୁ ଜଣାପଡ଼େ ଯେ ଯେବେ ବି ଯିହୋବାଙ୍କୁ ଦୟା କରିବାର କାରଣ ମିଳେ ସେ ନିଶ୍ଚୟ ଦୟା କରନ୍ତି । ତେଣୁ ଆମେ ଭରସା ରଖିପାରିବା ଯେ ଯିହୋବା ସେହି ଲୋକମାନଙ୍କୁ ନିଶ୍ଚୟ ଜୀବିତ କରିବେ, ଯେଉଁମାନେ ନିଜ ପାପ ସ୍ୱୀକାର କରିଥିଲେ ଏବଂ ପଶ୍ଚାତାପ କରିଥିଲେ ।

୧୩. (କ) ଯିହୋବା ନୀନିବୀର ଲୋକମାନଙ୍କ ଉପରେ ଦୟା କାହିଁକି କଲେ ? (ଖ) ଆଗକୁ ଯାଇ ଯୀଶୁ ନୀନିବୀର ଲୋକମାନଙ୍କ ବିଷୟରେ କʼଣ କହିଲେ ?

^୧୩ ଆମେ ଆଉ ଗୋଟିଏ କଥା ଜାଣିଛୁ । ଆମେ ଜାଣିଛୁ ଯେ ଯିହୋବା ନୀନିବୀର ଲୋକମାନଙ୍କ ଉପରେ ଦୟା କରିଥିଲେ । ସେ ଯୂନସଙ୍କୁ ନୀନିବୀ ସହର ବିଷୟରେ କହିଥିଲେ, ‘ଉଠ ଓ ତହିଁ  ବିରୁଦ୍ଧରେ ଘୋଷଣା କର; କାରଣ ସେମାନଙ୍କର ଦୁଷ୍ଟତା ଆମ୍ଭ ସମ୍ମୁଖରେ ଉପସ୍ଥିତ ହୋଇଅଛି ।’ କିନ୍ତୁ ତାʼପରେ ନୀନିବୀର ଲୋକମାନେ ନିଜ ଖରାପ କାମଗୁଡ଼ିକ ଛାଡ଼ିଦେଲେ ଏବଂ ପଶ୍ଚାତାପ କଲେ । ଏହା ଦେଖି ଯିହୋବା ସେମାନଙ୍କୁ କ୍ଷମା କରିଦେଲେ । ଯିହୋବା ଯୂନସଙ୍କଠାରୁ କେତେ ଅଲଗା ଥିଲେ ! ଯୂନସ ବହୁତ ରାଗି ଯାଇଥିଲେ ଏବଂ ତାଙ୍କୁ ନୀନିବୀର ଲୋକମାନଙ୍କ ଉପରେ ଟିକେ ବି ଦୟା ଲାଗୁ ନ ଥିଲା । ତେବେ ଯିହୋବା ଯୂନସଙ୍କୁ ମନେପକାଇ ଦେଲେ ଯେ ନୀନିବୀର ଲୋକମାନେ ଠିକ୍‌ ଓ ଭୁଲ ମଧ୍ୟରେ ‘ପ୍ରଭେଦ ଜାଣନ୍ତି’ ନାହିଁ । (ଯୂନ. ୧:୧, ୨; ୩:୧୦; ୪:୯-୧୧) ଆଗକୁ ଯାଇ ଯୀଶୁ ଏହି ଘଟଣାରୁ ଲୋକମାନଙ୍କୁ ଶିଖାଇଲେ ଯେ ଯିହୋବା ଜଣେ ଦୟାଳୁ ଈଶ୍ୱର ଅଟନ୍ତି ଏବଂ ତାଙ୍କ ନ୍ୟାୟ ସବୁବେଳେ ସଠିକ୍‌ ହୋଇଥାଏ । ନୀନିବୀର ଲୋକମାନେ ପଶ୍ଚାତାପ କରିଥିଲେ, ତେଣୁ ଯୀଶୁ କହିଲେ ଯେ ସେମାନେ “ବିଚାର” ସମୟରେ ଉଠିବେ ଅର୍ଥାତ୍‌ ସେମାନଙ୍କୁ ଜୀବିତ କରାଯିବ ।—ମାଥି. ୧୨:୪୧.

୧୪. ଜୀବିତ କଲାପରେ ଯେବେ ‘ଅଧାର୍ମିକ ଲୋକମାନଙ୍କ ନ୍ୟାୟ କରାଯିବ’ ତେବେ ନୀନିବୀର ଲୋକମାନଙ୍କ କ’ଣ ହେବ ?

^୧୪ ନୀନିବୀର ଲୋକମାନେ “ବିଚାର” ସମୟରେ ‘ଉଠିବେ’ ଅର୍ଥାତ୍‌ ଜୀବିତ କରାଯିବେ । ଏଠାରେ କେଉଁ ବିଚାର ବିଷୟରେ କୁହାଯାଉଛି ? ଯୀଶୁ କହିଥିଲେ ଯେ ଭବିଷ୍ୟତରେ ମରିଯାଇଥିବା ଲୋକମାନେ ‘ନ୍ୟାୟର ପୁନରୁତ୍‌ଥାନ ନିମନ୍ତେ ବାହାର ହୋଇ ଆସିବେ ।’ (ଯୋହ. ୫:୨୯) ଯୀଶୁ ସେସମୟ ବିଷୟରେ କହୁଥିଲେ ଯେବେ ସେ ହଜାର ବର୍ଷ ଶାସନ ସମୟରେ “ଧାର୍ମିକ ଓ ଅଧାର୍ମିକ” ଉଭୟ ପ୍ରକାରର ଲୋକମାନଙ୍କୁ ଜୀବିତ କରିବେ । (ପ୍ରେରି. ୨୪:୧୫) ଅଧାର୍ମିକ ଲୋକମାନଙ୍କ ‘ନ୍ୟାୟ ନିମନ୍ତେ ପୁନରୁତ୍‌ଥାନ’ ହେବ । ଏହାର ଅର୍ଥ ନୂଆ ଦୁନିଆରେ ସେମାନଙ୍କୁ ଜୀବିତ କଲା ପରେ ଈଶ୍ୱରଙ୍କ ବିଷୟରେ ଶିଖାଯିବ ଏବଂ ତା‘ପରେ ସେମାନଙ୍କ ନ୍ୟାୟ କରାଯିବ । ଯିହୋବା ଓ ଯୀଶୁ ଏହା ଦେଖିବେ ଯେ ସେହି ଲୋକମାନଙ୍କର ବ୍ୟବହାର କିପରି ଅଛି ଏବଂ ସେମାନେ ନିଜକୁ ପରିବର୍ତ୍ତନ କରୁଛନ୍ତି ନା ନାହିଁ । ଆଉ ତା’ପରେ ତାʼ ଅନୁସାରେ ସେମାନଙ୍କ ନ୍ୟାୟ କରିବେ । ଯଦି ନୀନିବୀର କୌଣସି ବ୍ୟକ୍ତି ଯିହୋବାଙ୍କ ଉପାସନା ସ୍ୱୀକାର କରେ ନାହିଁ ତେବେ ତାକୁ ଦୋଷୀ ମନେ କରାଯିବ ଏବଂ ତାକୁ ବିନାଶ କରିଦିଆଯିବ । (ଯିଶା. ୬୫:୨୦) କିନ୍ତୁ ଯେଉଁ ଲୋକମାନେ ଯିହୋବାଙ୍କୁ ଉପାସନା କରିବାର ନିଷ୍ପତ୍ତି ନେବେ, ସେମାନେ ଜୀବନ ପାଇବେ ଏବଂ ସବୁଦିନ ପାଇଁ ବଞ୍ଚିବେ ।—ଦାନି. ୧୨:୨.

୧୫. (କ) ଏହା କହିବା କାହିଁକି ଠିକ୍‌ ହେବନି ଯେ ସଦୋମ ଓ ହମୋରାରେ ଯେଉଁ ଲୋକମାନଙ୍କ ବିନାଶ ହୋଇଯାଇଥିଲା, ସେମାନଙ୍କ ମଧ୍ୟରୁ କାହାରିକୁ ବି ଜୀବିତ କରାଯିବ ନାହିଁ ? (ଖ) ଯିହୂଦା ୭ରେ ଲେଖାଥିବା କଥାର ଅର୍ଥ କʼଣ ? (“ ଯିହୂଦାଙ୍କ କହିବାର ଅର୍ଥ କʼଣ ଥିଲା ?” ନାମକ ବକ୍ସ ଦେଖନ୍ତୁ ।)

^୧୫ ଯୀଶୁ କହିଥିଲେ ଯେ “ବିଚାର—ଦିନରେ” ସଦୋମ ଓ ହମୋରାର ଲୋକମାନଙ୍କ ପରିସ୍ଥିତି ସେହି ଲୋକମାନଙ୍କଠୁ ଅଧିକ ଭଲ ହେବ, ଯେଉଁମାନେ ତାଙ୍କୁ ଓ ତାଙ୍କ ଶିକ୍ଷାଗୁଡ଼ିକୁ ମାନିବାରୁ ମନା କରିଦେଇଥିଲେ । (ମାଥି. ୧୦:୧୪, ୧୫; ୧୧:୨୩, ୨୪; ଲୂକ ୧୦:୧୨) କ’ଣ ଯୀଶୁ ସଦୋମ ଓ ହମୋରାର ଲୋକମାନଙ୍କ ବିଷୟରେ କହି ଏହା ଜଣାଇବା ପାଇଁ ଚାହୁଁଥିଲେ ଯେ ସେମାନେ କେତେ ଖରାପ ଥିଲେ ? ହୁଏତ ଆମକୁ ଏପରି ହିଁ ଲାଗିପାରେ । କିନ୍ତୁ ଯୀଶୁଙ୍କ ଶବ୍ଦରୁ ଏପରି ଜଣାପଡ଼େ ଯେ ସଦୋମ ଓ ହମୋରାର ଲୋକମାନଙ୍କ ପାଇଁ ସତରେ ଆଶା ଅଛି । ସେମାନଙ୍କ ବିଷୟରେ କଥା ହେବା ସମୟରେ ଯୀଶୁ “ବିଚାର—ଦିନ” ବିଷୟରେ କଥା ହେଲେ । ଆଉ  ମନେପକାନ୍ତୁ ଯୀଶୁ ନୀନିବୀର ଲୋକମାନଙ୍କ ବିଷୟରେ କଥା ହେବା ସମୟରେ ମଧ୍ୟ ନ୍ୟାୟର ଦିନ ବିଷୟରେ କହିଥିଲେ ଏବଂ କହିଥିଲେ ଯେ ସେମାନେ ସତରେ ଜୀବିତ ହେବେ । ତେଣୁ ଆମେ କହିପାରିବା ଯେ ସଦୋମ ଓ ହମୋରାର କିଛି ଲୋକଙ୍କୁ ମଧ୍ୟ ଜୀବିତ କରାଯାଇପାରିବ । ଆଉ ଗୋଟିଏ କଥା ଉପରେ ଧ୍ୟାନ ଦିଅନ୍ତୁ ଯେ ନୀନିବୀର ଲୋକମାନଙ୍କ ଭଳି ସଦୋମ ଓ ହମୋରାର ଲୋକମାନେ ବି ଖରାପ କାମଗୁଡ଼ିକ କରିଥିଲେ । ନୀନିବୀର ଲୋକମାନଙ୍କୁ ତ ପଶ୍ଚାତାପ କରିବାର ସୁଯୋଗ ମିଳିଥିଲା କିନ୍ତୁ ସଦୋମ ଓ ହମୋରାର ଲୋକମାନଙ୍କୁ ନୁହେଁ । ଆଉ ଯୀଶୁ କହିଥିଲେ ଯେ “ଯେଉଁମାନେ ଅସତ୍‌ କର୍ମ କରିଅଛନ୍ତି, ସେମାନେ ଦଣ୍ଡର ପୁନରୁତ୍‌ଥାନ ନିମନ୍ତେ ବାହାର ହୋଇ ଆସିବେ ।” (ଯୋହ. ୫:୨୯) ଏହା ଯୋଗୁଁ ଆମେ କହିପାରିବା ଯେ ସଦୋମ ଓ ହମୋରାର କିଛି ଲୋକଙ୍କୁ ଜୀବିତ କରାଯାଇପାରେ ଏବଂ ହୁଏତ ଆମକୁ ସେମାନଙ୍କୁ ଯିହୋବା ଓ ଯୀଶୁଙ୍କ ବିଷୟରେ ଶିଖାଇବାର ସୁଯୋଗ ମିଳିବ ।

୧୬. ଯିହୋବା କିପରି ନିର୍ଦ୍ଧାରିତ କରିବେ ଯେ ସେ କାହାକୁ ଜୀବିତ କରିବେ ଏବଂ କାହାକୁ ନୁହେଁ ? (ଯିରିମୀୟ ୧୭:୧୦)

^୧୬ ଯିରିମୀୟ ୧୭:୧୦ ପଢ଼ନ୍ତୁ । ଏହି ପଦରେ ଆଉ ଗୋଟିଏ କଥା କୁହାଯାଇଛି ଯାହା ଆମେ ଜାଣିଛୁ । ତାହା ହେଉଛି ଯେ ଯିହୋବା ‘ପ୍ରତ୍ୟେକ ମନୁଷ୍ୟର ଅନ୍ତଃକରଣ ଅନୁସନ୍ଧାନ କରନ୍ତି ଏବଂ ମର୍ମ ପରୀକ୍ଷା କରନ୍ତି’ ଅର୍ଥାତ୍‌ ହୃଦୟରେ ଥିବା ବିଚାରଗୁଡ଼ିକୁ ପରୀକ୍ଷା କରନ୍ତି । ତେଣୁ ଭବିଷ୍ୟତରେ ଯେବେ ଈଶ୍ୱର ନିର୍ଦ୍ଧାରିତ କରିବେ ଯେ କାହାକୁ ଜୀବିତ କରିବାର ଅଛି, ତେବେ ସେ “ପ୍ରତ୍ୟେକ ମନୁଷ୍ୟକୁ ତାହାର ଆଚରଣ ଅନୁସାରେ ତାହାର କର୍ମର ଫଳ” ଦେବେ । ଯେବେ ଜରୁରୀ ତେବେ ସେ ନିଜ ନିଷ୍ପତ୍ତିରେ ଅଟଳ ରହିବେ । କିନ୍ତୁ ଯେବେ ବି ସମ୍ଭବ ସେ ଦୟା କରିବେ । ତେଣୁ ଆମେ କୌଣସି ବ୍ୟକ୍ତି ବିଷୟରେ ଏହା କହିବା ଉଚିତ୍‌ ନୁହେଁ ଯେ ତାଙ୍କୁ ଜୀବିତ କରାଯିବ ନାହିଁ । ବାଇବଲରେ ଯେଉଁମାନଙ୍କ ବିଷୟରେ ଏହା ସ୍ପଷ୍ଟ ଭାବେ କୁହାଯାଇଛି ଆମେ କେବଳ ସେମାନଙ୍କ ବିଷୟରେ ହିଁ ଏପରି କହିପାରିବା ।

“ସମସ୍ତ ପୃଥିବୀର ବିଚାରକର୍ତ୍ତା” କେବେ ଅନ୍ୟାୟ କରିବେ ନାହିଁ

୧୭. ଯେଉଁ ଲୋକମାନଙ୍କ ମୃତ୍ୟୁ ହୋଇଯାଇଛି ସେମାନଙ୍କର କʼଣ ହେବ ?

^୧୭ ଯେବେ ଆଦମ ହବା, ଶୟତାନର ସହଯୋଗ କଲେ ଏବଂ ଯିହୋବାଙ୍କ ବିରୁଦ୍ଧରେ ଗଲେ ତେବେଠୁ ଆଜି ଯାଏ କୋଟି କୋଟି ଲୋକଙ୍କ ମୃତ୍ୟୁ ହୋଇଛି । ମୃତ୍ୟୁ ଆମ “ଶତ୍ରୁ” ଏବଂ ଏହା ଅସଂଖ୍ୟ ଲୋକମାନଙ୍କୁ ନିଜ ଶିକାର କରିଛି । (୧ କରି. ୧୫:୨୬) କିନ୍ତୁ ଯେଉଁ ଲୋକମାନଙ୍କ ମୃତ୍ୟୁ ହୋଇଯାଇଛି ସେମାନଙ୍କ କʼଣ ହେବ ? ୧,୪୪,୦୦୦ ମଧ୍ୟରୁ ଯେଉଁ ଲୋକମାନଙ୍କ ମୃତ୍ୟୁ ହୋଇଯାଇଛି, ସେମାନଙ୍କୁ ସ୍ୱର୍ଗରେ ଜୀବନ ମିଳିଯାଇଛି । ଆଉ ସେମାନଙ୍କ ମଧ୍ୟରୁ ଯେଉଁମାନେ ପୃଥିବୀରେ ରହି ଯାଇଛନ୍ତି ସେମାନଙ୍କୁ ବି ସ୍ୱର୍ଗରେ ଅମର ଜୀବନ ମିଳିବ । (ପ୍ରକା. ୧୪:୧) ଏହାଛଡ଼ା ପୃଥିବୀରେ ବଡ଼ ମାତ୍ରାରେ “ଧାର୍ମିକ” ଲୋକମାନଙ୍କୁ ଜୀବିତ କରାଯିବ । ଏମାନେ ସେହି ଲୋକମାନେ ଅଟନ୍ତି ଯେଉଁମାନେ ଯିହୋବାଙ୍କୁ ପ୍ରେମ କରୁଥିଲେ । ଆଉ ଯଦି ସେମାନେ ଖ୍ରୀଷ୍ଟଙ୍କ ହଜାର ବର୍ଷ ଶାସନ ସମୟରେ ଏବଂ ଶେଷ ପରୀକ୍ଷାରେ ମଧ୍ୟ ବିଶ୍ୱସ୍ତ ରହିବେ, ତେବେ ସେମାନେ ପୃଥିବୀରେ ସବୁଦିନ ପାଇଁ ବଞ୍ଚିବେ । (ଦାନି. ୧୨:୧୩; ଏବ୍ରୀ ୧୨:୧) ହଜାର ବର୍ଷ ସମୟରେ “ଅଧାର୍ମିକ” ଲୋକମାନଙ୍କୁ ବି ଜୀବିତ କରାଯିବ ।  ସେମାନଙ୍କ ମଧ୍ୟରେ ସେହି ଲୋକମାନେ ଥିବେ, ଯେଉଁମାନେ କେବେ ବି ଯିହୋବାଙ୍କ ସେବା କରିନାହାନ୍ତି କିମ୍ବା “ଯେଉଁମାନେ ଅସତ୍‌ କର୍ମ କରିଅଛନ୍ତି ।” ସେମାନଙ୍କୁ ସୁଯୋଗ ମିଳିବ ଯେ ସେମାନେ ନିଜକୁ ବଦଳାନ୍ତୁ ଏବଂ ଯିହୋବାଙ୍କ ସେବା କରନ୍ତୁ । (ଲୂକ ୨୩:୪୨, ୪୩) କିନ୍ତୁ କିଛି ଲୋକ ବହୁତ ଦୁଷ୍ଟ ଥିଲେ । ସେମାନେ ଜାଣିଶୁଣି ଯିହୋବା ଓ ତାଙ୍କ ଉଦ୍ଦେଶ୍ୟ ବିରୁଦ୍ଧରେ ଗଲେ । ତେଣୁ ଯିହୋବା ନିଷ୍ପତ୍ତି ନେଇଛନ୍ତି ଯେ ସେ ସେମାନଙ୍କୁ ଜୀବିତ କରିବେ ନାହିଁ ।—ଲୂକ ୧୨:୪, ୫.

୧୮-୧୯. (କ) ଆମେ କାହିଁକି ଭରସା ରଖିପାରିବା ଯେ ଯିହୋବା ସବୁବେଳେ ସଠିକ୍‌ ନ୍ୟାୟ କରନ୍ତି ? (ଯିଶାଇୟ ୫୫:୮, ୯) (ଖ) ପରବର୍ତ୍ତୀ ଲେଖାରେ ଆମେ କʼଣ ଜାଣିବା ?

^୧୮ ଆମେ ଭରସା ରଖିପାରିବା ଯେ ଯିହୋବା ଯେବେ ବି ଲୋକମାନଙ୍କ ନ୍ୟାୟ କରନ୍ତି ତାହା ସବୁବେଳେ ସଠିକ୍‌ ହୋଇଥାଏ । ଅବ୍ରହାମ ମଧ୍ୟ ଏକଥା ଭଲଭାବେ ଜାଣିଥିଲେ । ତାଙ୍କୁ ଜଣାଥିଲା ଯେ “ସମସ୍ତ ପୃଥିବୀର ବିଚାରକର୍ତ୍ତା” ଯିହୋବା ଈଶ୍ୱର ବହୁତ ଦୟାଳୁ, ସେ ସବୁକିଛି ଜାଣନ୍ତି ଏବଂ ସବୁବେଳେ ତାହା କରନ୍ତି ଯାହା ସଠିକ୍‌ ହୋଇଥାଏ । ଯିହୋବା ନିଜ ପୁଅଙ୍କୁ ମଧ୍ୟ ନ୍ୟାୟ କରିବା ଶିଖାଇଛନ୍ତି ଏବଂ ତାଙ୍କୁ ନ୍ୟାୟ କରିବାର ସବୁ ଦାୟିତ୍ୱ ଦେଇଛନ୍ତି । (ଯୋହ. ୫:୨୨) ସେମାନେ ଦୁହେଁ ମନୁଷ୍ୟର ହୃଦୟ ଦେଖିପାରନ୍ତି ଏବଂ ଜାଣିପାରନ୍ତି ଯେ ସେମାନେ ଭିତରୁ କିପରି । (ମାଥି. ୯:୪) ତେଣୁ ସେମାନେ ‘ନ୍ୟାୟ ବିଚାର କରିବା ସମୟରେ’ କେବେ ବି ଅନ୍ୟାୟ କରିବେ ନାହିଁ, ସବୁବେଳେ ତାହା ହିଁ କରିବେ ଯାହା ସଠିକ୍‌ ଥିବ ।

^୧୯ ଆସନ୍ତୁ ଆମେ ଭରସା ରଖିବା ଯେ ଯିହୋବା ସବୁକିଛି ଜାଣନ୍ତି ଏବଂ ଏହା ମନେରଖିବା ଯେ ଆମେ କେବେ ବି ଅନ୍ୟମାନଙ୍କ ନ୍ୟାୟ କରିପାରିବା ନାହିଁ, କେବଳ ଯିହୋବା ହିଁ ଲୋକମାନଙ୍କ ନ୍ୟାୟ କରିପାରିବେ । (ଯିଶାଇୟ ୫୫:୮, ୯ ପଢ଼ନ୍ତୁ ।) ଆମେ ଭରସା ରଖିପାରିବା ଯେ ଯିହୋବା ଓ ଯୀଶୁ ସଠିକ୍‌ ନ୍ୟାୟ କରିବେ । ଆମ ରାଜା ଯୀଶୁ ପୂରାପୂରି ନିଜ ପିତାଙ୍କ ଭଳି ଅଟନ୍ତି । ସେ ସଠିକ୍‌ ନ୍ୟାୟ କରିବେ ଏବଂ ଦୟା ମଧ୍ୟ କରିବେ । (ଯିଶା. ୧୧:୩, ୪) କିନ୍ତୁ ଯିହୋବା ଓ ଯୀଶୁ ମହାକ୍ଳେଶ ସମୟରେ କିପରି ଲୋକମାନଙ୍କ ନ୍ୟାୟ କରିବେ ? ଏବିଷୟରେ ଆମେ କʼଣ ଜାଣିଛୁ ? ଏବଂ କʼଣ ଜାଣିନୁ ? ପରବର୍ତ୍ତୀ ଲେଖାରେ ଏହି ପ୍ରଶ୍ନଗୁଡ଼ିକର ଉତ୍ତର ମିଳିବ ।