ଯେତେବେଳେ ଆମେ ଅଧ୍ୟୟନ କରୁ ସେତେବେଳେ ଆମକୁ ଭାବିବା ଉଚିତ୍‌ ଯେ ‘ମୁଁ ଯାହା ପଢ଼ିବି ସେଥିରୁ ମୁଁ କʼଣ ଶିଖିବି ?’ ଏପରି କରିବା ଭଲ, କିନ୍ତୁ ଆମକୁ କେବେବି ଏପରି ଭାବିବା ଉଚିତ୍‌ ନୁହେଁ ଯେ ଏହି ବିଷୟରେ ତ ଏହିସବୁ କଥା ହିଁ କୁହାଯିବ । ଯଦି ଆମେ ଏପରି କରିବା, ତେବେ ଯିହୋବା ଆମକୁ କʼଣ ଶିଖାଇବା ପାଇଁ ଚାହୁଁଛନ୍ତି ତାହା ଜାଣିପାରିବା ନାହିଁ । ତାହେଲେ ଆମକୁ ଶିଖିବା ଉଦ୍ଦେଶ୍ୟରେ କିପରି ଅଧ୍ୟୟନ କରିବା ଉଚିତ୍‌ ? ଏହା ପାଇଁ ଆମକୁ କʼଣ କରିବାକୁ ପଡ଼ିବ ?

ଯିହୋବାଙ୍କୁ ବୁଦ୍ଧି ମାଗନ୍ତୁ । ପ୍ରାର୍ଥନା କଲେ ଆପଣ ବୁଝିପାରିବେ ଯେ ଯିହୋବା ଆପଣଙ୍କୁ କʼଣ ଶିଖାଇବା ପାଇଁ ଚାହୁଁଛନ୍ତି । (ଯାକୁ. ୧:୫) କୌଣସି ବିଷୟରେ ଆପଣ ପୂର୍ବରୁ ଯେତିକି ଜାଣିଛନ୍ତି ସେତିକିରେ ସନ୍ତୁଷ୍ଟ ରହନ୍ତୁ ନାହିଁ ।—ହିତୋ. ୩:୫, ୬.

ବାଇବଲର ବାକ୍ୟଗୁଡ଼ିକୁ ନିଜ ଜୀବନରେ ପ୍ରଭାବ ପକାଇବା ପାଇଁ ଦିଅନ୍ତୁ । “ଈଶ୍ୱରଙ୍କ ବାକ୍ୟ ଜୀବନ୍ତ ।” (ଏବ୍ରୀ ୪:୧୨) ପ୍ରତିଥର ଯେବେ ଆମେ ବାଇବଲ ପଢ଼ୁ, ତେବେ ଆମେ କିଛି ନୂଆ କଥା ଶିଖିପାରିବା ଆଉ ଆମ ଜୀବନରେ ଏହାର ଗଭୀର ପ୍ରଭାବ ପଡ଼ିପାରେ । କିନ୍ତୁ ଏହା ତେବେ ହେବ ଯେବେ ଆମେ ଶିଖିବା ଉଦ୍ଦେଶ୍ୟରେ ଅଧ୍ୟୟନ କରିବା ।

ଯିହୋବାଙ୍କ ମେଜରେ ଥିବା ପ୍ରତ୍ୟେକ ଜିନିଷର ଆନନ୍ଦ ନିଅନ୍ତୁ । ଯିହୋବା ଆମକୁ ଯେଉଁ ଭିନ୍ନ ଭିନ୍ନ କଥାଗୁଡ଼ିକ ଶିଖାଉଛନ୍ତି, ତାହା ଗୋଟିଏ ବଢ଼ିଆ “ଭୋଜ” ଭଳି ଅଟେ । (ଯିଶା. ୨୫:୬) ତେଣୁ ଆପଣଙ୍କୁ ଯାହା ପସନ୍ଦ କେବଳ ତାହା ନୁହେଁ, ବରଂ ସବୁ ଜିନିଷର ଆନନ୍ଦ ନିଅନ୍ତୁ । ତେବେ ଯାଇ ଆପଣଙ୍କୁ ଅଧ୍ୟୟନ କରିବା ପାଇଁ ଭଲ ଲାଗିବ ଓ ଆପଣ ଯିହୋବାଙ୍କୁ ଖୁସି କରୁଥିବା ବ୍ୟକ୍ତି ହୋଇପାରିବେ ।