ଆତ୍ମସମ୍ମାନ ହେବା କାହିଁକି ଜରୁରୀ ?

• ଗୋଟିଏ ଅନୁସନ୍ଧାନରୁ ଜଣାପଡ଼େ ଯେ ଯେଉଁ ଲୋକମାନେ ନିଜକୁ ବେକାର ଭାବନ୍ତି, ସେମାନେ ପ୍ରାୟ ଅତ୍ୟଧିକ ଚିନ୍ତା କରିବାକୁ ଲାଗନ୍ତି ଏବଂ ଡିପରେସନ୍‌ରେ ଚାଲିଯାʼନ୍ତି । କିଛି ଲୋକମାନଙ୍କୁ ଭୋକ ହୁଏନି କିମ୍ବା ସେମାନେ ଅତ୍ୟଧିକ ଖାଇବାକୁ ଲାଗନ୍ତି । କେବଳ ଏତିକି ନୁହେଁ, ସେମାନେ ଡ୍ରଗସ୍‌ ନେବା ଓ ଅଧିକ ମଦ ପିଇବା ଆରମ୍ଭ କରିଦିଅନ୍ତି ।

• ଯେଉଁ ଲୋକମାନଙ୍କର ଆତ୍ମସମ୍ମାନ ଥାଏ, ସେମାନେ ନିଜକୁ ଅନ୍ୟ ସହିତ ତୁଳନା କରିବାରୁ ଦୂରେଇ ରହନ୍ତି । ଏହା ଯୋଗୁଁ ସେମାନେ ସମସ୍ତଙ୍କ ସହ ସହଜରେ ମିଳାମିଶା କରିପାରନ୍ତି ଓ ଭଲ ସାଙ୍ଗ ମଧ୍ୟ ବନାଇପାରନ୍ତି । କିନ୍ତୁ ଅନ୍ୟପଟେ, ଯେଉଁ ଲୋକମାନଙ୍କର ଆତ୍ମସମ୍ମାନ କମ୍‌ ଥାଏ, ସେମାନେ ଅନ୍ୟମାନଙ୍କର ଭୁଲଗୁଡ଼ିକ ବାହାର କରନ୍ତି । ସେମାନଙ୍କ କାହାରି ସହ ସମ୍ପର୍କ ଭଲ ରହେ ନାହିଁ ।

• ଯେଉଁ ଲୋକମାନଙ୍କଠାରେ ଆତ୍ମସମ୍ମାନ ଥାଏ, ସେମାନେ ସମସ୍ୟାଗୁଡ଼ିକ ଆସିଲେ ବି ଡରନ୍ତି ନାହିଁ ବରଂ ଅଟଳ ରହନ୍ତି । ଯଦି ସେମାନେ କିଛି କରିବା ପାଇଁ ନିଷ୍ପତ୍ତି ନିଅନ୍ତି, ତାହେଲେ ଯେତେ ବାଧା ଆସିଲେ ବି ସେମାନେ ହାର୍‌ ମାନନ୍ତି ନାହିଁ ବରଂ ନିଜ ଲକ୍ଷ୍ୟକୁ ପାଇବା ପାଇଁ ପୂରା ଚେଷ୍ଟା କରନ୍ତି । କିନ୍ତୁ ଅନ୍ୟପଟେ, ଯେଉଁ ଲୋକମାନଙ୍କଠାରେ ଆତ୍ମସମ୍ମାନ କମ୍‌ ଥାଏ, ସେମାନଙ୍କୁ ପ୍ରାୟ ଛୋଟ ଛୋଟ ଅସଫଳତା ବି ପାହାଡ଼ ଭଳି ଲାଗେ । ତେଣୁ ସେମାନେ ଶୀଘ୍ର ହାର୍‌ ମାନିଯାʼନ୍ତି ।

 ଆପଣ କିପରି କରିପାରିବେ ?

ଭଲ ସାଙ୍ଗ ବାଛନ୍ତୁ । ଏପରି ଲୋକମାନଙ୍କ ସହ ସାଙ୍ଗ ହୁଅନ୍ତୁ ଯେଉଁମାନେ ଅନ୍ୟମାନଙ୍କୁ ଆଦର କରନ୍ତି, ଯେଉଁମାନେ ଆପଣଙ୍କ ପ୍ରକୃତରେ ଚିନ୍ତା କରନ୍ତି ଏବଂ ଆପଣଙ୍କ ଉତ୍ସାହ ବଢ଼ାନ୍ତି ।

ଅନ୍ୟମାନଙ୍କ ସାହାଯ୍ୟ କରନ୍ତୁ । ଯେବେ ଆପଣ ଅନ୍ୟମାନଙ୍କ ପାଇଁ କିଛି ଭଲ କରିବେ, ଏପରି ଲୋକଙ୍କ ପାଇଁ ବି ଯେଉଁମାନେ ହୁଏତ ଆପଣଙ୍କ ପାଇଁ କିଛି କରିପାରିବେ ନାହିଁ, ତେବେ ବି ଆପଣଙ୍କୁ ପ୍ରକୃତ ଖୁସି ମିଳିବ । ଯଦିଓ କେହି ଆପଣଙ୍କ ଭଲ କାମଗୁଡ଼ିକୁ ଧ୍ୟାନ ଦିଅନ୍ତି ନାହିଁ, ଆପଣଙ୍କ ପ୍ରଶଂସା ବି କରନ୍ତି ନାହିଁ, ତେବେ ବି ଆପଣ ଖୁସି ରହିବେ ।

ନିଜ ପିଲାମାନଙ୍କୁ ନିଜର ସମ୍ମାନ କରିବା ଶିଖାନ୍ତୁ । ଗୋଟିଏ ଉପାୟ ହେଉଛି, ଯଦି କୌଣସି ସମସ୍ୟା ଆସେ ଆଉ ସେମାନେ ନିଜେ ଏହାର ସମାଧାନ କରିପାରନ୍ତି, ତେବେ ସେମାନଙ୍କୁ କରିବାକୁ ଦିଅନ୍ତୁ । ଏଥିରୁ ସେମାନେ ଶିଖିପାରିବେ ଯେ ସମସ୍ୟାଗୁଡ଼ିକର ସାମନା କିପରି କରାଯାଏ କିମ୍ବା ତାʼର ସମାଧାନ କିପରି ବାହାର କରାଯାଏ । ଏଥିରୁ ତାଙ୍କ ଆତ୍ମସମ୍ମାନ ବଢ଼ିବ ଏବଂ ବଡ଼ ହେଲା ପରେ ସେମାନଙ୍କୁ ଲାଭ ବି ହେବ ।