ଏହା କାହିଁକି ଜରୁରୀ ଯେ ପରିବାରରେ ସମସ୍ତେ ପରସ୍ପରକୁ ଆଦର କରନ୍ତୁ ?

• ବିବାହକୁ ସଫଳ କରିବା ପାଇଁ ସାତଟି ସିଦ୍ଧାନ୍ତ ନାମକ ଇଂରାଜୀ ବହିରେ ଲେଖାଅଛି, ଯଦି ସ୍ୱାମୀ ସ୍ତ୍ରୀ ପରସ୍ପରର ଆଦର କରନ୍ତି, ତେବେ ସେମାନେ “କେବଳ ବଡ଼ ବଡ଼ କଥାରେ ନୁହଁ ବରଂ ପ୍ରତିଦିନର ଛୋଟ ଛୋଟ କଥାରେ ବି” ନିଜ ପ୍ରେମ ଦେଖାଇପାରିବେ ।

• ଏକ ଅନୁସନ୍ଧାନରେ ଦେଖାଗଲା ଯେ ଯେଉଁ ପିଲାମାନେ ଅନ୍ୟମାନଙ୍କର ଆଦର କରନ୍ତି, ସେମାନେ ନିଜ ବିଷୟରେ ଭଲ ଅନୁଭବ କରନ୍ତି ଓ ବାପା ମାଆଙ୍କ ସହ ସେମାନଙ୍କ ଭଲ ସମ୍ପର୍କ ରହିଥାଏ । ସେମାନେ ଖୁସିରେ ରହନ୍ତି ଓ ସେମାନଙ୍କୁ ମାନସିକ ସମସ୍ୟାଗୁଡ଼ିକ ବି ବହୁତ କମ୍‌ ହୋଇଥାଏ ।

 ଆପଣ କିପରି କରିପାରିବେ ?

ପୂରା ପରିବାର ମିଶି କଥା ହୁଅନ୍ତୁ । ପ୍ରଥମ, ନିଜ ଜୀବନସାଥୀ ସହ ମିଶି ନିଶ୍ଚିତ କରନ୍ତୁ ଯେ ପରିବାରରେ ସମସ୍ତେ ଏକଥା ଜାଣନ୍ତୁ ଯେ ଆଦର କରିବା କାହିଁକି ଜରୁରୀ ଅଟେ । ଦ୍ୱିତୀୟ, ଲେଖନ୍ତୁ ଯେ ପରିବାରର ପ୍ରତ୍ୟେକ ସଦସ୍ୟଙ୍କୁ କିପରି ବ୍ୟବହାର କରିବା ଉଚିତ୍‌ ଓ କିପରି ନୁହେଁ । ତୃତୀୟ, ଯେଉଁ କଥାଗୁଡ଼ିକ ଆପଣ ଲେଖିଛନ୍ତି ତାʼଉପରେ ପୂରା ପରିବାର ସହ ମିଶି କଥା ହୁଅନ୍ତୁ ଯେଉଁଥିରୁ ସମସ୍ତଙ୍କୁ ଜଣା ଥିବ ଯେ ଅନ୍ୟମାନଙ୍କ ଆଦର କରିବା ପାଇଁ ସେମାନଙ୍କୁ କʼଣ କରିବାର ଅଛି ।

ଏକ ଭଲ ଉଦାହରଣ ରଖନ୍ତୁ । କʼଣ ଆପଣଙ୍କ ପରିବାର ଲୋକଙ୍କଠୁ ଭୁଲ ହୋଇଯିବା ପରେ ଆପଣ ବାରମ୍ବାର ସେମାନଙ୍କୁ ସେହି କଥା କହୁଥାʼନ୍ତି ? ଯେବେ ସେମାନେ କୌଣସି ମାମଲାରେ ନିଜ ମତ ଦିଅନ୍ତି କʼଣ ଆପଣ ସେମାନଙ୍କର ମଜାକ ଉଡ଼ାନ୍ତି ? ଯେବେ ସେମାନେ କିଛି କହୁଥାʼନ୍ତି, ତେବେ କʼଣ ଆପଣ ସେମାନଙ୍କ କଥାକୁ ମଝିରେ କାଟି ଦିଅନ୍ତି କିମ୍ବା ସେମାନଙ୍କ କଥାଗୁଡ଼ିକ ଉପରେ ଧ୍ୟାନ ଦିଅନ୍ତି ନାହିଁ ? ମନେ ରଖନ୍ତୁ, ପ୍ରଥମେ ଆପଣଙ୍କୁ ଅନ୍ୟମାନଙ୍କ ଆଦର କରିବା ଉଚିତ୍‌ ।

ପରାମର୍ଶ: ନିଜ ଜୀବନସାଥୀ ଏବଂ ପିଲାମାନଙ୍କୁ ସେତେବେଳେ ବି ଆଦର କରିବା ପାଇଁ ଚେଷ୍ଟା କରନ୍ତୁ, ଯେବେ ଆପଣଙ୍କୁ ଲାଗେ ସେମାନେ ଏହାର ଯୋଗ୍ୟ ନୁହନ୍ତି ।

ସହମତ ନ ହେଲେ ବି ଝଗଡ଼ା କରନ୍ତୁ ନାହିଁ । ପରିବାରର କୌଣସି ସଦସ୍ୟ ସହିତ ନିଜ କଥା କହିବା ସମୟରେ କେବେ ବି ଏପରି କୁହନ୍ତୁ ନାହିଁ, “ତମେ ସବୁବେଳେ ଏପରି ହିଁ କର” ବା “ତମେ କେବେ ବି ମୋର କଥା ଶୁଣ ନାହିଁ” କିମ୍ବା “ତମ ସହିତ କଥା ହେବା ହିଁ ବେକାର ।” ଏପରି କହିଲେ ତାଙ୍କୁ ଖରାପ ଲାଗିପାରେ ଓ ଛୋଟ ମତଭେଦରୁ ବଡ଼ ଝଗଡ଼ା ହୋଇପାରେ ।