ପରମେଶ୍ୱରଙ୍କଲୋକଙ୍କ ମେଳରେ ସୁରକ୍ଷା ପାଆନ୍ତୁ
ଅଧ୍ୟାୟ ୧୭
ପରମେଶ୍ୱରଙ୍କଲୋକଙ୍କ ମେଳରେ ସୁରକ୍ଷା ପାଆନ୍ତୁ
୧, ୨. ଏକ ଝଡ଼ରେ ଛାରଖାର ହୋଇଥିବା ଅଞ୍ଚଳର ଲୋକମାନଙ୍କ ପରି ମାନବଜାତିର ଅବସ୍ଥା କିପରି ହୋଇଛି ?
କଳ୍ପନା କରନ୍ତୁ, ଆପଣ ବାସ କରୁଥିବା ଅଞ୍ଚଳକୁ ଏକ ପ୍ରଚଣ୍ଡ ଝଡ଼ ଛାରଖାର କରିଦେଲା । ଆପଣଙ୍କ ଘର ଭାଙ୍ଗିଗଲା ଓ ଆପଣଙ୍କ ଧନସମ୍ପତ୍ତି ନଷ୍ଟ ହୋଇଗଲା । ଖାଦ୍ୟର ଅଭାବ ହେଲା । ସ୍ଥିତି ନୈରାଶ୍ୟଜନକ ମନେ ହେଉଥିଲା । ଏହା ପରେ, ଆଶାତୀତଭାବେ ହଠାତ ସାହାଯ୍ୟ ସାମଗ୍ରୀ ପହଞ୍ଚାଇ ଦିଆଗଲା । ଖାଦ୍ୟ ଓ ବସ୍ତ୍ର ବହୁ ପରିମାଣରେ ଯୋଗାଇ ଦିଆଗଲା । ଆପଣଙ୍କ ପାଇଁ ଏକ ନୂତନ ଗୃହ ତିଆରି କରାଗଲା । ନିଶ୍ଚିତରୂପେ ଯେଉଁ ବ୍ୟକ୍ତିଙ୍କ ଦ୍ୱାରା ଏସବୁ ଯୋଗାଇବା ସମ୍ଭବ ହେଲା, ତାଙ୍କ ପ୍ରତି ଆପଣ କୃତଜ୍ଞ ହେବେ ।
୨ ଏହିପରି ଆଜି ମଧ୍ୟ କିଛି ଘଟୁଛି । ସେହି ଝଡ଼ ପରି ଆଦମ ଓ ହବାଙ୍କ ଅବଜ୍ଞା ମାନବଜାତିର ବହୁତ କ୍ଷତି ଘଟାଇଛି । ମାନବଜାତିର ପାରଦୀଶ ଗୃହ ନଷ୍ଟ ହୋଇଛି । ସେହି ସମୟଠାରୁ ଲୋକମାନଙ୍କୁ ଯୁଦ୍ଧ, ଅପରାଧ ଓ ଅନ୍ୟାୟରୁ ସୁରକ୍ଷା ଦେବାରେ ସମସ୍ତ ଲୌକିକ ସରକାର ବିଫଳ ହୋଇଛନ୍ତି । ଧର୍ମ, ହିତକର ଆଧ୍ୟାତ୍ମିକ ଭୋଜନ ନଦେଇ ବହୁ ସଂଖ୍ୟକ ଲୋକମାନଙ୍କୁ ଅନାହାର ଅବସ୍ଥାରେ ଛାଡ଼ିଦେଇଛି । ତଥାପି, ଆଧ୍ୟାତ୍ମିକଭାବେ ଦେଖିଲେ ଯିହୋବା ପରମେଶ୍ୱର ଖାଦ୍ୟ, ବସ୍ତ୍ର ଓ ଆଶ୍ରୟ ଯୋଗାଇ ଦେଉଛନ୍ତି । ସେ ତାହା କିପରି କରୁଛନ୍ତି ?
“ବିଶ୍ୱସ୍ତ ଓ ବୁଦ୍ଧିମାନ୍ ଦାସ”
୩. ମାନବଜାତି ପାଇଁ ଯିହୋବା କିପରି ବ୍ୟବସ୍ଥା କରନ୍ତି, ଏହା କେଉଁ ଉଦାହରଣ ଦ୍ୱାରା ଦେଖାଇ ଦିଆଯାଇଛି ?
୩ ସାହାଯ୍ୟ ସାମଗ୍ରୀ ସାଧାରଣତଃ ଏକ ସଂଗଠିତ ମାଧ୍ୟମ ଦ୍ୱାରା ବିତରଣ କରାଯାଏ ଓ ଠିକ୍ ସେହିପରି ଯିହୋବା ତାଙ୍କ ଲୋକମାନଙ୍କ ପାଇଁ ଆଧ୍ୟାତ୍ମିକ ବ୍ୟବସ୍ଥା କରିଛନ୍ତି । ଉଦାହରଣ ସ୍ୱରୂପ, ପ୍ରାୟ ୧,୫୦୦ ବର୍ଷ ପାଇଁ ଇଶ୍ରାଲୀୟମାନେ “ଯିହୋବାଙ୍କ ମଣ୍ଡଳୀରେ” ଥିଲେ । ସେମାନଙ୍କ ମଧ୍ୟରେ ପରମେଶ୍ୱରଙ୍କ ନିୟମ ଶିକ୍ଷା ଦେବାକୁ ସେହି ଲୋକମାନେ ଥିଲେ, ଯେଉଁମାନଙ୍କୁ ମାଧ୍ୟମରୂପେ ବ୍ୟବହାର କରାଯାଉଥିଲା । (୧ ବଂଶାବଳି ୨୮:୮; ୨ ବଂଶାବଳି ୧୭:୭-୯) ସା.ଯୁ. ପ୍ରଥମ ଶତାବ୍ଦୀରେ ଯିହୋବା ଖ୍ରୀଷ୍ଟିୟାନ ସଂଗଠନ ସ୍ଥାପନ କଲେ । ମଣ୍ଡଳୀଗୁଡ଼ିକ ଗଠିତ ହେଲା, ପ୍ରେରିତ ଓ ପ୍ରୌଢ଼ ବ୍ୟକ୍ତିମାନଙ୍କ ଦ୍ୱାରା ନିର୍ମିତ ପରିଚାଳନା ସମିତିର ଅଧୀନରେ ସେମାନେ କାର୍ଯ୍ୟ ସଂପାଦନ କଲେ । (ପ୍ରେରିତ ୧୫:୨୨-୩୧) ସେହିପରି ଆଜିମଧ୍ୟ ଯିହୋବା ଏକ ସଂଗଠିତ ଗୋଷ୍ଠୀ ମାଧ୍ୟମରେ ନିଜ ଲୋକମାନଙ୍କ ସହିତ ସମ୍ପର୍କ ରକ୍ଷା କରନ୍ତି । ଏହା ଆମେ କିପରି ଜାଣିବା ?
୪. ଆଧୁନିକ ସମୟରେ “ବିଶ୍ୱସ୍ତ ଓ ବୁଦ୍ଧିମାନ ଦାସ” କିଏ ପ୍ରମାଣିତ ହୋଇଛନ୍ତି ଓ ପରମେଶ୍ୱରଙ୍କ ଆଧ୍ୟାତ୍ମିକ ବ୍ୟବସ୍ଥା କିପରି ପ୍ରାପ୍ତ ହୋଇଛି ?
୪ ଯୀଶୁ କହିଥିଲେ ଯେ ରାଜପଦ ପ୍ରାପ୍ତ ହେବା ସମୟରେ ତାଙ୍କ ଅନୁଗାମୀମାନଙ୍କୁ “ବିଶ୍ୱସ୍ତ ଓ ବୁଦ୍ଧିମାନ ଦାସମାନେ” ଯଥା ସମୟରେ ଖାଦ୍ୟ ଯୋଗାଇବେ । (ମାଥିଉ ୨୪:୪୫-୪୭) ୧୯୧୪ ମସିହାରେ ଯେତେବେଳେ ଯୀଶୁଙ୍କୁ ସ୍ୱର୍ଗସ୍ଥ ରାଜାରୂପେ ଅଧିଷ୍ଠିତ କରାଗଲା, ଏହି “ଦାସ” ବୋଲି କିଏ ପ୍ରମାଣିତ ହେଲେ ? ନିଶ୍ଚିତରୂପେ ଖ୍ରୀଷ୍ଟୀୟ ଜଗତର ପାଦ୍ରୀବର୍ଗ ନୁହେଁ । କାରଣ ଅଧିକାଂଶତଃ, ପ୍ରଥମ ବିଶ୍ୱ ଯୁଦ୍ଧରେ ସେମାନଙ୍କ ନିଜ ରାଷ୍ଟ୍ରୀୟ ସରକାରଙ୍କର ପକ୍ଷ ନେଇଥିବା ବିଷୟରେ ପ୍ରଚାର କରି ସେମାନଙ୍କ ଗୋଷ୍ଠୀକୁ ପୋଷଣ କରୁଥିଲେ । ପରମେଶ୍ୱରଙ୍କ ପବିତ୍ର ଆତ୍ମାଦ୍ୱାରା ଅଭିଷିକ୍ତ ଓ ଯୀଶୁ କହିଥିବା “ସାନ ପଲ” ହେଉଛନ୍ତି ପ୍ରକୃତ ଖ୍ରୀଷ୍ଟିୟାନ ଗୋଷ୍ଠୀ, ଏମାନେ ଉପଯୁକ୍ତଭାବେ ସମୟାନୁସାରେ ଆଧ୍ୟାତ୍ମିକ ଭୋଜନ ବିତରଣ କରୁଛନ୍ତି । (ଲୁକ ୧୨:୩୨) ଏହି ଅଭିଷିକ୍ତ ଖ୍ରୀଷ୍ଟିୟାନ୍ମାନେ ଲୌକିକ ସରକାର ପରିବର୍ତ୍ତେ ପରମେଶ୍ୱରଙ୍କ ରାଜ୍ୟ ବିଷୟରେ ପ୍ରଚାର କଲେ । ଫଳସ୍ୱରୂପ, ପରବର୍ତ୍ତୀ ବର୍ଷଗୁଡ଼ିକରେ ସତ୍ୟ ଧର୍ମର ଆଭ୍ୟାସ କରି ଲକ୍ଷ ଲକ୍ଷ ସଂଖ୍ୟାରେ ଧାର୍ମିକଭାବେ ପର୍ଯ୍ୟବସିତ “ଅନ୍ୟ ମେଷଗୁଡ଼ିକ” ଅଭିଷିକ୍ତ “ଦାସ” ସହିତ ସଂଯୁକ୍ତ ହେଲେ । (ଯୋହନ ୧୦:୧୬) ଏହି ‘ବିଶ୍ୱସ୍ତ ଦାସ’ ଓ ଏହାର ବର୍ତ୍ତମାନ-ଦିନର ପରିଚାଳନା ସମିତିକୁ ଉପଯୋଗକରି ପରମେଶ୍ୱର ଆଧ୍ୟାତ୍ମିକ ଖାଦ୍ୟ, ବସ୍ତ୍ର ଓ ଆଶ୍ରୟ ପ୍ରୟୋଜନବୋଧ କରୁଥିବା ଲୋକଙ୍କୁ ଯୋଗାଇବା ପାଇଁ ନିଜ ସଙ୍ଗଠିତ ଲୋକମାନଙ୍କୁ ନିର୍ଦ୍ଦେଶ ଦିୟନ୍ତି ।
“ଯଥାସମୟରେ ଖାଦ୍ୟ”
୫. ଆଜି ଜଗତରେ ଆଧ୍ୟାତ୍ମିକ ଅବସ୍ଥାର ସ୍ଥିତି କʼଣ, କିନ୍ତୁ ଯିହୋବା ଏହି ବିଷୟରେ କʼଣ କରିବାକୁ ଯାଉଛନ୍ତି ?
୫ ଯୀଶୁ କହିଥିଲେ: “ମନୁଷ୍ୟ କେବଳ ରୋଟୀରେ ବଞ୍ଚିବ ନାହିଁ, ମାତ୍ର [ଯିହୋବା] ଈଶ୍ୱରଙ୍କ ମୁଖରୁ ନିର୍ଗତ ପ୍ରତ୍ୟେକ ବାକ୍ୟରେ ବଞ୍ଚିବ ।” (ମାଥିଉ ୪:୪) କିନ୍ତୁ ଦୁଃଖର କଥା ଯେ ପରମେଶ୍ୱରଙ୍କ ମୁଖ ନିର୍ଗତ ବାକ୍ୟପ୍ରତି ଅଧିକାଂଶ ଲୋକ ମନଯୋଗ ଦେଉ ନାହାନ୍ତି । ଯିହୋବାଙ୍କ ଭବିଷ୍ୟଦ୍ବକ୍ତା ଆମୋଷଙ୍କ ଦ୍ୱାରା ଯେପରି ପୂର୍ବରୁ କୁହାଯାଇଥିଲା: “ତାହା ଅନ୍ନ କିଅବା ଜଳ ପିପାସାର ଦୁର୍ଭିକ୍ଷ ନୁହେଁ, ମାତ୍ର ସଦାପ୍ରଭୁ ଯିହୋବାଙ୍କ ବାକ୍ୟ ଶୁଣିବାର ଦୁର୍ଭିକ୍ଷ ହେବ ।” (ଆମୋଷ ୮:୧୧, NW) ଏପରିକି ଅତି ଧାର୍ମିକ ଲୋକମାନେ ମଧ୍ୟ ଆଧ୍ୟାତ୍ମିକଭାବେ କ୍ଷୁଧିତ । ତଥାପି, ଯିହୋବାଙ୍କ ଇଚ୍ଛା ଯେ, “ସମସ୍ତଙ୍କର ଉଦ୍ଧାର ହେଉ ଓ ସେମାନେ ସତ୍ୟର ଯଥାର୍ଥ ଜ୍ଞାନ ପ୍ରାପ୍ତ ହୁଅନ୍ତୁ ।” (୧ ତୀମଥି ୨:୩, ୪) ସେହି ଅନୁସାରେ, ସେ ପ୍ରଚୁର ପରିମାଣରେ ଆଧ୍ୟାତ୍ମିକ ଭୋଜନ ଯୋଗାଉଛନ୍ତି । କିନ୍ତୁ ଏହା କେଉଁଠାରେ ମିଳିପାରିବ ?
୬. ଅତୀତରେ ଆଧ୍ୟାତ୍ମିକଭାବେ କିପରି ସେ ନିଜ ଲୋକମାନଙ୍କୁ ପୋଷଣ କରିଥିଲେ ?
୬ ସମଗ୍ର ଇତିହାସରେ, ଯିହୋବା ନିଜ ଲୋକମାନଙ୍କୁ ଦଳବଦ୍ଧ ହିସାବରେ ଆଧ୍ୟାତ୍ମିକ ଭୋଜନ ବିତରଣ କରିଥିଲେ । (ଯିଶାଇୟ ୬୫:୧୩) ଉଦାହରଣସ୍ୱରୂପ, ପରମେଶ୍ୱରଙ୍କ ନିୟମରେ ଦଳବଦ୍ଧଭାବେ ନିର୍ଦ୍ଦେଶ ଦେବା ପାଇଁ ଇଶ୍ରାୟେଲୀୟ ଯାଜକମାନେ ପୁରୁଷ, ନାରୀ ଓ ପିଲାମାନଙ୍କୁ ଏକତ୍ର କରୁଥିଲେ । (ଦ୍ୱିତୀୟ ବିବରଣ ୩୧:୯, ୧୨) ପରିଚାଳନା ସମିତିର ଅଧୀନରେ ସମସ୍ତଙ୍କୁ ପ୍ରୋତ୍ସାହନ ଓ ନିର୍ଦ୍ଦେଶ ପାଇଁ ପ୍ରଥମ ଶତାବ୍ଦୀର ଖ୍ରୀଷ୍ଟିୟାନ୍ମାନେ ମଣ୍ଡଳୀ ସଂଗଠିତ କଲେ ଓ ସଭାର ଆୟୋଜନ କଲେ । (ରୋମୀୟ ୧୬:୫; ଫିଲୀମୋନ ୧, ୨) ଯିହୋବାଙ୍କ ସାକ୍ଷୀମାନେ ଏହି ନମୁନା ଅନୁକରଣ କରନ୍ତି । ଆପଣଙ୍କୁ ସେମାନଙ୍କ ସବୁ ସଭାରେ ଉପସ୍ଥିତ ହେବାପାଇଁ ହାର୍ଦ୍ଦିକ ଆମନ୍ତ୍ରଣ କରୁଛନ୍ତି ।
୭. ଖ୍ରୀଷ୍ଟିୟାନ ସଭାରେ ନିୟମିତ ଉପସ୍ଥିତ ହେବା, ଜ୍ଞାନ ଓ ବିଶ୍ୱାସ ସହିତ କିପରିଭାବେ ସମ୍ପୃକ୍ତ ?
୭ ନିଶ୍ଚୟ ବ୍ୟକ୍ତିଗତ ଭାବେ ବାଇବଲ ଅଧ୍ୟୟନରେ ଆପଣ ଅଧିକ ଶିଖିସାରିଥିବେ । ହୋଇପାରେ କେହିଜଣେ ସାକ୍ଷୀ ଆପଣଙ୍କୁ ସାହାଯ୍ୟ କରିଥିବେ । (ପ୍ରେରିତ ୮:୩୦-୩୫) କିନ୍ତୁ ଯଦି ଉପଯୁକ୍ତ ଯତ୍ନ ନ ଦିଆଯାଏ, ତେବେ ଏକ ଚାରାଗଛ ପରି ଆପଣଙ୍କ ବିଶ୍ୱାସ ଶୁଖିଯାଇ ମରିଯାଇପାରେ । ସୁତରାଂ, ଆପଣ ଉପଯୁକ୍ତ ଆଧ୍ୟାତ୍ମିକ ପୁଷ୍ଟି ପାଇବା ଉଚିତ । (୧ ତୀମଥି ୪:୬) ଆପଣଙ୍କୁ ଆଧ୍ୟାତ୍ମିକଭାବେ ପୋଷଣ କରିବା ପାଇଁ ସ୍ଥାପିତ ଖ୍ରୀଷ୍ଟିୟାନ ସଭା କ୍ରମାଗତ କାର୍ଯ୍ୟକ୍ରମ ଯୋଗାଏ, ଯେପରିକି ଆପଣ ପରମେଶ୍ୱରଙ୍କ ଜ୍ଞାନରେ ବୃଦ୍ଧି ପାଇ ବିଶ୍ୱାସରେ ବଢ଼ି ପାରନ୍ତି, ଏଥିପାଇଁ ସାହାଯ୍ୟ କରନ୍ତି ।—କଲସୀୟ ୧:୯, ୧୦.
୮. ଯିହୋବାଙ୍କ ସାକ୍ଷୀମାନଙ୍କ ସଭାରେ ଉପସ୍ଥିତ ହେବା ପାଇଁ ଆମକୁ କାହିଁକି ପ୍ରୋତ୍ସାହିତ କରାଯାଉଛି ?
୮ ସଭା ଅନ୍ୟଏକ ଅତି ଗୁରୁତ୍ୱପୂର୍ଣ୍ଣ ଉଦ୍ଦେଶ୍ୟ ସାଧନ କରେ । ପାଉଲ ଲେଖିଥିଲେ: “ଆସନ୍ତୁ ଆମେ ପ୍ରେମ ଓ ଉତ୍ତମ କାର୍ଯ୍ୟରେ ପରସ୍ପରପ୍ରତି ଉତ୍ସାହିତ କରିବାକୁ ଚିନ୍ତା କରିବା, ଏକାଠି ସମ୍ମିଳିତ ହେବାରେ ଅବହେଳା କରିବା ନାହିଁ ।” (ଏବ୍ରୀ ୧୦:୨୪, ୨୫, NW) “ଉତ୍ସାହିତ କରିବା” ଅନୁଦିତ ଗ୍ରୀକ୍ ଶବ୍ଦ “ତେଜିୟାନ କରିବା” ଅର୍ଥ ବି ହୋଇପାରେ । ବାଇବଲର ଏକ ହିତୋପଦେଶ କହେ: “ଲୁହା ଦ୍ୱାରା ଲୁହା ନିଜେ ତେଜିୟାନ ହୁଏ, ସେହିପରି ଜଣେ ଲୋକ ଅନ୍ୟଜଣର ମୁଖ ତେଜସ୍ୱୀ କରେ ।” (ହିତୋପଦେଶ ୨୭:୧୭, NW) ଆମେ ସମସ୍ତେ ନିରନ୍ତର ‘ତେଜସ୍ୱୀ ହେବା’ ଆବଶ୍ୟକ । ଜଗତର ଦୈନିକ ଚାପ ଆମ ବିଶ୍ୱାସକୁ ନିସ୍ତେଜ କରିପାରେ । ଯେତେବେଳେ ଆମେ ଖ୍ରୀଷ୍ଟିୟାନ ସଭାରେ ଉପସ୍ଥିତ ହେଉଛୁ, ସେଠାରେ ପ୍ରୋତ୍ସାହନର ଆଦାନ ପ୍ରଦାନ ରହିଛି । (ରୋମୀୟ ୧:୧୧, ୧୨) “ପରସ୍ପରକୁ ପ୍ରୋତ୍ସାହନ ଦିଅ ଓ ପରସ୍ପର ଉନ୍ନତି ନିମନ୍ତେ ଯତ୍ନବାନ ହୁଅ,” ମଣ୍ଡଳୀର ସଦସ୍ୟମାନେ ପ୍ରେରିତ ପାଉଲଙ୍କ ଉପଦେଶ ଅନୁକରଣ କରିଥାଆନ୍ତି ଓ ଏସବୁ ଆମ ବିଶ୍ୱାସକୁ ତେଜିଆନ୍ କରେ । (୧ ଥେସଲନୀକୀୟ ୫:୧୧, NW) ଖ୍ରୀଷ୍ଟିୟାନ ସଭାରେ ନିୟମିତ ଉପସ୍ଥିତ ହେବା ମଧ୍ୟ ଦର୍ଶାଏ ଯେ, ଆମେ ପରମେଶ୍ୱରଙ୍କୁ ପ୍ରେମ କରୁଛୁ ଓ ତାଙ୍କର ସ୍ତୁତି କରିବାକୁ ତାହା ଆମକୁ ସୁଯୋଗ ଦିଏ ।—ଗୀତସଂହିତା ୩୫:୧୮.
“ପ୍ରେମକୁ ପରିଧାନ କର”
୯. ପ୍ରେମ ପ୍ରଦର୍ଶନ କରି ଯିହୋବା କିପରି ଉଦାହରଣ ରଖିଛନ୍ତି ?
୯ ପାଉଲ ଲେଖିଥିଲେ: “ପ୍ରେମକୁ ପରିଧାନ କର, ଏହା ସିଦ୍ଧ ଅବସ୍ଥାର ବନ୍ଧନସ୍ୱରୂପ ।” (କଲସୀୟ ୩:୧୪) ଯିହୋବା ଆମ ପାଇଁ ଅନୁଗ୍ରହପୂର୍ବକ ଏହି ପରିଚ୍ଛଦର ବ୍ୟବସ୍ଥା କରିଛନ୍ତି । କେଉଁ ପ୍ରକାରେ ? ଖ୍ରୀଷ୍ଟିୟାନମାନେ ପ୍ରେମ ପ୍ରଦର୍ଶିତ କରି ପାରନ୍ତି, କାରଣ ପ୍ରେମ ଯିହୋବା ପରମେଶ୍ୱରଙ୍କ ପ୍ରଦତ୍ତ ପବିତ୍ର ଆତ୍ମାର ଫଳ ମଧ୍ୟରୁ ଗୋଟିଏ । (ଗାଲାତୀୟ ୫:୨୨, ୨୩) ଯିହୋବା ନିଜ ଅଦ୍ୱିତୀୟ ପୁତ୍ରକୁ ପଠାଇ ମହାନ ପ୍ରେମର ନିଦର୍ଶନ ଆମକୁ ଦେଖାଇଛନ୍ତି । ଯାହାଫଳରେ ଆମେ ଅନନ୍ତ ଜୀବନ ପାଇପାରୁ । (ଯୋହନ ୩:୧୬) ଏହି ପ୍ରେମ ପ୍ରକାଶ କରିବାରେ ଏହାର ଏକ ଶ୍ରେଷ୍ଠ ନିଦର୍ଶନ ଆମପାଇଁ ଆଦର୍ଶ ହୋଇରହିଛି । “ଈଶ୍ୱର ଯଦି ଆମ୍ଭମାନଙ୍କୁ ଏପରି ପ୍ରେମ କଲେ,” ପ୍ରେରିତ ଯୋହନ ଲେଖିଛନ୍ତି, “ତେବେ ଆମ୍ଭେମାନେ ମଧ୍ୟ ପରସ୍ପରକୁ ପ୍ରେମ କରିବା ଉଚିତ ।”—୧ ଯୋହନ ୪:୧୧.
୧୦. “ଭାଇମାନଙ୍କ ସମ୍ପୂର୍ଣ୍ଣ ସଙ୍ଗଠନରୁ” ଆମେ କିପରି ଉପକାର ପାଇପାରିବା ?
୧୦ ରାଜ୍ୟଗୃହର ସଭାଗୁଡ଼ିକରେ ଆପଣଙ୍କ ଉପସ୍ଥିତି ସ୍ନେହ ଦେଖାଇବାରେ ଅତ୍ୟୁତ୍ତମ ସୁଯୋଗ ଦେବ । ସେଠାରେ ଆପଣ ବହୁତ ପ୍ରକାରର ଲୋକମାନଙ୍କୁ ସାକ୍ଷାତ କରିବେ । ଏଥିରେ ଆଶ୍ଚର୍ଯ୍ୟ ହେବାର ନାହିଁ, ଆପଣ ସେମାନଙ୍କ ମଧ୍ୟରୁ ଆନେକଙ୍କ ପ୍ରତି ସଙ୍ଗେ ସଙ୍ଗେ ଆକର୍ଷଣ ଅନୁଭବ କରିବେ । ଅବଶ୍ୟ ଯିହୋବାଙ୍କ ସେବକମାନଙ୍କ ମଧ୍ୟରେ ବି ବ୍ୟକ୍ତିତ୍ୱ ଭିନ୍ନ ଭିନ୍ନ ହୋଇଥାଏ । ସମ୍ଭବତଃ ଅତୀତରେ ଆପଣଙ୍କ ଆଗ୍ରହ ବା ଗୁଣ ସହିତ ସାମ୍ୟ ନଥିବା ଲୋକଙ୍କୁ ଆପଣ ଏଡ଼ାଇ ଯାଉଥିଲେ । କିନ୍ତୁ, ଖ୍ରୀଷ୍ଟିୟାନମାନଙ୍କୁ ‘ଭାଇମାନଙ୍କ ସମ୍ପୂର୍ଣ୍ଣ ସଙ୍ଗଠନ ପ୍ରତି ସ୍ନେହ ରଖିବା’ ଆବଶ୍ୟକ । (୧ ପିତର ୨:୧୭, NW) ସେଥିପାଇଁ ରାଜ୍ୟ ଗୃହରେ ସେମାନଙ୍କ ସହିତ ଘନିଷ୍ଟ ହେବାକୁ ଲକ୍ଷ୍ୟ ରଖନ୍ତୁ—ଏପରିକି ଯେଉଁ ବ୍ୟକ୍ତିମାନଙ୍କ ବୟସ, ବ୍ୟକ୍ତିତ୍ୱ, ଜାତି ବା ଶିକ୍ଷାଗତ ଯୋଗ୍ୟତା ଆପଣଙ୍କଠାରୁ ଭିନ୍ନ । ଏହିପରି ପ୍ରତ୍ୟେକଙ୍କର କିଛି ନା କିଛି ପ୍ରୀତିକର ଗୁଣ ଆପଣ ଦେଖିବାକୁ ପାଇବେ ।
୧୧. ଯିହୋବାଙ୍କ ସାକ୍ଷୀମାନଙ୍କ ମଧ୍ୟରେ ବ୍ୟକ୍ତିତ୍ୱର ବିଭିନ୍ନତା ଥିଲେମଧ୍ୟ, ନିରାଶ ହେବା ଉଚିତ୍ ନୁହେଁ କାହିଁକି ?
୧୧ ମଣ୍ଡଳୀରେ ବ୍ୟକ୍ତିତ୍ୱର ବିଭିନ୍ନତା ଆପଣଙ୍କୁ କେବେହେଲେ ନିରାଶ କରିବ ନାହିଁ । ଦୃଷ୍ଟାନ୍ତ ସ୍ୱରୂପ, କଳ୍ପନା କରନ୍ତୁ ଗୋଟିଏ ରାସ୍ତାରେ ଅନେକ ସଂଖ୍ୟକ ଯାନ ଆପଣଙ୍କ ପାର୍ଶ୍ୱଦେଇ ଗତି କରୁଛି । ସେଗୁଡ଼ିକର ଗତି ବା ସ୍ଥିତି ସମାନ ନୁହେଁ । କେତେକ ଅନେକ ମାଇଲ ଯାତ୍ରା କରିସାରିଛନ୍ତି, କିନ୍ତୁ ଅନ୍ୟ କେତେକ ଆପଣଙ୍କଭଳି ଏହିକ୍ଷଣି ଯାତ୍ରା ଆରମ୍ଭ କରିଛନ୍ତି । ତଥାପି, ଏହି ଭିନ୍ନତାକୁ ଖାତିର ନକରି ସବୁଗୁଡ଼ିକ ଗୋଟିଏ ରାସ୍ତାରେ ଯାତ୍ରା କରୁଛନ୍ତି । ଏହା ଗୋଟିଏ ମଣ୍ଡଳୀର ସଂଯୁକ୍ତ ବ୍ୟକ୍ତିମାନଙ୍କ ସହିତ ସମତୁଲ୍ୟ । ସମସ୍ତ ଖ୍ରୀଷ୍ଟିୟାନଙ୍କ ଗୁଣଗୁଡ଼ିକ ସମାନଭାବେ ବିକସିତ ହୁଏ ନାହିଁ । ଏହା ବ୍ୟତୀତ, ସମସ୍ତେ ସମାନ ଶାରୀରିକ ବା ମାନସିକ ଅବସ୍ଥାରେ ନୁହନ୍ତି । କେତେକ ଅନେକ ବର୍ଷରୁ ଯିହୋବାଙ୍କୁ ଉପାସନା କରିଆସୁଛନ୍ତି; ଅନ୍ୟମାନେ ଏହିକ୍ଷଣି ଆରମ୍ଭ କରିଛନ୍ତି । ହେଲେମଧ୍ୟ, ‘ଏକ ମନରେ ଓ ଏକ ବିଚାରରେ ସମ୍ମିଳିତ ହୋଇ’ ସମସ୍ତେ ଅନନ୍ତଜୀବନ ପଥରେ ଆଗେଇ ଯାଉଛନ୍ତି । (୧ କରନ୍ଥୀୟ ୧:୧୦) ତେଣୁ ମଣ୍ଡଳୀରେ ସଦସ୍ୟମାନଙ୍କର ଦୁର୍ବଳତା ପରିବର୍ତ୍ତେ ଶ୍ରେଷ୍ଠ ଗୁଣ ପ୍ରତି ଧ୍ୟାନ ଦିଅନ୍ତୁ । ଏପରି ଇଚ୍ଛା କଲେ ଆପଣଙ୍କ ହୃଦୟ ପ୍ରସନ୍ନ ହେବ ଓ ଆପଣ ଅନୁଭବ କରିପାରିବେ ଯେ, ଏହି ଲୋକମାନଙ୍କ ମଧ୍ୟରେ ପରମେଶ୍ୱର ଅଛନ୍ତି । ନିଶ୍ଚିତ ଭାବରେ ଆପଣ ଏଠାରେ ହିଁ ରହିବାକୁ ଚାହିଁବେ ।—୧ କରନ୍ଥୀୟ ୧୪:୨୫.
୧୨, ୧୩. (କ) କେହି ଜଣେ ଯଦି ଆପଣଙ୍କୁ ମଣ୍ଡଳୀରେ ଅପମାନ କରେ, ତେବେ ଆପଣ କʼଣ କରିବେ ? (ଖ) ଆକ୍ରୋଶଭାବ ନ ରଖିବା ଗୁରୁତ୍ୱପୂର୍ଣ୍ଣ କାହିଁକି ?
୧୨ ଯେହେତୁ ସକଳ ମାନବଜାତି ଅସିଦ୍ଧ, କେବେ କେବେ ମଣ୍ଡଳୀରେ କେହି ହୁଏତ ଏପରି କିଛି କହିପାରେ ବା କରିପାରେ ଯାହା ଆପଣଙ୍କୁ ବିତୃଷ୍ଣା ଲାଗିପାରେ । (ରୋମୀୟ ୩:୨୩) ଶିଷ୍ୟ ଯାକୁବ ଯଥାର୍ଥରୂପେ ଲେଖିଥିଲେ: “ଆମ୍ଭେମାନେ ସମସ୍ତେ ଅନେକ ବିଷୟରେ ଝୁଣ୍ଟିପଡ଼ୁ । ଯଦି କେହି ବାକ୍ୟରେ ଝୁଣ୍ଟି ନ ପଡ଼େ, ତେବେ ସେ ସିଦ୍ଧ ପୁରୁଷ ।” (ଯାକୁବ ୩:୨) ଯଦି କେହି ଆପଣଙ୍କୁ ଅସନ୍ତୁଷ୍ଟ କରେ, ତେବେ ଆପଣ କିପରି ପ୍ରତିକ୍ରିୟା ଦେଖାଇବେ ? ଏକ ବାଇବଲ ହିତୋପଦେଶ କହେ: “ମନୁଷ୍ୟର ସୁବୁଦ୍ଧି [“ଅନ୍ତଦୃଷ୍ଟି,” NW] ତାହାକୁ କ୍ରୋଧରେ ଧୀର କରେ; ପୁଣି ଦୋଷ ଛାଡ଼ିଦେବା ତାହାର ଭୂଷଣ ।” (ହିତୋପଦେଶ ୧୯:୧୧) ଅନ୍ତଦୃଷ୍ଟିର ଅର୍ଥ ହେଉଛି ଏକ ସ୍ଥିତିର ମୂଳତତ୍ୱ ବୁଝିବା ପାଇଁ ଗଭୀର ଭାବରେ ଦେଖିବା, ଯାହା ଜଣେ ବ୍ୟକ୍ତିକୁ ଏକ ନିର୍ଦ୍ଧିଷ୍ଟ ପ୍ରକାରରେ କହିବା କିମ୍ବା କାର୍ଯ୍ୟକରିବା ପାଇଁ ସମର୍ଥ କରିଥାଏ । ଆମ୍ଭମାନଙ୍କ ମଧ୍ୟରୁ ଅଧିକାଂଶ ଆମ ନିଜ ଭୁଲକୁ ନ ଧରିବା ପାଇଁ ଅଧିକ ଅନ୍ତଦୃଷ୍ଟି ଉପଯୋଗ କରିଥାଉ । ଅନ୍ୟମାନଙ୍କ ଅସିଦ୍ଧତାକୁ ବୁଝି ଆଚ୍ଛାଦନ କରିବାରେ ମଧ୍ୟ ଅନ୍ତଦୃଷ୍ଟିକୁ କାହିଁକି ଉପଯୋଗ କରିବା ନାହିଁ ?—ମାଥିଉ ୭:୧-୫; କଲସୀୟ ୩:୧୩.
୧୩ ଆମେ ନିଜେ ଯଦି ଯିହୋବାଙ୍କ ଠାରୁ କ୍ଷମା ପାଇବା ପାଇଁ ଚାହୁଁଛୁ ତେବେ ଅନ୍ୟମାନଙ୍କୁ କ୍ଷମା କରିବା ଉଚିତ, ଏହା କେବେହେଲେ ଭୁଲନ୍ତୁ ନାହିଁ । (ମାଥିଉ ୬:୯, ୧୨, ୧୪, ୧୫) ଯଦି ଆମେ ସତ୍ୟ ବିଷୟରେ ଶିଖୁଛୁ, ଅନ୍ୟମାନଙ୍କ ସହିତ ସ୍ନେହମୟ ବ୍ୟବହାର କରିବା । (୧ ଯୋହନ ୧:୬, ୭; ୩:୧୪-୧୬; ୪:୨୦, ୨୧) ସେଥିପାଇଁ, ଯଦି ଆପଣ ମଣ୍ଡଳୀରେ ଜଣେ ବ୍ୟକ୍ତିଙ୍କ ପାଇଁ କୌଣସି ସମସ୍ୟାର ସମ୍ମୁଖୀନ ହୁଅନ୍ତି, ତେବେ କ୍ରୋଧ ସମ୍ବରଣ କରନ୍ତୁ । ଯଦି ଆପଣ ପ୍ରେମକୁ ପରିଧାନ କରିଛନ୍ତି, ତେବେ ଆପଣ ସମସ୍ୟାକୁ ସମାଧାନ କରିବା ନିମନ୍ତେ ଯଥାସାଧ୍ୟ ଚେଷ୍ଟା କରିବେ ଓ ଆପଣଙ୍କର ଯଦି ଦୋଷ ଥାଏ ତେବେ କ୍ଷମା ପ୍ରାର୍ଥନା ପାଇଁ ପଛଘୂଞ୍ଚା ଦିୟନ୍ତୁ ନାହିଁ ।—ମାଥିଉ ୫:୨୩, ୨୪; ୧୮:୧୫-୧୭.
୧୪. କେଉଁ ଗୁଣଗୁଡ଼ିକ ଆମେ ପରିଧାନ କରିବା ଉଚିତ୍ ?
୧୪ ପ୍ରେମର ନିକଟତର ଅନ୍ୟ ଗୁଣସବୁ ଆମକୁ ପରିଧାନ କରିବା ଉଚିତ । ପାଉଲ ଲେଖିଥିଲେ: “କୋମଳ ହୃଦୟ, ଦୟା, ନମ୍ରତା, ମୃଦୁତା ଓ ଦୀର୍ଘସହିଷ୍ଣୁତା ପରିଧାନ କର ।” ଏହି ଗୁଣସବୁ ପ୍ରେମଦ୍ୱାରା ପରିବେଷ୍ଟିତ ଈଶ୍ୱରୀୟ “ନୂତନ ସ୍ୱଭାବର [“ବ୍ୟକ୍ତିତ୍ୱ,” NW]” ଅଂଶ ଅଟେ । (କଲସୀୟ ୩:୧୦, ୧୨) ଏସବୁ ପରିଧାନ କରିବା ପାଇଁ ଆପଣ କି ଉଦ୍ୟମ କରିବେ ? ବିଶେଷତଃ ଯଦି ଆପଣ ଭ୍ରାତୃପ୍ରେମ ପରିଧାନ କରନ୍ତି, ଆପଣ କʼଣ ଯୀଶୁଙ୍କ ଶିଷ୍ୟମାନଙ୍କ ପରିଚୟ ଚିହ୍ନ ଧାରଣ କରିବେ, କାରଣ ସେ କହିଲେ: “ଯଦି ତୁମ୍ଭମାନଙ୍କର ପରସ୍ପର ପ୍ରତି ପ୍ରେମ ଥାଏ, ତାହା ହେଲେ ତୁମ୍ଭେମାନେ ଯେ ମୋହର ଶିଷ୍ୟ, ଏହା ସମସ୍ତେ ତଦ୍ଦ୍ୱାରା ଜ୍ଞାତ ହେବେ ।”—ଯୋହନ ୧୩:୩୫.
ସୁରକ୍ଷାର ସ୍ଥାନ
୧୫. ମଣ୍ଡଳୀ ଏକ ଆଶ୍ରୟସ୍ଥଳପରି ହୋଇଥାଏ କିପରି ?
୧୫ ମଣ୍ଡଳୀ ଏକ ଆଶ୍ରୟସ୍ଥଳିରୂପେ କାର୍ଯ୍ୟ କରେ, ଯେଉଁଠାରେ ଆପଣ ସୁରକ୍ଷା ଅନୁଭବ କରିପାରିବେ । ଏଠାରେ ଆପଣ ସଚ୍ଚୋଟ ହୃଦୟୀ ଲୋକମାନଙ୍କୁ ପାଇବେ ଯେଉଁମାନେ ପରମେଶ୍ୱରଙ୍କ ଦୃଷ୍ଟିରେ ଯାହା ଠିକ୍ ତାହା କରିବା ପାଇଁ ଚେଷ୍ଟା କରୁଛନ୍ତି । ସେମାନଙ୍କ ମଧ୍ୟରୁ ଅନେକେ ସେହି ଅଭ୍ୟାସ ଓ ମନୋବୃତ୍ତିଗୁଡ଼ିକୁ ତ୍ୟାଗ କରି ଦେଇଛନ୍ତି ଯାହା ହୁଏତ ଆପଣ ତ୍ୟାଗ କରିବା ପାଇଁ ସଂଗ୍ରାମ କରୁଛନ୍ତି । (ତିତସ ୩:୩) ସେମାନେ ଆପଣଙ୍କୁ ସାହାଯ୍ୟ କରିପାରିବେ, କାରଣ ଆମ୍ଭମାନଙ୍କୁ କୁହାଯାଇଛି “ପରସ୍ପରର ଭାର ବହନ କର ।” (ଗାଲାତୀୟ ୬:୨) ସ୍ୱାଭାବିକଭାବେ, ଉନ୍ନତିର ପଥରେ ଗତି କରିବା ଆପଣଙ୍କର ନିଜ ଦାୟିତ୍ୱ ଯାହା ପରିଶେଷରେ ଆପଣଙ୍କୁ ଅନନ୍ତ ଜୀବନଆଡ଼କୁ ପରିଚାଳିତ କରିବ । (ଗାଲାତୀୟ ୬:୫; ଫିଲିପ୍ପୀୟ ୨:୧୨) ସାହାଯ୍ୟ ଓ ସହଯୋଗ କରିବା ପାଇଁ ମାଧ୍ୟମରୂପେ ଯିହୋବା ଖ୍ରୀଷ୍ଟିୟାନ ମଣ୍ଡଳୀର ବ୍ୟବସ୍ଥା କରିଛନ୍ତି । ଆପଣଙ୍କ ସମସ୍ୟା ଯେତେ କଷ୍ଟକର ହେଉ ନା କାହିଁକି, ଆପଣଙ୍କର ଏକ ମୂଲ୍ୟବାନ ସମ୍ପଦ ଅଛି—ତାହା ହେଉଛି ଏହି ପ୍ରେମମୟ ମଣ୍ଡଳୀ ଯାହା କଷ୍ଟ ଓ କ୍ଷତି ସମୟରେ ଆପଣଙ୍କୁ ସାହାଯ୍ୟ କରିବ ।—ଲୁକ ୧୦:୨୯-୩୭; ପ୍ରେରିତ ୨୦:୩୫ ତୁଳନା କରନ୍ତୁ ।
୧୬. ମଣ୍ଡଳୀର ପ୍ରାଚୀନମାନେ କି ସାହାଯ୍ୟ କରିଥାଆନ୍ତି ?
୧୬ ସେମାନଙ୍କ ମଧ୍ୟରୁ ଯେଉଁମାନେ ଆପଣଙ୍କୁ ସାହାଯ୍ୟ କରିବେ, ସେମାନେ “ଉପଯୁକ୍ତ ମନୁଷ୍ୟ” ଅର୍ଥାତ—ମଣ୍ଡଳୀର ମନୋନୀତ ପ୍ରାଚୀନ କିମ୍ବା ଅଧ୍ୟକ୍ଷମାନେ, ଯେଉଁମାନେ ସ୍ୱେଚ୍ଛାରେ ଓ ଆଗ୍ରହସହକାରେ ପଲକୁ ପ୍ରତିପାଳନ କରନ୍ତି । (ଏଫିସୀୟ ୪:୮, ୧୧, ୧୨; ପ୍ରେରିତ ୨୦:୨୮; ୧ ପିତର ୫:୨, ୩) ସେମାନଙ୍କ ବିଷୟରେ ଯିଶାଇୟ ଭବିଷ୍ୟଦ୍ବାଣୀ କରିଥିଲେ: “ଏକ ମନୁଷ୍ୟ ବତାସରେ ଆଶ୍ରୟ ସ୍ଥାନ ଓ ଝଡରେ ଆଶ୍ରୟ, ଶୁଷ୍କ ସ୍ଥାନରେ ଜଳସ୍ରୋତ, ଶ୍ରାନ୍ତିଜନକ ଭୂମିରେ ବୃହତ୍ ଶୈଳର ଛାୟାସ୍ୱରୂପ ହେବେ ।”—ଯିଶାଇୟ ୩୨:୨.
୧୭. (କ) ମୁଖ୍ୟତଃ କେଉଁ ପ୍ରକାର ସାହାଯ୍ୟ ଯୀଶୁ ଦେବା ପାଇଁ ଚାହାନ୍ତି ? (ଖ) ପରମେଶ୍ୱର ନିଜ ଲୋକମାନଙ୍କ ପାଇଁ କʼଣ ବ୍ୟବସ୍ଥା କରିବାର ପ୍ରତିଜ୍ଞା କରିଛନ୍ତି ?
୧୭ ଯେତେବେଳେ ଯୀଶୁ ପୃଥିବୀରେ ଥିଲେ, ଧାର୍ମିକ ନେତାମାନଙ୍କ ଦ୍ୱାରା ପ୍ରେମମୟ ତତ୍ତ୍ୱାବଧାନର ଘୋର ଅଭାବ ଥିଲା । ଲୋକମାନଙ୍କ ଅବସ୍ଥା ତାଙ୍କୁ ଗଭୀର ଭାବରେ ସ୍ପର୍ଶ କରିଥିଲା । ପ୍ରକୃତରେ ସେ ଆଧ୍ୟାତ୍ମିକଭାବେ ସେମାନଙ୍କୁ ସାହାଯ୍ୟ କରିବା ପାଇଁ ଚାହୁଁଥିଲେ । ଯୀଶୁ ସେମାନଙ୍କ ପାଇଁ କରୁଣା ଦେଖାଇଥିଲେ କାରଣ “ସେମାନେ ଅରକ୍ଷକ ମେଷ ପରି ଦୁର୍ଦ୍ଦଶାଗ୍ରସ୍ତ ଓ ଛିନ୍ନଭିନ୍ନ ଥିଲେ ।” (ମାଥିଉ ୯:୩୬) ବର୍ତ୍ତମାନ ଦିନର ଲୋକଙ୍କ ଶୋଚନୀୟ ଅବସ୍ଥା ବିଷୟ ଏଥିରେ କିପରି ଉପଯୁକ୍ତ ଭାରରେ ବର୍ଣ୍ଣନା କରାଯାଇଛି, ଯେଉଁମାନଙ୍କର ଆଧ୍ୟାତ୍ମିକ ସାହାଯ୍ୟ ଓ ସାନ୍ୱନା ଦେବାକୁ କେହି ନଥିବା ଯୋଗୁଁ ହୃଦୟବିଦାରକ ଯନ୍ତ୍ରଣା ସହ୍ୟ କରି ସାହାଯ୍ୟ ପାଇଁ ଆସୁଛନ୍ତି ! କିନ୍ତୁ ଯିହୋବାଙ୍କ ଲୋକଙ୍କ ପାଇଁ ଆଧ୍ୟାତ୍ମିକ ସାହାଯ୍ୟ ଅଛି, କାରଣ ସେ ପ୍ରତିଜ୍ଞା କରିଛନ୍ତି: “ଆମ୍ଭେ ସେମାନଙ୍କ ପାଇଁ ପାଳକଗଣ ନିଯୁକ୍ତ କରିବା, ସେମାନେ ପାଳନକରିବେ, ପୁଣି ସେମାନେ ଆଉ ଭୀତ କି ନିରାଶ ନୋହିବେ, କିଅବା ସେମାନଙ୍କ ମଧ୍ୟରୁ କେହି ମରିହଜି ଯିବେନାହିଁ ।”—ଯିରିମିୟ ୨୩:୪, NW.
୧୮. ଯଦି ଆମେ ଆଧ୍ୟାତ୍ମିକ ସାହାଯ୍ୟ ଆବଶ୍ୟକ କରୁ, ତେବେ ଆମେ ଜଣେ ପ୍ରାଚୀନ ନିକଟକୁ ଯିବା ଉଚିତ୍ କାହିଁକି ?
୧୮ ମଣ୍ଡଳୀରେ ମନୋନୀତ ପ୍ରାଚୀନମାନଙ୍କ ସହିତ ପରିଚିତ ହୁଅନ୍ତୁ । ପରମେଶ୍ୱରଙ୍କ ଜ୍ଞାନ ପ୍ରୟୋଗ କରିବାରେ ସେମାନେ ଅଧିକ ଅନୁଭବି, କାରଣ ବାଇବଲରେ ଉଲ୍ଲିଖିତ ଅଧ୍ୟକ୍ଷତାର ଗୁଣ ସେମାନେ ପାଇଛନ୍ତି । (୧ ତୀମଥି ୩:୧-୭; ତିତସ ୧:୫-୯) ପରମେଶ୍ୱରଙ୍କ ଆବଶ୍ୟକତାର ବିରୁଦ୍ଧାଚରଣ କରୁଥିବା ଅଭ୍ୟାସ କିମ୍ବା ଦୁର୍ଗୁଣକୁ ଅତିକ୍ରମ କରିବା ପାଇଁ ଆଧ୍ୟାତ୍ମିକ ସାହାଯ୍ୟ ଯଦି ଆପଣ ଚାହାନ୍ତି, ତେବେ ସେମାନଙ୍କ ମଧ୍ୟରୁ କାହାରି ପାଖକୁ ଯିବା ପାଇଁ ଦ୍ୱିଧା କରନ୍ତୁ ନାହିଁ । ଆପଣ ଦେଖିବେ ଯେ ପ୍ରାଚୀନମାନେ ପାଉଲଙ୍କ ଆଦେଶ ଅନୁସରଣ କରନ୍ତି: “ଅବିହିତ ଆଚରଣ କରୁଥିବା ଲୋକମାନଙ୍କୁ ଚେତନା ଦିଅ, ସାହସହୀନମାନଙ୍କୁ ସାନ୍ତ୍ୱନା ଦିଅ, ଦୁର୍ବଳମାନଙ୍କ ତତ୍ତ୍ୱ ନିଅ, ସମସ୍ତଙ୍କ ପ୍ରତି ଦୀର୍ଘସହିଷ୍ଣୁ ହୁଅ ।”—୧ ଥେସଲନୀକୀୟ ୨:୭, ୮; ୫:୧୪.
ଯିହୋବାଙ୍କ ଲୋକମାନଙ୍କ ସହିତ ସୁରକ୍ଷାର ଆନନ୍ଦ ଉପଭୋଗ କରନ୍ତୁ
୧୯. ଯିହୋବାଙ୍କ ସଂଗଠନ ଭିତରେ ଯେଉଁମାନେ ସୁରକ୍ଷା ପାଇବା ପାଇଁ ଇଚ୍ଛା କରନ୍ତି, ସେମାନଙ୍କୁ ଯିହୋବା କି ଆଶୀର୍ବାଦ ପ୍ରଦାନ କରିଛନ୍ତି ?
୧୯ ଯଦିଓ ଆମେ ବର୍ତ୍ତମାନ ଅସିଦ୍ଧ ଅବସ୍ଥାରେ ଜୀବିତ, ଯିହୋବା ଆମକୁ ଆଧ୍ୟାତ୍ମିକ ଖାଦ୍ୟ, ବସ୍ତ୍ର ଓ ଆଶ୍ରୟ ଯୋଗାଇଥାଆନ୍ତି । ନିଶ୍ଚୟ, ଭୌତିକ ପାରଦୀଶର ଉପକାର ପାଇଁ ପରମେଶ୍ୱର ପ୍ରତିଜ୍ଞା କରିଥିବା ନୂତନ ଜଗତକୁ ଅପେକ୍ଷା କରିବା ଉଚିତ । କିନ୍ତୁ ଯେଉଁମାନେ ପରମେଶ୍ୱରଙ୍କ ସଂଗଠନର ଅଂଶ ଅଟନ୍ତି, ସେମାନେ ବର୍ତ୍ତମାନ ମଧ୍ୟ ଆଧ୍ୟାତ୍ମିକ ପାରଦୀଶର ସୁରକ୍ଷା ଉପଭୋଗ କରୁଛନ୍ତି । ସେମାନଙ୍କ ସମ୍ବନ୍ଧରେ ଯିହିଜିକଲ ଭବିଷ୍ୟଦ୍ବାଣୀ କରିଥିଲେ: “ସେମାନେ ନିରାପଦରେ ବାସ କରିବେ ଓ କେହି ସେମାନଙ୍କୁ ଭୟ ଦେଖାଇବେ ନାହିଁ ।”—ଯିହିଜିକଲ ୩୪:୨୮; ଗୀତସଂହିତା ୪:୮.
୨୦. ଯିହୋବାଙ୍କ ଉପାସନା ନିମନ୍ତେ ଆମେ ଯାହାକିଛି ଉତ୍ସର୍ଗ କରୁ, ତାହାର କ୍ଷତି ପୂରଣ ସେ କିପରି କରିବେ ?
୨୦ ଯିହୋବା ନିଜ ବାକ୍ୟ ଓ ସଂଗଠନ ମାଧ୍ୟମରେ ପ୍ରେମମୟ ଆଧ୍ୟାତ୍ମିକ ବ୍ୟବସ୍ଥା କରିଛନ୍ତି, ସେଥିପାଇଁ ଆମେ କେଡ଼େ କୃତଜ୍ଞ ! ପରମେଶ୍ୱରଙ୍କ ଲୋକମାନଙ୍କର ନିକଟତର ହୁଅନ୍ତୁ । ପରମେଶ୍ୱରଙ୍କ ଜ୍ଞାନ ଅର୍ଜନ କରିବାରେ ଆପଣଙ୍କ ମିତ୍ର ବା ବନ୍ଧୁମାନେ ଆପଣଙ୍କ ବିଷୟରେ ଯାହା ଭାବିଲେ ମଧ୍ୟ ସେଥିରେ ଭୟଭୀତ ହୋଇ ଦୂରେଇ ଯାଆନ୍ତୁ ନାହିଁ । କେତେକ ନିନ୍ଦା କରିପାରନ୍ତି କାରଣ ଆପଣ ଯିହୋବା ସାକ୍ଷୀମାନଙ୍କ ସହିତ ମିଳାମିଶା କରୁଛନ୍ତି ଓ ରାଜ୍ୟଗୃହ ସଭାରେ ଉପସ୍ଥିତ ହେଉଛନ୍ତି । କିନ୍ତୁ ପରମେଶ୍ୱରଙ୍କ ଉପାସନା ନିମନ୍ତେ ଆପଣ ଯାହାକିଛି ଉତ୍ସର୍ଗ କରନ୍ତି, ସେଥିପାଇଁ ସେ ଉଦାରତାସହ କ୍ଷତି ପୂରଣ କରିବେ । (ମଲାଖି ୩:୧୦) ଏହାଛଡ଼ା ଯୀଶୁ କହିଲେ: “ଯେଉଁ ଲୋକ ମୋହର ସୁସମାଚାର ନିମନ୍ତେ ଗୃହ, ଭ୍ରାତା, ଭଗ୍ନୀ ମାତା, ସନ୍ତାନ-ସନ୍ତତି ଓ ଭୂମି ପରିତ୍ୟାଗ କରିଅଛି, ଆଉ ଏବେ ଇହକାଳରେ ତାଡ଼ନା ସଙ୍ଗେ ସଙ୍ଗେ ଶତ ଗୁଣରେ ଗୃହ, ଭ୍ରାତା, ଭଗ୍ନୀ, ମାତା, ସନ୍ତାନସନ୍ତତି ଓ ଭୂମି, ପୁଣି ପରକାଳରେ ଅନନ୍ତ ଜୀବନ ନ ପାଇବ, ଏପରି ଲୋକ କେହି ନାହିଁ ।” (ମାର୍କ ୧୦:୨୯, ୩୦) ହଁ, ଆପଣ ପଛରେ ଯାହାକିଛି ଛାଡ଼ିଛନ୍ତି ବା ବର୍ତ୍ତମାନ ସହ୍ୟ କରୁଛନ୍ତି, ତାହା କିଛିନୁହେଁ, ଆପଣ ପରମେଶ୍ୱରଙ୍କ ଲୋକମାନଙ୍କ ମଧ୍ୟରେ ଆନନ୍ଦଦାୟକ ସାହଚର୍ଯ୍ୟ ଓ ଆଧ୍ୟାତ୍ମିକ ସୁରକ୍ଷା ପାଇପାରିବେ ।
ଆପଣଙ୍କ ଜ୍ଞାନ ପରୀକ୍ଷା କରନ୍ତୁ
“ବିଶ୍ୱସ୍ତ ଓ ବୁଦ୍ଧିମାନ ଦାସ” କିଏ ?
ଆଧ୍ୟାତ୍ମିକଭାବେ ଆମକୁ ପୋଷଣ କରିବାପାଇଁ ଯିହୋବା କʼଣ ବ୍ୟବସ୍ଥା କରିଛନ୍ତି ?
ଖ୍ରୀଷ୍ଟିୟାନ ମଣ୍ଡଳୀ ଆମକୁ କିପରି ସାହାଯ୍ୟ କରିବେ ?
[ଅଧ୍ୟୟନ ପ୍ରଶ୍ନ]
[୧୬୫ ପୃଷ୍ଠାରେ ପୂରା-ପୃଷ୍ଠା ଚିତ୍ର]
