ଅଧ୍ୟାୟ ୨

ପରମେଶ୍ୱରଙ୍କ ଜ୍ଞାନ ପ୍ରକାଶ କରୁଥିବା ପୁସ୍ତକ

୧, ୨. ଆମେ ଆମ ସୃଷ୍ଟିକର୍ତ୍ତାଙ୍କର ଉପଦେଶ କାହିଁକି ଆବଶ୍ୟକ କରିଥାଉ ।

 ଏହା ଯୁକ୍ତିଯୁକ୍ତ ଯେ ପ୍ରେମମୟ ସୃଷ୍ଟିକର୍ତ୍ତା ମାନବଜାତି ପାଇଁ ଏକ ଉପଦେଶ ଓ ନିର୍ଦ୍ଦେଶାତ୍ମକ ପୁସ୍ତକର ବ୍ୟବସ୍ଥା କରିବେ । ମନୁଷ୍ୟଜାତି ପାଇଁ ଏହି ନିର୍ଦ୍ଦେଶ ଯେ ଆବଶ୍ୟକ ଏଥିରେ କʼଣ ଆପଣ ଏକମତ ନୁହନ୍ତି ?

^୨ ୨,୫୦୦ ବର୍ଷରୁ ଅଧିକ ପୂର୍ବେ ଜଣେ ଐତିହାସିକ ଓ ଭବିଷ୍ୟଦ୍‌ବକ୍ତା ଲେଖିଥିଲେ: “ମନୁଷ୍ୟର ଗତି ତାହାର ଆୟତ୍ତ ନୁହେଁ: ନିଜ ପାଦବିକ୍ଷେପ ସ୍ଥିର କରିବାର ଗମନକାରୀ ମନୁଷ୍ୟର ସାଧ୍ୟ ନୁହେଁ ।” (ଯିରିମିୟ ୧୦:୨୩) ପୂର୍ବାପେକ୍ଷା, ଆଜି ଏହି ଉକ୍ତିର ସତ୍ୟତା ବେଶୀ ଅଛି । ସେଥିପାଇଁ ଐତିହାସିକ ଉଇଲିୟମ୍‌ ଏଚ୍‌. ମେକ୍‌ନିଲ୍‌ କହନ୍ତି: “ଏହି ଗ୍ରହଉପରେ ମାନବର ଦୁଃସାହସିକ କାର୍ଯ୍ୟ ସମାଜର ପ୍ରଚଳିତ ବ୍ୟବସ୍ଥାକୁ ଭାଙ୍ଗି ଅବିରତ ଭାବରେ ସଙ୍କଟ ଓ ଅସ୍ଥିରତା ଆଣିଅଛି ।”

୩, ୪. (କ) ଏକ ବାଇବଲ ଅଧ୍ୟୟନ ପାଇଁ ଆମେ କିପରି ମନୋବୃତ୍ତି ରଖିବା ଉଚିତ ? (ଖ) ବାଇବଲର ପରୀକ୍ଷା ଦିଗରେ ଆମେ କିପରି ଅଗ୍ରସର ହେବା ?

^୩ ବିଜ୍ଞତାର ପଥରେ ପରିଚାଳିତ ହେବା ପାଇଁ ବାଇବଲ ଆମର ସମସ୍ତ ଆବଶ୍ୟକତା ପୂରଣ କରିଥାଏ । ଏହା ସତ ଯେ ଅନେକ ଲୋକ ପ୍ରଥମେ ବାଇବଲ ପଢ଼ିଲାବେଳେ ଅଭିଭୂତ ହୋଇଥାଆନ୍ତି । ଏହା ଏକ ବୃହତ୍‌ ପୁସ୍ତକ ଓ ଏହାର କିଛି କିଛି ଅଂଶ ବୁଝିବା ସହଜ ନୁହେଁ । କିନ୍ତୁ ଯଦି ଆପଣଙ୍କୁ ଏକ ମୂଲ୍ୟବାନ ସମ୍ପତ୍ତିର ଉତ୍ତରାଧିକାରୀ ହେବା ପାଇଁ କʼଣ କରିବାକୁ ହେବ, ତାହାର ଲିଖିତ ନିର୍ଦ୍ଦେଶ ଥିବା ଦଲିଲ୍‌ଟିଏ ଦିଆଯାଏ, ତେବେ କʼଣ ଆପଣ ଏହାକୁ ଯତ୍ନସହକାରେ ପଢ଼ିବା ପାଇଁ ସମୟ ଦେବେନାହିଁ ? ଯଦି ଆପଣ ଏହି ଦଲିଲର କୌଣସି ଅଂଶ ବୁଝିବାକୁ କଠିନ ପାଆନ୍ତି, ସମ୍ଭବତଃ ଆପଣ କୌଣସି ଅଭିଜ୍ଞ ବ୍ୟକ୍ତିଙ୍କ ସାହାଯ୍ୟ ନେବେ ଯାହାଙ୍କର ଏହି ବିଷୟରେ ଧାରଣା ଥିବ ।  ବାଇବଲ ପ୍ରତି ଠିକ୍‌ ଏପରି ମନୋବୃତ୍ତି ପୋଷଣ ନ କରିବା କାହିଁକି ? (ପ୍ରେରିତ ୧୭:୧୧) ବସ୍ତୁଗତ ଉତ୍ତରାଧିକାରଠାରୁ ଏହା ଅଧିକ ଗୁରୁତ୍ୱପୂର୍ଣ୍ଣ । ଯେପରି ଆମେ ପୂର୍ବ ଅଧ୍ୟାୟରେ ଶିଖିଲୁ, ପରମେଶ୍ୱର ବିଷୟକ ଜ୍ଞାନ ଅନନ୍ତ ଜୀବନଆଡ଼କୁ ପରିଚାଳିତ କରିପାରେ ।

^୪ ଆସନ୍ତୁ ଏହି ପୁସ୍ତକଟିକୁ ପରୀକ୍ଷା କରିବା ଯାହା ପରମେଶ୍ୱରଙ୍କ ଜ୍ଞାନକୁ ପ୍ରଦର୍ଶିତ କରିଥାଏ । ପ୍ରଥମେ ଆମେ ବାଇବଲର ସଂକ୍ଷିପ୍ତ ପରିଚୟ ଦେବା । ଏହାପରେ, ଅନେକ ଅଭିଜ୍ଞ ବ୍ୟକ୍ତି ବାଇବଲକୁ ପରମେଶ୍ୱରଙ୍କ ଅନୁପ୍ରାଣିତ ବାକ୍ୟ ବୋଲି କାହିଁକି ବିଶ୍ୱାସ କରନ୍ତି, ତାହାର କାରଣ ଆମେ ଆଲୋଚନା କରିବା ।

ବାଇବଲରେ କʼଣ ଅନ୍ତର୍ଭୁକ୍ତ ଅଛି

୫. (କ) ଏବ୍ରୀ ଶାସ୍ତ୍ରରେ କʼଣ ଅନ୍ତର୍ଭୁକ୍ତ ହୋଇଛି ? (ଖ) ଗ୍ରୀକ୍‌ ଶାସ୍ତ୍ର ଅନ୍ତର୍ଗତ ବିଷୟସବୁ କʼଣ ?

^୫ ବାଇବଲ ଦୁଇ ଭାଗରେ ବିଭକ୍ତ । ୬୬ ଗୋଟି ପୁସ୍ତକ ଏଥିରେ ଅନ୍ତର୍ଭୁକ୍ତ ଯାହାକୁ ପ୍ରାୟତଃ ପୁରାତନ ନିୟମ ଓ ନୂତନ ନିୟମ କୁହାଯାଏ । ଅଣଚାଳିଶଟି ବାଇବଲ ପୁସ୍ତକ ମୂଳତଃ ଏବ୍ରୀ ଓ ୨୭ ଗୋଟି ଗ୍ରୀକ୍‌ ଭାଷାରେ ରଚିତ ହୋଇଥିଲା । ଏବ୍ରୀ ଶାସ୍ତ୍ରାବଳୀରେ, ଆଦିପୁସ୍ତକରୁ ନେଇ ମଲାଖି ପର୍ଯ୍ୟନ୍ତ ସୃଷ୍ଟି ଓ ମନୁଷ୍ୟ ଇତିହାସର ପ୍ରଥମ ୩,୫୦୦ ବର୍ଷର ବର୍ଣ୍ଣନା ଅଛି । ବାଇବଲର ଏହି ଭାଗକୁ ଅନୁଧ୍ୟାନ କରିବା ଦ୍ୱାରା ଆମେ ଇଶ୍ରାୟେଲୀୟଙ୍କ ପ୍ରତି ପରମେଶ୍ୱରଙ୍କ ଆଚରଣ ବିଷୟରେ ଜାଣିବା—ସା.ଯୁ.ପୂ. ୧୬ଶ ଶତାବ୍ଦୀରେ ଏକ ଜାତିରୂପେ ସେମାନଙ୍କ ଜନ୍ମ ଠାରୁ ସା.ଯୁ.ପୂ. ୫ମ ଶତାବ୍ଦୀ ପର୍ଯ୍ୟନ୍ତ । a ଗ୍ରୀକ୍‌ ଶାସ୍ତ୍ରାବଳୀ ମାଥିଉ ପୁସ୍ତକରୁ ପ୍ରକାଶିତ ବାକ୍ୟ ପର୍ଯ୍ୟନ୍ତ ଅନ୍ତର୍ଗତ, ଏହା ସା.ଯୁ. ପ୍ରଥମ ଶତାବ୍ଦୀରେ ଯୀଶୁ ଖ୍ରୀଷ୍ଟ ଓ ତାଙ୍କ ଶିଷ୍ୟଙ୍କ ଶିକ୍ଷା ଓ କାର୍ଯ୍ୟକଳାପ ବିଷୟରେ କେନ୍ଦ୍ରିତ ।

୬. ଆମେ ସମ୍ପୂର୍ଣ୍ଣ ବାଇବଲକୁ ଆଧ୍ୟୟନ କରିବା ଉଚିତ୍‌ କାହିଁକି ?

^୬ କେହି କେହି ଦାବି କରିଥାନ୍ତି ଯେ “ପୁରାତନ ନିୟମ” ହେଉଛି ଯିହୂଦୀମାନଙ୍କ ପାଇଁ ଓ “ନୂତନ ନିୟମ” ଖ୍ରୀଷ୍ଟିୟାନମାନଙ୍କ ପାଇଁ । କିନ୍ତୁ ୨ ତୀମଥି ୩:୧୬ ପଦ ଅନୁସାରେ, “ସମସ୍ତ ଶାସ୍ତ୍ର ଈଶ୍ୱରନିଶ୍ୱଶିତ ଏବଂ ଉପକାରୀ ।” (ଆମର ବକ୍ରାକାର ଅକ୍ଷର ।) ତେଣୁ ଶାସ୍ତ୍ରର ସଠିକ୍‌ ଅଧ୍ୟୟନରେ ସମ୍ପୂର୍ଣ୍ଣ ବାଇବଲ ଅନ୍ତର୍ଭୁକ୍ତ ହେବା ଉଚିତ୍‌ । ପ୍ରକୃତପକ୍ଷେ, ବାଇବଲର ଦୁଇ ଭାଗ ପରସ୍ପରର ପରିପୂରକ ଓ ସୁସମନ୍ୱିତ ହୋଇ ଗୋଟିଏ ସାମଗ୍ରିକ ବିଷୟ ଗଠନ କରନ୍ତି ।

୭. ବାଇବଲର ମୁଖ୍ୟ ବିଷୟ କʼଣ ?

 ^୭ ହୁଏତ ଆପଣ ଅନେକ ବର୍ଷଧରି ଧାର୍ମିକ ସଭାରେ ଉପସ୍ଥିତ ହୋଇଥିବେ ଓ ଉଚ୍ଚସ୍ୱରରେ ବାଇବଲ ପଠନ ହେଉଥିବା ଶୁଣିଥିବେ କିମ୍ବା ଆପଣ ନିଜେ ସେଥିରୁ କିଛି ଉଦ୍ଧୃତ ଅଂଶ ପଢ଼ିଥିବେ । ଆପଣ କʼଣ ଜାଣିଥିଲେ କି ଆଦିପୁସ୍ତକଠାରୁ ପ୍ରକାଶିତ ବାକ୍ୟ ପର୍ଯ୍ୟନ୍ତ ବାଇବଲର ବିଷୟବସ୍ତୁ ସମାନ ? ହଁ, ଗୋଟିଏ ସୁସମନ୍ୱିତ ବିଷୟ ବାଇବଲରେ ସ୍ଥାନିତ ହୋଇଛି । ସେହି ବିଷୟଟି କʼଣ ? ଏହା ହେଲା ମାନବସମାଜକୁ ଶାସନ କରିବା ପାଇଁ ପରମେଶ୍ୱରଙ୍କ ଅଧିକାରର ସତ୍ୟତା ପ୍ରତିପାଦନ ଓ ତାଙ୍କର ରାଜ୍ୟ ମାଧ୍ୟମରେ ତାଙ୍କ ପ୍ରେମମୟ ଉଦ୍ଦେଶ୍ୟର ଉପଲବ୍‌ଧି । ପରମେଶ୍ୱର ଏହି ଉଦ୍ଦେଶ୍ୟକୁ କିପରି ପୂରଣ କରିବେ, ତାହା ଆମେ ପରେ ଦେଖିବା ।

୮. ପରମେଶ୍ୱରଙ୍କ ବ୍ୟକ୍ତିତ୍ୱ ବିଷୟରେ ବାଇବଲ କʼଣ ପ୍ରକାଶ କରିଥାଏ ?

^୮ ପରମେଶ୍ୱରଙ୍କ ଉଦ୍ଦେଶ୍ୟ ବର୍ଣ୍ଣନା କରିବା ସହିତ, ବାଇବଲ ତାଙ୍କ ବ୍ୟକ୍ତିତ୍ୱ ବିଷୟରେ ମଧ୍ୟ ଦର୍ଶାଇଥାଏ । ଉଦାହରଣସ୍ୱରୂପ, ବାଇବଲରୁ ଆମେ ଶିଖିପାରିବା ଯେ ପରମେଶ୍ୱର ଅନୁଭୁତିଶୀଳ ଓ ଆମର ପସନ୍ଦଗୁଡ଼ିକ ତାଙ୍କଠାରେ ଗୁରୁତ୍ୱଲାଭ କରେ । (ଗୀତସଂହିତା ୭୮:୪୦, ୪୧; ହିତୋପଦେଶ ୨୭:୧୧; ଯିହିଜିକଲ ୩୩:୧୧) ଗୀତସଂହିତା ୧୦୩:୮-୧୪ କହିଥାଏ ଯେ, ପରମେଶ୍ୱର “ସ୍ନେହଶୀଳ ଓ କୃପାମୟ, କ୍ରୋଧରେ  ଧୀର ଓ ଅତ୍ୟନ୍ତ ଦୟାଳୁ ।” ‘ଆମେ କେବଳ ମାତ୍ର ଧୂଳିରୁ ଗଠିତ’ ଓ ମୃତ୍ୟୁପରେ ସେଇ ଧୂଳିରେ ହିଁ ମିଶିଯାଉ—ଏକଥା ମନେରଖି ପରମେଶ୍ୱର ସହାନୁଭୂତିଶୀଳ ହୋଇ ଆମକୁ ଶିକ୍ଷା ଦେଇଥାନ୍ତି । (ଆଦିପୁସ୍ତକ ୨:୭; ୩:୧୯) କି ଅଦ୍ଭୁତ ଗୁଣ ସେ ଦେଖାଇଥାଆନ୍ତି ! ଏହି ପ୍ରକାର ଈଶ୍ୱରଙ୍କୁ କʼଣ ଉପାସନା କରିବାକୁ ଆପଣ ଚାହାନ୍ତି ନାହିଁ ?

୯. ପରମେଶ୍ୱରଙ୍କ ମାନଦଣ୍ଡ ବିଷୟରେ ବାଇବଲ ଆମକୁ କିପରି ସଠିକ୍‌ ଧାରଣା ଦେଇଥାଏ ଓ ଆମେ ଏହି ଜ୍ଞାନ ଦ୍ୱାରା କିପରି ଉପକୃତ ହୋଇପାରିବା ?

^୯ ପରମେଶ୍ୱରଙ୍କ ମାନଦଣ୍ଡ ବିଷୟରେ ବାଇବଲ ଆମକୁ ସଠିକ୍‌ ଧାରଣା ଦେଇଥାଏ । ଏଗୁଡ଼ିକ ଅନେକ ସମୟରେ ବିଧିରୂପେ ବର୍ଣ୍ଣିତ ହୋଇଛି । ତଥାପି, ବହୁବାର ବ୍ୟବହାରିକ ଉଦାହରଣ ଦ୍ୱାରା ଦିଆଯାଇଥିବା ଶିକ୍ଷା, ସିଦ୍ଧାନ୍ତଗୁଡ଼ିକରେ ପ୍ରତିଫଳିତ କରାଯାଇଛି । ଆମର ଉପକାର ପାଇଁ ପ୍ରାଚୀନ ଇଶ୍ରାୟେଲୀୟଙ୍କ ଇତିହାସରେ ବର୍ଣ୍ଣିତ ଘଟଣାସବୁ ପରମେଶ୍ୱର ଲେଖାଇଛନ୍ତି । ଏହି ନିରପେକ୍ଷ ବୃତାନ୍ତଗୁଡ଼ିକ ଦେଖାଇଥାଏ ଯେ ଲୋକମାନେ ପରମେଶ୍ୱରଙ୍କ ଉଦ୍ଦେଶ୍ୟ ସହିତ ସାମଞ୍ଜସ୍ୟ ରଖି କାର୍ଯ୍ୟ କଲେ କʼଣ ହୁଏ ଓ ସେହିପରି ଯେତେବେଳେ ସେମାନେ ନିଜ ଇଚ୍ଛାରେ ଚାଲନ୍ତି, ତେବେ କି ଦୁଃଖମୟ ପରିଣାମ ହୋଇଥାଏ । (୧ ରାଜା ୫:୪; ୧୧:୪-୬; ୨ ବଂଶାବଳୀ ୧୫:୮-୧୫) ଏପରି ବାସ୍ତବ ଜୀବନବୃତାନ୍ତ ପଢ଼ିଲେ ନିଶ୍ଚୟ ଆମ ହୃଦୟକୁ ସ୍ପର୍ଶ କରିବ । ଯଦି ଆମେ ବର୍ଣ୍ଣିତ ଘଟଣାସବୁକୁ ଦୃଷ୍ଟିପାତ କରିବାକୁ ଚେଷ୍ଟା କରିବା, ତେବେ ସେଥିରେ ଅନ୍ତର୍ଭୁକ୍ତ ଲୋକମାନଙ୍କ ମଧ୍ୟରେ ନିଜକୁ ଚିହ୍ନଟ କରିପାରିବା । ଏହିପରି ଭଲ ଉଦାହରଣରୁ ଆମେ ଉପକୃତ ହୋଇ ପାରିବା ଓ ସେହି ବିପଦଗୁଡ଼ିକୁ ଏଡ଼ାଇ ପାରିବା, ଯେଉଁଥିରେ କୁକର୍ମକାରୀମାନେ ଫାନ୍ଦରେ ପଡ଼ିଥିଲେ । ହେଲେମଧ୍ୟ, ଏହି ଗୁରୁତ୍ୱପୂର୍ଣ୍ଣ ପ୍ରଶ୍ନର ଉତ୍ତର ଆବଶ୍ୟକ: ଆମେ କିପରି ନିଶ୍ଚିତ ହୋଇପାରିବା ଯେ ଯାହା ଆମେ ବାଇବଲରୁ ପଢ଼ୁଅଛୁ, ତାହା ବାସ୍ତବରେ ପରମେଶ୍ୱରଙ୍କ ଦ୍ୱାରା ଅନୁପ୍ରେରିତ ?

ଆପଣ ବାଇବଲକୁ ବିଶ୍ୱାସ କରିପାରିବେ କି  ?

୧୦. (ଖ) କିଛି ଲୋକମାନେ ବାଇବଲକୁ ଅପ୍ରଚଳିତ ବୋଲି ଅନୁଭବ କରନ୍ତି କାହିଁକି ? (ଖ) ବାଇବଲ ବିଷୟରେ ୨ ତିମଥୀ ୩:୧୬, ୧୭ ଆମକୁ କʼଣ କହିଥାଏ ?

^୧୦ ହୁଏତ ଆପଣ ଲକ୍ଷ୍ୟ କରିଥିବେ ଯେ, ଉପଦେଶ ଦେଉଥିବା ଅଧିକାଂଶ ପୁସ୍ତକ ଖୁବ୍‌ ଅଳ୍ପ ସମୟରେ ପୁରୁଣା ଓ ଅନାବଶକ ହୋଇଯାଏ । ବାଇବଲ ବିଷୟରେ କʼଣ କୁହାଯିବ ? ଏହା ଅତି ପୁରାତନ ଓ ଏହାର ଶେଷ ବାକ୍ୟଗୁଡ଼ିକ ଲିପିବଦ୍ଧ ହେବାଠାରୁ ପ୍ରାୟ ୨,୦୦୦ ବର୍ଷ ଅତିକ୍ରମ ହୋଇସାରିଛି । ସେଥିପାଇଁ ଅନେକେ ଏହାକୁ ଆଧୁନିକ ଯୁଗରେ ପ୍ରଯୋଜ୍ୟ ନୁହେଁ ବୋଲି ଭାବନ୍ତି । କିନ୍ତୁ ଯଦି ବାଇବଲ ପରମେଶ୍ୱରଙ୍କ ଦ୍ୱାରା ଅନୁପ୍ରାଣିତ, ତେବେ ଏହା ଅତି ପୁରୁଣା ହେଲେ ସୁଦ୍ଧା ଏହାର ଉପଦେଶ ଚିରନ୍ତନ ଓ ସମକାଳୀନ ହେବା ଉଚିତ୍‌ । ଶାସ୍ତ୍ର ଏବେ ମଧ୍ୟ “ଶିକ୍ଷା, ଅନୁଯୋଗ, ସଂଶୋଧନ ଓ  ଧାର୍ମିକତା ସମ୍ବନ୍ଧୀୟ ଶାସନ ନିମନ୍ତେ ଉପକାରୀ, ଯେପରି ଈଶ୍ୱରଙ୍କ ଲୋକ ସିଦ୍ଧହୋଇ ସମସ୍ତ ଉତ୍ତମ କାର୍ଯ୍ୟ ନିମନ୍ତେ ସୁସଜ୍ଜିତ ହୁଏ ।”—୨ ତିମଥୀ ୩:୧୬, ୧୭.

୧୧-୧୩. ଆମେ କାହିଁକି କହିପାରିବା ଯେ, ବାଇବଲ ବର୍ତ୍ତମାନ ସମୟ ପାଇଁ ମଧ୍ୟ ପ୍ରଯୋଜ୍ୟ ଅଟେ ?

^୧୧ ଗଭୀର ଅନୁସନ୍ଧାନ ଦର୍ଶାଇଥାଏ ଯେ, ବାଇବଲର ନୀତିସମୂହ ଆଜି ମଧ୍ୟ ସେତିକି ପ୍ରଯୋଜ୍ୟ ଯେତିକି ପ୍ରଥମେ ଏହାର ଲିପିବଦ୍ଧ ସମୟରେ ଥିଲା । ଉଦାହରଣ ସ୍ୱରୂପ, ବାଇବଲରେ ମନୁଷ୍ୟ ସ୍ୱଭାବ ବିଷୟରେ ଏପରି ସ୍ପଷ୍ଟ ଅବତାରଣା କରିଥାଏ ଯାହା ପ୍ରତ୍ୟେକ ବଂଶର ମନୁଷ୍ୟଜାତି ପାଇଁ ପ୍ରଯୋଜ୍ୟ । ମାଥିଉଙ୍କ ପୁସ୍ତକ ୫ ରୁ ୭ ଅଧ୍ୟାୟରେ ବର୍ଣ୍ଣିତ ପର୍ବତ ଉପରେ ଦେଇଥିବା ଯୀଶୁଙ୍କ ଉପଦେଶ ସହଜଭାବେ ଲକ୍ଷଣୀୟ । ଏହି ଉପଦେଶ ପ୍ରୟାତି ଭାରତୀୟ ନେତା ମୋହନ୍‌ଦାଶ କରମଚାନ୍ଦ ଗାନ୍ଧୀଙ୍କୁ ଏତେ ପ୍ରଭାବିତ କରିଥିଲା ଯେ, ସେ ଏକ ବ୍ରିଟିଶ୍‌ କର୍ମଚାରୀଙ୍କୁ କହିଥିଲେ: “ଯେତେବେଳେ ମୋର ଓ ଆପଣଙ୍କ ଦେଶବାସୀ ଖ୍ରୀଷ୍ଟଙ୍କ ଦ୍ୱାରା ଦିଆଯାଇଥିବା ଏହି ପାର୍ବତୀୟ ଉପଦେଶକୁ ମାନିବାକୁ ଲାଗିବେ, କେବଳ ଆମ ଦେଶର ନୁହେଁ, କିନ୍ତୁ ସମଗ୍ର ପୃଥିବୀର ସମସ୍ତ ସମସ୍ୟାର ସମାଧାନ ହୋଇଯିବ ।”

^୧୨ ଯୀଶୁଙ୍କ ଶିକ୍ଷାରେ ଲୋକମାନେ ପ୍ରଭାବିତ ହୁଅନ୍ତି, ଏଥିରେ କୌଣସି ଆଶ୍ଚର୍ଯ୍ୟ ନାହିଁ ! ପାର୍ବତୀୟ ଉପଦେଶରେ ସେ ଆମକୁ ସତ୍ୟ ସୁଖର ପଥ ଦେଖାଇଥିଲେ । ବିବାଦକୁ କିପରି ସମାଧାନ କରିବା, ତାହା ସେ ବୁଝାଇଥିଲେ । ପ୍ରାର୍ଥନା କିପରି କରିବା, ତାହା ସେ ନିର୍ଦ୍ଦେଶ ଦେଇଥିଲେ । ବସ୍ତୁଗତ ପଦାର୍ଥର ସଦୁପଯୋଗ କରିବା ଓ ଅନ୍ୟମାନଙ୍କ ସହିତ ଭଲ ସମ୍ବନ୍ଧ ରଖିବା ପାଇଁ ସେ ସ୍ୱର୍ଣ୍ଣମୟ ନିୟମ ଦେଇଥିଲେ । ଧାର୍ମିକ ଭଣ୍ଡମାନଙ୍କୁ କିପରି ଚିହ୍ନିବା ଓ ଏକ ସୁରକ୍ଷିତ ଭବିଷ୍ୟତ କିପରି ପାଇବା, ତାହାମଧ୍ୟ ଏହି ଉପଦେଶର ବିଷୟବସ୍ତୁରେ ଅନ୍ତର୍ଭୁକ୍ତ ଥିଲା ।

^୧୩ ପାର୍ବତୀୟ ଉପଦେଶରେ ଓ ଅବଶିଷ୍ଟ ପୃଷ୍ଠାମାନଙ୍କରେ ବାଇବଲ ସ୍ପଷ୍ଟରୂପରେ କହେ ଯେ, ନିଜ ବ୍ୟକ୍ତିଗତ ଜୀବନର ଉନ୍ନତି ସାଧନ ପାଇଁ କʼଣ କରିବା ଉଚିତ୍‌ ଓ କାହାକୁ ଏଡ଼େଇ ଯିବା ଉଚିତ୍‌ । ଏହାର ଉପଦେଶଗୁଡ଼ିକ ଏତେ ବାସ୍ତବଧର୍ମୀ ଯେ ଜଣେ ଶିକ୍ଷାବିତ୍‌ ଥରେ ଏପରି କହିବା ପାଇଁ ପ୍ରୟୋଚିତ ହୋଇଥିଲେ: “ଯଦିଓ ମୁଁ ସ୍ନାତକ ଓ ସ୍ନାତକୋତ୍ତର ଡ଼ିଗ୍ରୀଧରି ଗୋଟିଏ ଉଚ୍ଚ ବିଦ୍ୟାଳୟର ପରାମର୍ଶଦାତା ରୂପେ କାର୍ଯ୍ୟକରେ ଏବଂ ମାନସିକ ସ୍ୱାସ୍ଥ୍ୟ ଓ ମନୋବିଜ୍ଞାନ ବିଷୟରେ ଅନେକ ପୁସ୍ତକ ପଢ଼ିଛି, କିନ୍ତୁ ମୁଁ ଆବିଷ୍କାର କରିଛି ଯେ, ସଫଳ ବିବାହ, ତରୁଣ ବୟସର ଅପରାଧ ନିବାରଣ ତଥା ବନ୍ଧୁତା ସ୍ଥାପନ ଓ ରକ୍ଷା କରିବା ପ୍ରଭୁତି ବିଷୟରେ ବାଇବଲର ଉପଦେଶ ମୋର ଅଧ୍ୟୟନ କରିଥିବା ଗ୍ରନ୍ଥଠାରୁ ନିଶ୍ଚିତରୂପେ ଶ୍ରେୟସ୍କର ।” ବାସ୍ତବଧର୍ମୀ ଓ ସମୟୋପଯୋଗୀ ହେବା ସହିତ ବାଇବଲ ଭରସାଯୋଗ୍ୟ ଅଟେ ।

 ସଠିକ୍‌ ଓ ନିର୍ଭରଯୋଗ୍ୟ

୧୪. କʼଣ ଦେଖାଇଥାଏ ଯେ, ବାଇବଲ ବିଜ୍ଞାନ ଦୃଷ୍ଟିରୁ ସତ୍ୟ ଅଟେ ?

^୧୪ ଯଦିଓ ବାଇବଲ ଏକ ବିଜ୍ଞାନ ପୁସ୍ତକ ନୁହେଁ, ଏହା ବୈଜ୍ଞାନିକ ଦୃଷ୍ଟିରୁ ସଠିକ୍‌ । ଉଦାହରଣ ସ୍ୱରୂପ, ଯେତେବେଳେ ଲୋକମାନେ ବିଶ୍ୱାସ କରୁଥିଲେ ଯେ ପୃଥିବୀ ଚେପ୍ଟା, ଭବିଷ୍ୟଦ୍‌ବକ୍ତା ଯିଶାଇୟ ଏହାକୁ ‘ଗୋଲାକାର’ ବୋଲି ଉଲ୍ଲେଖ କରିଥିଲେ । (ଏବ୍ରୀ, କୁଘ୍‌ ଶବ୍ଦଟି ଏଠାରେ “ଗୋଲକ” କୁ ବୁଝାଏ) (ଯିଶାଇୟ ୪୦:୨୨) ଯିଶାଇୟଙ୍କ ସମୟଠାରୁ ସହସ୍ର ସହସ୍ର ବର୍ଷ ପରେ ମଧ୍ୟ ପୃଥିବୀର ଗୋଲାକାର ଧାରଣା ବ୍ୟାପକ ଭାବରେ ଗ୍ରହଣ କରାଯାଇ ନ ଥିଲା । ଏହା ବ୍ୟତୀତ, ଆୟୁବ ୨୬:୭—୩,୦୦୦ରୁ ଅଧିକ ବର୍ଷ ପୂର୍ବେ ରଚିତ—ଏଥିରେ କୁହାଯାଇଛି ଯେ, ପରମେଶ୍ୱର “ଅବସ୍ତୁ ଉପରେ ପୃଥିବୀକି ଝୁଲାନ୍ତି” । ଜଣେ ବାଇବଲ ବିଦ୍ୱାନ କହନ୍ତି: “ଜ୍ୟୋତିର୍ବିଦ୍ୟା ଦ୍ୱାରା ପ୍ରମାଣିତ ସତ୍ୟ ବିଷୟରେ ଆୟୁବ କିପରି ଜାଣିଲା ଯେ, ପୃଥିବୀ ଶୂନ୍ୟରେ ସ୍ୱୟଂ-ଭାରସାମ୍ୟ ବଳରେ ଝୁଲୁଅଛି, ଏହା ଏକ ଏପରି ପ୍ରଶ୍ନ ଯାହା ପବିତ୍ର ଶାସ୍ତ୍ରର ପ୍ରେରଣାକୁ ଅସ୍ୱୀକାର କରୁଥିବା ଲୋକେ ସମାଧାନ କରିପାରିବେ ନାହିଁ ।”

୧୫. ବାଇବଲର ବିବରଣ ଶୈଳୀ ଆମର ବିଶ୍ୱାସକୁ ଦୃଢ଼ କରିଥାଏ କିପରି ?

^୧୫ ବାଇବଲର ବିବରଣ ଶୈଳୀ ମଧ୍ୟ ଏହି ଅତି ପୁରାତନ ପୁସ୍ତକରେ ଆମର ଆସ୍ଥାକୁ ଦୃଢ଼ କରିଥାଏ । ପୌରାଣିକ କାହାଣୀର ବିପରୀତ ପରି ବାଇବଲରେ ଦିଆଯାଇଥିବା ଘଟଣାଗୁଡ଼ିକ ନିର୍ଦ୍ଦିଷ୍ଟ ବ୍ୟକ୍ତି ଓ ସମୟ ସହିତ ଜଡ଼ିତ । (୧ ରାଜା ୧୪:୨୫; ଯିଶାଇୟ ୩୬:୧; ଲୁକ ୩:୧, ୨) ଅପର ପକ୍ଷରେ ପ୍ରାଚୀନ ଐତିହାସିକମାନେ ସର୍ବଦା ନିଜ ଶାସକମାନଙ୍କ ବିଜୟ ବିଷୟ ଅତିରଞ୍ଜନକରି ଜଣାଇଥିଲେ ଏବଂ ପରାଜୟ ଓ ଭୁଲ୍‌କୁ ଲୁଚାଇଲାବେଳେ ବାଇବଲ ଲେଖକମାନେ ନିଜର ଜଘନ୍ୟ ପାପ ବିଷୟରେ ମଧ୍ୟ ସତ୍ୟବାଦୀ ଓ ନିରପେକ୍ଷ ଥିଲେ—ଏପରିକି ସେମାନଙ୍କ ଗମ୍ଭୀର ପାପ ବିଷୟରେ ମଧ୍ୟ ।—ଗଣନାପୁସ୍ତକ ୨୦:୭-୧୩; ୨ ଶାମୂୟେଲ ୧୨:୭-୧୪; ୨୪:୧୦.

ଭବିଷ୍ୟଦ୍‌ବାଣୀର ଏକ ପୁସ୍ତକ

୧୬. ବାଇବଲ ପରମେଶ୍ୱରଙ୍କ ଅନୁପ୍ରାଣିତ ବାକ୍ୟ, ତାହାର ଅକାଟ୍ୟ ପ୍ରମାଣ କʼଣ ?

^୧୬ ପରିପୂର୍ଣ୍ଣ ଭବିଷ୍ୟଦ୍‌ବାଣୀ ଚୂଡ଼ାନ୍ତ ପ୍ରମାଣ ଦେଇଥାଏ ଯେ, ବାଇବଲ ପରମେଶ୍ୱରଙ୍କ ଦ୍ୱାରା ଅନୁପ୍ରାଣିତ । ବାଇବଲରେ ଅନେକ ଭବିଷ୍ୟଦ୍‌ବାଣୀ ଅଛି ଯାହା ପୁଙ୍ଖାନୁପୁଙ୍ଖ ଭାବରେ ପରିପୂର୍ଣ୍ଣ ହୋଇଛି । ନିଶ୍ଚିତ ଭାବରେ, କେବଳ ମାତ୍ର ମନୁଷ୍ୟ ଏଥିପାଇଁ ଦାୟୀ ହୋଇ ନ ପାରନ୍ତି । ତେବେ ଏହି ଭବିଷ୍ୟଦ୍‌ବାଣୀଗୁଡ଼ିକ ପଛରେ କʼଣ ଅଛି ? ବାଇବଲ ସ୍ୱୟଂ କହେ ଯେ “ଭାବବାଣୀ କେବେହେଁ ମନୁଷ୍ୟର ଇଚ୍ଛାରୁ ଉତ୍ପନ୍ନ ହୋଇ ନାହିଁ, ମାତ୍ର ଈଶ୍ୱରପ୍ରେରିତ ମନୁଷ୍ୟମାନେ ପବିତ୍ର ଆତ୍ମାଙ୍କ ଦ୍ୱାରା . . . ବା ପରମେଶ୍ୱରଙ୍କ  ଅଦୃଶ୍ୟ ଶକ୍ତି ଦ୍ୱାରା . . . ଚାଳିତ ହୋଇ କଥା କହିଥିଲେ ।” (୨ ପିତର ୧:୨୧) କିଛି ଉଦାହରଣ ବିଷୟରେ ବିଚାର କରନ୍ତୁ ।

୧୭. ବାବିଲୋନର ପତନ ବିଷୟରେ କେଉଁ ଭବିଷ୍ୟଦ୍‌ବାଣୀଗୁଡ଼ିକ ପୂର୍ବରୁ କୁହାଯାଇଥିଲା ଓ ଏଗୁଡ଼ିକ କିପରି ପରିପୂର୍ଣ୍ଣ ହେଲା ?

^୧୭ ବାବିଲୋନ୍‌ ପ୍ରଦେଶର ପତନ । ମେଦ ଓ ପାରସୀୟଙ୍କ ଦ୍ୱାରା ବାବିଲୋନର ପତନ ହେବା ବିଷୟ ଉଭୟ ଯିଶାଇୟ ଓ ଯିରିମିୟ ଦ୍ୱାରା ପୂର୍ବସଂକେତ କରାଯାଇଥିଲା । ବିଶେଷ ଭାବରେ, ବାବିଲୋନର ପରାଜୟ ହେବାର ପ୍ରାୟ ୨୦୦ ବର୍ଷ ପୂର୍ବେ ଏହି ଘଟଣା ବିଷୟରେ ଯିଶାଇୟଙ୍କ ଭବିଷ୍ୟଦ୍‌ବାଣୀରେ ଲିପିବଦ୍ଧ ହୋଇଥିଲା ! ଭବିଷ୍ୟଦ୍‌ବାଣୀର ନିମ୍ନଲିଖିତ ଅଂଶଗୁଡ଼ିକ ବର୍ତ୍ତମାନ ଐତିହାସିକ ଲେଖା ଅଟେ: ୟୁଫ୍ରେଟିସ୍‌ ନଦୀର ଗତିପଥ ବଦଳାଇ ଏକ କୃତ୍ରିମ ହ୍ରଦରେ ପରିଣତ ହେବା ଓ ନିଜେ ଶୁଷ୍କ ହୋଇଜିବା (ଯିଶାଇୟ ୪୪:୨୭; ଯିରିମିୟ ୫୦:୩୮); ବାବିଲୋନୀୟ ନଦୀଗୁଡ଼ିକର ଅସାବଧାନତା ଯୋଗୁଁ ସୁରକ୍ଷାର ନ୍ୟୁନତା (ଯିଶାଇୟ ୪୫:୧); ଏବଂ କୋରସ ନାମକ ଶାସକ ଦ୍ୱାରା ଏହାର ବିଜୟ ।—ଯିଶାଇୟ ୪୪:୨୮.

୧୮. “ଗ୍ରୀସ୍‌ ରାଜାଙ୍କ” ଉତ୍ଥାନ ଓ ପତନ ବିଷୟରେ ବାଇବଲର ଭବିଷ୍ୟଦ୍‌ବାଣୀ କିପରି ପରିପୂର୍ଣ୍ଣ ହୋଇଥିଲା ?

^୧୮ “ଗ୍ରୀସ୍‌ର ରାଜାଙ୍କ” ଉତ୍ଥାନ ଓ ପତନ । ଦାନିୟେଲ ଏକ ଦର୍ଶନରେ ଗୋଟାଏ ଛାଗ ଗୋଟିଏ ମେଷକୁ ଆଘାତ କରି ତାହାର ଶିଙ୍ଗ ଦ୍ୱୟକୁ ଭାଙ୍ଗି ପକାଇବାର ଦେଖିଲେ । ଏହାପରେ ଛାଗଟିର ବୃହତ୍‌ ଶିଙ୍ଗଟି ଭାଙ୍ଗିଯାଇ ସେହି ସ୍ଥାନରେ ଚାରୋଟି ଶିଙ୍ଗ ଉତ୍ପନ୍ନ ହେଲା । (ଦାନିୟେଲ ୮:୧-୮) ଦାନିୟେଲଙ୍କୁ ଏହାର ଅର୍ଥ ପ୍ରକାଶ କରିଦିଆଗଲା: “ତୁମ୍ଭେ ଯେଉଁ ମେଷ ଦେଖିଲ, ତାହାର ଦୁଇ ଶୃଙ୍ଗ ମାଦୀୟ ଓ ପାରସିକ ରାଜା । ପୁଣି, ସେ ଲୋମଶ ଛାଗ ଯବନ [ଗ୍ରୀସ୍‌] ଦେଶର ରାଜା ଓ ତାହାର ଦୁଇ ଚକ୍ଷୁର ମଧ୍ୟସ୍ଥାନରେ ଥିବା ବୃହତ୍‌ ଶୃଙ୍ଗ ପ୍ରଥମ ରାଜା । ଆଉ, ଯେଉଁ ଶୃଙ୍ଗ ଭଗ୍ନ ହୋଇ ତହିଁର ସ୍ଥାନରେ ଯେ ଚାରି ଶୃଙ୍ଗ ଉତ୍ପନ୍ନ ହେଲା, ଏଥିରେ ସେହି ଦେଶୀୟମାନଙ୍କ ମଧ୍ୟରୁ ଚାରି ରାଜ୍ୟ ଉତ୍ପନ୍ନ ହେବାର ଜାଣିବ, ମାତ୍ର ପରାକ୍ରମରେ ତାହାର ତୁଲ୍ୟ ନୋହିବ ।” (ଦାନିୟେଲ ୮:୨୦-୨୨) ଏହି ଭବିଷ୍ୟଦ୍‌ବାଣୀର ଅନୁରୁପରେ, ପ୍ରାୟ ଦୁଇ ଶତାବ୍ଦୀ ପରେ, “ଗ୍ରୀସ୍‌ର ରାଜା” ପରାକ୍ରମଶାଳୀ ଆଲେକ୍‌ଜାଣ୍ଡାର ଦୁଇ-ଶିଙ୍ଗ ମେଦ-ପାରସୀୟ ଶାସକକୁ ପରାଜୟ କଲେ । ଆଲେକ୍‌ଜାଣ୍ଡାର୍‌ ସା.ଯୁ.ପୂ. ୩୨୩ ରେ ମୃତ୍ୟୁ ବରଣ କଲେ ଓ ଶେଷରେ ତାଙ୍କ ଚାରି ସେନାପତି ତାହାର ସ୍ଥାନ ନେଲେ । ତଥାପି ଏମାନଙ୍କ ମଧ୍ୟରୁ ଗୋଟିଏ ହେଲେ ରାଜ୍ୟ ଆଲେକ୍‌ଜାଣ୍ଡାର୍‌ଙ୍କ ସାମ୍ରାଜ୍ୟ ପରି ଶକ୍ତିଶାଳୀ ନଥିଲା ।

୧୯. କେଉଁ ଭବିଷ୍ୟଦ୍‌ବାଣୀଗୁଡ଼ିକ ଯୀଶୁ ଖ୍ରୀଷ୍ଟଙ୍କ ଉପରେ ପରିପୂର୍ଣ୍ଣ ହୋଇଥିଲା ?

^୧୯ ଯୀଶୁ ଖ୍ରୀଷ୍ଟଙ୍କ ଜୀବନ । ଏବ୍ରୀ ଶାସ୍ତ୍ରରେ ଅନେକ ଭବିଷ୍ୟଦ୍‌ବାଣୀ ଅଛି, ଯାହା  ଯୀଶୁଙ୍କ ଜନ୍ମ, ସେବାକାର୍ଯ୍ୟ, ମୃତ୍ୟୁ ଓ ପୁନରୁତ୍ଥାନରେ ପରିପୂର୍ଣ୍ଣ ହୋଇଛି । ଉଦାହରଣ ସ୍ୱରୂପ, ୭୦୦ ବର୍ଷ ପୂର୍ବେ ମୀଖା କହିଥିଲେ ଯେ ମଶୀହ ବା ଖ୍ରୀଷ୍ଟ ବେଥ୍‌ଲେହିମରେ ଜନ୍ମନେବେ । (ମୀଖା ୫:୨; ଲୁକ ୨:୪-୭) ମୀଖାଙ୍କ ସମକାଳୀନ ଯିଶାଇୟ ପୂର୍ବରୁ କହିଥିଲେ ଯେ ମଶୀହଙ୍କୁ ପ୍ରହାର କରାଯିବ ଓ ଛେପ ପକାଯିବ । (ଯିଶାଇୟ ୫୦:୬; ମାଥିଉ ୨୬:୬୭) ପାଞ୍ଚଶହ ବର୍ଷ ପୂର୍ବେ ଯିଖରିୟ ଭବିଷ୍ୟଦ୍‌ବାଣୀ କରିଥିଲେ ଯେ, ୩୦ଗୋଟି ରୌପ୍ୟ ମୁଦ୍ରା ବିନିମୟରେ ବିଶ୍ୱାସଘାତକମାନେ ମଶୀହଙ୍କୁ ଶତ୍ରୁ ହସ୍ତରେ ଅର୍ପଣ କରିବେ । (ଯିଖରିୟ ୧୧:୧୨; ମାଥିଉ ୨୬:୧୫) ଏକ ହଜାରରୁ ଅଧିକ ବର୍ଷ ପୂର୍ବେ, ଦାଉଦ, ଯୀଶୁଙ୍କ ମୃତ୍ୟୁବେଳର ପରିସ୍ଥିତି ବିଷୟରେ ବର୍ଣ୍ଣନା କରିଥିଲେ । (ଗୀତସଂହିତା ୨୨:୭, ୮, ୧୮; ମାଥିଉ ୨୭:୩୫, ୩୯-୪୩) ମଶୀହଙ୍କ ପ୍ରକଟନ କେବେ ହେବ, ଏହା ସଙ୍ଗେ ସଙ୍ଗେ ତାଙ୍କ ସେବାକାର୍ଯ୍ୟର କାଳ ଓ ମୃତ୍ୟୁର ସମୟ ବିଷୟରେ ଦାନିୟେଲଙ୍କ ଭବିଷ୍ୟଦ୍‌ବାଣୀ ପ୍ରାୟ ପାଞ୍ଚ ଶତାବ୍ଦୀ ପୂର୍ବରୁ ପ୍ରକାଶ ପାଇଥିଲା । (ଦାନିୟେଲ ୯:୨୪-୨୭) ଏହା ଯୀଶୁଖ୍ରୀଷ୍ଟଙ୍କ ବିଷୟରେ ପରିପୂର୍ଣ୍ଣ ହୋଇଥିବା ଭବିଷ୍ୟଦ୍‌ବାଣୀର ମାତ୍ର କେତୋଟି ନମୁନା । ପରେ ଆପଣ ତାଙ୍କ ବିଷୟରେ ଅଧିକ ପଢ଼ିଲେ ଫଳପ୍ରଦ ହେବ ।

୨୦. ପରିପୂର୍ଣ୍ଣ ହୋଇଥିବା ବାଇବଲ ଭବିଷ୍ୟଦ୍‌ବାଣୀର ଲେଖା ଦ୍ୱାରା ଆମକୁ କେଉଁ ବିଶ୍ୱାସ ହେବା ଉଚିତ ?

 ^୨୦ ଅନେକ ଦୀର୍ଘକାଳର ଅନ୍ୟ ବାଇବଲ ଭବିଷ୍ୟଦ୍‌ବାଣୀଗୁଡ଼ିକ ପରିପୂର୍ଣ୍ଣ ହୋଇସାରିଛି । ‘କିନ୍ତୁ,’ ଆପଣ ପଚାରି ପାରନ୍ତି, ‘ଏହା ମୋ ଜୀବନକୁ କିପରି ପ୍ରଭାବିତ କରିବ ?’ ଯଦି କେହି ବହୁବର୍ଷ ଧରି ଆପଣଙ୍କୁ ସତ୍ୟ କହୁଥାଏ, ତେବେ ଯଦି ସେ କୌଣସି ନୂଆ କଥା କହନ୍ତି, ଆପଣ କʼଣ ତାଙ୍କୁ ହଠାତ୍‌ ସନ୍ଦେହ କରିବେ ? ନା ! ପରମେଶ୍ୱର ସଂପୂର୍ଣ୍ଣରୂପେ ବାଇବଲରେ ସତ୍ୟ କହିଅଛନ୍ତି । ବାଇବଲ ଯାହା ପ୍ରତିଜ୍ଞା କରେ, ସେଥିରେ କʼଣ ଆପଣଙ୍କର ବିଶ୍ୱାସ ଦୃଢ଼ କରିବା ଉଚିତ୍‌ ନୁହେଁ, ଯେପରିକି ଆଗାମୀ ପାର୍ଥିବ ପାରଦୀଶ ବିଷୟରେ ଏହାର ଭବିଷ୍ୟଦ୍‌ବାଣୀ ? ନିଶ୍ଚୟ ଆମ ବିଶ୍ୱାସ ପ୍ରଥମ ଶତାବ୍ଦୀର ଯୀଶୁଙ୍କ ଶିଷ୍ୟ ପାଉଲଙ୍କ ପରି ହୋଇପାରେ, ଯିଏ ଲେଖିଲେ ଯେ, ‘ପରମେଶ୍ୱର ମିଥ୍ୟା କହି ପାରିବେ ନାହିଁ ।’ (ତିତସ ୧:୨) ଏହାବ୍ୟତୀତ, ଆମେ ଯେତେବେଳେ ଶାସ୍ତ୍ର ପଢ଼ି ତାହାର ଉପଦେଶ କାମରେ ଲଗାଉ, ସେତେବେଳେ ଆମେ ଏପରି ପ୍ରଜ୍ଞାଦ୍ୱାରା ସଂଚାଳିତ ହେଉଛୁଁ, ଯାହା ମନୁଷ୍ୟ ନିଜ ଅନୁଭୂତିରେ ସାଧନ କରିପାରିବ ନାହିଁ, କାରଣ ବାଇବଲ ଏପରି ପୁସ୍ତକ ଯାହା ପରମେଶ୍ୱରଙ୍କ ଜ୍ଞାନ ପ୍ରକାଶ କରିଥାଏ ଓ ଅନନ୍ତ ଜୀବନଆଡ଼କୁ ପରିଚାଳିତ କରିଥାଏ ।

ପରମେଶ୍ୱରଙ୍କ ଜ୍ଞାନ ପାଇଁ “ଲାଳସା ରଖନ୍ତୁ”

୨୧. ଯଦି ବାଇବଲରୁ ଅର୍ଜନ କରିଥିବା କିଛି ଶିକ୍ଷା ଆପଣଙ୍କୁ ଆଶ୍ଚର୍ଯ୍ୟଜନକ ମନେ ହୁଏ, ତେବେ ଆପଣ କʼଣ କରିବା ଉଚିତ ?

^୨୧ ଆପଣ ବାଇବଲର ଅଧ୍ୟୟନ କରିଲେ ସମ୍ଭବତଃ ଆପଣ ଏପରି ଶିକ୍ଷା ପାଇବେ, ଯାହା ଆପଣଙ୍କୁ ପୂର୍ବରୁ ଦିଆଯାଇଥିବା ଶିକ୍ଷା ଠାରୁ ଭିନ୍ନ । ଆପଣ ହୁଏତ ଏହା ମଧ୍ୟ ପାଇବେ ଯେ, ଆପଣଙ୍କ କିଛି ପ୍ରିୟ ଧାର୍ମିକ ପ୍ରଥା ପରମେଶ୍ୱରଙ୍କୁ ପ୍ରସନ୍ନ କରେ ନାହିଁ । ପରମେଶ୍ୱରଙ୍କ ମାନଦଣ୍ଡର ଠିକ୍‌ ଓ ଭୁଲ ବିଷୟରେ ଆପଣ ଶିଖିବେ, ଯାହା ଏହି ସଂସାରରେ ସାର୍ବଜନିକ ଭାବେ ପ୍ରଚଳିତ ମାନଠାରୁ ଉଚ୍ଚତର । ପ୍ରଥମେ-ପ୍ରଥମେ ଏହା ଆଶ୍ଚର୍ଯ୍ୟ ଜନକ ପରି ମନେ ହୋଇ ପାରେ । କିନ୍ତୁ ଧୈର୍ଯ୍ୟ ଧରନ୍ତୁ ! ପରମେଶ୍ୱରଙ୍କ ଜ୍ଞାନ ପାଇବା ପାଇଁ ଯତ୍ନପୂର୍ବକ ଶାସ୍ତ୍ରର ନିରୀକ୍ଷଣ କରନ୍ତୁ । ଉକ୍ତ ସମ୍ଭାବନାକୁ ସ୍ୱୀକାର କରିବା ପାଇଁ ପ୍ରସ୍ତୁତ ହୁଅନ୍ତୁ ଯେ, ବାଇବଲର ପରାମର୍ଶ ଆପଣଙ୍କ ଚିନ୍ତାଧାରା ଓ କାଯ୍ୟରେ ସମନ୍ୱୟ ପାଇଁ ଦାବି କରିପାରେ ।

୨୨. ଆପଣ କାହିଁକି ବାଇବଲ ଅଧ୍ୟୟନ କରୁଛନ୍ତି ଓ ଅନ୍ୟମାନଙ୍କୁ ଏହି ବିଷୟରେ ବୁଝିବାପାଇଁ ଆପଣ କିପରି ସାହାଯ୍ୟ କରିପାରିବେ ?

^୨୨ ସଦାଶୟ ମିତ୍ର ଓ ବନ୍ଧୁମାନେ ଆପଣଙ୍କ ବାଇବଲ ଅଧ୍ୟୟନକୁ ବିରୋଧ କରି ପାରନ୍ତି, କିନ୍ତୁ ଯୀଶୁ କହିଥିଲେ: “ଯେ କେହି ଲୋକଙ୍କ ସାକ୍ଷାତରେ ମୋତେ ସ୍ୱୀକାର  କରିବ, ମୁଁ ମଧ୍ୟ ମୋହର ସ୍ୱର୍ଗସ୍ଥ ପିତାଙ୍କ ସାକ୍ଷାତରେ ତାହାକୁ ସ୍ୱୀକାର କରିବି । ମାତ୍ର ଯେ କେହି ଲୋକଙ୍କ ସାକ୍ଷାତରେ ମୋତେ ଅସ୍ୱୀକାର କରିବ, ମୁଁ ମଧ୍ୟ ମୋହର ସ୍ୱର୍ଗସ୍ଥ ପିତାଙ୍କ ସାକ୍ଷାତରେ ତାହାକୁ ଅସ୍ୱୀକାର କରିବି ।” (ମାଥିଉ ୧୦:୩୨, ୩୩) କେତେଜଣ ଆଶଙ୍କା କରିପାରନ୍ତି ଯେ, ଆପଣ ଗୋଟିଏ ଧର୍ମମତ ସହିତ ଜଡ଼ିତ ହେବେ ବା ଧର୍ମାନ୍ଧ ହୋଇଯିବେ । କିନ୍ତୁ ବାସ୍ତବରେ ଆପଣ କେବଳ ପରମେଶ୍ୱର ଓ ତାଙ୍କ ସତ୍ୟ ଜ୍ଞାନ ଆହରଣ କରିବା ପାଇଁ ଚେଷ୍ଟା କରୁଛନ୍ତି । (୧ ତିମଥୀ ୨:୩, ୪) ଆପଣ ଯାହା ଶିକ୍ଷା ନେଉଛନ୍ତି, ସେ ବିଷୟରେ ଅନ୍ୟମାନଙ୍କୁ କହିବା ସମୟରେ ଯୁକ୍ତିପୂର୍ଣ୍ଣ ନୁହେଁ ବରଂ ଯୁକ୍ତିସଙ୍ଗତ ହୁଅନ୍ତୁ ଓ ଏହି ବିଷୟରେ ସେମାନଙ୍କୁ ବୁଝିବାପାଇଁ ସାହାଯ୍ୟ କରନ୍ତୁ । (ଫିଲିପ୍‌ପୀୟ ୪:୫) ମନେରଖନ୍ତୁ, ଅନେକ ଲୋକଙ୍କୁ “ବିନା ବାକ୍ୟରେ ଜୟ କରିହୁଏ,” ଯେତେବେଳେ ସେମାନେ ପ୍ରମାଣ ଦେଖନ୍ତି ଯେ ବାସ୍ତବରେ ବାଇବଲର ଜ୍ଞାନ ଲୋକଙ୍କ ପାଇଁ ଲାଭପ୍ରଦ ।—୧ ପିତର ୩:୧, ୨, NW.

୨୩. ପରମେଶ୍ୱରଙ୍କ ଜ୍ଞାନ ପାଇଁ ଆପଣ କିପରି “ଲାଳସା ରଖିବେ” ?

^୨୩ ବାଇବଲ ଆମକୁ ଉଦ୍‌ବୋଧିତ କରିଥାଏ: “ନବଜାତ ଶିଶୁ ତୁଲ୍ୟ ପାରମାର୍ଥିକ ଅମିଶ୍ରିତ ଦୁଗ୍ଧ ପାନ କରିବାକୁ ଇଚ୍ଛା [“ଲାଳସା,” NW] କର ।” (୧ ପିତର ୨:୨) ଏକ ଶିଶୁ ନିଜର ପୋଷଣ ପାଇଁ ନିଜ ମାଁ ଉପରେ ନିର୍ଭର କରିଥାଏ ଓ ତାହା ପୂରଣ କରିବା ନିମନ୍ତେ ଅବିରତ ବାଧ୍ୟ କରିଥାଏ । ଠିକ୍‌ ସେହିପରି, ଆମେ ପରମେଶ୍ୱରଙ୍କଠାରୁ ପ୍ରାପ୍ତ ଜ୍ଞାନ ଉପରେ ନିର୍ଭର କରିଥାଉଁ । ଆପଣଙ୍କ ଅଧ୍ୟୟନକୁ କ୍ରମାଗତ ରଖି ତାଙ୍କ ଜ୍ଞାନ ପାଇଁ “ଲାଳସା କରନ୍ତୁ ।” ବାସ୍ତବରେ, ଦୈନନ୍ଦିନ ବାଇବଲ ପଢ଼ିବା ଆପଣଙ୍କ ଲକ୍ଷ୍ୟ ରଖନ୍ତୁ । (ଗୀତସଂହିତା ୧:୧-୩, NW) ଏହା ଆପଣଙ୍କ ପାଇଁ ପ୍ରଚୁର ଆଶୀର୍ବାଦ ଆଣିବ, ଯେପରି ଗୀତସଂହିତା ୧୯:୧୧ ପରମେଶ୍ୱରଙ୍କ ନିୟମ ବିଷୟରେ କହିଥାଏ: “ତହିଁର ପ୍ରତିପାଳନରେ ମହାଫଳ ଥାଏ ।”

[ପାଦ ଟିପ୍ପଣୀଗୁଡ଼ିକ]

ଆପଣଙ୍କ ଜ୍ଞାନ ପରୀକ୍ଷା କରନ୍ତୁ

କେଉଁ କାରଣରୁ ବାଇବଲ ଅନ୍ୟ ପୁସ୍ତକଠାରୁ ଭିନ୍ନ ଓ ଅନନ୍ୟ ଅଟେ ?

ଆପଣ ବାଇବଲରେ କାହିଁକି ନିର୍ଭର କରିପାରିବେ ?

ଆପଣଙ୍କୁ କʼଣ ପ୍ରମାଣିତ କରିଥାଏ ଯେ, ବାଇବଲ ପରମେଶ୍ୱରଙ୍କ ଅନୁପ୍ରାଣିତ ବାକ୍ୟ ଅଟେ ?

[ଅଧ୍ୟୟନ ପ୍ରଶ୍ନ]

[୧୪ ପୃଷ୍ଠାରେ ବାକ୍ସ]

ନିଜ ବାଇବଲ ସହିତ ସୁପରିଚିତ ହୁଅନ୍ତୁ

ବାଇବଲ ସହିତ ସୁପରିଚିତ ହେବା ଆଦୌ କଷ୍ଟସାଧ୍ୟ ନୁହେଁ । ବାଇବଲ ପୁସ୍ତକର କ୍ରମ ଓ ସ୍ଥାନ ଜାଣିବା ପାଇଁ ଆପଣ ଏହାର ସୂଚୀପତ୍ର ବ୍ୟବହାର କରନ୍ତୁ ।

ସହଜ ଉପଯୋଗପାଇଁ ବାଇବଲ ପୁସ୍ତକଗୁଡ଼ିକରେ ଅନେକ ଅଧ୍ୟାୟ ଓ ପଦ ଅଛି । ଅଧ୍ୟାୟ ଗୁଡ଼ିକର ବିଭାଜନ ୧୩ ଦଶ ଶତାବ୍ଦୀରେ ହୋଇଥିଲା ଓ ଆପାତତଃ ୧୬ ଦଶ ଶତାବ୍ଦୀରେ ଏକ ଫ୍ରେଞ୍ଚ୍‌ ମୁଦ୍ରଣ ଗ୍ରୀକ୍‌ ଶାସ୍ତ୍ରକୁ ବର୍ତ୍ତମାନ ପ୍ରଚଳିତ ପଦରେ ବିଭାଜନ କଲା । ୧୫୫୩ ରେ ପ୍ରକାଶିତ ଏକ ଫ୍ରେଞ୍ଚ୍‌ ସଂସ୍କରଣର ପ୍ରଥମ ବାଇବଲ ଥିଲା ଯେଉଁଥିରେ ଉଭୟ ଅଧ୍ୟାୟ ଓ ପଦସଂଖ୍ୟା ଥିଲା ।

ଯେତେବେଳେ ଏହି ପୁସ୍ତକରେ ଶାସ୍ତ୍ରବଚନ ଉଦ୍ଧୃତ ହୁଏ, ସେତେବେଳେ ପ୍ରଥମ ସଂଖ୍ୟା ଅଧ୍ୟାୟକୁ ନିର୍ଦ୍ଦେଶ କରେ ଓ ପରବର୍ତ୍ତୀ ସଂଖ୍ୟାଟି ପଦକୁ ସୂଚିତ କରେ । ଉଦାହରଣ ସ୍ୱରୂପ, ଉଦ୍ଧୃତ “ହିତୋପଦେଶ ୨:୫”ର ଅର୍ଥ ହେଉଛି ହିତୋପଦେଶ ପୁସ୍ତକର ଅଧ୍ୟାୟ ୨ ଓ ପଦ ୫ । ଉଦ୍ଧୃତ ଶାସ୍ତ୍ରବଚନଗୁଡ଼ିକୁ ଦେଖି ଆପଣ ସହଜରେ ଅତି ଶୀଘ୍ର ବାଇବଲ ପାଠ ପାଇପାରିବେ ।

ବାଇବଲ ସହିତ ସୁପରିଚିତ ହେବାର ସର୍ବୋତ୍ତମ ପ୍ରଣାଳୀ ହେଲା ଏହାକୁ ଦୈନନ୍ଦିନ ଅଧ୍ୟୟନ କରିବା । ପ୍ରଥମେ ପ୍ରଥମେ ଏହା ହୁଏତ କଷ୍ଟକର ହୋଇପାରେ । କିନ୍ତୁ ଯଦି ଆପଣ ଅଧ୍ୟାୟର ଦୀର୍ଘତା ଅନୁଯାୟୀ ଦିନକୁ ତିନିରୁ ପାଞ୍ଚ ଅଧ୍ୟାୟ ପଢ଼ନ୍ତି, ତେବେ ଆପଣ ସଂପୂର୍ଣ୍ଣ ବାଇବଲକୁ ଗୋଟିଏ ବର୍ଷ ମଧ୍ୟରେ ପଢ଼ି ଶେଷ କରିପାରିବେ । ଏହା ଆଜିଠାରୁ କାହିଁକି ଆରମ୍ଭ କରିବେନି ?

[୧୯ ପୃଷ୍ଠାରେ ବାକ୍ସ]

ବାଇବଲ—ଏକ ଅନନ୍ୟ ପୁସ୍ତକ

• ବାଇବଲ “ପରମେଶ୍ୱରଙ୍କ ଦ୍ୱାରା ଅନୁପ୍ରାଣିତ ।” (୨ ତିମଥୀ ୩:୧୬) ଯଦିଓ ଏହାର ଶବ୍ଦ ମନୁଷ୍ୟ ରଚିତ, ପରମେଶ୍ୱର ସେମାନଙ୍କ ଚିନ୍ତାକୁ ନିର୍ଦ୍ଦେଶ କରିଥିଲେ, ତେଣୁ ବାଇବଲ ପ୍ରକୃତରେ “ପରମେଶ୍ୱରଙ୍କ ବାକ୍ୟ” ଅଟେ ।—୧ ଥେସଲନୀକୀୟ ୨:୧୩.

• ବାଇବଲ ୧୬ ଶତାବ୍ଦୀରୁ ଅଧିକ ବର୍ଷ ଧରି ବିଭିନ୍ନ ପୃଷ୍ଠଭୁମିର ପ୍ରାୟ ୪୦ ଜଣ ରଚୟିତାଙ୍କ ଦ୍ୱାରା ଲିଖିତ । ଏହାସତ୍ୱେ, ବାଇବଲ ଆରମ୍ଭରୁ ଶେଷ ପର୍ଯ୍ୟନ୍ତ ସୁସଙ୍ଗତ ।

• ବାଇବଲ ଅନ୍ୟ ଯେକୌଣସି ପୁସ୍ତକ ଅପେକ୍ଷା ଅଧିକ ବିବାଦର ସମ୍ମୁଖୀନ ହେବା ସତ୍ୱେ ସୁରକ୍ଷିତ ହୋଇ ରହିଛି । ମଧ୍ୟଯୁଗରେ, ଖଣ୍ଡିଏ ମାତ୍ର ଶାସ୍ତ୍ର ରଖିବା ଯୋଗୁଁ ଲୋକଙ୍କୁ ସ୍ତମ୍ଭରେ ଜାଳି ଦିଆଯାଇଥିଲା ।

• ବାଇବଲ ହେଉଛି ପୃଥିବୀର ସର୍ବାଧିକ ମାତ୍ରାରେ ବିକ୍ରୟ ହେଉଥିବା ପୁସ୍ତକ । ଏହା ସଂପୂର୍ଣ୍ଣ ବା ଆଂଶିକଭାବେ ପ୍ରାୟ ୨,୦୦୦ ଭାଷାରେ ଅନୂଦିତ ହୋଇ ସାରିଛି । ଏହା ସହସ୍ର ସହସ୍ର କୋଟି ସଂଖ୍ୟାରେ ଛପା ହୋଇଛି ଓ ପୃଥିବୀରେ କ୍ୱଚିତ୍‌ ଏପରି କୌଣସି ସ୍ଥାନ ଥାଇପାରେ ଯେଉଁଠି ଏହାର ଖଣ୍ଡିଏ ସଂଖ୍ୟା ମିଳିବ ନାହିଁ ।

• ବାଇବଲର ଅତି ପୁରାତନ ଭାଗ ସା.ଯୁ.ପୂ. ୧୬ଶ ଶତାବ୍ଦୀର ଅଟେ । ଏହା ହିନ୍ଦୁମାନଙ୍କର ଋକ୍‌-ବେଦ (ପ୍ରାୟ ସା.ଯୁ.ପୂ. ୧୩୦୦) କିମ୍ବା ବୌଦ୍ଧ ମାନଙ୍କ “ତ୍ରିପିଟକ” (ସା.ଯୁ.ପୂ. ପଞ୍ଚମ ଶତାବ୍ଦୀ) ବା ଇସ୍‌ଲାମ୍‌ ମାନଙ୍କ କୋରାନ୍‌ (ସା.ଯୁ. ସପ୍ତମ ଶତାବ୍ଦୀ), ସଙ୍ଗେ ସଙ୍ଗେ ସିଣ୍ଟୋ ନିହୋଙ୍ଗି (ସା.ଯୁ. ୭୨୦) ଠାରୁ ବି ପୂର୍ବରୁ ରଚିତ ।

 [୨୦ ପୃଷ୍ଠାରେ ପୂରା-ପୃଷ୍ଠା ଚିତ୍ର]